.jpg)
ប្រជាពលរដ្ឋប្រមាណ ៣០ នាក់មកពីសហគមន៍មានជម្លោះដីធ្លីរ៉ាំរ៉ៃមួយចំនួនបានព្យាយាមដាក់ញត្តិទៅខុទ្ទកាល័យលោកនាយករដ្ឋមន្ត្រី ហ៊ុន សែន កាលពីម្សិលមិញ ប៉ុន្តែពួកគាត់មិនត្រឹមតែមិនបានដាក់ញត្តិប៉ុណ្ណោះទេ ថែមទាំងត្រូវបានសមត្ថកិច្ចចាប់ឃាត់ខ្លួនតំណាង ៣ នាក់យកទៅសាកសួរថែមទៀត។ ផា លីណា
ភ្នំពេញ: ស្ត្រីជាសកម្មជនអ្នកតវ៉ាដីធ្លីចំនួន ៣ នាក់ត្រូវបានសមត្ថកិច្ចខណ្ឌដូនពេញដោះលែងវិញកាលពីម្សិលមិញ បន្ទាប់ពីពួកគេត្រូវឃាត់ខ្លួនយកទៅសួរនាំរយៈពេលជាង ១ ម៉ោងក្នុងអំឡុងពេលតវ៉ាយកញត្តិទៅដាក់នៅខុទ្ទកាល័យលោកនាយករដ្ឋមន្ត្រី ហ៊ុន សែន។
ពលរដ្ឋទាំង ៣ នាក់ដែលសមត្ថកិច្ចឃាត់ខ្លួននោះមានអ្នកស្រី ស៊ា ណារ៉េត តំណាងពលរដ្ឋអតីតបឹងកក់, អ្នកស្រី ច្រាយ នីម តំណាងពលរដ្ឋសហគមន៍ព្រលានយន្តហោះ SOS និងអ្នកស្រី ព្រាប រដ្ឋា តំណាងពលរដ្ឋមកពីខេត្តកោះកុងត្រូវបានសមត្ថកិច្ចខណ្ឌដូនពេញដោះលែងវិញនៅម៉ោង ១២ ថ្ងៃត្រង់ ក្រោយពីសួរនាំរយៈពេលជាង ១ ម៉ោង។
ប្រជាពលរដ្ឋជាង ៣០ នាក់មកពីសហគមន៍មានជម្លោះដីធ្លីខេត្តកោះកុងអតីតបឹងកក់ បុរីកីឡា និងសហគមន៍ផ្សេងទៀតបានប្រមូលផ្ដុំគ្នានៅមុខផ្ទះលោក ហ៊ុន សែន ដើម្បីដាក់ញត្តិស្វែងរកដំណោះស្រាយជុំវិញវិវាទដីធ្លីរបស់ពួកគេ ប៉ុន្ដែត្រូវសមត្ថកិច្ចរារាំង។ ក្រុមស្ត្រីសកម្មជនដីធ្លីទាំងនោះក៏បានយកញត្តិទៅដាក់នៅការិយាល័យអង្គការសហប្រជាជាតិប្រចាំនៅកម្ពុជាផងដែរ។
អ្នកស្រី ច្រាយ នីម តំណាងពលរដ្ឋសហគមន៍ព្រលានយន្តហោះ SOS ដែលចេញមកជួយគាំទ្រសហគមន៍មានជម្លោះដីធ្លីខេត្តកោះកុងបានប្រាប់ថា ខណៈក្រុមពលរដ្ឋទៅប្រមូលផ្តុំគ្នាឈរលើកបដានៅសួនច្បារមុខភូមិគ្រឹះលោក ហ៊ុន សែន ក្បែរវិមានឯករាជ្យក៏ត្រូវបានសមត្ថកិច្ច និងសន្តិសុខខណ្ឌដូនពេញរុញច្រាន ហើយបានឃាត់ខ្លួនអ្នកស្រី និងស្ត្រី ២ នាក់ផ្សេងទៀតលើកដាក់លើឡាន និងបញ្ជូនទៅសាលាខណ្ឌដូនពេញ។
អ្នកស្រីបន្តថាក្រុមអ្នកភូមិបានសម្រេចចិត្តទៅប្រមូលផ្ដុំនៅមុខផ្ទះលោក ហ៊ុន សែន ក្រោយពីស្ថាប័នរដ្ឋនានាមិនបានដោះស្រាយបញ្ចប់វិវាទដីធ្លីរបស់ពួកគេ។ ម្យ៉ាងទៀតថ្មីៗនេះលោក ហ៊ុន សែន បានបង្កើតក្រុមការងារចម្រុះមួយ សម្រាប់ទទួលពាក្យបណ្តឹងតវ៉ាផ្សេងៗនៅមុខភូមិគ្រឹះរបស់លោក ដើម្បីដោះស្រាយបញ្ហានានាជូនពលរដ្ឋ។
ក្រុមនគរបាលរារាំងពលរដ្ឋមកតវ៉ាសុំឲ្យដោះស្រាយបញ្ហាដីធ្លីកាលពីម្សិលមិញ។ផា លីណា
អ្នកស្រីបន្ថែមថា៖ «ការបង្កើតគណៈកម្មការនេះមិនមែនសម្រាប់ជួយដោះស្រាយប្រជាពលរដ្ឋគ្រប់ទីកន្លែងដែលពួកគាត់រងភាពអយុត្តិធម៌ដូចដែលសម្តេចគាត់ថាទេ។ ផ្ទុយទៅវិញគណៈកម្មការនេះបានបង្ក្រាបទៅលើអ្នកតវ៉ារាល់អ្នកមានបញ្ហាដីធ្លីគ្រប់ទីកន្លែងដែលមកភូមិគ្រឹះសម្តេចទៅវិញ»។
អ្នកស្រី សាំង ពុយ តំណាងពលរដ្ឋមកពីខេត្តកោះកុងបានថ្លែងថា៖ «ខ្ញុំអត់យល់ថា សម្ដេចលោកបង្កើតគណៈកម្មការដោះស្រាយទំនាស់នៅមុខផ្ទះគាត់ហ្នឹងយ៉ាងម៉េចទេ បើមន្ត្រីគ្មានអ្នកចេញមកទទួល ហើយថែមទាំងចាប់ពលរដ្ឋទៀត។ ក្រោយពីពួកខ្ញុំទៅផ្ទះសម្ដេចគ្មានលទ្ធផលនេះ ខ្ញុំក៏បន្តដំណើរទៅការិយាល័យ UN ប្រចាំនៅកម្ពុជាវិញ»។
អ្នកស្រី សាំង ពុយ បន្ថែមថាភាគី UN បានទទួលញត្តិរបស់ពលរដ្ឋដោយក្ដីរីករាយ និងបានសន្យាថានឹងយកញត្តិនេះទៅពិនិត្យ និងប្រជុំជំរុញឲ្យមានការដោះស្រាយជូនពលរដ្ឋ។
លោក ហ៊ីង ប៊ុនហៀង អគ្គមេបញ្ជាការរងនៃកងយោធពលខេមេរភូមិន្ទ និងជាមេបញ្ជាការបញ្ជាការដ្ឋានអង្គរក្ស និងជាប្រធានក្រុមដឹកនាំមន្ត្រីចម្រុះដោះស្រាយបណ្ដឹងនៅភូមិគ្រឹះលោកនាយករដ្ឋមន្ត្រីកាលពីម្សិលមិញមិនអាចទាក់ទងសុំការបញ្ជាក់ជុំវិញករណីនេះបានទេ។
លោក ម៉ៅ ភិរុណ អភិបាលខេត្តកណ្ដាល និងជាអនុប្រធានក្រុមដឹកនាំមន្ត្រីចម្រុះដោះស្រាយបណ្ដឹងបានថ្លែងថា លោកមិនទាន់បានទទួលព័ត៌មានទេ។
លោក ស៊ឹង សែនករុណា មន្ត្រីសម្របសម្រួលផ្នែកសិទ្ធិមនុស្សនៃសមាគមការពារសិទ្ធិមនុស្សអាដហុកកាលពីម្សិលមិញបានថ្លែងថា៖ «ខ្ញុំមិនដឹងថា តើពលរដ្ឋអាចទៅដាក់ពាក្យបណ្តឹងបានដោយរបៀបម៉េច បើសិនជាមានវិធានការដូចព្រឹកមិញ (ម្សិលមិញ) នេះ? អ៊ីចឹង ហើយគួរតែឲ្យពួកគាត់បានទៅដល់ជួបជាមួយគណៈកម្មការ ហើយដាក់ពាក្យបណ្តឹងតាមគោលបំណងរបស់ពួកគាត់ នោះទើបជារឿងមួយត្រឹមត្រូវតាមគោលបំណងនៃការបង្កើតគណៈកម្មការនោះ»៕
