ភ្នំពេញ៖ បុរសជាម្ចាស់រថយន្តហាយឡេនឌ័រ និងអ្នកបើកបរម្នាក់ដែលបើករថយន្តបុកក្មេងស្រីជាសិស្សសាលា ២ នាក់ស្លាប់ ហើយបើករថយន្តរត់គេចកាលពីយប់ថ្ងៃទី ១១ ខែធ្នូ ត្រូវបានបញ្ជូនទៅសាលាដំបូងរាជធានីភ្នំពេញ កាលពីម្សិលមិញបន្ទាប់ពីសមត្ថកិច្ចបានចាប់ខ្លួនកាលពីថ្ងៃទី ៣១ ខែធ្នូ នៅម្តុំរង្វង់មូលចោមចៅ។
លោក ប៊ុន សត្យា នាយការិយាល័យព្រហ្មទណ្ឌកម្រិតស្រាលនៃស្នងការដ្ឋាននគរបាលរាជធានីភ្នំពេញឲ្យដឹងថា ជនសង្ស័យ ២ នាក់នោះមានឈ្មោះ ឌុល សារិទ្ធ ហៅ សូត ភេទប្រុស អាយុ ៣៧ ឆ្នាំ ជនជាតិខ្មែរ មុខរបរយោធាកងពលតូចលេខ ៧០ មានលំនៅតាមផ្លូវវេងស្រេង ភូមិព្រៃជីសាក់ សង្កាត់ចោមចៅ ៣ ខណ្ឌពោធិ៍សែនជ័យ ជាអ្នកបើកបររថយន្ត និងឈ្មោះ ហេង សុខនូវ ភេទប្រុស អាយុ ៥៧ ឆ្នាំ ជនជាតិខ្មែរ មានលំនៅក្នុងបុរីពិភពថ្មី សង្កាត់គោករកា ខណ្ឌព្រែកព្នៅ គឺជាម្ចាស់រថយន្ត។
លោកឲ្យដឹងថា ជនសង្ស័យទាំង ២ នាក់ ត្រូវសមត្ថកិច្ចជំនាញស្ទាក់ចាប់បាន ខណៈពេលពួកគេកំពុងបើកបររថយន្តបង្ក នៅតាមបណ្តោយផ្លូវជាតិលេខ ៣ ម្តុំរង្វង់មូលចោមចៅ ស្ថិតក្នុងសង្កាត់ចោមចៅ ៣ ក្នុងខណ្ឌ ពោធិ៍សែនជ័យ។ ចំណែកអ្នកបើកបររថយន្ត AUDI ដែលសមត្ថកិច្ចឃាត់ខ្លួនបណ្តោះអាសន្នដោយច្រឡំនោះ ត្រូវបានអនុញ្ញាតឲ្យគាត់ត្រឡប់ទៅផ្ទះវិញហើយ។ លោកថ្លែងថា៖ «ពួកគាត់ត្រូវបានសមត្ថកិច្ចរបស់ខ្ញុំកសាងសំណុំរឿងបញ្ជូន ទៅតុលាការហើយ នៅថ្ងៃនេះ (ថ្ងៃទី ១ មករា)»។
បើតាមមន្រ្តីនគរបាលខណ្ឌជ្រោយចង្វារមួយរូប ស្នើសុំមិនបញ្ចេញឈ្មោះប្រាប់ថា កាលពីយប់ថ្ងៃទី ១១ ខែធ្នូ មានគ្រោះថ្នាក់ចរាចរណ៍មួយ គឺរថយន្ត ១ គ្រឿង បានបើកបុកយុវតីជាសិស្សសាលាឈ្មោះ ភ័ណ្ឌ ភីរ៉ាដា អាយុ ១២ ឆ្នាំ រៀនថ្នាក់ទី ៧ និងម្នាក់ទៀតឈ្មោះ ខេន កូវ៉ា អាយុ ១៣ ឆ្នាំ រៀនថ្នាក់ទី ៨ នៅសង្កាត់កោះដាច់ ខណ្ឌជ្រោយចង្វារ ហើយបានបើករថយន្តរត់គេចឡើងសាឡាងឆ្លងមករាជធានីភ្នំពេញ។
ក្រោយកើតហេតុសមត្ថកិច្ចបានស្រាវជ្រាវតាមកាមេរ៉ាសុវត្ថិភាពបានឃើញរថយន្ត AUDI ពណ៌ស ១ គ្រឿង ជាមួយនោះសាក្សីនៅកន្លែងកើតហេតុ ក៏បានបញ្ជាក់ដែរថា ពេលកើតហេតុនោះ គេបានឃើញរថយន្តហាយឡេនឌ័រ ១ គ្រឿងដែរ បានបើកបរឆ្លងសាឡាងបន្ទាប់ពីកើតមានគ្រោះថ្នាក់ចរាចរណ៍បុកក្មេងស្លាប់នោះ។
បន្ទាប់មកនៅរសៀលថ្ងៃទី ២៧ ខែ ធ្នូ ឆ្នាំ ២០១៩ សមត្ថកិច្ចនៃស្នងការដ្ឋាននគរបាលរាជធានីភ្នំពេញបានបើកការស្រាវជ្រាវ ហើយក៏ស្ទាក់ចាប់បានបុរសម្នាក់ជាអ្នកបើកបររថយន្ត AUDI ពណ៌ស ១ គ្រឿង ស្ថិតនៅក្បែរស្ពានលីយ៉ុងផាត់ ក្នុងខណ្ឌជ្រោយចង្វារ។ ប៉ុន្តែនៅថ្ងៃទី ៣១ ខែធ្នូ សមត្ថកិច្ចបានស្រាវជ្រាវឈានទៅចាប់អ្នកបង្កគ្រោះថ្នាក់ចរាចរណ៍ពិតប្រាកដបាន ២ នាក់ ជាមួយរថយន្តហាយឡេនឌ័រ ១ គ្រឿង ដែលបង្កគ្រោះថ្នាក់ចរាចរណ៍នោះ។
តាមគេហទំព័ររបស់អគ្គស្នងការនគរបាលជាតិបានចុះផ្សាយកាលពីម្សិលមិញថា កាលពីថ្ងៃទី ៣១ ធ្នូ កន្លងមក លោក នេត សាវឿន អគ្គស្នងការនគរបាលជាតិ បានផ្តល់ថវិកាចំនួន ១០ លានរៀល ដល់លោកអនុសេនីយ៍ឯក ព្រេម សោភណ្ឌ ជាមន្ដ្រីនៅការិយាល័យនគរបាលចរាចរណ៍រាជធានីភ្នំពេញដែលជាឪពុករបស់ក្មេងស្រីរងគ្រោះឈ្មោះ ភណ្ឌ ភីរ៉ាដា៕