កោះកុង៖ ប្រជានេសាទតាមសមុទ្រ ១៤ នាក់ ត្រូវបានកម្លាំងសមត្ថកិច្ចស្រុកគិរីជលសា ខេត្តកោះកុង ចាប់ខ្លួន និងបញ្ជូនទៅមណ្ឌលធ្វើចត្តាឡីស័ក ក្រោយពីពួកគេបាននាំយកផលិតផលសមុទ្រចេញ-ចូលទៅលក់នៅប្រទេសថៃ ជាញឹកញាប់ក្នុងគ្រាប្រទេសថៃ កំពុងមានបញ្ហាប្រឈមការឆ្លងរីករាលដាលនៃជំងឺកូវីដ ១៩ យ៉ាងពេញបន្ទុក។
លោក ចេង មុនីរិទ្ធ អភិបាលស្រុកគិរីសាគរ ប្រាប់ ភ្នំពេញ ប៉ុស្តិ៍ នាថ្ងៃទី ២៣ មេសា នេះថា ការឃាត់ខ្លួនប្រជានេសាទទាំង ១៤ នាក់នេះ បានធ្វើឡើងកាលពីថ្ងៃទី ២២ មេសា ក្រោយពីពួកគេបានជិះទូកនេសាទចំនួន ២ គ្រឿង ត្រឡប់មកពីនាំផលនេសាទសមុទ្រ ដែលនេសាទបានទៅលក់នៅប្រទេសថៃ។
លោកបញ្ជាក់ថា៖ "បច្ចុប្បន្ន នៅប្រទេសថៃ មានការឆ្លងរីករាលដាលជំងឺកូវីដ ១៩ ខ្លាំងជាងនៅកម្ពុជាយើងទៅទៀត។ យើងបារម្ភខ្លាចពួកគាត់មានឆ្លងជំងឺកូវីដ ១៩ ពីពលរដ្ឋថៃមកចូលក្នុងសហគមន៍យើង។ ដូច្នេះយើងចាំបាច់ត្រូវឃាត់ខ្លួនពួកគាត់បញ្ជូនទៅកាន់មណ្ឌលចត្តាឡីស័ក ដើម្បីធ្វើតេស្តរកមេរោគជំងឺកូវីដ ១៩ និងដើម្បីទប់ស្កាត់ការឆ្លងរីករាលដាលនៃជំងឺនេះចូលមកក្នុងសហគមន៍យើង"។
លោកថា ថ្វីបើលទ្ធផលធ្វើតេស្តលើកទី១ នាព្រឹកថ្ងៃទី ២៣ មេសា ពួកគេមិនមានវិជ្ជមានជំងឺកូវីដ ១៩ ក៏ដោយ ក៏កម្លាំងសមត្ថកិច្ចមិនអនុញ្ញាតឲ្យពួកគេត្រឡប់ទៅផ្ទះវិញដែរ គឺតម្រូវឲ្យពួកគេធ្វើចត្តាឡីស័កនៅលើទូក ដែលពួកគេបានឈប់ចតនៅមុខកោះស្តេចរយៈពេល ១៤ ថ្ងៃ ដើម្បីរង់ចាំលទ្ធផលធ្វើតេស្តជាលើកទី២ និងទី៣ តាមសេចក្តីណែនាំរបស់ក្រសួងសុខាភិបាល ដើម្បីចៀសវាងនៅពេលរកថា ក្នុងចំណោមពួកគេមានវិជ្ជមានកូវី ១៩ ហើយឆ្លងដល់អ្នកដទៃនៅក្នុងសហគមន៍៕