.jpg)
អ្នកបើកកង់បីឥណ្ឌា កំពុងបើកលើស្ពានអាកាសស្ទឹងមានជ័យ។ ស្រេង ម៉េងស្រ៊ុន
ភ្នំពេញ: អ្នកបើកបរត្រីចក្រយានយន្ត និងទោចក្រយានយន្តរ៉ឺម៉កសណ្តោងចំនួន ៦៣១ នាក់ បានសម្រុកទៅចូលរួមវគ្គបណ្តុះណ្តាលចរាចរណ៍ផ្លូវគោកដោយឥតគិតថ្លៃ ដើម្បីត្រៀមប្រឡងយកប័ណ្ណបើកបរ បន្ទាប់ពីសាលាក្រុងបានប្រកាសបើកវគ្គបណ្ដុះបណ្ដាលនេះកាលពីសប្ដាហ៍មុន។ យោងតាមគេហទំព័រហ្វេសប៊ុករដ្ឋបាលសាលារាជធានីភ្នំពេញបានឲ្យដឹងថា ការចូលនៃអ្នកបើកបរទាំងនោះបានចាប់ផ្ដើមតាំងពីចេញសេចក្ដីប្រកាសនៅថ្ងៃទី ១ រហូតដល់ថ្ងៃទី ៩ មីនា។
សាលារាជធានីបន្តថា វគ្គបណ្តុះបណ្តាលច្បាប់ចរាចរណ៍ផ្លូវគោកនេះ នឹងប្រព្រឹត្តទៅរៀងរាល់ថ្ងៃសៅរ៍ រយៈពេល ២ ខែ ចាប់ពីថ្ងៃទី ២ ខែ មីនា ដល់ថ្ងៃទី ៤ ខែ ឧសភា ឆ្នាំ ២០១៩ ចំនួន ២ ទីតាំងដូចជា នៅអង្គភាពផ្តល់ប័ណ្ណបើកបរនៃមន្ទីរសាធារណការ និងដឹកជញ្ជូនរាជធានីភ្នំពេញផ្លូវលេខ ៥៩៨ សង្កាត់ច្រាំងចំរេះទី២ ខណ្ឌឫស្សីកែវ និងនៅមន្ទីរសាធារណការ និងដឹកជញ្ជូនរាជធានីភ្នំពេញ នៅផ្លូវជាតិលេខ ៦ សង្កាត់ព្រែកលៀប ខណ្ឌជ្រោយចង្វារ។
លោក សាំ ពិសិដ្ឋ ប្រធានមន្ទីរសាធារណការ និងដឹកជញ្ជូនរាជធានីភ្នំពេញ កាលពីម្សិលមិញមិនទាន់អាចទាក់ទងសុំការបញ្ជាក់ជុំវិញករណីនេះបានទេ។
ខណៈលោក ម៉េត មាសភក្ដី អ្នកនាំពាក្យសាលាក្រុងភ្នំពេញ ក៏មិនអាចទាក់ទងបានដែរកាលពីម្សិលមិញ។
លោក កែវ ណារិន អ្នកបើកបររ៉ឺម៉កកង់បី (កង់បីឥណ្ឌា) អាយុ ៣៦ ឆ្នាំ មកពីខេត្តស្វាយរៀងបានថ្លែងកាលពីម្សិលមិញថា លោកមិនទាន់បានទទួលព័ត៌មាននេះទេ។
លោកបន្តថា៖ «សព្វថ្ងៃនេះ ខ្ញុំអត់ទាន់មានប័ណ្ណបើកបរ ឬពាក់មីទេ ព្រោះខ្ញុំអត់ទាន់មានលុយទៅធ្វើ ហើយបើអាជ្ញាធរគេប្រកាសឲ្យទៅធ្វើ និងរៀនបើកបរអត់គិតប្រាក់ ខ្ញុំគិតថា វាជាឱកាសល្អហើយ។ ខ្ញុំគិតថា បើយើងមានឯកសារត្រឹមត្រូវតាមច្បាប់ ហើយពេលប៉ូលិសសួររក យើងក៏មានឯកសារបញ្ជាក់ច្បាស់លាស់ យើងមិនបាច់បង់ប្រាក់ពិន័យអ្វីទេ»។
លោក ខៀវ ឡុង អ្នកបើកបររ៉ឺម៉កកង់បី អាយុ ៤១ ឆ្នាំ មកពីខេត្តកណ្ដាលដែលគ្រោងនឹងទៅចូលរួមក្នុងវគ្គបណ្ដុះបណ្ដាលនេះ បានថ្លែងថា៖ «កាលពីមុន ខ្ញុំចង់ទៅធ្វើប័ណ្ណបើកបរដែរ ប៉ុន្ដែអត់ទាន់មានលុយ អ៊ីចឹងចាំរកលុយបានចាំទៅធ្វើ តែឥឡូវគេឲ្យទៅធ្វើអត់អស់លុយអ៊ីចឹង ខ្ញុំនឹងទៅធ្វើដែរ ព្រោះបើយើងបានប័ណ្ណបើកបរហ្នឹងទៅ វាមិនសូវភ័យពេលឃើញប៉ូលិស។ សព្វថ្ងៃនេះ ពេលឃើញប៉ូលិសម្ដងៗភ័យដែរ ព្រោះយើងអត់មានប័ណ្ណបើកបរហ្នឹង អ៊ីចឹងខ្លាចតែប៉ូលិសចាប់»។
លោកស្រី លឹម សុខជា ទីប្រឹក្សាជាន់ខ្ពស់អង្គការសម្ព័ន្ធដើម្បីសុវត្ថិភាពចរាចរណ៍ផ្លូវគោកបានបង្ហាញនូវការគាំទ្រចំពោះចំណាត់ការនេះ។
លោកស្រីបញ្ជាក់ថា៖ «ខ្ញុំបារម្ភថា ពួកគាត់អត់នាំគ្នាមករៀន ហើយអាជ្ញាធរក៏ត្រូវមានវិធានការជំរុញឲ្យពួកគាត់ទៅរៀន។ ម្យ៉ាងទៀត បើចំនួនអ្នកចូលរួមជាមួយយើងមានចំនួនតិច គឺយើងនៅមានបញ្ហាប្រឈម ប៉ុន្ដែបើពួកគាត់មករៀនច្រើន គឺយើងអាចចាត់ទុកថា ជោគជ័យពាក់កណ្ដាលហើយ ដូច្នេះ យើងធ្វើយ៉ាងណា ឬលើកទឹកចិត្តយ៉ាងណា ត្រូវជំរុញឲ្យពួកគាត់មករៀន»។
សាលារាជធានីភ្នំពេញបានអះអាងថាកន្លងមកនេះបងប្អូនប្រកបអាជីវកម្ម ដឹកជញ្ជូនអ្នកដំណើរភាគច្រើនបានបើកបរយានយន្តលើដងផ្លូវដោយពុំមានប័ណ្ណបើកបរយានយន្តត្រឹមត្រូវ។ ដើម្បីចូលរួមកាត់បន្ថយគ្រោះថ្នាក់ចរាចរណ៍ធានាបាននូវសុវត្ថិភាពដល់អ្នកដំណើរ រដ្ឋបាលរាជធានីភ្នំពេញ បានចាត់ឲ្យមន្ទីរសាធារណការ និងដឹកជញ្ជូនរាជធានីភ្នំពេញរៀបចំបើកវគ្គបណ្ដុះបណ្ដាលច្បាប់ចរាចរណ៍ផ្លូវគោកដោយឥតគិតថ្លៃជារៀងរាល់ថ្ងៃសៅរ៍ មានរយៈពេល ២ ខែ គិតចាប់ពីថ្ងៃសៅរ៍ ទី ២ ខែ មីនា ដល់ថ្ងៃទី៤ ខែឧសភា ឆ្នាំ ២០១៩ ស្ថិតនៅអង្គភាពផ្ដល់ប័ណ្ណបើកបរយានយន្ត។ ក្រោយពីបញ្ចប់វគ្គបណ្ដុះបណ្ដាលរួចបងប្អូនអាចដាក់ពាក្យប្រឡងដើម្បីទទួលបានប័ណ្ណបើកបរយានយន្តប្រភេទ «ក»៕
