ភ្នំពេញៈ ចៅក្រមសាលាដំបូងខេត្តព្រះសីហនុកាលពីម្សិលមិញបានចេញដីកាបង្គាប់ឲ្យឃុំខ្លួនអ្នកបើកបររថយន្តឈ្នួលដែលបង្កឲ្យសម្ដេចក្រុមព្រះរបួសធ្ងន់ និងអ្នកម្នាង អ៊ុក ផល្លា ទទួលមរណភាព ខណៈដែលគណបក្សហ៊្វុនស៊ិនប៉ិចបានស្នើរាជរដ្ឋាភិបាលពិសេសក្រសួងមហាផ្ទៃឲ្យស៊ើបអង្កេតករណីរកការពិតពីគ្រោះថ្នាក់ចរាចរណ៍នេះ។
ដីកាដែលចេញដោយចៅក្រមស៊ើបសួរលោក ប្លុង វិសាល កាលពីម្សិលមិញបានបង្គាប់ឲ្យដាក់ឈ្មោះ ម៉ិល សារ៉េត អាយុ ៣៤ ឆ្នាំរស់នៅភូមិ ១ សង្កាត់លេខ ១ ក្រុង-ខេត្តព្រះសីហនុ ស្ថិតក្រោមការត្រួតពិនិត្យពីបទ «បើកបរបណ្តាលឲ្យរបួស និងស្លាប់អ្នកដទៃ» និងបង្គាប់ឲ្យសមត្ថកិច្ចឃុំខ្លួនបុរសរូបនេះនៅពន្ធនាគារខេត្តព្រះសីហនុតាមនីតិវិធីច្បាប់។
ទាក់ទងនឹងករណីនេះដែរគណបក្សហ៊្វុនស៊ិនប៉ិចក៏បានស្នើឲ្យមានការស៊ើបអង្កេតឲ្យបានច្បាស់ផងដែរ ខណៈសម្ដេចក្រុមព្រះត្រូវបានបញ្ជូនបន្តទៅព្យាបាលនៅប្រទេសថៃ។
លោក យូ ហុកគ្រី អនុប្រធានគណបក្សហ៊្វុនស៊ិនប៉ិចបានប្រាប់អ្នកសារព័ត៌មាននៅវត្តបទុមវតីទីដែលតម្កល់សពអ្នកម្នាង អ៊ុក ផល្លា កាលពីម្សិលមិញថា គណបក្សហ៊្វុនស៊ិនប៉ិចស្នើឲ្យមានការស៊ើបអង្កេតករណីគ្រោះថ្នាក់ចរាចរណ៍នេះឲ្យឃើញសខ្មៅ ពីព្រោះវាបានកើតឡើងផ្ទួនគ្នាលើគ្រួសាររបស់សម្ដេចក្រុមព្រះ។
លោកថា៖ «យើងគ្រាន់តែឆ្ងល់ថាហេតុអ្វីបានជារថយន្តខ្សែដែលមានរថយន្តស៊ីរ៉ែនពីមុខហើយនៅតែមានគ្រោះថ្នាក់ទៀត? ហើយគ្រោះថ្នាក់នេះមិនមែនជាលើកទី ១ ទេ...យើងចេះតែឆ្ងល់ថាហេតុអ្វីបានជាឧបទ្ទវហេតុកើតឡើងផ្ទួនដូច្នេះ? ហើយយើងសង្ឃឹមលើរាជរដ្ឋាភិបាល ពិសេសក្រសួងមហាផ្ទៃបើកការស៊ើបអង្កេតឲ្យឃើញសខ្មៅ»។
សូមបញ្ជាក់ថាកាលថ្ងៃទី ២៥ ខែមេសា ឆ្នាំ ២០១៥ សម្ដេចក្រុមព្រះនរោត្តម រណឫទ្ធិ និងអ្នកម្នាង អ៊ុក ផល្លា ក៏ធ្លាប់ជួបគ្រោះថ្នាក់ចរាចរណ៍ផងដែរ នៅភូមិអម្ពិលធំ ឃុំខ្វិតធំ ស្រុកព្រៃឈរ ខេត្តកំពង់ចាម ដែលកាលនោះបានបណ្ដាលឲ្យអ្នកម្នាង អ៊ុក ផល្លា របួសភ្នែកធ្ងន់ និងត្រូវបានបញ្ជូនទៅព្យាបាលនៅក្រៅប្រទេស។
លោក យឹម សាវី អគ្គលេខាធិការគណបក្សហ៊្វុនស៊ិនប៉ិចបានថ្លែងដែរថា សម្តេចក្រុមព្រះត្រូវបញ្ជូនទៅថៃ បន្ទាប់ពីបានទទួលការសង្គ្រោះនៅមន្ទីរពេទ្យរ៉ូយ៉ាល់ភ្នំពេញក្រោយពីដឹកតាមឧទ្ធម្ភាគចក្រមកពីមន្ទីរពេទ្យខេត្តព្រះសីហនុ។
លោកថា៖ «ព្រះអង្គមិនអីទេ គឺបានប្រសើរហើយ។ លោកត្រូវបានចាកចេញទៅប្រទេសថៃកាលពីយប់មិញ។ លោកកំពុងសម្រាកព្យាបាលនៅប្រទេសថៃ»។
ដោយឡែកចំពោះសពអ្នកម្នាង អ៊ុកផល្លា នឹងត្រូវធ្វើពិធីបូជានៅថ្ងៃទី ២០ មិថុនានៅវត្តបទុមវតីដោយមានការឯកភាពគ្នាជាមួយគ្រួសារសព និងខាងគណៈកម្មធិការ។ នេះបើតាមលោក យឹម សាវី។
លោកបានថ្លែងថា៖ «យើងបានឯកភាពគ្នាថាបូជានៅថ្ងៃ ២០ ...ការស្លាប់នេះគឺជាការខាតបង់ដ៏ធំសម្រាប់ពលរដ្ឋដោយសារពួកគេគោរពស្រឡាញ់គាត់ ហើយសមាជិកគណបក្សគោរពស្រឡាញ់គាត់ដោយសារគាត់បម្រើប្រទេសជាតិ»។
លោកយាយ ហ៊ី ហុង អាយុ ៧១ ឆ្នាំដែលបានចូលរួមគោរពវិញ្ញាណក្ខន្ធសពអ្នកម្នាងបានថ្លែងទាំងទឹកភ្នែកថា៖ «ខ្ញុំមានការអាណិតអាសូរអ្នកម្នាងពន់ពេកណាស់ ពីព្រោះគាត់នៅក្មេងនៅឡើយ...។ ខ្ញុំមិនធ្លាប់គាល់គាត់ទេ តែដោយសារមានចិត្ត និងក្តីអាណិតគាត់ ខ្ញុំស្រក់ទឹកភ្នែកអាណិតគាត់។...វាជាការខាតបង់ធនធានសម្រាប់ជាតិដោយសារគាត់គឺជាគ្រូបង្ហាត់របាំដ៏ល្អ»។
លោក ទិត្យ សាវ៉ាត អាយុ ៦៦ ឆ្នាំដែលជាសមាជិកគណបក្សហ៊្វុនស៊ិនប៉ិចជាច្រើនឆ្នាំបានថ្លែងក្នុងពេលចូលរួមពិធីបុណ្យសពអ្នកម្នាង អ៊ុក ផល្លា ដែរថា គ្រោះថ្នាក់នេះគឺស្មានមិនដល់សោះថាកើតឡើងចំពោះអ្នកម្នាង។
លោកថា៖ «យើងមានការសោកស្តាយណាស់នៅពេលដែលបានបាត់បង់អ្នកម្នាង..។ គាត់គឺជាបុគ្គលដ៏ឆ្នើមមួយនៅក្នុងបក្សដោយគាត់តែងជំរុញសម្តេចក្រុមព្រះឲ្យខិតខំធ្វើសកម្មភាព និងចុះជួយប្រជាជន»។
មរណភាពអ្នកម្នាង អ៊ុក ផល្លា ដែលមានវ័យទើបតែ ៣៩ ឆ្នាំបានបន្សល់ទុករាជបុត្រា ២ អង្គ ខណៈសម្ដេចក្រុមព្រះ នរោត្តម រណឫទ្ធិ ជាព្រះស្វាមីស្ថិតក្នុងស្ថានភាពរបួសធ្ងន់មិនបាននៅចូលរួមក្នុងពិធីបុណ្យ៕