.jpg)
ជនសង្ស័យនេសាទល្មើសច្បាប់ពេលសមត្ថកិច្ចចាប់ខ្លួន។ ហ្វេសប៊ុក
ក្រចេះ: បុរស ២ នាក់ ត្រូវបានសាលាដំបូងខេត្តក្រចេះសម្រេចឃុំខ្លួននៅពន្ធនាគារជាបណ្ដោះអាសន្នពាក់ព័ន្ធនឹងការចោទប្រកាន់ពីបទ «នេសាទត្រីដោយប្រើឧបករណ៍ឆក់» នៅក្នុងតំបន់អភិរក្សសត្វផ្សោតទន្លេមេគង្គ ស្របពេលដែលមានសត្វផ្សោត១ក្បាលត្រូវបានមន្ត្រីប្រទះឃើញងាប់ដោយមានសរសៃមងជាប់ខ្លួនកាលពីថ្មីៗនេះ។
លោក ម៉ុក ពន្លក នាយរងខណ្ឌជលផល និងជាប្រធានក្រុមឆ្មាំទន្លេខេត្តក្រចេះ បានប្រាប់ភ្នំពេញប៉ុស្តិ៍កាលពីម្សិលមិញថា ជនសង្ស័យឈ្មោះ សេង អឿន អាយុ ២៩ ឆ្នាំ និងឈ្មោះ ថន ពិសិទ្ធ អាយុ ១៨ ឆ្នាំ ដែលអ្នកទាំង ២ មានលំនៅក្នុងភូមិត្បូងខ្លា ឃុំអូរម្រះ ស្រុកសៀមបូក ខេត្តស្ទឹងត្រែង ត្រូវបានក្រុមកម្លាំងឆ្មាំទន្លេ និងប្រជានេសាទកំពង់ក្បឿងឃាត់ខ្លួនកាលពីថ្ងៃទី ២៣ ខែ កក្កដា ខណៈពួកគេកំពុងប្រព្រឹត្តបទល្មើសនេសាទត្រីដោយប្រើឧបករណ៍ឆក់នៅចំណុចភូមិកំពង់ក្បឿង ឃុំបឹងចារ ស្រុកសំបូរ ខេត្តក្រចេះ។
លោកបានបន្តថា ប្រតិបត្តិការនោះ ក្រុមសមត្ថកិច្ចបានចាប់រឹបអូសកាណូតស្មាច់ដែលមានកម្លាំងម៉ាស៊ីន ២០ សេះ ១ គ្រឿង ប្រវែង ៥,៩ ម៉ែត្រ, អាគុយម៉ាក BK ៧០ អំពែរ ១ គ្រឿង និងក្បាលឆក់ម៉ាក Toshiba (5M580000G) ចំនួន ១ គ្រឿងផងដែរ។
លោកថ្លែងថា ជនសង្ស័យទាំង ២ នាក់នេះ ត្រូវបានសាលាដំបូងខេត្តក្រចេះសម្រេចឲ្យនាំយកទៅឃុំខ្លួននៅពន្ធនាគារខេត្តជាបណ្ដោះអាសន្នពីថ្ងៃ ២៤ កក្កដា ដោយចោទប្រកាន់ពីបទ «នេសាទត្រីដោយប្រើឧបករណ៍ឆក់» ក្នុងតំបន់អភិរក្សសត្វផ្សោតទន្លេមេគង្គ តាមបញ្ញត្តិមាត្រា ៩៨ នៃច្បាប់ជលផល។
យោងតាមមាត្រានេះ ជនសង្ស័យទាំង ២ នឹងត្រូវប្រឈមការផ្ដន្ទាទោសជាប់ពន្ធនាគារម្នាក់ៗពី ៣ ឆ្នាំ ទៅ ៥ ឆ្នាំ។ ចំណែកវត្ថុតាងត្រូវរឹបអូសជាសម្បត្តិរដ្ឋឬត្រូវបំផ្លាញចោល។
លោក ពន្លក បានបញ្ជាក់ថា៖ «នៅពេលនេះ ជនសង្ស័យទាំង ២ កំពុងត្រូវបានឃុំខ្លួនក្នុងពន្ធនាគារខេត្តក្រចេះរង់ចាំការជំនុំជម្រះទោសនៅពេលក្រោយ»។
លោក ហ៊ុល សឿង មេឃុំបឹងចារ បានប្រាប់ភ្នំពេញប៉ុស្តិ៍កាលពីម្សិលមិញថា ផ្សោត ១ ក្បាល ដែលបានងាប់កាលពី ៣៤ ថ្ងៃមុន ទំនងជាស្នាដៃជនសង្ស័យ ២ នាក់នេះ ព្រោះពួកគេជាជនសកម្មក្នុងការប្រព្រឹត្តបទល្មើសនេសាទក្នុងតំបន់អភិរក្សអន្លង់សត្វផ្សោតទន្លេមេគង្គ។
លោក សឿង បានបន្តថា ប្រជានេសាទនៅទូទាំងឃុំបឹងចារ បានយល់ច្បាស់អំពីសារៈសំខាន់នៃសត្វផ្សោត ហើយពួកគាត់បានចូលរួមយ៉ាងសកម្មក្នុងកិច្ចការពារ និងអភិរក្សសត្វផ្សោតទន្លេមេគង្គដោយការចុះល្បាតរួមគ្នាជាមួយកម្លាំងប្រជាការពារនៅក្នុងមូលដ្ឋាន និងក្រុមឆ្មាំទន្លេដើម្បីទប់ស្កាត់ និងបង្ក្រាបបទល្មើសជលផលរៀងរាល់ ៣ ថ្ងៃម្ដង។
លោកថ្លែងថា៖ «អ្នកប្រព្រឹត្តបទល្មើសនេសាទក្នុងតំបន់អភិរក្សសត្វផ្សោតទន្លេមេគង្គ ភាគច្រើនជាអ្នករស់នៅ [ខេត្ត] ភាគខាងក្រោម និងខាងលើខ្សែទឹក»។
អង្គការ WWF កាលពីពេលថ្មីៗនេះ បានអំពាវនាវយ៉ាងទទូចឲ្យបញ្ឈប់សកម្មភាពនេសាទនៅក្នុងតំបន់ការពារ និងអភិរក្សសត្វផ្សោត ព្រោះវាជាសម្បត្តិបេតិកភណ្ឌមានជីវិតដ៏មានតម្លៃរបស់ប្រទេស កម្ពុជា។
អង្គការនេះ ក៏បានកត់សម្គាល់ផងដែរថា៖ «ការដាក់មងនៅក្នុងតំបន់អភិរក្សគឺជាកត្តាចម្បងដែលធ្វើឲ្យមានការងាប់សត្វផ្សោតទន្លេមេគង្គ»៕
