ភ្នំពេញៈ គណៈកម្មាធិការជាតិសុវត្ថិភាពចរាចរណ៍ផ្លូវគោកបានឲ្យដឹងនៅក្នុងអំឡុងកិច្ចប្រជុំមួយជាមួយនិយោជកនៃក្រុមហ៊ុនរថយន្តដឹកទំនិញធ្ងន់ៗ និងដឹកអ្នកដំណើរថា អ្នកបើករថយន្តដឹកទំនិញធ្ងន់ៗត្រូវបានរកឃើញមានប្រើគ្រឿងញៀនកើនឡើង ៥០ ភាគរយក្នុងរយៈពេល ៦ ខែឆ្នាំ ២០១៨ បើធៀបនឹងរយៈពេលដូចគ្នាក្នុងឆ្នាំ ២០១៧។
លោក ហ៊ឹម យ៉ាន អនុប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោកបានជួបប្រជុំជាមួយតំណាងក្រុមហ៊ុនរថយន្តដឹកទំនិញ និងដឹកអ្នកដំណើរកាលពីថ្ងៃទី ២១ ខែសីហានៅអគ្គស្នងការដ្ឋាននគរបាលជាតិថា៖ «យើងបានពិនិត្យអ្នកបើកបររថយន្ត និងជំនួយការ អ្នកបើករថយន្តជិត ៧០០ នាក់ អ្នកបើករថយន្ត ៩៤ នាក់មានប្រើប្រាស់គ្រឿងញៀនគឺ ១៤ ភាគរយ ហើយពួកគេបើករថយន្តដឹកទំនិញធ្ងន់ៗ»។
លោក យ៉ាន បានថ្លែងថាក្នុងឆ្នាំ ២០១៨ នេះមានអ្នកប្រើប្រាស់គ្រឿងញៀនកើនឡើង ៥០ ភាគរយបើធៀបទៅនឹងឆ្នាំ ២០១៧។
លោកបន្តថា៖ «ខ្ញុំមិនចាំថា តើមានអ្នកបើករថយន្ត និងជំនួយការអ្នកបើករថយន្តសរុបចំនួនប៉ុន្មានទេ ប៉ុន្តែការប្រៀបធៀប ៦ ខែក្នុងឆ្នាំ ២០១៧ មានជំនួយការអ្នកបើកបររថយន្តប្រមាណ ៤៧ នាក់បានប្រើប្រាស់គ្រឿងញៀន»។
លោកបន្តថា៖ «យើងបានសូមឲ្យម្ចាស់ក្រុមហ៊ុនពិនិត្យអ្នកបើកបររថយន្តរបស់ពួកគេ និងតាមដានការបើកបរប្រចាំថ្ងៃរបស់ពួកគេ។ ពួកគេត្រូវផ្តល់ប្រវត្តិរូបរបស់អ្នកបើកបរទៅនគរបាលជាតិ»។
លោក យ៉ាន បានលើកឡើងថា ការពិនិត្យរកជាតិគ្រឿងញៀនទៅលើអ្នកបើករថយន្ត និងការអំពាវនាវឲ្យនិយោជករបស់អ្នកបើករថយន្តដឹកទំនិញគឺជាផ្នែកនៃការបង្ការគ្រោះថ្នាក់ចរាចរណ៍ ហើយអ្នកបើករថយន្តដែលរកឃើញថា ប្រើប្រាស់គ្រឿងញៀន និងមានសារជាតិគ្រឿងញៀនត្រូវបានចាប់ខ្លួន និងចោទប្រកាន់ទៅតាមច្បាប់។
លោកបានថ្លែងបន្តថា៖ «វាគ្រាន់តែជាការបង្ការរបស់យើង។ ការបើកបរហួសល្បឿននៅតែជាបុព្វហេតុចម្បងដែលធ្វើឲ្យកើតមានគ្រោះថ្នាក់ចរាចរណ៍ ៣៦ ភាគរយ និងហេតុផលមួយទៀតគឺការបើកវ៉ា និងការបើកបរស្រវឹងតែ ៦ ភាគរយ»។
លោកបានបញ្ជាក់ថា៖ «យើងសូមឲ្យក្រុមហ៊ុន និងអ្នកដំណើរប្រុងប្រយ័ត្នឲ្យបានខ្ពស់។ នៅពេលពួកគេជ្រើសរើសអ្នកបើកបររថយន្តត្រូវពិនិត្យរកសារជាតិគ្រឿងញៀន និងប្រវត្តិណាមួយ និងការបើកបរប្រចាំថ្ងៃរបស់អ្នកបើកបរទាំងនោះ»។
លោក អៀរ ចរិយា នាយកស្ថាបនិកនៃវិទ្យាស្ថានដើម្បីសុវត្ថិភាពចរាចរណ៍ផ្លូវគោកបានថ្លែងថា វាជាហានិភ័យដែលធ្វើឲ្យមានទាំងគ្រោះថ្នាក់ចរាចរណ៍ និងទាំងបញ្ហាសុខភាពរបស់អ្នកបើកបរ។
លោកបានបន្ថែមថា៖ «ដោយសារពួកគេមិនអាចគ្រប់គ្រងការបើកបររបស់ពួកគេបាន ពួកគេក្លាហានពេក និងអ្នកដែលកំពុងទទួលទានស្រា»។
លោកបានថ្លែងថា៖ «ខ្ញុំបានឃើញអាជ្ញាធរជួបនិយោជក ពួកគេគួរធ្វើវាជាទៀងទាត់ និងបង្កើនការពិនិត្យទៅលើផ្លូវជាតិសំខាន់ៗ។ អ្នកបើកបរដឹងអំពីគ្រោះថ្នាក់ ប៉ុន្តែពួកគេនៅតែបំពាន ដោយសារការអនុវត្តច្បាប់មិនរឹងមាំ»។
លោក តាន់ គីមហួត ប្រធានផ្នែកហិរញ្ញវត្ថុនៅក្រុមហ៊ុនដឹកជញ្ជូនសូរិយាភ្នំពេញដែលមានអ្នកបើករថយន្ត និងជំនួយការអ្នកបើករថយន្តប្រមាណ ១០០ នាក់បានថ្លែងថា ក្រុមហ៊ុនរបស់លោកពីមុនជ្រើសរើសបុគ្គលិកគឺតម្រូវឲ្យធ្វើតេស្តរកសារជាតិគ្រឿងញៀនជាមុន។
លោកបានបន្តថា៖ «យើងពិនិត្យទឹកនោមពួកគេ ដើម្បីស្វែងរកសារជាតិគ្រឿងញៀន ប្រសិនបើយើងរកឃើញ យើងមិនជួលពួកគេធ្វើការទេ ហើយសូម្បីតែបន្ទាប់ពីបានជួលពួកគេធ្វើការហើយក៏ដោយ យើងនៅតែធ្វើតេស្តរកសារជាតិគ្រឿងញៀនរៀងរាល់ ៣ ខែ និងរៀងរាល់ ៦ ខែដោយសារយើងពិតជាបារម្ភអំពីសុវត្តិភាពអតិថិជនរបស់យើង»៕ PS