.jpg)
រថយន្តប្រមូលសំរាមនៅក្បែរសួនវត្តបទុមវតី។ ហុង មិនា
ភ្នំពេញៈ រដ្ឋបាលរាជធានីភ្នំពេញបានប្រកាសសាជាថ្មីទៀតដល់អតិថិជនទាំងអស់ដែលមិនទាន់មាន ID បង់សេវាសំរាមតាមប្រព័ន្ធអេឡិចត្រូនិកត្រូវទៅចុះឈ្មោះនៅរដ្ឋាករស្វយ័តគ្រប់គ្រងសំរាម និងសំណល់រឹង រាជធានីភ្នំពេញដែលមានទីតាំងនៅក្នុងសាលារាជធានីភ្នំពេញ ដើម្បីទទួលបាន ID សម្រាប់បង់សេវាថ្លៃសំរាមតាមប្រព័ន្ធអេឡិចត្រូនិកជំនួសដោយការធ្លាប់បង់តាមវិក្កយបត្រ។
លោក នួន សំណាវុធ អភិបាលរដ្ឋាករស្វយ័តគ្រប់គ្រងសំរាម សំណល់រឹងរាជធានីភ្នំពេញបានថ្លែងឲ្យដឹងតាមប្រព័ន្ធតេឡេក្រាមកាលពីម្សិលមិញថា៖ «ពាក់ព័ន្ធនឹងអតិថិជនដែលគាត់ប្រើប្រាស់ថ្លៃសេវាសំរាម គឺប្រើប្រាស់ លេខ ID នៅលើវិក្កយបត្រភ្លើង។
គាត់អាចយកលេខ ID ទាំងនោះទៅកន្លែងបង់ណាដែលមានការសហការដូចជា អេស៊ីលីដា ភ្នាក់ងារវេរលុយទ្រូម៉ានី និងវីងជាដើម ហើយបើគាត់មានបញ្ហាទាក់ទងនឹងការបង់ថ្លៃសេវាសំរាមអីទៀតនោះ សុំអញ្ជើញគាត់ទៅសាលារាជធានីជាន់ទី ៦ រៀងរាល់ម៉ោងធ្វើការ»។
យោងតាមសេចក្តីណែនាំស្តីពីការផ្លាស់ប្តូរប្រព័ន្ធគ្រប់គ្រង និងនីតិវិធីនៃការបង់ថ្លៃសេវាប្រមូលសំរាម និងសំណល់រឹងរបស់សាលារាជធានីភ្នំពេញកាលពីថ្ងៃទី ១៦ ធ្នូ ឆ្នាំ ២០១៩ បានឲ្យដឹងថា ដើម្បីទំនើបកម្មសេវាសាធារណៈ និងសម្រួលដល់ការបង់ថ្លៃប្រើប្រាស់សេវាឱ្យបានគ្រប់ទីកន្លែង រដ្ឋបាលរាជធានីភ្នំពេញសម្រេចផ្អាកការចេញ និងចែកវិក្កយបត្រប្រមូលថ្លៃសេវាសំរាម និងសំណល់រឹងជាក្រដាស ដូចដែលធ្លាប់ភ្ជាប់ជាមួយវិក្កយបត្រអគ្គិសនីដោយដាក់ឱ្យប្រើប្រាស់នូវប្រព័ន្ធបង់ទូទាត់តាមមធ្យោបាយអេឡិចត្រូនិកជំនួសវិញ។
សេចក្ដីណែនាំដដែលនេះបានឲ្យដឹងថា៖ «អតិថិជនក៏អាចជ្រើសរើសបង់ថ្លៃសេវាសម្រាប់ច្រើនខែទុកជាមុនបានផងដែរ ដោយប្រព័ន្ធទូទាត់នឹងធ្វើការកាត់កង និងបង្ហាញសមតុល្យទឹកប្រាក់នៅសល់ជាស្វ័យប្រវត្តិជារៀងរាល់ខែ ខណៈដែលក្នុងករណីខកខានមិនបានបង់ទូទាត់តាមការកំណត់នោះនឹងត្រូវបានចាត់ទុកជាបំណុល ដែលជាកម្មវត្ថុនៃការផាកពិន័យទៅតាមច្បាប់ និងលិខិតបទដ្ឋានគតិយុត្តជាធរមានព្រមទាំងចាត់វិធានការផ្សេងៗទៀតតាមការចាំបាច់»។
ទោះយ៉ាងណាក៏ដោយលោក ឃួង ស្រេង អភិបាលរាជធានីភ្នំពេញនៅថ្ងៃទី ១៧ ខែមីនា ឆ្នាំ ២០២០ បានឲ្យដឹងសាជាថ្មីថា ចាប់ពីខែមីនានេះតទៅ ប្រជាពលរដ្ឋ និងក្រុមហ៊ុនឯកជនដែលធ្លាប់បង់សេវាសំរាមតាមវិក្កយបត្រ ហើយមិនទាន់មាន ID បង់សេវាសំរាមតាមប្រព័ន្ធអេឡិចត្រូនិកត្រូវទៅទំនាក់ទំនងជាមួយរដ្ឋាករស្វយ័តគ្រប់គ្រងសំរាម និងសំណល់រឹង រាជធានីភ្នំពេញនៅរៀងរាល់ម៉ោងធ្វើការ ដើម្បីបញ្ចូលទិន្នន័យ និងលេខសម្គាល់ ID របស់អតិថិជនសម្រាប់បង់ថ្លៃសេវាប្រមូលសំរាម និងសំណល់រឹងក្នុងដំណាក់កាលអន្តរកាលនេះ។ ក្រោយពីទទួលបានលេខសម្គាល់ ID រួចហើយ អតិថិជនត្រូវរួសរាន់ទូទាត់ថ្លៃសេវាសំរាមជូនរដ្ឋាករស្វយ័តគ្រប់គ្រងសំរាម និងសំណល់រឹង រាជធានីភ្នំពេញជាកំហិត។
សេចក្តីជូនដំណឹងនោះបានឲ្យដឹងថា៖ «ប្រជាពលរដ្ឋក្រុមហ៊ុនឯកជនរួសរាន់ធ្វើទំនាក់ទំនងមករដ្ឋាករស្វយ័តគ្រប់គ្រងសំរាម និងសំណល់រឹង រាជធានីភ្នំពេញ និងមកបង់ថ្លៃប្រមូលសំរាម សម្រាប់ខែមករា និងខែកុម្ភៈ ឆ្នាំ ២០២០ និងខែបន្តបន្ទាប់ទៀតឲ្យទាន់ពេលវេលាចៀសវាងរងការទទួលវិធានការនានារបស់រដ្ឋបាលរាជធានីភ្នំពេញ»។
ក្នុងឆ្នាំ ២០១៩ រាជរដ្ឋាភិបាលបានបង្វែរការបង់ថ្លៃសេវាសំរាមពីក្រុមហ៊ុនស៊ីនទ្រីមកឲ្យសាលារាជធានីភ្នំពេញជាអ្នកគ្រប់គ្រង។ ខណៈស្ថិតិអតិថិជនដែលបានចូលរួមបង់សេវាមិនត្រូវបានប្រាប់ឲ្យដឹងនោះទេ។
លោក ហួត ហៃ នាយករដ្ឋបាលសាលារាជធានីភ្នំពេញកាលពីម្សិលមិញ មិនអាចបញ្ចាក់ពីស្ថិតិអតិថិជនបានទេដោយបានបង្វែរសំណួរទៅសួរអ្នកនាំពាក្យសាលារាជធានីភ្នំពេញ។
លោក ហួត ហៃ ថ្លែងថា៖ «ខ្ញុំមិនអាចជម្រាបជូនបានទេ (ព្រោះ) សាលារាជធានីភ្នំពេញយើងមានអ្នកនាំពាក្យ ដូច្នេះបើខ្ញុំនិយាយទៅ វាខុសតួនាទីរបស់ខ្ញុំ»។
លោក ម៉េត មាសភក្តី អ្នកនាំពាក្យសាលារាជធានីភ្នំពេញកាលពីម្សិលមិញមិនអាចទាក់ទងតាមទូរស័ព្ទបានទេ។
លោក សន ជ័យ ប្រធានអង្គការសម្ព័ន្ធគណនេយ្យភាពសង្គមកម្ពុជាកាលពីម្សិលមិញមិនអាចទាក់ទងបានទេ៕
