.jpg)
ស្ថានភាពនៃការបិទចរាចរណ៍ឆ្លងកាត់ខេត្ត ។ ហុង មិនា
ភ្នំពេញ៖ អ្នកនាំពាក្យក្រសួងមហាផ្ទៃបានឲ្យដឹងថា ស្ថានភាពនៃការបិទចរាចរណ៍ឆ្លងកាត់ខេត្តទូទាំងប្រទេសមានលក្ខណៈល្អប្រសើរ ខណៈខេត្តកំពង់ឆ្នាំងមានប្រជាពលរដ្ឋដែលចូលមកពីក្រៅមូលដ្ឋានជាង ១៥០ នាក់ ប៉ុន្ដែត្រូវបានយកទៅធ្វើចត្តាឡីស័កទាំងអស់គិតត្រឹមថ្ងៃអាទិត្យនេះ។
កាលពីថ្ងៃទី ៦ មេសា រាជរដ្ឋាភិបាលបានសម្រេចបិទការធ្វើដំណើរឆ្លងកាត់ការចេញចូលពីខេត្តមួយទៅខេត្តមួយនៅទូទាំងប្រទេស លើកលែងតែខេត្តកណ្ដាល និងរាជធានីភ្នំពេញ ដើម្បីទប់ស្កាត់ការរាលដាលជំងឺកូវីដ ១៩។
លោក ខៀវ សុភគ៌ អ្នកនាំពាក្យក្រសួងមហាផ្ទៃបានប្រាប់ភ្នំពេញប៉ុស្តិ៍ នៅថ្ងៃអាទិត្យនេះថា បន្ទាប់ពីរដ្ឋាភិបាលបានដាក់ចេញវិធានការក្នុងការផ្អាកការធ្វើដំណើរឆ្លងកាត់ការចេញចូលពីខេត្តមួយទៅខេត្តមួយ គឺស្ថានភាពនៃការធ្វើដំណើរទូទាំងប្រទេសស្ថិតក្នុងកម្រិតមួយដែលអាចគ្រប់គ្រងបាន។
លោកបន្តថា ស្ថានភាពដែលអាចគ្រប់គ្រងបាននេះ ក៏ព្រោះតែមានការចូលរួមពីសំណាក់ប្រជាពលរដ្ឋភាគច្រើន បើទោះជាមានពលរដ្ឋ មួយចំនួនតូចនៅតែបំពានយ៉ាងណាក៏ដោយ។
លោកបញ្ជាក់ថា៖ «យើងមិនទទួលបានព័ត៌មាន ជុំវិញការពិបាកក្នុងការអនុវត្តវិធាននេះ ដែលថាពលរដ្ឋ លោក មិនស្តាប់តាមនោះទេ។ ជាទូទៅ សភាពការណ៍ គឺល្អប្រសើរទាំងអស់ អត់មានអីគួរឲ្យព្រួយបារម្ភទេ»។
ជាមួយនឹងការបិទចរាចរណ៍នេះលោក ប្រាក់ វ៉ុន ប្រធានមន្ទីរសុខាភិបាលខេត្តកំពង់ឆ្នាំងបានឲ្យដឹងដែរថា គិតត្រឹមថ្ងៃទី ១១ មេសានេះមានពលរដ្ឋ ១៥១ នាក់ត្រូវបាននាំចូលទៅធ្វើចត្តាឡីស័ក បន្ទាប់ពីពួកគេបានត្រឡប់មកកាន់មូលដ្ឋាននៃខេត្តនេះ។
លោកបន្តថា៖ «អ្នកដែលយើងនាំទៅធ្វើចត្តាឡីស័កនេះ គឺពួកគាត់ធ្វើការនៅភ្នំពេញ តែពួកគាត់បានមកលេងស្រុកកំណើត។ យើងបានកំណត់ហើយថា អ្នកដែលចូលមូលដ្ឋាននៅក្នុងខេត្តកំពង់ឆ្នាំងក្នុងថ្ងៃឈប់សម្រាកនេះ គឺត្រូវធ្វើចត្តាឡីស័ករយៈពេល ១៤ ថ្ងៃ។ តែពួកគាត់មិនដឹង ដូច្នេះយើងបាននាំយកពួកគាត់ទៅធ្វើចត្តាឡីស័កអស់ហើយ»។
តាមលោក ប្រាក់ វ៉ុន គិតត្រឹមថ្ងៃអាទិត្យនេះ គឺមានអ្នកឆ្លងជំងឺកូវីដ១៩ តែ ២ នាក់ប៉ុណ្ណោះនៅក្នុងខេត្តនេះ ខណៈអ្នកកំពុងធ្វើការចត្តាឡីស័កទូទាំងខេត្ត គឺមានជិត ២០០ នាក់៕
