ភ្នំពេញៈ ក្រសួងសុខាភិបាលបានឲ្យដឹងថាក្នុងចំណោមអ្នកដំណើរជនជាតិខ្មែរ ២០៤ នាក់ ដែលទើបធ្វើដំណើរពីប្រទេសម៉ាឡេស៊ីមកដល់កម្ពុជាកាលពីថ្ងៃទី ១៦ ខែមិថុនា គឺមានម្នាក់ត្រូវបានធ្វើតេស្ដវិជ្ជមាន ជំងឺកូវីដ ១៩ ខណៈ ២០៣ នាក់ទៀតអវិជ្ជមាន ហើយត្រូវបានបញ្ជូនចេញពីទីក្រុងភ្នំពេញទៅធ្វើចត្តាឡីស័កនៅតាមបណ្ដាខេត្ត។
ក្រសួងបញ្ជាក់ថា បុរសជនជាតិខ្មែរអាយុ ២១ ឆ្នាំ មានស្រុកកំណើតនៅឃុំស្រែអំបិល ស្រុកស្រែអំបិល ខេត្តកោះកុងដែលត្រូវធ្វើតេស្ដវិជ្ជមានជំងឺកូវីដ ១៩ នៅថ្ងៃទី ១៧ ខែមិថុនា គឺជាអ្នកជំងឺលើកទី ១២៩ ដែលត្រូវបានរាយការណ៍ក្នុងប្រទេសកម្ពុជា។ បុរសដែលទើបធ្វើដំណើរមកពីម៉ាឡេស៊ីរូបនេះគឺត្រូវបានបញ្ជូនទៅព្យាបាលនៅមន្ទីរពេទ្យមិត្តភាពខ្មែរ-សូវៀត។
ស្ថានទូតខ្មែរប្រចាំនៅម៉ាឡេស៊ីបញ្ជាក់ថា ក្នុងចំណោមពលរដ្ឋដែលធ្វើដំណើរពីម៉ាឡេស៊ីទាំង ២០៤ នាក់ គឺក្នុងនោះមាន ១១៥ នាក់ ជាអ្នកដែលបានជាប់គាំងមិនអាចចាកចេញពីម៉ាឡេស៊ីតាំងពីថ្ងៃទី ៧ ខែមេសា។
លោកស្រី ឱ វណ្ណឌីន អ្នកនាំពាក្យក្រសួងសុខាភិបាលបញ្ជាក់ថា អ្នកដំណើរផ្សេងទៀតដែលលទ្ធផលធ្វើតេស្ដអវិជ្ជមានទាំង ២០៣ នាក់គឺត្រូវបញ្ជូនចេញពីមណ្ឌលធ្វើចត្តាឡីស័កបណ្ដោះអាសន្ននៅវិទ្យាល័យ ហ៊ុន សែន ជម្ពូវ័ន នៅភ្នំពេញទៅកាន់មណ្ឌលចត្តាឡីស័កនៅតាមបណ្ដាខេត្តដែលស្ថិតនៅក្បែរលំនៅឋានរបស់ពួកគាត់។
លោកស្រីថា អ្នកដំណើរទាំងនេះនឹងមិនអនុញ្ញាតឱ្យទៅធ្វើចត្តាឡីស័កនៅតាមផ្ទះទេ។ លោកស្រីបន្តថា៖ «អ្នកដំណើរជាង ២០០ នាក់ ត្រូវបានចាត់ចែងបន្តទៅទៀត ព្រោះឥឡូវពួកគាត់ត្រូវដាក់ធ្វើចត្តាឡីស័កបណ្ដោះអាសន្ន (នៅភ្នំពេញ) ដើម្បីរង់ចាំប្រកាសលទ្ធផល (ធ្វើតេស្ដកូវីដ ១៩ នៅវិទ្យាស្ថានប៉ាស្ទ័រ) ហើយលទ្ធផលចេញហើយ។ អ៊ីចឹង! អ្នកអវិជ្ជមានហ្នឹងត្រូវបែងចែកទៅមណ្ឌលចត្តាឡីស័កនៅតាមខេត្តដែលពួកគាត់រស់នៅ អ៊ីចឹងមានការជូនពួកគាត់ទៅមណ្ឌលចត្តាឡីស័ករៀងៗខ្លួនទៅតាមអាសយដ្ឋានរបស់ពួកគាត់»។
ក្រសួងសុខាភិបាលបញ្ជាក់ថា ក្នុងចំណោមអ្នកឆ្លងជំងឺកូវីដ ១៩ ទាំង ១២៩ នាក់ គឺក្នុងនោះមានអ្នកជាសះស្បើយចំនួន ១២៦ នាក់ ខណៈ ៣ នាក់ ដែលកំពុងសម្រាកព្យាបាលជំងឺនៅមន្ទីរពេទ្យ គឺមាន ២ នាក់ ទើបវិលត្រឡប់ពីប្រទេសឥណ្ឌូនេស៊ី។
រដ្ឋាភិបាលកម្ពុជាកំពុងខិតខំទប់ស្កាត់ការចម្លងពីបុគ្គលម្នាក់ទៅម្នាក់ទៀត នៅក្នុងស្រុក ដើម្បីចៀសផុតពីការចម្លងនៅតាមសហគមន៍ តាមរយៈការផ្ដោតសំខាន់លើការរឹតបន្តឹងវិធានការចំពោះអ្នកដំណើរមកពីក្រៅប្រទេស ដោយតម្រូវឱ្យអ្នកដំណើរទាំងអស់ដែលមកដល់ព្រលានយន្តហោះភ្លាមគឺត្រូវបញ្ជូនទៅដាក់នៅកន្លែងរង់ចាំ ដើម្បីយកសំណាកទៅធ្វើតេស្ដរកជំងឺកូវីដ ១៩ មុនសម្រេចឱ្យទៅធ្វើចត្តាឡីស័កនៅតាមផ្ទះ ឬនៅតាមមណ្ឌលចត្តាឡីស័ក ខណៈករណីឆ្លងភាគច្រើនដែលបានរកឃើញកន្លងមកគឺជាករណីនាំចូលពីក្រៅប្រទេស។
កាលពីថ្ងៃទី ១៧ ខែមិថុនា ក្រសួងសុខាភិបាលបានប្រកាសលុបចោល ការតម្រូវឱ្យមានប្រាក់ធានារ៉ាប់រងសុខភាព និងប្រាក់តម្កល់ ៣ ពាន់ដុល្លារ សម្រាប់ធ្វើតេស្ដ ព្យាបាល និងការធ្វើចត្តាឡីស័ក ចំពោះពលរដ្ឋខ្មែរកាន់លិខិតឆ្លងដែនបរទេស ដែលមានទិដ្ឋាការពិសេស (Visa K) ប៉ុន្តែត្រូវមានវិញ្ញាបនបត្របញ្ជាក់សុខភាពគ្មានជំងឺកូវីដ និងមានសុពលភាពរយៈពេល ៧២ ម៉ោងចាប់ពីពេលចេញដំណើរ។
លោកស្រី ឱ វណ្ណឌីន បញ្ជាក់ថា កម្ពុជាបានតម្រូវឱ្យជនបរទេស បង់ថ្លៃសេវាផ្សេងៗនៅក្នុងអំឡុងពេលកូវីដ ១៩ នេះ គឺមានតម្លៃថោកបំផុត បើប្រៀបធៀបនឹងបណ្ដាប្រទេសមួយចំនួនទៀត ប៉ុន្តែលោកស្រីមិនបានបញ្ចេញឈ្មោះប្រទេសទាំងនោះទេ។
ថ្វីដ្បិតនៅក្នុងប្រទេសកម្ពុជាគ្មានករណីស្លាប់ដោយសារជំងឺកូវីដ ១៩ ប៉ុន្តែពលរដ្ឋខ្មែរដែលជាកងកម្លាំងរក្សាសន្ដិភាពរបស់អង្គការសហប្រជាជាតិនៅប្រទេសម៉ាលី ម្នាក់បានស្លាប់ដោយសារជំងឺនេះ។ ក្រសួងការពារជាតិឲ្យដឹងថា កម្ពុជាមានកងកម្លាំងរក្សាសន្ដិភាព ១០ នាក់នៅប្រទេសម៉ាលី និងយោធាសិក្ខាកាម ៦ នាក់ នៅប្រទេសរុស្ស៊ី បានឆ្លងជំងឺកូវីដ ១៩ ប៉ុន្តែបានជាសះស្បើយពីជំងឺនេះអស់ហើយ៕