The Phnom Penh Post Search

Search form




Logo of Phnom Penh Post newspaper Phnom Penh Post - អ្នកនាំពាក្យ៖ ការសម្រេច​របស់​សភា​អឺរ៉ុប​ពី​ការកាត់ទោស​មន្ត្រី​អតីត​ CNRP មិនមាន​ឥទ្ធិពល​លើ​តុលាការ​ទេ

អ្នកនាំពាក្យ៖ ការសម្រេច​របស់​សភា​អឺរ៉ុប​ពី​ការកាត់ទោស​មន្ត្រី​អតីត​ CNRP មិនមាន​ឥទ្ធិពល​លើ​តុលាការ​ទេ

Content image - Phnom Penh Post
កិច្ចប្រជុំ​របស់​សភា​អឺរ៉ុប​កាលពី​ថ្ងៃទី​ ១១ ខែមីនា ឆ្នាំ​ ២០២១​។ រូបថត EU

អ្នកនាំពាក្យ៖ ការសម្រេច​របស់​សភា​អឺរ៉ុប​ពី​ការកាត់ទោស​មន្ត្រី​អតីត​ CNRP មិនមាន​ឥទ្ធិពល​លើ​តុលាការ​ទេ

ភ្នំពេញៈ អ្នកនាំពាក្យ​រដ្ឋសភា និង​អ្នកនាំពាក្យ​គណបក្ស​កាន់អំណាច​បាន​ថ្លែងថា ការចេញ​សេចក្ដីសម្រេច​របស់​សភា​សហភាព​អឺរ៉ុប​អំពី​ការកាត់ទោស​ថ្នាក់ដឹកនាំ​ និង​សកម្មជន​អតីត​គណបក្ស​សង្គ្រោះជាតិ និង​សកម្មជន​សង្គម​ស៊ីវិល​នៅ​កម្ពុជា មិនមាន​ឥទ្ធិពល​អ្វី​លើ​ការសម្រេចចិត្ត​របស់​តុលាការ​កម្ពុជា​នោះទេ​។

លោក ឡេង ប៉េងឡុង អ្នកនាំពាក្យ​រដ្ឋសភា​បាន​ថ្លែង​ពី​ម្សិលមិញ​ថា ការធ្វើ​សេចក្ដី​សម្រេច​របស់​សភា​អឺរ៉ុប​អំពី​ការកាត់ទោស​មេដឹកនាំ និង​សមាជិក​អតីត​គណបក្សប្រឆាំង និង​អ្នក​រំលោភច្បាប់​នៅ​កម្ពុជា មិនមាន​ឥទ្ធិពល​អ្វី​មកលើ​ការសម្រេចចិត្ត​របស់​តុលាការ​កម្ពុជា​ទេ ហើយ​រដ្ឋសភា​កម្ពុជា​ក៏​មិនមាន​ឥទ្ធិពល​លើ​តុលាការ​ដែរ​។

លោក​បាន​ថ្លែង​ដូច្នេះ​ថា​៖ «​ការសម្រេច​ជា​រឿង​តុលាការ ហើយ​តុលាការ​គេ​ធ្វើការ​តាម​នីតិវិធី តាមច្បាប់​។ ច្បាប់​គឺ​សំអាង​ទៅលើ​ភ័ស្តុតាង​ហើយ​គេ​សម្រេច​ដោយ​មាន​មូលដ្ឋាន​របស់គេ​។ អ៊ីចឹង សភា​មិនមាន​ធ្វើ​អ្វី​បានទេ នេះ​ជា​អធិបតេយ្យ​នៃ​ការសម្រេចចិត្ត​របស់​តុលាការ​ជា​សេចក្ដី​សម្រេចចិត្ត​តាម​ឆន្ទានុសិទ្ធិ​របស់​ចៅក្រម​នីមួយៗ​។ យើង​មិន​អាចមាន​សិទ្ធិ​អី​ទៅ​លូកលាន់​ទៅ​ទិតៀន ឬ​ជ្រៀតជ្រែក​បានទេ​»​។

ការថ្លែង​ដូច្នេះ​របស់​លោក​ ឡេង ប៉េងឡុង បន្ទាប់ពី​សភា​អឺរ៉ុប​បាន​ចេញ​សេចក្តីសម្រេច​មួយ​កាលពី​ថ្ងៃទី​ ១១ ខែមីនា​ អំពី​ការកាត់ទោស​ដែលមាន​ជនជាប់ចោទ​ច្រើន យន្តការ​ផ្លូវច្បាប់​លើ​សង្គម​ស៊ីវិល ការចាប់​ខ្លួន​ពាក់ព័ន្ធ​នឹង​បញ្ហា​កូវីដ​១៩ ជាពិសេស​ការកាត់ទោស​មេដឹកនាំ​អតីត​គណបក្ស​សង្គ្រោះជាតិ​លោក​ សម រង្ស៊ី ​និង​សមាជិក​ផ្សេងទៀត​ពី​ ២០ ទៅ​ ២៥ ឆ្នាំ កាលពី​ពេល​ថ្មីៗ​នេះ​។

នៅក្នុង​សេចក្ដី​សម្រេច​នោះ សភា​អឺរ៉ុប​បានលើក​ឡើង​ពី​បញ្ហា​ជាច្រើន​ចំណុច រួមមាន​ទាំង​ការអំពាវនាវ​កុំឱ្យ​សហភាព​អឺរ៉ុប​ទទួលយក​ប្រទេស​កម្ពុជា​ជា​កន្លែង​សម្រាប់​រៀបចំ​កិច្ចប្រជុំ​អាស៊ី​អឺរ៉ុប ដែល​គ្រោង​ធ្វើឡើង​នៅ​ឆ្នាំនេះ ប្រសិនបើ​លទ្ធិប្រជាធិបតេយ្យ មិន​ត្រូវបាន​ស្ដារឡើងវិញ​ទេនោះ​។

ចំណុច​ទី​១៦ នៃ​សេចក្ដី​សម្រេច​របស់​សភា​អឺរ៉ុប​សរសេរ​ថា​៖ «​អំពាវនាវ​ឱ្យ​រដ្ឋ​សមាជិក​ព្យួរ​ការគាំទ្រ​ផ្នែក​ហិរញ្ញវត្ថុ​ទ្វេភាគី​ចំពោះ​រដ្ឋាភិបាល​កម្ពុជា ហើយ​បង្វែរ​ការផ្ដោត​ការយកចិត្ត​ទុកដាក់​លើ​អង្គការ​មិនមែន​រដ្ឋាភិបាល និង​គណបក្សប្រឆាំង​នានា​»​។

សភា​អឺរ៉ុប​ថ្លែងថា​៖ «​សភា​អឺរ៉ុប​ជឿជាក់ថា ការដាក់​ទណ្ឌកម្ម​ជាក់លាក់​រួមមាន​ការហាម​ឃាត់​ការធ្វើដំណើរ និង​ការបង្កក​ទ្រព្យសម្បត្តិ​លើ​មេដឹកនាំ​កម្ពុជា និង​ផលប្រយោជន៍​ផ្នែក​សេដ្ឋកិច្ច​របស់​ពួកគេ មិន​ធ្លាប់​កើតមាន​ទេ​។ ដូច្នេះ​សភា​អឺរ៉ុប​លើកទឹកចិត្ត​ឱ្យ​មាន​ក្រុមប្រឹក្សា​អនុម័ត​វិធានការ​តឹងរ៉ឹង​ទៅលើ​មេដឹកនាំ​នយោបាយ និង​មេដឹកនាំ​កម្លាំង​សន្តិសុខ ដែល​ទទួលខុសត្រូវ​លើ​ការរំលោភ​សិទ្ធិ​មនុស្ស​ធ្ងន់ធ្ងរ ការរំលាយ​គណបក្ស​ និង​ការគាបសង្កត់​គណបក្សប្រឆាំង​នៅ​កម្ពុជា និង​វិធានការ​ប្រឆាំងនឹង​ផលប្រយោជន៍​សេដ្ឋកិច្ច​របស់​ពួកគេ ក្រោម​ច្បាប់​សកល​ស្ដីពី​ទណ្ឌកម្ម​លើ​ការរំលោភ​សិទ្ធិមនុស្ស​របស់​សហភាព​អឺរ៉ុប​»​។

សេចក្ដី​សម្រេច​ក៏​អំពាវនាវ​ឱ្យ​សេវា​កិច្ចការបរទេស​នៃ​សហភាព​អឺរ៉ុប រដ្ឋ​សមាជិក​សហភាព​អឺរ៉ុប​ជំរុញ​ឱ្យ​មាន​កិច្ចប្រឹងប្រែង​មួយ​ក្នុង​សន្និបាត​ក្រុមប្រឹក្សា​សិទ្ធិមនុស្ស​អង្គការសហប្រជាជាតិ​លើក​ទី​ ៤៨ ដើម្បី​ឈាន​ទៅ​រក​ការអនុម័ត​ដ៏ខ្លាំង​មួយ ដើម្បី​ដោះស្រាយ​បញ្ហា​សិទ្ធិមនុស្ស​នៅ​កម្ពុជា​។

ក្រៅពីនេះ សភា​អឺរ៉ុប​ក៏​បាន​អំពាវនាវ​ឱ្យ​បេសកកម្ម​សហភាព​អឺរ៉ុប​នៅ​ភ្នំពេញ និង​ស្ថានទូត​នៃ​ប្រទេស​សមាជិក​អឺរ៉ុប​ទាំងអស់​បន្ត​តាមដាន​ការកាត់ទោស​ និង​ធ្វើ​ទស្សនកិច្ច​ទៅកាន់​ពន្ធនាគារ ព្រមទាំង​ស្នើឱ្យ​រដ្ឋាភិបាល​កម្ពុជា​ផ្ដល់​សុពលភាព​ដល់​គណបក្ស​សង្គ្រោះ​ជាតិ​ឡើងវិញ​ និង​ផ្ដល់​អាសនៈ​ដល់​ក្រុមប្រឹក្សា​ឃុំ-សង្កាត់​ជាប់ឆ្នោត​នៃ​គណបក្ស​នេះ​ចំនួន ៥ ០០៧ ​នាក់​ឡើងវិញ​។

ភ្នំពេញ​ប៉ុស្តិ៍​មិនអាច​សុំ​ការអត្ថាធិប្បាយ​ពី​លោក ផៃ ស៊ីផាន អ្នកនាំពាក្យ​រាជរដ្ឋាភិបាល​បានទេ​កាលពី​ថ្ងៃទី​ ១៤ ខែមីនា​។

ប៉ុន្តែ​លោក សុខ ឥសាន អ្នកនាំពាក្យ​គណបក្ស​ប្រជាជន​កម្ពុជា​បាន​ថ្លែងថា សហភាព​អឺរ៉ុប​មិនមែន​ជា​មេ​អាណានិគមន៍​លើ​កម្ពុជា​ទេ​។ ការសម្រេច​ដោយ​អត្តនោម័ត​របស់​សភា​អឺរ៉ុប​អំពី​បញ្ហា​កម្ពុជា គឺជា​រូបភាព​ចង់​ធ្វើ​អាណានិគមនិយម​មកលើ​កម្ពុជា​ដែល​ផ្ទុយ​ពី​ធម្មនុញ្ញ​អង្គការ​សហប្រជាជាតិ​។

លោក​ថ្លែង​ដូច្នេះ​ថា​៖ «​ការសម្រេច​របស់​សភា​អឺរ៉ុប គ្មាន​អានុភាព​ឱ្យ​កម្ពុជា​ធ្វើតាម​ឡើយ​។ ការចេញ​សេចក្តីសម្រេច​ដែល​អត់​មាន​ប្រសិទ្ធភាព គឺជា​ការបន្ទាប​តម្លៃ​ខ្លួនឯង​។ ការតាំង​ខ្លួន​ជា​មេអាណានិគម​លើ​ប្រទេស​ដទៃ​ជា​ការហួស​សម័យ​ហើយ​ក្នុង​សតវត្សរ៍​ទី​ ២១ ​នេះ​»៕

វីដេអូ៖

អត្ថបទគួរចាប់អារម្មណ៍