The Phnom Penh Post Search

Search form




Logo of Phnom Penh Post newspaper Phnom Penh Post - អ្នក​ធ្វើការ​ខាង​ព្រំដែន​​រង​ការ​គំរាម​សម្លាប់​ និង​ជេរ​ប្រមាថ

អ្នក​ធ្វើការ​ខាង​ព្រំដែន​​រង​ការ​គំរាម​សម្លាប់​ និង​ជេរ​ប្រមាថ

ព្រឹទ្ធ​សមាជិក លោក ហុង សុខហួរ ត្រូវ​​បាន​សមត្ថកិច្ច​នាំ​ខ្លួន​ឡើង​សាលា​ដំបូង​រាជធានី​កាលពី​ថ្ងៃ​ទី ១៥ ខែ​សីហា​។
ព្រឹទ្ធ​សមាជិក លោក ហុង សុខហួរ ត្រូវ​​បាន​សមត្ថកិច្ច​នាំ​ខ្លួន​ឡើង​សាលា​ដំបូង​រាជធានី​កាលពី​ថ្ងៃ​ទី ១៥ ខែ​សីហា​។ ហេង ជីវ័ន

អ្នក​ធ្វើការ​ខាង​ព្រំដែន​​រង​ការ​គំរាម​សម្លាប់​ និង​ជេរ​ប្រមាថ

ភ្នំពេញៈ អ្នក​ធ្វើការ​ខាង​ព្រំដែន​ពីរ​រូប​ត្រូវ​បាន​ជន​មិន​ស្គាល់​មុខ​ជេរប្រមាថ និង​គំរាម​សម្លាប់​តាម​បណ្តាញ​សង្គម​ជុំវិញ​​ការ​ធ្វើ​កិច្ចការ​ព្រំដែន​ កម្ពុជា-វៀតណាម ដែល​មាន​ភាព​ចម្រូងចម្រាស​ស្រប​ពេល​ដែល​សមាជិក​ព្រឹទ្ធសភា​របស់​គណបក្ស សម រង្ស៊ី ដែល​​ត្រូវ​បាន​ចោទប្រកាន់​ពាក់ព័ន្ធ​នឹង​ការ​ក្លែង​ឯកសារ​សន្ធិ​សញ្ញា​ព្រំដែន​កម្ពុជា វៀតណាម​នឹង​ត្រូវ​​នាំ​ខ្លួន​ចូល​បំភ្លឺ​នៅ​សាលា​ឧទ្ធរណ៍​លើ​បណ្តឹង​ទាស់​នៅ​សប្តាហ៍​ក្រោយ​នេះ។

ក្រោយពី​បាន​ចូល​ប្រឡូក​ក្នុង​កិច្ចការ​ស្រាវជ្រាវ​​បញ្ហា​ព្រំដែន​ដែល​ត្រូវ​បាន​ចាត់​តាំង​ដោយ​រាជបណ្ឌិត្យ​សភា​កម្ពុជា ​លោក សុខ ទូច សាកលវិទ្យា​ធិការ​នៃ​សាកលវិទ្យាល័យ​ខេមរៈ និង​ជា​ប្រធាន​ក្រុម​អ្នក​ស្រាវជ្រាវ​ព្រំដែន​កម្ពុជា​បាន​អះអាង​ថា ​លោក​បាន​ទទួល​​រង​ការ​គាំទ្រ​ជាច្រើន​ពី​មហាជន​ក្នុង​ដំណើរការ​ស្រាវជ្រាវ​នេះ​ដើម្បី​ស្វែងរក​លទ្ធផល​បង្ហាញ​ដល់​សាធារណជន​ប៉ុន្តែ​​​ទន្ទឹម​នឹង​នេះ​លោក​ក៏​បាន​​ទទួល​រង​ការ​រិះគន់ និង​ការ​ជេរប្រមាថ​ផង​ដែរ​ពី​សំណាក់​សាធារណជន​មួយ​ចំនួន​ជាពិសេស​អ្នក​ប្រើប្រាស់​ហ្វេសប៊ុក​។

លោក​ថា៖ «តាំងពី​ខ្ញុំ​ធ្វើការ​ហ្នឹង​មក​មាន​គេ​ជេរ​ជា​ហូរហែ​តែ​ខ្ញុំ​មិន​ចាប់​អារម្មណ៍​នោះ​ទេ​ព្រោះ​ខ្ញុំ​ធ្វើការ​នេះ​ប្រកប​ដោយ​វិជ្ជាជីវៈ​ដើម្បី​សិក្សា និង​ស្វែងរក​នូវ​លទ្ធផល​ដាក់​បង្ហាញ​តែ​ប៉ុណ្ណោះ​»។

យ៉ាង​នេះ​ក្តី​ លោក សុខ ទូច ថ្មីៗ​នេះ​ក៏​បាន​បង្ហោះ​ជា​សាធារណៈ​នូវ​សារ​ព្រមាន​គំរាម​សម្លាប់​មួយ​ដែល​លោក​ទទួល​បាន​ពី​អ្នក​លេង​ហ្វេសប៊ុក​ដែល​លោក​ចាត់​ទុក​ថា​នេះ​ជា​ការ​ប្រមាថ​ធ្ងន់ធ្ងរ​មួយ​ចំពោះ​ជីវិត​របស់​លោក។

លោក​ថា៖ «លោក​ម្នាក់​ឈ្មោះ​ ឌី បាន​ជេរ​ខ្ញុំ​អាឆ្កែ​យួន​លោក​ម្នាក់​ទៀត​គាត់​ផ្ញើ​សារ​មក​ជេរ​ខ្ញុំ​ហើយ​មាន​ក្រុម​មួយ​ទៀត​គាត់​ដាក់​គ្រាប់​កាំភ្លើង ១០ គ្រាប់​ហើយ​សរសេរ​ថា​ទុក​បាញ់​ក្បាល​ខ្ញុំ អា​បណ្ឌិត​ខួរ​ក្បាល​ឆ្កែ អាបណ្ឌិត​លក់​ក្បាល​ឲ្យ​យួន​ហើយ​ដាក់​រូបថត​ខ្ញុំ​ទន្ទឹម​នឹង​គ្រាប់​កាំភ្លើង​ហ្នឹង។ ខ្ញុំ​ទទួល​បាន​សារ​គំរាម​នេះ​នៅ​រសៀល​ថ្ងៃ​ទី​ ២៩ ខែ​សីហា»។

ប្រធាន​រាជបណ្ឌិត្យ​សភា​កម្ពុជា​លោកស្រី ខ្លូត ធីតា បាន​បង្ហាញ​ការ​ព្រួយបារម្ភ​ចំពោះ​រឿង​នេះ​តែ​លោកស្រី សង្ឃឹម​ថា​លោក សុខ ទូច នឹង​អត់​ធន់​ហើយ​បំពេញ​ការងារ​ឲ្យ​បាន​ជោគជ័យ។

លោកស្រី​ថា៖ «ដោយសារ​យើង​ជា​អ្នក​ស្រាវជ្រាវ​យើង​មិន​សូវ​ខ្វល់​នឹង​ពាក្យ​មិន​ល្អ​ទាំង​នោះ​ទេ​ព្រោះ​កម្ពុជា​ទើប​ចាប់ផ្តើម​មាន​ហ្វេសប៊ុក​តិច​ទៀត​មាន​ច្បាប់​គឺ​ការ​គំរាម​​បែប​នោះ​នឹង​លែង​កើត​មាន​ហើយ​យើង​មិន​អាច​ថា​ពេល​គេ​ច្រឡោត​យើង​ច្រឡោត​ដែរ​នោះ​ទេ​សំខាន់​យើង​ត្រូវ​ធ្វើការ​ដើម្បី​ជាតិ​សិន​។ យ៉ាង​នេះ​ក្តី​រាជបណ្ឌិត្យ​សភា​នឹង​ប្រជុំ​ពិភាក្សា​រឿង​នេះ»។

មិន​ខុស​ពី​លោក សុខ ទូច លោកស្រី កុយ ពិសី អនុប្រធាន​លេខាធិការដ្ឋាន​អចិន្រៃ្តយ៍​នៃ​អាជ្ញាធរ​ជាតិ​ទទួល​បន្ទុក​កិច្ចការ​ព្រំដែន​បាន​ឲ្យ​ដឹង​ដែរ​ថា​ទាក់ទិន​នឹង​​បញ្ហា​ព្រំដែន​ កម្ពុជា-វៀតណាម លោកស្រី​ក៏​ធ្លាប់​ត្រូវ​បាន​សាធារណជន​មួយ​ចំនួន​ជេរ​ប្រមាថ​តាមរយៈ​ហ្វេសប៊ុក និង​គំរាម​ផង​ដែរ​តែ​លោកស្រី គិត​ថា​រដ្ឋាភិបាល​នឹង​មាន​ចំណាត់​ការ​លើ​រឿង​នេះ និង​សង្ឃឹម​ថា​អ្នក​ទាំងនោះ​នឹង​យល់​ហើយ​ឈប់​ធ្វើ​នូវ​អ្វី​ដែល​នាំឲ្យ​ប៉ះពាល់​ដល់​អារម្មណ៍ និង​កិត្តិយស​របស់​លោកស្រី។

លោកស្រី​ថា៖ «ខ្ញុំ​អត់​បាន​ធ្វើ​ខុស​ច្បាប់​ទេ​រឿង​ដែល​ខ្ញុំ​ធ្វើ​គឺជា​ការងារ​របស់​ខ្ញុំ។ គាត់​មក​គំរាម​គឺ​មិន​ត្រូវ​ទាល់តែ​សោះ​ខ្ញុំ​មិនមែន​ជា​អ្នក​នយោបាយ​នោះ​ទេ​ខ្ញុំ​ស្គាល់​ខ្លួនឯង​ហើយ​ខ្ញុំ​ដឹង​ថា​ខ្ញុំ​កំពុង​ធ្វើ​កិច្ច​ការងារ​របស់​ខ្ញុំ»។

លោកស្រី ពិសី បញ្ជាក់​ថា​សារ​គំរាម​មក​លើ​លោកស្រី​សរសេរ​ថា៖ «ប្រយ័ត្ន​ខ្លួន​ណា ម៉េច​មី​ច្រម៉ក់​ឯង​ថា​លោក អ៊ុំ សំអាន ដើរ​កុហក​រឿង​ព្រំដែន»​។

ជុំវិញ​ការ​ខ្វែង​គំនិត​គ្នា​រវាង​គណបក្ស​ប្រជាជន​កម្ពុជា និង​គណបក្ស​សង្គ្រោះ​ជាតិ​ចំពោះ​ការ​ប្រើប្រាស់​ផែនទី​បោះ​បង្គោល​ព្រំដែន​កម្ពុជា-វៀតណាម​ឧបនាយក​រដ្ឋមន្ត្រី និង​ជា​រដ្ឋមន្ត្រី​ក្រសួង​ការបរទេស​កម្ពុជា​លោក ហោ ណាំហុង បាន​ថ្លែង​ពី​ម្សិលមិញ​នៅ​ក្រៅ​កម្មវិធី​មួយ​នៅ​វិទ្យាស្ថាន​បច្ចេកវិទ្យា​កម្ពុជា​ថា​តំណាងរាស្ត្រ​គណបក្ស​សង្គ្រោះ​ជាតិ​លោក អ៊ុំ សំអាន បាន​កំពុង​យក​បញ្ហា​ព្រំដែន​ទៅ​ឃោសនា និង​វាយប្រហារ​រាជរដ្ឋាភិបាល​កម្ពុជា​ទាំង​ឆាក​ជាតិ និង​អន្តរជាតិ។

លោក​ថា៖ «ការ​ដែល​លោក អ៊ុំ សំអាន យក​បញ្ហា​ព្រំដែន​ទៅ​ឃោសនា​នេះ​ដោយសារ​បញ្ហា​អភិវឌ្ឍន៍​សង្គម​គេ​មើល​ឃើញ​ទាំងអស់​គ្នា​បរទេស​ក៏​ឃើញ​អត់​មាន​លេស​អី​វាយប្រហារ​រាជរដ្ឋាភិបាល​ដូច្នេះ (អ៊ុំ សំអាន) មាន​តែ​បញ្ហា​មួយ​ហ្នឹង​យក​ទៅ​ធ្វើ​ប្រធានបទ​ឃោសនា​រក​សន្លឹក​ឆ្នោត និង​វាយប្រហារ​រដ្ឋាភិបាល​ប៉ុន្តែ​ខ្ញុំ​សង្ឃឹម​ថា​នៅ​ថ្ងៃ​ខាង​មុខ​ឆាប់ៗ​អ្នក​ទាំងអស់​នឹង​បាន​ភ្លឺ​ភ្នែក​អំពី​អ្វី​ដែល​រាជរដ្ឋាភិបាល​បាន​ធ្វើ»។

ការ​អះអាង​នេះ​ធ្វើ​ឡើង​ស្រប​ពេល​ដែល​លោក អ៊ុំ សំអាន តំណាង​រាស្ត្រ​គណបក្ស​សង្គ្រោះ​ជាតិ​កំពុង​ស្ថិត​នៅ​សហរដ្ឋ​អាមេរិក និង​បាន​ប្រកាស​ថា​លោក​បាន​រកឃើញ​ផែនទី​ដើម​កម្ពុជា​ប្រភេទ​បោន​ខ្នាត ១/១០០.០០០ ចំនួន ២៦ ផ្ទាំង​តម្កល់​នៅ​បណ្តាល័យ​អាមេរិក​។ ប៉ុន្តែ​ផែនទី​ទាំង​នោះ​ត្រូវ​បាន​លោក វ៉ា គីមហុង ទេសរដ្ឋមន្ត្រី​ទទួល​បន្ទុក​កិច្ចការ​ព្រំដែន​អះអាង​ថា​រាជរដ្ឋាភិបាល​មាន​តាំងពី ១០ ឆ្នាំ​មុន​មក​ម្ល៉េះ។

ទាក់ទិន​នឹង​ភាព​ចម្រូងចម្រាស​នៃ​ព្រំដែន​កម្ពុជា-វៀតណាម សមាជិក​ព្រឹទ្ធសភា​មកពី​គណបក្ស សម រង្ស៊ី គឺ​លោក ហុង សុខហួរ ដែល​បាន​ធ្វើ​បទបង្ហាញ​ពី​ឯកសារ​សន្ធិសញ្ញា​កម្ពុជា វៀតណាម​ឆ្នាំ​ ១៩៧៩ ត្រូវ​បាន​សាលា​ដំបូង​រាជធានី​ភ្នំពេញ​សម្រេច​បញ្ជូន​ទៅ​ឃុំ​ខ្លួន​នៅ​ពន្ធនាគារ​ព្រៃស​កាលពី​ពាក់​កណ្តាល​ខែ​សីហា​ដោយ​ចោទ ៣ បទល្មើស​គឺ​ការ​ក្លែង​ឯកសារ​សាធារណៈ ​ការ​ប្រើប្រាស់​ឯកសារ​ដែល​ក្លែង​ និង​ញុះញង់​ឲ្យ​មាន​អសន្តិសុខ។

លោក សំ សុគង់ មេធាវី​ម្នាក់​ក្នុង​ចំណោម​មេធាវី​បួន​នាក់​ដែល​ការពារ​ក្តី​លោក ហុង សុខហួរ បាន​ឲ្យ​ដឹង​កាលពី​ម្សិលមិញ​ថា​សាលា​ឧទ្ធរណ៍​បាន​សម្រេច​កោះ​អញ្ជើញ​មេធាវី​ចូល​ខ្លួន​ការពារ​ក្តី​ក្នុង​សវនាការ​បណ្តឹង​ឧទ្ធរណ៍​ទៅ​នឹង​ដីកា​សម្រេច​ឃុំ​ខ្លួន​បណ្តោះ​អាសន្ន​របស់​សាលា​ដំបូង​រាជធានី​នៅ​ថ្ងៃ​ទី ២ ខែ​កញ្ញា វេលា​ម៉ោង​ ៨ ​ព្រឹក។

លោក​ថា៖ «តាម​ផ្លូវ​ច្បាប់​គឺ​ជនជាប់ចោទ​ត្រូវ​តែ​មាន​វត្តមាន​ក្នុង​សវនការ​ដើម្បី​តាមដាន និង​ដោះសា​ការ​ចោទប្រកាន់​។ ក្នុង​ករណី​ដែល​មិន​មាន​វត្តមាន​របស់​កូនក្តី​ក្រុម​មេធាវី​នឹង​មិន​ចូល​នីតិវិធី​ឡើយ។ ពួក​យើង​សង្ឃឹម​ថា​លោក ហុង សុខហួរ នឹង​​អាច​នៅ​ក្រៅ​ឃុំ​បាន»៕

អត្ថបទគួរចាប់អារម្មណ៍

  • កោះកុងៈ កូនអណ្តើក​ហ្លួង​ចំនួន ៣០ ​ក្បាល​បាន​ញាស់​ចេញពី​សម្បុក​នៅលើ​ឆ្នេរ​ខ្សាច់​សិប្បនិម្មិត​ក្នុង​មជ្ឈមណ្ឌល​អភិរក្ស​សត្វ​ល្មូន​ខេត្តកោះកុង កាលពី​សប្តាហ៍​កន្លងទៅ ហើយ​នេះ​គឺជា​លើក​ទី​ ២ ​ហើយ ដែល​អណ្តើក​ហ្លួង​ចិញ្ចឹម​ក្នុង​មជ្ឈមណ្ឌល​នេះ​បាន​ពង​កូន​។ នេះ​បើតាម​អង្គការ​សមាគម​អភិរក្ស​សត្វព្រៃ​នៅ​កម្ពុជា (WCS)​។

  • ភ្នំពេញៈ ការបញ្ចូល​មីក្រូ​សារជាតិ​ក្នុង​អង្ករ គឺជា​ជំហាន​ចម្បង​មួយ​ក្នុងការ​ដោះស្រាយ​បញ្ហា​អាហារូបត្ថម្ភ​ក្នុង​ប្រទេស​កម្ពុជា ដែល​ប្រជាជន​ភាគច្រើន​ទទួលទាន​បាយ ក្នុង​បរិមាណ​ច្រើន​ជា​រៀងរាល់ថ្ងៃ​។ នេះ​បើតាម​មន្ត្រី​ក្រុមប្រឹក្សា​ស្តារ​អភិវឌ្ឍន៍​វិស័យ​កសិកម្ម និង​ជនបទ​។

  • ភ្នំពេញ: ក្នុង​ចំណោម​ភោជនីយដ្ឋាន​ពោរពេញ​ដោយ​សិល្បៈ​ចម្អិន​ម្ហូបអាហារ ការ​គិតគូរ​ពី​និរន្តរភាព​បរិស្ថាន​ភព​ផែន​ដី និង​បង្កប់​រឿង​រ៉ាវ​ប្រពៃណី​វប្បធម៌​ដ៏​អស្ចារ្យ​នៅ​អេស្ប៉ាញ ប៉េរូ​សហរដ្ឋអាមេរិក​ ថៃ ដាណឺម៉ាក​ នូវែលសេឡង់ ចិន ជប៉ុន អ៊ីតាលី និង​ម៉ិកស៊ិក អាហារ​នៅ​​ផ្ទះ​ប្រពៃណី​បុរាណ​មួយ​​​តាម​ដង​ទន្លេ​មេគង្គ

  • ភ្នំពេញៈ ទាំង​អ្នកនយោបាយ អ្នកវិភាគ និង​ស្ថាប័ន​គណៈកម្មាធិការ​ជាតិ​រៀបចំ​ការបោះឆ្នោត​បានចាត់ទុក​ដំណើរការ​ឃោសនា​រក​សំឡេងឆ្នោត ក្នុង​រយៈពេល ៣ ​ថ្ងៃ​របស់​គណបក្ស​នយោបាយ ដែល​បាន​ចុះបញ្ជី​បេក្ខជន​ចូលរួម​បោះឆ្នោត​ជ្រើសរើស​ក្រុមប្រឹក្សាឃុំ សង្កាត់​អាណត្តិ​ទី​ ៥ ដែល​នឹង​ប្រព្រឹត្តទៅ​នៅ​ថ្ងៃទី​ ៥ ខែមិថុនា ថា មាន​ភាពចាស់ទុំ​ផ្នែក​នយោបាយ និង​មិនមាន​អំពើហិង្សា​ណាមួយ​កើតឡើង​នោះ

  • ភ្នំពេញៈ សាលាឧទ្ធរណ៍​ភ្នំពេញ​នៅ​ថ្ងៃទី​ ២៣ ​ឧសភា បានប្រកាស​សាលដីកា​កំបាំង​មុខមន្ត្រី​សមាគម​ការពារ​សិទ្ធិមនុស្ស​អាដហុក​ ៤ ​រូប និង​អតីត​មន្ត្រី​ ១ ​រូប​ទៀត​សម្រេច​តម្កល់​សាលក្រម​របស់​សាលាដំបូង​រាជធានី​ភ្នំពេញ​ដដែល បន្ទាប់ពី​បាន​កាត់ក្តី​ឱ្យ​ពួកគេ​ជាប់ពន្ធនាគារ​ក្នុង​ម្នាក់​ ៥ ​ឆ្នាំ តែ​ឱ្យ​អនុវត្ត​ទោស ​១៤ ​ខែ​ពាក់ព័ន្ធ​បទចោទ​សូកប៉ាន់​សាក្សី និង​សមគំនិត​សូកប៉ាន់​សាក្សី​ដល់​ នាង ខុម ចាន់តារាទី ហៅ​ ស្រីមុំ​។

  • បន្ទាយមានជ័យៈ ក្នុង​មួយ​ថ្ងៃៗ​មាន​ប្រជាពលរដ្ឋ​នៅតាម​ព្រំដែន ជាពិសេស​ពលករ​ខ្មែរ​ពី ​៤០០ ទៅ​ ៥០០​ នាក់​បាន​ទៅ​ស្នើសុំ​ធ្វើ​បណ្ណ​ឆ្លងដែន ដើម្បី​បាន​ចូលទៅ​ធ្វើការ ឬ​លក់ដូរ​ស្របច្បាប់ នៅក្នុង​ប្រទេស​ថៃ បន្ទាប់ពី​ភាគី​ទាំង​ ២​ បាន​ឯកភាព​គ្នា​បើក​ច្រកព្រំដែន​ឡើងវិញ កាលពី​ថ្ងៃទី​ ១ ខែឧសភា ក្នុង​កម្រិត​ថ្នាក់​តំបន់​។