ភ្នំពេញៈ មន្ត្រីជាន់ខ្ពស់មួយចំនួននៃគណបក្សសង្គ្រោះជាតិដែលត្រូវបានតុលាការកំពូលរំលាយចោល និងដាក់បម្រាមមិនឲ្យធ្វើនយោបាយដែលកំពុងស្នាក់នៅក្នុងប្រទេសបានបង្ហាញនូវឆន្ទៈប្រឆាំងទៅលើសារនយោបាយរបស់លោក សម រង្ស៊ី ដែលត្រូវបានជ្រើសតាំងជាប្រធានស្ដីទីនៅឯក្រៅប្រទេស ហើយបានចាត់ទុកបុគ្គលនយោបាយណាមានបំណងសុំធ្វើសម្បទាននយោបាយវិញក្រោយវិសោធនកម្មច្បាប់ប្រកាសជាផ្លូវការថាជាការប្រមាថ និងដាក់សម្ពាធលើសេរីភាពបុគ្គល។
លោក អ៊ូ ច័ន្ទរ័ត្ន អតីតតំណាងរាស្ត្រខេត្តតាកែវដែលស្ថិតក្នុងចំណោមមនុស្ស ១១៨ នាក់កំពុងជាប់បម្រាមនយោបាយបានថ្លែងប្រាប់ភ្នំពេញប៉ុស្តិ៍កាលពីម្សិលមិញថា ការលើកឡើងរបស់លោក សម រង្ស៊ី គឺជាសារប្រមាថ រារាំង និងដាក់សម្ពាធដល់មន្ត្រីរបស់ខ្លួនដោយការប្រមាថ និងការលាបពណ៌នេះអាចធ្វើឲ្យគណបក្សមួយនេះមានការបែកបាក់គ្នាផងដែរ។
លោក ច័ន្ទរ័ត្ន បានថ្លែងថា៖ «លោក សម រស្ស៊ី គួរតែគោរពការសម្រេចចិត្តរបស់បុគ្គលនីមួយៗ ការលាបពណ៌គ្នាទៅវិញទៅមកវានឹងមិនធ្វើឲ្យមានសេចក្តីសុខនៅក្នុងសង្គមខ្មែរទេ វាជាការធ្វើឲ្យមានការបែកបាក់ ប្រេះឆាគ្នាឥតមានថ្ងៃបញ្ចប់ទេ ខ្ញុំមិនយល់ពីយុទ្ធសាស្ត្រអ្វីដែលគាត់ធ្វើ ការរារាំង និងការដាក់សម្ពាធមុនដល់អ្នកនយោបាយប្រឆាំងខ្លួនឯង យើងមិនចង់ឃើញការប្រមាថ និងការលាបពណ៌បែបនេះទេ»។
លោក ច័ន្ទរ័ត្ន បានថ្លែងបន្ថែមថាមានមន្ត្រីជាន់ខ្ពស់ខ្លះបានឲ្យដឹងថា មានមន្ត្រីជាន់ខ្ពស់មួយចំនួនបាននិងកំពុងពិចារណាក្នុងការស្នើសុំទទួលសិទ្ធិធ្វើនយោបាយឡើងវិញ បើទោះបីលោក សម រង្ស៊ី បានព្រមានថាជនណាដែលស្នើសុំសិទ្ធិធ្វើនយោបាយឡើងវិញនោះគឺជាជនក្បត់ក៏ដោយ។
ការលើកឡើងរបស់មន្ត្រីជាន់ខ្ពស់ទាំងនោះបានធ្វើឡើងបន្ទាប់ពីលោក សម រង្ស៊ី បានលើកឡើងកាលពីថ្ងៃទី ២៩ ខែធ្នូ ថាមានមនុស្សក្បត់តែ ២ នាក់ទេ ក្នុងចំណោមមន្ត្រីគណបក្សសង្គ្រោះជាតិ ១១៨ នាក់នោះគឺជា «មនុស្សថោកទាប ល្ងង់មើលខ្លី» ហើយចាត់ទុកថាបុគ្គលណាស្នើសុំដកបម្រាមធ្វើនយោបាយគឺជាការចាញ់បោក ឬបានលក់ខ្លួនឲ្យលោក ហ៊ុន សែន (នាយករដ្ឋមន្ត្រី)។
លោក សម រង្ស៊ី ក៏បានអះអាងផងដែរថា មន្ត្រីគណបក្សសង្គ្រោះជាតិ ១១៦ នាក់នៅតែស្មោះត្រង់ដោយសារពួកគេបានយល់ច្បាស់ថា បើទៅធ្វើនយោបាយក្នុងកាលៈទេសៈបែបនេះគឺគ្រាន់តែទៅធ្វើដើម្បីបម្រើប្រយោជន៍លោក ហ៊ុន សែន ដោយផ្ទាល់ ឬដោយប្រយោលតែប៉ុណ្ណោះ។
លោក សម រង្ស៊ី បានសរសេរនៅលើហ្វេសប៊ុករបស់លោកថា៖ «មនុស្សថោកទាប ល្ងង់មើលខ្លី តែ ២ នាក់ប៉ុណ្ណោះ មន្ត្រីគណបក្សសង្គ្រោះជាតិ ១១៦ នាក់លើ ១១៨ នាក់ដែលត្រូវបានគេដកសិទ្ធិធ្វើនយោបាយ មិនចាញ់បោក ឬមិនលក់ខ្លួនឲ្យ ហ៊ុន សែន ទេ។ យើងទាំងអស់គ្នាត្រូវដឹងថា ហ៊ុន សែន មិនអាចទ្រាំនឹងសម្ពាធពីសហភាពអឺរ៉ុបបានទេ ដែលនឹងដាក់ទណ្ឌកម្មពាណិជ្ជកម្មធ្វើឲ្យសេដ្ឋកិច្ចប្រទេសកម្ពុជាជួបប្រទះវិបត្តិដ៏ធ្ងន់ធ្ងរបើ ហ៊ុន សែន មិនធ្វើតាមការទាមទាររបស់សហភាពអឺរ៉ុបនេះទេ»។
ទោះជាយ៉ាងណាក៏ដោយលោក គង់ គាំ អ្នកនយោបាយជើងចាស់ដែលធ្លាប់ជាអតីតប្រធានគណបក្ស សម រង្ស៊ី (SRP) ដែលក្រោយមកត្រូវបានប្ដូរឈ្មោះជាគណបក្សភ្លើងទៀននោះកាលពីសប្ដាហ៍មុនបានប្រកាសត្រៀមខ្លួនវិលចូលនយោបាយវិញ។ លោកបានថ្លែងប្រាប់ភ្នំពេញប៉ុស្ដិ៍ថា លោក សម រង្ស៊ី ជាមនុស្សពូកែលាបពណ៌តាមរយៈការបោកបញ្ឆោតមន្ត្រីសមាជិករបស់ខ្លួន និងប្រជាពលរដ្ឋដែលជាអ្នកគាំទ្រលោក។
លោកបញ្ជាក់ថា៖ «វាជាការបន្ទាបបន្ថោក និងមួលបង្កាច់ចំពោះពួកយើងដោយសារតែចង់បានផលប្រយោជន៍របស់ខ្លួន។ លោក សម រង្ស៊ី ធ្វើការលាបពណ៌មកលើពួកយើងតែតាមពិតលោក សម រង្ស៊ីទេដែលថោកទាបតាមរយៈការបោកបញ្ឆោត ប្រជាពលរដ្ឋខ្មែរ និងក្បត់ឆន្ទៈប្រជាជនខ្មែរដោយអំពាវនាវដល់អន្តរជាតិឲ្យដាក់សម្ពាធ និងដកហូតផលប្រយោជន៍ពីប្រទេសកម្ពុជា មិនស្មោះត្រង់ជាមួយលោកប្រធាន កឹម សុខា។ លោកបាននិងកំពុងព្យាយាមបំបែកបំបាក់អតីតសមាជិកសង្គ្រោះជាតិ »។
លោក គង់ បូរ៉ា តំណាងរាស្ត្រអតីតគណបក្សសង្គ្រោះជាតិ និងជាកូនប្រុសរបស់លោក គង់ គាំ កាលពីថ្ងៃទី ៣១ បានបង្ហោះនៅលើហ្វេសប៊ុករបស់លោកដោយបានបដិសេធ និងបានរិះគន់ពាក្យសម្តីរបស់លោក សម រង្ស៊ី ដែលបានចោទប្រកាន់ទៅលើរូបលោក និងឪពុករបស់លោកថាជាជនក្បត់ដោយបានអះអាងថា លោកមិនអាចបម្រើគណបក្សក្បត់ជាតិ និងក្បត់ប្រជាជនបានទេ។
លោកបញ្ជាក់ដូច្នេះថា៖ «ខ្ញុំបានត្រៀមខ្លួនរួចហើយ ដើម្បីស្នើសុំសិទ្ធិធ្វើនយោបាយឡើងវិញ បន្ទាប់ពីសេចក្តីស្នើវិសោធនកម្មច្បាប់ស្តីពីគណបក្សនយោបាយចូលជាធរមាន។ ខ្ញុំ គង់ បូរ៉ា មិនអាចបន្តរួមដំណើរក្នុងអំពើក្បត់ប្រទេស ក្បត់ប្រជាពលរដ្ឋតទៅទៀតបានឡើយ។ បម្រើប្រទេស និងបម្រើប្រជាពលរដ្ឋភាគច្រើនមិនបញ្ច្រាសចរន្តទេ»។
លោក កង គឹមហាក់ អតីតតំណាងរាស្ត្របក្សប្រឆាំងម្នាក់ទៀតបានថ្លែងថា៖ «វាគ្រាន់តែជាការលើកឡើងរបស់គាត់ (សម រង្ស៊ី) ទេតែគាត់មិនអាចធ្វើសេចក្តីសម្រេចចិត្តទាំងអស់នោះទេ។ ខ្ញុំមិនអាចទស្សន៍ទាយបានទេថាមានមន្ត្រីប៉ុន្មាននាក់នឹងធ្វើលិខិតស្នើសុំ យើងរង់ចាំមើលជាក់ស្តែងទៅ យើងនឹងដឹងថា មានមន្ត្រីណាខ្លះដែលនឹងស្នើសុំពីព្រោះយើងមិនទាន់ឃើញនរណាមួយប្រកាសជំហរច្បាស់លាស់នៅឡើយ។ ខ្ញុំមិនទាន់ប្រាកដដែរ ខ្ញុំរង់ចាំមើលស្ថានការណ៍ជាក់ស្តែងសិន»។
ចំពោះលោក ប៉ុល ហំម វិញដែលជាអនុប្រធានអតីតគណបក្សសង្គ្រោះជាតិបានថ្លែងប្រាប់ភ្នំពេញប៉ុស្តិ៍កាលពីពេលថ្មីៗនេះថា លោកមិនទាន់សម្រេចចិត្តយ៉ាងណានៅឡើយទាក់ទងនឹងការស្នើសុំសិទ្ធិធ្វើនយោបាយ។
ដោយឡែកព្រះអង្គម្ចាស់ស៊ីសុវត្ថិ ធម្មិកោ ដែលស្ថិតនៅក្នុងចំណោមមន្ត្រី ១១៨ ដែរនោះបានថ្លែងកាលពីថ្ងៃពុធម្សិលមិញថា ព្រះអង្គប្រកាន់ជំហរដោយផ្អែកលើគោលការណ៍ ២ គឺលោកនឹងស្នើសុំការលើកលែងបម្រាមហាមធ្វើនយោបាយក្រោយពេលលោក កឹម សុខា ត្រូវបានដោះលែង ហើយការស្នើសុំលើកលែងត្រូវធ្វើឡើងជាកញ្ចប់។
ព្រះអង្គម្ចាស់យល់ថាមានការមិនចុះសម្រុងគ្នាខ្លះក្នុងគណក្សសង្គ្រោះជាតិ ក្រោយពេលមានវិសោធនកម្មច្បាប់នយោបាយដែលបើកផ្លូវឲ្យមានការធ្វើសម្បទាននយោបាយឡើងវិញ និងដោយការឡើងកាន់ជាប្រធានស្តីទីគណបក្សសង្គ្រោះជាតិរបស់លោក សម រង្ស៊ី។ ប៉ុន្តែលោកថាវាមិនមែនជាបញ្ហាធំដុំទេព្រោះប្រជាធិបតេយ្យតែងតែមានការខ្វែងគំនិតគ្នាខ្លះជាធម្មតា។
ប៉ុន្តែព្រះអង្គម្ចាស់មិនគាំទ្រចំពោះការប្រើពាក្យពេចន៍មើលងាយមួយចំនួនដែលលោក សម រង្ស៊ី បានលើកឡើងដោយចោទអ្នកស្នើសុំលើកបម្រាមថាជាអ្នកក្បត់ ថោកទាប ឬល្ងង់មើលខ្លី ជាដើមដោយព្រះអង្គថា ការស្នើសុំសិទ្ធិធ្វើនយោបាយ ឬមិនស្នើសុំ គឺជាសិទ្ធិសម្រេចចិត្តរបស់បុគ្គលរៀងខ្លួន។ ព្រះអង្គថ្លែងថាការចោទប្រកាន់របស់លោក សម រង្ស៊ី គឺជាភាសាបំបែកបំបាក់ទៅវិញទេ។
ព្រះអង្គម្ចាស់ ធម្មិកោ ថ្លែងថា៖ «ខ្ញុំគោរពសិទ្ធិសេរីភាពរបស់បុគ្គលនីមួយៗក្នុងការសម្រេចអនាគតវាសនារបស់ខ្លួនឯង ដូច្នេះខ្ញុំមិនអាចថាក្បត់អ៊ីចឹងទេ ខ្ញុំមិនគាំទ្រ។ ការចោទប្រកាន់ លាបពណ៌នេះខ្ញុំមិនគាំទ្រទេ។ ខ្ញុំគោរពការសម្រេចរបស់បុគ្គលនីមួយៗដូច្នេះខ្ញុំមិនគាំទ្រពាក្យសម្ដីបែបនេះទេ ជាពិសេសចេញមកពីមេ។ មេត្រូវប្រើភាសាបង្រួបបង្រួមមិនមែនភាសាបំបែកបំបាក់ទេ។ ការចោទថាអ្នកទាំងអស់នេះជាអ្នកក្បត់ ឬជាអ្នកថោកអីហ្នឹងគឺជាការបំបែកបំបាក់ហើយ មិនមែនជាការបង្រួបបង្រួមទេ ការបង្រួបបង្រួមគឺត្រូវគោរពសិទ្ធិរបស់គេ»។
ទោះជាយ៉ាងណាក៏ដោយមន្ត្រីជាន់ខ្ពស់នៃអតីតគណបក្សសង្គ្រោះជាតិដែលកំពុងស្នាក់នៅក្នុងស្រុកបានថ្លែងដោយសុំមិនបញ្ចេញឈ្មោះដោយបានអះអាងថា ក្នុងចំណោម ១១៨ នាក់មានប្រហែលជា ៦០ នាក់ដែលស្មោះស្ម័គ្រជាមួយលោក កឹម សុខា។
លោកថ្លែងថា៖ «ប្រសិនបើលោក កឹម សុខា ធ្វើលិខិតស្នើសុំធ្វើនយោបាយឡើងវិញ អ្នកគាំទ្រលោក កឹម សុខា និងអ្នកគាំទ្រលោក សម រង្ស៊ីមួយចំនួនក៏នឹងស្នើសុំធ្វើនយោបាយឡើងវិញផងដែរ»។
អតីតសមាជិកសភាលោក ម៉ៅ មុនីវណ្ណ និងលោកស្រី មូរ សុខហួរ មិនអាចទាក់ទងបានទេកាលពីម្សិលមិញ៕