កំពង់ឆ្នាំងៈ អ្នកទោស ៦០០ នាក់ក្នុងចំណោមអ្នកទោស ៨៨៤ នាក់ នៅពន្ធនាគារខេត្តកំពង់ឆ្នាំងកាលពីថ្ងៃចន្ទម្សិលម្ង៉ៃត្រូវបានអនុញ្ញាតឲ្យរៀបចំពិធីសូត្រមន្ត និងរាប់បាត្រដល់ព្រះសង្ឃ ១៩ អង្គ ដើម្បីឧទ្ទិសកុសល្យផលបុណ្យជូនដល់វិញ្ញាណក្ខន្ធបុព្វការីជនរបស់ពួកគេក្នុងរដូវបុណ្យកាន់បិណ្ឌប្រពៃណីជាតិខ្មែរ។
លោក ពៅ វុទ្ធី ប្រធានពន្ធនាគារខេត្តកំពង់ឆ្នាំងបានប្រាប់ភ្នំពេញប៉ុស្តិ៍កាលពីថ្ងៃចន្ទថា ជារៀងរាល់ឆ្នាំក្នុងរដូវបុណ្យជាតិជាប្រពៃណីខ្មែរ អ្នកទោសទាំងអស់ ត្រូវបានអនុញ្ញាតឲ្យមានការរៀបចំពិធីសូត្រមន្ត និងរាប់បាត្រដល់ព្រះសង្ឃនៅក្នុងពន្ធនាគារដើម្បីឧទ្ទិសកុសល្យផលបុណ្យជូនដល់វិញ្ញាណក្ខន្ធបុព្វការីជនរបស់ពួកគេដូចប្រជាពលរដ្ឋនៅទូទាំងប្រទេសដែរ។
លោក វុទ្ធី បានបញ្ជាក់ថា៖ «អ្នកជាប់ឃុំទាំងអស់ត្រូវបានផ្ដល់សិទ្ធិឲ្យចូលរួមនៅក្នុងពិធីសាសនាទៅតាមជំនឿរបស់ពួកគេដូចពលរដ្ឋដទៃទៀតដែរពិសេសក្នុងរដូវបុណ្យជាតិសំខាន់ៗដែលរួមមាន បុណ្យចូលឆ្នាំថ្មី និងបុណ្យភ្ជុំបិណ្ឌ»។
បើតាមលោក វុទ្ធី ពន្ធនាគារគឺជាមជ្ឈមណ្ឌលអប់រំ និងកែប្រែមនុស្សដែលជាប់ទោសឲ្យភ្ញាក់រឭកធ្វើអំពើល្អ ដូចនេះការផ្តល់ឱកាសឲ្យអ្នកទោសបានចូលរួមក្នុងពិធីសាសនាគឺជារឿងដ៏ប្រពៃមួយដើម្បីឲ្យពួកគេបានស្តាប់ និងពិចារណាទៅលើសកម្មភាពនៃការប្រព្រឹត្តរបស់ពួកគេនាពេលកន្លងមកតាមរយៈការស្ដាប់ព្រះធម៌ និងព្រះគម្ពីរដែលបានសម្ដែងឡើងតាមរយៈព្រះសង្ឃ និងគ្រូគង្វាលនៃសាសនា។
លោក វុទ្ធី បានបន្តថានៅក្នុងពន្ធនាគារខេត្តកំពង់ឆ្នាំងមានអ្នកទោសសរុប ៨៨៤ នាក់ ប៉ុន្តែអ្នកទោស ២៨៤ នាក់ ជាអ្នកប្រកាន់តាមសាសនាគ្រិស្ត និងមូស្លីម។ កាលពីព្រឹកថ្ងៃចន្ទគឺជាថ្ងៃបុណ្យកាន់បិណ្ឌវេនទី ១០ នៃពិធីបុណ្យភ្ជុំបិណ្ឌជាប្រពៃណីខ្មែរដែលជាអ្នកប្រកាន់តាមលទ្ធិព្រះពុទ្ធសាសនា ហេតុដូច្នេះហើយទើបពួកគេទាំងនោះត្រូវអវត្តមានក្នុងពិធីសូត្រមន្ត និងរាប់បាត្រដល់ព្រះសង្ឃ។
លោក វុទ្ធី បានបញ្ជាក់ទៀតថា៖ «អ្នកទោសប្រមាណ ៣០ ភាគរយ ក្នុងចំណោមអ្នកទោស ៦០០ នាក់ ដែលត្រូវបានអនុញ្ញាតឲ្យរៀបចំពិធីសូត្រមន្តនិងរាប់បាត្រនៅក្នុងពន្ធនាគារនាព្រឹកថ្ងៃចន្ទ [ម្សិលម៉ៃ្ង] បានអនុវត្តទោសបានប្រមាណ ៣ ភាគ ៤ នៃទោសសរុបរបស់ពួកគេ»៕