.jpg)
អតីតតំណាងរាស្ត្រនៃអតីតគណបក្សសង្គ្រោះជាតិទៅសួរសុខទុកអ្នកទោសនៅព្រៃស។ ផា លីណា
ភ្នំពេញៈ អតីតក្រុមមន្ត្រីជាន់ខ្ពស់នៃអតីតគណបក្សសង្គ្រោះជាតិ និងក្រុមអ្នកជាប់ឃុំដែលចាត់ទុកខ្លួនឯងថាជាអ្នកទោសមនសិការលើសំណុំរឿងនយោបាយកាលពីម្សិលមិញបានអំពាវនាវដោយទទូចពីពន្ធនាគារព្រៃស ដើម្បីសុំក្ដីមេត្តាពីលោកនាយករដ្ឋមន្ត្រី ហ៊ុន សែន ឲ្យអន្តរាគមន៍ដើម្បីលើកលែងទោស និងបន្ធូរបន្ថយដល់ពួកគេនាឱកាសបុណ្យចូលឆ្នាំថ្មីប្រពៃណីជាតិ ដែលជារៀងរាល់ឆ្នាំព្រះមហាក្សត្រតែងប្រោសព្រះរាជទានលើកលែងទោស និងបន្ធូរបន្ថយទោសដល់ទណ្ឌិត។
អតីតមន្ត្រីជាន់ខ្ពស់ និងសកម្មជនអតីតគណបក្សសង្គ្រោះជាតិចំនួន ១៥ នាក់រួមទាំងលោក អ៊ុំ សំអាន លោក មាជ សុវណ្ណារ៉ា កំពុងអនុវត្តទោសក្នុងពន្ធនាគារព្រៃសចន្លោះពី ៧ ទៅ ២០ ឆ្នាំលើបទចោទដែលខ្លះចាត់ទុកថាមានជាប់ពាក់ព័ន្ធនឹងរឿងនយោបាយ។
លោកនាយករដ្ឋមន្ត្រី ហ៊ុន សែន ដែលជាប្រធានគណបក្សប្រជាជនកម្ពុជាធ្លាប់ព្រមានមិនលើកលែងទោសឲ្យពួកគេនោះទេ។
ទោះយ៉ាងណាក៏ដោយក៏មន្ត្រី និងសកម្មជនបក្សប្រឆាំងទាំងនោះបានរំពឹងពីឱកាសនៃពិធីបុណ្យចូលឆ្នាំខ្មែរនាពាក់កណ្ដាលខែមេសានេះ សម្រាប់ទទួលបានការពិចារណា និងក្តីមេត្តាពីប្រមុខរាជរដ្ឋាភិបាលដែលជារឿយៗធ្លាប់បានអន្តរាគមន៍ដោះលែងមន្ត្រីបក្សប្រឆាំងជាច្រើននាក់រួចមកហើយ។
ថ្លែងនៅចំពោះមុខអ្នកកាសែតបន្ទាប់ពីចេញពីសួរសុខទុក្ខមន្ត្រី និងសកម្មជនរបស់ពួកគេនៅក្នុងពន្ធនាគារព្រៃសកាលពីព្រឹកម្សិលមិញ អតីតតំណាងរាស្ត្រចំនួន ៣ រូបគឺលោក អ៊ូ ច័ន្ទរ័ត្ន លោក ម៉ៅ មុន្នីវណ្ណ និងលោក កង គឹមហាក់ បានពាំនាំនូវខ្លឹមសាររបស់អ្នកជាប់ឃុំទាំងនោះចេញមកក្រៅ។
លោក ម៉ៅ មុន្នីវណ្ណ ក្នុងចំណោមអ្នកទាំង ៣ រូបថ្លែងថាអតីតសកម្មជន និងមន្ត្រីទាំងអស់បានទទូចសុំក្ដីមេត្តាពីប្រមុខរាជរដ្ឋាភិបាលលោក ហ៊ុន សែន។
លោកថ្លែងថា៖ «អ្នកទោសមនសិការទាំងអស់នេះ ពួកគាត់ចង់ផ្ដាំផ្ញើសំឡេងតាមរយៈពួកខ្ញុំ ជូនប្រមុខរាជរដ្ឋាភិបាលថា គួរតែពិចារណាដល់ពួកគាត់។ ឥឡូវមានអ្នកខ្លះជាប់ទោសរហូតដល់ ២ ភាគ ៣ ហើយ ហើយមានសាលក្រមជាស្ថាពរទៀត ដូច្នេះសមល្មមនឹងការលើកលែងទោសដើម្បីឲ្យគាត់បានទៅជួបជុំគ្រួសារ ញាតិមិត្តរបស់ពួកគាត់ក្នុងឱកាសចូលឆ្នាំថ្មីប្រពៃណីជាតិ»។ «សូមអំពាវនាវឲ្យមានការប្រោសប្រណីពីប្រមុខរាជរដ្ឋាភិបាលក្ដី ពីព្រះមហាក្សត្រក្ដីសូមឲ្យលើកលែងទោសឲ្យគាត់ ព្រោះភាគច្រើនពួកគេជាយុវជន»។
ទោះជាយ៉ាងណាលោកក៏សម្ដែងការខកចិត្តចំពោះការមិនអនុញ្ញាតឲ្យពួកលោកបានជួបសួរសុខទុក្ខលោក មាជ សុវណ្ណារ៉ា ដោយអគ្គនាយកដ្ឋានពន្ធនាគារបានដាក់បម្រាម ដោយសារលោក មាជ សុវណ្ណរ៉ា បានធ្វើខុសនឹងវិន័យពន្ធនាគារក្នុងការលួចនិយាយទូរស័ព្ទ។
ឆ្លើយបតនឹងសំណួរអំពីការអះអាងរបស់លោកនាយករដ្ឋមន្ត្រី ហ៊ុន សែន ដែលប្រកាសកាលពីសប្ដាហ៍មុនក្នុងការបិទផ្លូវចរចា និងមិនលើកលែងទោសឲ្យពួកគេ លោក ម៉ៅ មុន្នីវណ្ណ ថ្លែងថាជាទូទៅសូម្បីតែការប្រឈមគ្នាដោយអាវុធ នៅទីបំផុតនៅតែដោះស្រាយគ្នាដោយការជជែកដែរ អត់មានអីដែលមិនអាចជជែកគ្នាបានទេ។
លោក សុខ ឥសាន អ្នកនាំពាក្យគណបក្សប្រជាជនកម្ពុជាបានថ្លែងដោយចាត់ទុកការអំពាវនាវរបស់មន្ត្រីបក្សប្រឆាំងថាជាអន្ទាក់ទៅវិញដោយសារក្រោយការលើកលែងទោសលោក ហុង សុខហួរ អតីតសមាជិកព្រឹទ្ធសភាគណបក្ស សម រង្ស៊ី ត្រូវបានថ្នាក់ដឹកនាំគណបក្សប្រឆាំងចាត់ទុកថាជាសម្ពាធនយោបាយ។
លោកថ្លែងថា៖ «គាត់សុំអង្វរតែពេលគាត់ទាល់ច្រក អាហ្នឹងមិនមែនជាការអង្វរដោយស្មោះត្រង់ ឬទទួលកំហុសទេ វាជាអន្ទាក់ដើម្បីអូសទាញធ្វើម៉េច មិនប្រយ័ត្នទេប្រមុខរាជរដ្ឋាភិបាលគាត់ធ្លាក់ចូលទៅក្នុងការដែលយកវប្បធម៌និទណ្ឌភាព ឬថារឿងនេះនយោបាយដែលបក្សប្រឆាំង ឬក្រុមប្រឆាំងកំពុងតែប្រើប្រាស់វោហារស័ព្ទថាជារឿងនយោបាយហើយ។ តាមពិតគេកាត់ទោសទៅតាមស្ថានទម្ងន់ទោស និងតាមនីតិវិធីតុលាការត្រឹមត្រូវមិនមែនរឿងនយោបាយទេ»។
លោក ហង្ស វិទូ ប្រធានក្រុមអ្នកវិភាគថ្លែងថាលោកនាយករដ្ឋមន្ត្រីនឹងមិនអន្តរាគមន៍លើកលែងទោសដល់អ្នកទោសនយោបាយទាំងនោះទេក្នុងស្ថានភាពនយោបាយបច្ចុប្បន្ន ប៉ុន្តែលោកជឿថាពួកគេអាចនឹងត្រូវដោះលែងក្រោយការបោះឆ្នោតជាតិ។ លោកថ្លែងថា៖ «ពួកគេអាចត្រូវបានលើកលែងទោស ឬដោះលែង លុះត្រាតែមានដំណោះស្រាយនយោបាយ»៕
