.jpg)
ឃ្លាំងដាក់រថយន្តរបស់ក្រុមហ៊ុន សេង ហួត ដែលអតិថិជនកំពុងតវ៉ា។ ហ្វេសប៊ុក
ភ្នំពេញៈ ប្រជាពលរដ្ឋជាច្រើននាក់មកពីគ្រប់ទិសទីដែលជាអតិថិជនបង់រំលស់រថយន្តពីក្រុមហ៊ុនយីហោឈ្មោះ សេង ហួត ដោយមានម្ចាស់ឈ្មោះ សេង សុភ័គ មានទីតាំងក្នុងសង្កាត់ចោមចៅ ២ ខណ្ឌពោធិ៍សែនជ័យ រាជធានីភ្នំពេញ បានដាក់ពាក្យបណ្តឹងទៅអាជ្ញាធរដើម្បីឲ្យជួយអន្តរាគមន៍ដោយអះអាងថាពួកគេ បានចាញ់បោកក្រុមហ៊ុននេះ។
លោក លឿង ស៊ីម៉េង ជាជនរងគ្រោះម្នាក់ក្នុងចំណោមពលរដ្ឋជាង ៥០ នាក់ ដែលអះអាងថាចាញ់បោកក្រុមហ៊ុននេះ បានប្រាប់ភ្នំពេញប៉ុស្តិ៍ពីម្សិលមិញថា កាលពីចុងឆ្នាំ ២០១៨ ពួកលោកបានធ្វើកិច្ចសន្យាជាមួយក្រុមហ៊ុននេះ ដើម្បីទិញរថយន្តបង់រំលស់ ដោយក្នុងម្នាក់ៗ ត្រូវបង់ប្រាក់កក់មុន ៣០ ទៅ ៤០ ភាគរយ និងត្រូវបង់ជារៀងរាល់ខែ ជាថ្នូរនឹងការយករថយន្តមកប្រើប្រាស់ តែមានអ្នកខ្លះមិនទាំងទាន់បានទទួលរថយន្តផង។
លោកបន្តថា ស្រាប់តែថ្មីៗនេះ មានសមាគមអភិវឌ្ឍន៍អ្នកបើកបរ (CDDA) បានបង្ហោះស្លាកលេខរថយន្តជាច្រើនលើបណ្តាញសង្គមដែលស្លាកលេខទាំងនោះភាគច្រើនជាស្លាកលេខរថយន្តដែលពួកគាត់កំពុងបង់រំលស់ពីក្រុមហ៊ុន សេង ហួត ប៉ុន្តែបែរជាគេតម្រូវឲ្យប្រគល់រថយន្តទាំងនោះឲ្យសមាគមខាងលើ មុនថ្ងៃទី ៣១ មីនា បើពុំដូចនោះទេនឹងត្រូវដកហូតឬត្រូវចោទប្រកាន់ពីបទលួចរថយន្តរបស់សមាគម។
បន្ទាប់ពីឃើញដូច្នេះ អតិថិជនបានភ្ញាក់ផ្អើលនិងបានទៅជួបនឹងម្ចាស់ក្រុមហ៊ុន សេង ហួត ហើយគេបានសន្យាថា នឹងដោះស្រាយ តែព្យាយាមគេចវេះរហូត។
លោកបញ្ជាក់ថា៖ «ពួកខ្ញុំគ្មានចង់បានអ្វីទេសុំឲ្យតែម្ចាស់ឃ្លាំងក្រុមហ៊ុន សេង ហួត នេះ ចេញមកដោះស្រាយឲ្យបានឆាប់ៗ និងសងសំណងដែលពួកខ្ញុំ កក់ និងបានបង់ជាប្រចាំខែកន្លងទៅប៉ុណ្ណោះ កុំឲ្យអូសបន្លាយពេលវេលាទៀត។ពួកយើង ក៏ព្រួយបារម្ភដែរ ចំពោះការបង្ហោះរបស់សមាគមដែលអាចចោទពួកយើងដែលប្រើប្រាស់រថយន្តទាំងនោះដោយមិនដឹងខ្លួន»។
កាលពីថ្ងៃទី ២៦ និង ២៧ ខែ មីនា មានពលរដ្ឋជាច្រើនបានផ្អើលឆោឡោនៅមុខ ក្រុមហ៊ុន សេង ហួត បង់រំលស់រថយន្ត ស្ថិតនៅផ្ទះលេខ ៧២ ក្រុម ២ ផ្លូវបេតុង ភូមិជ្រៃកោង សង្កាត់ចោមចៅទី ២ ខណ្ឌពោធិ៍សែនជ័យ រាជធានីភ្នំពេញដោយបានអះអាងថា ពួកគេត្រូវបានចាញ់បោកក្រុមហ៊ុននេះនិងមានអ្នកខ្លះបានយំស្រែក ថា ត្រូវចាញ់បោកក្រុមហ៊ុនអស់រាប់ពាន់ដុល្លារ ក្រោយក្រុមហ៊ុននេះ ដកហូតរថយន្តយកទៅវិញ។
លោក វ៉ា សារ៉ង ចៅសង្កាត់ចោមចៅ ២ ខណ្ឌពោធិ៍សែនជ័យ បានប្រាប់ភ្នំពេញប៉ុស្តិ៍ពីម្សិលមិញថា ក្រោយមានការផ្អើលឆោឡោ និងទទួលបានពាក្យបណ្តឹងពីពលរដ្ឋ ទាំងតាមខេត្តនិងនៅភ្នំពេញ ជាបន្តបន្ទាប់មក អាជ្ញាធរ ក៏បានចេញលិខិតនិងឲ្យមន្ត្រីទៅកោះហៅម្ចាស់ក្រុមហ៊ុន សេង ហួត នេះ ជាច្រើនដងដែរ ប៉ុន្តែ រហូតមកទល់ថ្ងៃអាទិត្យនេះ ពុំមានការចេញមុខមកទទួលដោះស្រាយទេ។
លោកថា៖ «យើងទទួលបានពាក្យបណ្តឹងពីរឿងនេះ បណ្តើរៗជាង ៣០ នាក់ហើយ ហើយនៅថ្ងៃចន្ទអាចនឹងមានជនរងគ្រោះមកបន្តបន្ទាប់ទៀត ដោយយើងនឹងធ្វើតាមនីតិវិធី បើម្ចាស់ឃ្លាំងនេះ មិនចេញមុខមកសម្របសម្រួលដោះស្រាយទេ យើងនឹងបញ្ចូនរឿងនេះ ទៅលើទៀត ហើយពលរដ្ឋទាំងនោះ ក៏នឹងប្តឹងទៅតុលាការ ដើម្បីដោះស្រាយឲ្យពួកគេដែរ»។
លោក សេង សុភ័គ អគ្គនាយកក្រុមហ៊ុន សេង ហួត មិនអាចទាក់ទងបានទេកាលពីម្សិលមិញ ដោយលោក ពុំលើកទូរស័ព្ទ។ តែលោកបានឡាយនៅលើបណ្តាញសង្គមហ្វេសប៊ុកកាលពីម្សិលមិញថា លោកក៏ជា
ជនរងគ្រោះដែរ ព្រោះរថយន្តទាំងនោះ លោកបានបង់រំលស់បន្តពីសមាគមអភិវឌ្ឍន៍អ្នកបើកបរ (CDDA) ដោយមានបុគ្គលឈ្មោះ ផង់ សុគា ជាប្រធាន។
លោកបន្តថា ក្រោយមក បុគ្គលរូបនោះ ក៏ត្រូវបានតុលាការឃុំខ្លួនបណ្តោះអាសន្នក្នុងពន្ធនាគារ ទាក់ទងនឹងរឿងបោកលុយពីក្រុមហ៊ុនជប៉ុនប្រមាណ ៣ លានដុល្លារ ហើយរថយន្តទាំងនោះ ក៏ត្រូវបានសមាគមនេះ ប្រកាសដកហូត ដែលធ្វើឲ្យពលរដ្ឋជាអតិថិជនរបស់លោកបារម្ភ។
លោកបញ្ជាក់ថា៖ «ក្រោយមានហេតុការណ៍នេះ ខ្ញុំក៏បានទាក់ទងផ្ទាល់ជាមួយជប៉ុនហ្នឹង ពិភាក្សា និងសហការជាមួយគាត់ ដោះស្រាយបញ្ហា ព្រោះក្នុងករណីនេះខ្ញុំក៏ជាជនរងគ្រោះម្នាក់ដែរ។ អ៊ីចឹងនៅក្នុងដំណោះស្រាយហ្នឹងគឺខ្ញុំត្រូវបន្តសហការជាមួយគេដោយប្រមូលឡានចំនួន ៤៣ គ្រឿងហ្នឹងដែលខ្ញុំបានបង់រំលស់ពីសមាគមនេះដើម្បីភ្ជាប់ប្រព័ន្ធ (GPS) ឡើងវិញ ហើយបង្វិលឡានហ្នឹងទៅឲ្យអតិថិជនខ្ញុំវិញ»។
លោក ម៉ាន់ សុផល មេធាវីការពារម្ចាស់ក្រុមហ៊ុន សេង ហួត បានអះអាងប្រាប់ភ្នំពេញប៉ុស្តិ៍ពីម្សិលមិញថា លោក សេង សុភ័គ នឹងចេញមុខដោះស្រាយ នៅថ្ងៃចន្ទនេះ។
លោក អាន ទូច បុគ្គលិកប្រចាំសមាគមអភិវឌ្ឍន៍អ្នកបើកបរ (CDDA) បានប្រាប់ថា ថៅកែរបស់ខ្លួន ឈ្មោះ ផង់ សុគា ត្រូវបានសមត្ថកិច្ច ចាប់ខ្លួនកាលពីថ្ងៃទី ២០ ខែ មីនា តែលោក មិនដឹងថាពីបទល្មើសអ្វីនោះ
ទេ។ យ៉ាងណា លោកអះអាងថា បើតាមលោកដឹងរថយន្តដែលក្រុមហ៊ុន សេង ហួត បានយកពីសមាគមគឺមួយចំនួនគ្រាន់តែជួលប៉ុណ្ណោះ ហើយក្រោយរថយន្តទាំងនោះបានបាត់ប្រព័ន្ធ GPS ដែលសមាគមបានភ្ជាប់ ទើបសមាគមសម្រេចបង្ហោះនៅលើបណ្តាញទំនាក់ទំនងសង្គម ដើម្បីស្វែងរករថយន្តទាំងនោះមកវិញ។
លោកបញ្ជាក់ថា៖ «មេខ្ញុំមានទំនាក់ទំនងជាមួយឈ្មោះសេង សុភ័គហ្នឹង ដោយបានសហការជាមួយគ្នា តែក្រោយមក ឮថា គាត់ មិនបានបង់រំលស់ ត្រឹមត្រូវ តាមការកំណត់ ជាមួយសមាគម ក៏មេខ្ញុំ (ផង់ សុគា) បានឲ្យសេង សុភ័គ ហ្នឹង បង់ផ្ទាល់ជាមួយនឹងធនាគារតែម្តង។ តែខ្ញុំមិនដឹងថា មានកិច្ចសន្យាអីខ្លះទេ ព្រោះខ្ញុំធ្វើការឲ្យគេទេ អ៊ីចឹង រឿងកិច្ចសន្យារឿងអីហ្នឹង ខ្ញុំមិនដឹងច្បាស់ដែរ តែមេខ្ញុំគាត់ជាមនុស្សល្អ ហើយគាត់ក៏ត្រូវបានអ្នកបង់រំលស់ឡានមុនៗបោកដែរ»៕
