The Phnom Penh Post Search

Search form




Logo of Phnom Penh Post newspaper Phnom Penh Post - អ្នកបើកបរ​រថយន្ត​ឈ្នួល​ ​ចំនួន ៤២ នាក់ ស្នើ​សុំ​អាជ្ញា​ធរ​ខណ្ឌ​ពោធិ៍​សែន​ជ័យ​ កុំ​ធ្វើ​ការ​ផាក​ពិន័យ​​រថ​យន្ត បន្ទាប់​ពី​ពួក​គេ​បាន​បញ្ចប់​ការ​ធ្វើ​ចត្តាឡីស័ក​

អ្នកបើកបរ​រថយន្ត​ឈ្នួល​ ​ចំនួន ៤២ នាក់ ស្នើ​សុំ​អាជ្ញា​ធរ​ខណ្ឌ​ពោធិ៍​សែន​ជ័យ​ កុំ​ធ្វើ​ការ​ផាក​ពិន័យ​​រថ​យន្ត បន្ទាប់​ពី​ពួក​គេ​បាន​បញ្ចប់​ការ​ធ្វើ​ចត្តាឡីស័ក​

Content image - Phnom Penh Post
អ្នក​បើក​បរ​រថយន្ត​ឈ្នួល ​ស្នើ​សុំឱ្យ​អាជ្ញាធរ​ខណ្ឌ​ពោធិ៍សែន​ជ័យ កុំ​ធ្វើការ​ផាក​ពិន័យ​លើ​រថយន្ត​របស់​ពួកគេ​​នៅ​ថ្ងៃ​ទី ២៦ ​ខែ​ ឧសភា ឆ្នាំ​ ២០២១។ រូប​ថត យូសុះអាប់​ឌុល រ៉ាស់​ហ៊ីម

អ្នកបើកបរ​រថយន្ត​ឈ្នួល​ ​ចំនួន ៤២ នាក់ ស្នើ​សុំ​អាជ្ញា​ធរ​ខណ្ឌ​ពោធិ៍​សែន​ជ័យ​ កុំ​ធ្វើ​ការ​ផាក​ពិន័យ​​រថ​យន្ត បន្ទាប់​ពី​ពួក​គេ​បាន​បញ្ចប់​ការ​ធ្វើ​ចត្តាឡីស័ក​

ភ្នំពេញៈ អ្នកបើកបរ​រថយន្ត​ឈ្នួល​ ​ចំនួន ៤២ នាក់ នៅ​ថ្ងៃ​ទី ​២៦​ ខែ​ឧសភា​ បាន​​នាំ​គ្នា​ទៅ​​ស្នើ​សុំ​​​អាជ្ញាធរ​ខណ្ឌ​ពោធិ៍​សែន​ជ័យ សូម​ឱ្យ​ផ្តល់​​រថយន្ត​ដល់​ពួកគាត់​​វិញ ដោយ​សូម​កុំ​ធ្វើ​ការ​​ផាក​ពិន័យ​ចំនួន​ ២​ លាន​រៀល​ បន្ទាប់ពី​ពួកគេ បានបញ្ចប់​​ការ​ធ្វើ​ច​ត្តា​ឡី​ស័ក្តិ ១៤​ ថ្ងៃ​។

អ្នកបើកបរ​រថយន្ត​ឈ្នួល​តួ​រី​សទាំង ៤២ នាក់​នេះ ត្រូវបាន​អាជ្ញាធរ​ខណ្ឌ​ពោធិ៍​សែន​ជ័យ ​ចាប់​ឃាត់​រថយន្ត​របស់​ពួកគេ កាលពី​ថ្ងៃទី ៨ ខែឧសភា ដោយ​លើក​ឡើង​ថា ​ពួកគេ បម្រុង​ដឹក​កម្មករ-កម្ម​កា​រិ​នី និង​អ្នកធ្វើដំណើរ ចេញពី​តំបន់​ក្រហម និង​តម្រូវឱ្យ​ពួកគេ​ធ្វើ​ច​ត្តា​ឡី​ស​ក្តី ១៤ ថ្ងៃ​ នៅក្នុង​សាលារៀន​មួយ​ នៅសង្កាត់​គោក​កញ្ជាន់​ ខណ្ឌ​ពោធិ៍​សែន​ជ័យ។

លោក ស៊ឹម ឌួង អ្នកបើកប​រថយន្តឈ្នួល​ មកពី​ខេត្តព្រៃវែងប្រាប់ ​ភ្នំពេញ ​ប៉ុស្តិ៍​ នៅ​ថ្ងៃទី ២៦ ខែឧសភា​ថា ពួក​លោក​​បានធ្វើ​សំណាក មិនមាន​វី​រុស​កូ​វីដ ១៩ និង​បានធ្វើ​ច​ត្តា​ឡី​ស័ក​លើសពី ១៤ ថ្ងៃ (១៩ ថ្ងៃ) ដែល​បានកំណត់។​

ប៉ុន្តែ ឥឡូវនេះ ពួក​លោក​​ត្រូវបាន​អាជ្ញាធរ​ខណ្ឌ​ពោធិ៍​សែន​ជ័យ ឱ្យ​បង់​​ពិន័យ​​ជា​ទឹកប្រាក់ ២ លាន​រៀល​ក្នុងម្នាក់ៗ ​ទើប​ឱ្យ​​យក​រថយន្ត​ចេញ​វិញ។

លោកបន្តថា ទាំង​រូបលោកក៏ដូចជា​អ្នក​​ផ្សេងទៀត​ ពុំមាន​លទ្ធភាព​បង់លុយ​រហូត ដល់ ២ លាន​រៀល​ ទៅឱ្យ​អាជ្ញាធរ​​នោះទេ ពីព្រោះ​មួយ​រយៈ​មក​នេះ មិនបាន​រក​ស៊ី​អ្វីឡើយ​ ដោយសារ​ជាប់​ធ្វើ​ច​ត្តា​ឡី​ស័​ក​។

ទោះជា​យ៉ាងណា​លោក ស៊ឹម ឌួង បញ្ជាក់ថា លោកនិង​អ្នក​ផ្សេងទៀត មិនបាន​បំពាន​បម្រាម​របស់​អាជ្ញាធរ​ក្នុង​តំបន់​ក្រហម​នោះទេ គ្រាន់តែ​បើក​​បរ​ឆ្លងកាត់​តាម​ផ្លូវធំប៉ុណ្ណោះ។

ប៉ុន្តែ អាជ្ញាធរបាន​ឃាត់​រថយន្ត​របស់លោក និង​អ្នកធ្វើដំណើរ​ផ្សេងទៀត ឱ្យ​ទៅ​ធ្វើ​ច​ត្តា​ឡី​ស័ក ទាំង​លោក និង​អ្នក​ផ្សេងទៀត ក៏​ធ្វើ​ទៅតាម​អ្វីដែល​អាជ្ញាធរ​បាន​ប្រាប់​ និង​គោរព​​ទៅ​តាម​​​វិធានការ​របស់​រដ្ឋាភិបាល មិន​ជំទាស់​នោះទេ។

លោក ស៊ឹម ឌួង ​ថ្លែងថា៖ «ពួក​ខ្ញុំគេ​ឱ្យ​ធ្វើ​​សំណាក ពួក​ខ្ញុំ​ធ្វើធ្វើ​ច​ត្តា​ឡី​ស័ក​ ១៤ ថ្ងៃ ពួក​ខ្ញុំ​នៅ​ធ្វើ​ ប៉ុន្តែដល់​ពេលដែល​ខ្ញុំ​ចេញ គេ​មិនឱ្យ​ខ្ញុំ​ចេញ គេ​តម្រូវឱ្យ​ពួក​ខ្ញុំជា​តៃកុង​ឡាន​ហ្នឹង ត្រូវ​បង់លុយ ២ លាន​រៀល ទើប​ឱ្យយក​រថ​យន្ត​ចេញ»។

លោក ស៊ឹម ឌួង បាន​ស្នើឱ្យ​រាជរដ្ឋាភិបាល និង​មន្ត្រី​ពាក់ព័ន្ធ យោគយល់​នូវ​អ្វីដែល​អ្នកបើក​បរ​បាន​បើករថយន្ត​ឆ្លងកាត់​តំបន់​បម្រាម របស់​អាជ្ញាធរ​រាជធានី​ភ្នំពេញ និង​​សូម​ទទួលស្គាល់​កំហុស ព្រោះ​ពួកលោក​​មិនមាន​លុយ​បង់​នោះទេ។

ទោះជា​យ៉ាងណា លោក សៀង ហាក់ អ្នកបើកបរ​​រថយន្តឈ្នួល​ម្នាក់ទៀត មកពី​ខេត្ត​ត្បូងឃ្មុំបានឱ្យដឹងថា លោក​សម្រេចចិត្ត​បង់លុយ​ទៅតាម​អ្វីដែល​អាជ្ញាធរ​តម្រូវឱ្យ​បង់នោះ​ ​ពីព្រោះ​លោក មិនអាច​នៅ​​រង់​ចាំ​តវ៉ា​យូ​រទៀត​បាន​ទេ ដោយ​សារ​តែ​លោក​ មាន​ជំងឺ​ទឹក​នោម​ផ្អែម​ប្រចាំកាយ។

លោក បញ្ជាក់ថា ការបង់​លុយ​នេះ គឺលោកឱ្យ​កូន​របស់លោកខ្ចី​ប្រាក់​​គេ យកមក​បង់ ព្រោះ​ក្នុង​រយៈពេល​នៃ​ការផ្ទុះ​ឡើង​នូវ​ជំងឺ​កូ​វីដ ១៩ ហើយ​លោក​ជាប់​ធ្វើ​ច​ត្តា​ឡី​ស័ក​ ១៤ ថ្ងៃមក​នេះ គ្រួសារ​លោក ​មិនបាន​រក​ចំណូល​​អ្វី​បាន​នោះទេ។

លោក​ សៀង ហាក់​ បន្តថា ក្រៅពី​រូបលោកក៏មាន​អ្នកបើកបរ​ប្រមាណ ៣ នាក់​ផ្សេងទៀត ក៏​សម្រេចចិត្ត​បង់លុយ​ដើម្បី​បានចេញ​ដែរ។

លោក បញ្ជាក់ទៀតថា លោក មិនមាន​កំហុស​ក្នុងការ​បើករថយន្ត​ចូល​តំបន់​ក្រហម​នោះទេ ហើយ​លោក​ក៏មាន​ការខ្លាច​ឆ្លង​នូវ​ជំងឺ​កូ​វីដ ១៩ នេះដែរ ប៉ុន្តែ​អាជ្ញាធរ បាន​ឃាត់​រូបលោក និង​រថយន្ត រួមជាមួយ​នឹង​ភ្ញៀវ ៣ នាក់ ឱ្យធ្វើ​ច​ត្តា​ឡី​ស័ក​ និង​ផាកពិន័យ​ដល់​លោក។

លោក សៀក ហាក់​ថា៖ «ខ្ញុំ​សុខចិត្ត​បង់លុយហើយ ​ព្រោះ​ខ្ញុំ​អត់​ស្រួល​ក្នុង​ខ្លួន ខ្ញុំ​កើត​ជំ​ងឺ​ទឹកនោមផ្អែម មិនអាច​នៅ​តវ៉ា​​ដូច​គេ​ទេ ដើម្បី​ប្រញាប់​ទៅផ្ទះ​ដើម្បី​មើល​ជំ​ងឺ»។

បើ​តាម​លោក សៀង ហាក់ ទាំង​អ្នកបើកប​រថយន្ត ព្រូឡាន និងអ្នកធ្វើដំណើរ មាន​ចំនួន ជាង ១០០ នាក់ ដែល​ត្រូវ​បាន​​អាជ្ញាធរ​ចាប់​ឃាត់​តម្រូវ​ឱ្យធ្វើ​ច​ត្តា​ឡី​ស័​ក​ ហើយ​ពួកគេ​មិនមាន​អ្នក​​ណា​ម្នាក់​ឆ្លង​ជំងឺ​កូ​វីដ ១៩ នោះទេ។

លោក ម៉ន វុ​ធី អធិការនគរបាល​ខ​ណ្ឌ​ពោធិ៍​សែន​ជ័យ ឱ្យដឹងថា អាជ្ញាធរ​ខណ្ឌបានអនុញ្ញាត​ឱ្យ​អ្នកបើកបរ​រថយន្ត​ទាំងនោះ​ចេញ បន្ទាប់ពី​បញ្ចប់​ការ​​ធ្វើ​ច​ត្តា​ឡី​ស័​ក​ ប៉ុន្តែតម្រូវឱ្យ​ពួកគេ​​ត្រូវ​បង់ប្រាក់​​ក្នុង​រថ​ន្ត​មួយគ្រឿង ២ លាន​រៀល និង​បើ​មាន​ម៉ូ​តូ តម្រូវឱ្យ​បង់ ១ លាន​រៀល នៅ​ច្រកចេញចូល​តែមួយ​តាមផ្លូវ​ច្បាប់។

លោក ម៉ន វុ​ធី ​បញ្ជាក់​ថា ចំពោះ​ពួកគាត់​តវ៉ា​ មិន​ព្រម​បង់លុយ​ជា​រឿង​របស់​ពួកគាត់ ប៉ុន្តែបើតាម​ច្បាប់​ត្រូវបញ្ជូន​ពួកគាត់​ទៅ​តុលាការ ព្រោះ​ពួកគាត់​បើកបរ​ក្នុង​តំបន់​ក្រហម។

លោក ម៉ន វុ​ធី​ ថ្លែងថា៖ «អ្នក​ល្មើស​ចូល​តំបន់​ក្រហម គឺត្រូវ​បញ្ជូនទៅ​តុលាការ ប៉ុន្តែនេះ លោក​អភិបាល​រាជធានី​ សុំ​យោគយល់​ឱ្យ​គាត់​បង់លុយ​បាន​ហើយ ឱ្យ​ចេញទៅ»៕

វីដេអូ៖

អត្ថបទគួរចាប់អារម្មណ៍