.jpg)
កប៉ាល់ដែលវៀតណាមហាមមិនឲ្យចូលប្រទេសរបស់គេ ត្រូវបានអនុញ្ញាតអោយចូលចតនៅកំពង់ផែភ្នំពេញ។ ហេង ជីវ័ន
ភ្នំពេញៈ ភ្ញៀវទេសចរចំនួន ៣៤ នាក់ តាមកប៉ាល់ដែលវៀតណាមហាមមិនឲ្យចូលប្រទេសរបស់គេ ហើយបានត្រឡប់មកកម្ពុជាវិញនោះបានចាកចេញពីកម្ពុជាហើយកាលពីម្សិលមិញ ខណៈដែលអ្នកនៅសេសសល់នឹងត្រូវចាកចេញនៅថ្ងៃនេះ។
លោក ផាន សុបិន្ត តំណាងក្រុមហ៊ុនទេសចរណ៍ដែលនាំភ្ញៀវក្នុងដំណើរកម្សាន្តតាមកប៉ាល់ទេសចរណ៍ចំនួន ៥ បានថ្លែងពីម្សិលមិញថា ភ្ញៀវទេសចរ ៣៤ នាក់ ជាជនជាតិដាណឺម៉ាកបានចាកចេញពីកម្ពុជាហើយកាលពីថ្ងៃម្សិលមិញតាមជើងយន្តហោះថៃអ៊ែរវេ ខណៈដែលនៅសេសសល់ចំនួន ៤១ នាក់ទៀត នឹងហោះចេញនៅថ្ងៃព្រហស្បតិ៍នេះទៅប្រទេសបារាំង អាមេរិក ស្វ៊ីស និងកាណាដា។
លោកបញ្ជាក់ថា សុខភាពភ្ញៀវ និងបុគ្គលិកនាវាទាំងអស់គឺល្អធម្មតា។ ពួកគេត្រូវបានបុគ្គលិកសុខាភិបាលធ្វើតេស្តចំនួន ៣ ដងគឺ ២ ដងធ្វើនៅព្រំដែនកម្ពុជា-វៀតណាមកាលពីថ្ងៃអង្គារ ហើយចុងក្រោយធ្វើនៅថ្ងៃពុធ ហើយសុខភាពរបស់ពួកគេមានអាការធម្មតា។
យោងតាមរដ្ឋបាលខេត្តកណ្ដាលបញ្ជាក់ថា នាវាទេសចរណ៍ចំនួន ៥ គ្រឿងត្រូវបានអនុញ្ញាតឲ្យចូលមកកម្ពុជាវិញតាមច្រក ក្អមសំណរក្នុងឃុំក្អមសំណរ ស្រុកលើកដែក ខេត្តកណ្ដាល បន្ទាប់ពីវៀតណាមបដិសេធមិនឲ្យចូលចតនៅប្រទេសរបស់គេ។ នាវាទាំង ៥ គ្រឿងនេះមានផ្ទុកមនុស្សសរុប ២០០ នាក់ ក្នុងនោះភ្ញៀវទេសចរមានចំនួន ៧៧ នាក់ និងនាវិកចំនួន ១២៣ នាក់។
រដ្ឋបាលខេត្តបញ្ជាក់ថា ទាំងភ្ញៀវទាំងនាវិកត្រូវបានត្រួតពិនិត្យសុខភាពដោយពេទ្យជំនាញចត្តាឡីស័កដោយបញ្ជាក់ថា ពួកគេមានសុខភាពល្អធម្មតា និងមិនមានសញ្ញាមេរោគកូរ៉ូណានោះទេ។ បន្ទាប់ពីពិនិត្យសុខភាពរួចហើយ កប៉ាល់ទាំង ៥ ត្រូវបានអនុញ្ញាតឲ្យចូលទៅកាន់កំពង់ផែស្វយ័តភ្នំពេញ។
ខណៈដែលប្រទេសមួយចំនួនបានប្រកាសបិទព្រំដែនរបស់ខ្លួនមិនឲ្យមានការចូលទៅកាន់ប្រទេសរបស់ពួកគេ ដើម្បីទប់ស្កាត់ការឆ្លងជំងឺកូវីដ ១៩ មន្ត្រីកម្ពុជាពិចារណាពន្យារទិដ្ឋាការសម្រាប់ភ្ញៀវទេសចរណាដែលមានបញ្ហាត្រឡប់ទៅប្រទេសរបស់ខ្លួន។ នេះបើតាមអ្នកនាំពាក្យអគ្គនាយកដ្ឋានអន្តោប្រវេសន៍ និងអ្នកនាំពាក្យរដ្ឋលេខាធិការដ្ឋានអាកាសចរស៊ីវិល។
លោក កែវ វណ្ណថន អ្នកនាំពាក្យអគ្គនាយកដ្ឋានអន្តោប្រវេសន៍បានថ្លែងកាលពីម្សិលមិញថា៖ «យើងកំពុងពិចារណារឿងហ្នឹងថា បើសិនជាគាត់ហួស យើងនឹងបន្តឲ្យគាត់ បើសិនជាគាត់ស្របច្បាប់»។
ទោះយ៉ាងណាលោកថា មកទល់ពេលនេះមិនទាន់មានតួលេខអំពីចំនួនភ្ញៀវទេសចរដែលមានបញ្ហានេះទេ។ លោកថា មន្ត្រីអន្តោប្រវេសន៍កំពុងធ្វើកិច្ចការនេះ។ លោកបញ្ជក់ថា បើសិនជាភ្ញៀវណាមានបញ្ហាបែបនេះសូមទៅរកមន្ត្រីអនុវត្តច្បាប់ដើម្បីពន្យារ ហើយមន្ត្រីអនុវត្តច្បាប់នឹងធ្វើតាមច្បាប់។
ស្រដៀងគ្នានេះលោក ស៊ិន ចាន់សិរីវុត្ថា អ្នកនាំពាក្យលេខាធិការដ្ឋានអាកាសចរស៊ីវិលបានថ្លែងថា កម្ពុជាបានហាមឃាត់ការធ្វើដំណើររបស់ជនបរទេសមកពីប្រទេសចំនួន ៦ តាមសំណើរបស់ក្រសួងសុខាភិបាលដែលរួមមានប្រទេសបារាំង អ៊ីតាលី អាល្លឺម៉ង់ អេស្ប៉ាញ អង់គ្លេស សហរដ្ឋអាមេរិក និង អ៊ីរ៉ង់ ប៉ុន្តែមិនហាមពលរដ្ឋពីប្រទេសទាំងនេះក្នុងការត្រឡប់ទៅប្រទេសរបស់គេវិញទេ។
លោកថ្លែងថា៖ «ប្រទេសរបស់គាត់ ឬកន្លែងដែលគាត់ស្នាក់នៅគេហាមឃាត់មិនឲ្យចូល អាហ្នឹងជាបញ្ហារបស់គាត់ យើងជួយអីគាត់អត់បានទេ មានតែសម្រួលឲ្យគាត់បន្តវីសាបាននៅតទៅទៀត តែប៉ុណ្ណឹង។ ឧបមាថា វីសាគាត់អស់សុពលភាពត្រឹមកន្លះខែ យើងបន្តឲ្យគាត់តាមគាត់ស្នើសុំនៅ ១ ខែ តែប៉ុណ្ណឹង»។
លោក ចាន់សិរីវុត្ថា បន្តថា ក្រុមហ៊ុនហោះហើរក៏គួរតែយោគយល់ដល់ភ្ញៀវទេសចរផងដែរក្នុងដំណាក់កាលនេះតាមរយៈការយល់ព្រមប្ដូរសំបុត្រយន្តហោះឲ្យពួកគេ បើសិនជាមានការស្នើសុំ៕
