.jpg)
អគ្គិភ័យកំពុងឆាបឆេះរាលដាលដល់រថយន្តដែលចតនៅក្បែរស្ថានីយសាំង។ រូបថត សហការី
ព្រះសីហនុៈ យ៉ាងហោចណាស់មានរថយន្ត ៤ គ្រឿង ម៉ូតូ ៣ គ្រឿង និងផ្ទះ ២ ខ្នង បានរងការខូចខាតដោយអគ្គិភ័យឆាបឆេះកាលពីវេលាម៉ោងជាង ១០ ព្រឹកម្សិលមិញនៅចំណុចក្រុម ១ ភូមិ ១ ឃុំអូរត្រេះ ស្រុកស្ទឹងហាវដែលតាមការសន្និដ្ឋាន ដំបូងបណ្តាលមកពីអ្នកបើកបររថយន្តដឹកសាំងជក់បារី។
លោក បួរ សុទ្ធី ស្នងការរងខេត្តព្រះសីហនុទទួលបន្ទុកផ្នែកបង្ការ និងពន្លត់អគ្គិភ័យបានប្រាប់ភ្នំពេញប៉ុស្តិ៍ថា មូលហេតុនាំឲ្យមានគ្រោះអគ្គិភ័យនេះកើតឡើងគឺបណ្ដាលមកពីអ្នកបើកបររថយន្តដឹកប្រេង និងម្ចាស់ដេប៉ូនោះខ្វះការប្រុងប្រយ័ត្ន នៅពេលធ្វើការបូមប្រេងពីរថយន្តដឹកប្រេងដែលមានចំណុះ ៨ ០០០ លីត្រចូលទៅក្នុងស៊ីទែនស្តុកប្រេងក្នុងដេប៉ូ។ «តាមការបំភ្លឺរបស់ម្ចាស់ដេប៉ូលក់ប្រេងឥន្ធនៈឈ្មោះ លឹម សេងលី អាយុ ២៧ ឆ្នាំបានឲ្យដឹងថា នៅពេលកំពុងបូមប្រេងផ្ទេរចេញពីរថយន្តចូលទៅក្នុងស៊ីទែនស្តុកសាំងរបស់ដេប៉ូគាត់នោះ អ្នកបើកបររថយន្តដឹកប្រេងនៃក្រុមហ៊ុន LHR បានជក់បារី»។
លោកបន្តថា៖ «ទោះយ៉ាងណាក៏ដោយ សមត្ថកិច្ចយើងនៅមិនទាន់ទទួលបានការបំភ្លឺពីអ្នកបើកបររថយន្តនោះនៅឡើយទេជុំវិញករណីនេះ ព្រោះក្រោយកើតហេតុ ផ្ទុះឆេះរថយន្តដឹកប្រេងនោះអ្នកបើកបររថយន្តបានរត់គេចខ្លួន»។
បើតាមលោក សុទ្ធី នៅក្នុងប្រតិបត្តិការពន្លត់អគ្គិភ័យនោះ សមត្ថកិច្ចបានប្រើរថយន្តពន្លត់អគ្គិភ័យ ៤ គ្រឿង និងទឹកអស់ ៤០ ម៉ែត្រគុប។ លោកថា ក្នុងករណីគ្រោះអគ្គិភ័យនេះពុំបង្កឲ្យមានគ្រោះថ្នាក់ដល់ពលរដ្ឋណាម្នាក់ឡើយ។ នៅពេលនេះសមត្ថកិច្ចជំនាញកំពុងបន្តស្រាវជ្រាវលើករណីនេះបន្ថែមទៀត៕
