ភ្នំពេញៈ លទ្ធផលប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) នៅឆ្នាំនេះ បានបង្ហាញថា អ្នកជាប់មាន ៦៦,២១ ភាគរយ ស្មើនឹង ៧៥ ០៥៩ នាក់ ចាប់ពីនិទ្ទេស A ដល់ E ជាចំនួនដែលកើនឡើងជាងឆ្នាំមុន ចំនួន ២,៣៧ ភាគរយ ដែលមានអ្នកជាប់តែ ៦៣,៨៤ ភាគរយ ប៉ុន្តែនិទ្ទេស A, B និង C ធ្លាក់ចុះ។ នេះបើតាមសេចក្ដីប្រកាសរបស់ក្រសួងអប់រំ យុវជន និងកីឡានៅថ្ងៃនេះ។
បើតាមសេចក្ដីប្រកាស អ្នកជាប់និទ្ទេស A មាន ២៩០ នាក់, និទ្ទេស B មាន ១ ៥៣២, និទ្ទេស C មាន ៤ ៦៣១ នាក់, និទ្ទេស D មាន ១៣ ៩៩៩ នាក់ និងនិទ្ទេស E មាន ៥៤ ៦០៧ នាក់។
យ៉ាងណាក្ដី សម្រាប់អ្នកជាប់និទ្ទេស A មានត្រឹម ២៩០ នាក់ប៉ុណ្ណោះនៅក្នុងឆ្នាំនេះ គឺបានធ្លាក់ចុះជាងឆ្នាំមុនដែលមានរហូតដល់ ៤២៤ នាក់នៅទូទាំងប្រទេស ខណៈនិទ្ទេស B និង C ក៏ធ្លាក់ចុះដូចគ្នា។
បើតាមសេចក្ដីប្រកាសព័ត៌មានដដែល ការធ្លាក់ចុះនិទ្ទេស A , B និង C នេះគឺដោយសារក្រសួងអប់រំបានបង្កើនស្ដង់ដារប្រធានវិញ្ញាសាប្រឡងឲ្យខ្លាំងជាងមុនក្នុងគោលដៅពង្រឹងគុណភាពអប់រំនិងជំរុញបេក្ខជនឲ្យខិតខំរៀនសូត្រ។
សូមបញ្ជាក់ថាបេក្ខជនចូលរួមប្រឡងយកសញ្ញាបត្រមធ្យមសិក្សាទុតិយភូមិនៅឆ្នាំ ២០១៨ នេះមានសរុប ១១៥ ២៦៨ នាក់ក្នុងនោះមានស្រី ៥៨ ១៥៨ នាក់។ ប៉ុន្តែការប្រកាសលទ្ធផលផ្លូវការទើបតែធ្វើនៅរាជធានីភ្នំពេញ និង ខេត្តកណ្ដាលប៉ុណ្ណោះនៅថ្ងៃទី ៩ កញ្ញានេះ ខណៈខេត្តផ្សេងទៀតត្រូវប្រកាសនៅថ្ងៃស្អែក៕