.jpg)
ពលរដ្ឋនៅឃុំក្បាលរមាសបិទច្រកហាមមនុស្សពីខាងក្រៅចូលសហគមន៍ដើម្បីបង្ការការចម្លងជំងឺកូវីដ១៩។ រូបថត ហ្វេសប៊ុក
ស្ទឹងត្រែងៈ តំណាងសហគមន៍ភូមិក្របីជ្រុំ ឃុំក្បាលរមាស ស្រុកសេសាន ខេត្តស្ទឹងត្រែងបាននិយាយកាលពីថ្ងៃទី ២៤ មីនា ថាដើម្បីបង្ការទប់ស្កាត់ការឆ្លងរីករាលដាលនៃជំងឺកូវីដ ១៩ អ្នកភូមិបានសម្រេចហាមឃាត់មនុស្សពីខាងក្រៅសហគមន៍ ចេញ-ចូលនៅក្នុងសហគមន៍របស់ពួកគេជាបណ្ដោះអាសន្ន។
លោក ស៊ីឡា ផន អាយុ ៦៥ ឆ្នាំជាតំណាងសហគមន៍ភូមិក្របីជ្រុំបានប្រាប់ភ្នំពេញប៉ុស្តិ៍ថា បន្ទាប់ពីមន្ត្រីសុខាភិបាលរួមទាំងអាជ្ញាធរមូលដ្ឋានចុះផ្សព្វផ្សាយអប់រំណែនាំអំពីវិធីបង្ការទប់ស្កាត់ការឆ្លងជំងឺកូវីដ ១៩ អ្នកភូមិក្របីជ្រុំបានឯកភាពគ្នា បិទច្រកចេញ-ចូលនៅក្នុងភូមិនេះជាបណ្ដោះអាសន្ន ដើម្បីបង្ការមនុស្សពីខាងក្រៅសហគមន៍ដែលសង្ស័យមានផ្ទុកជំងឺកូវីដនោះចូលមកបង្កការឆ្លងរីករាលដាលដល់មនុស្សនៅក្នុងសហគមន៍របស់ពួកគេ។
លោកផនអះអាងថាពលរដ្ឋនៅក្នុងសហគមន៍ភូមិក្របីជ្រុំ ភាគច្រើនជាជនជាតិភាគតិចឡាវ និងព្នង។
លោកបាននិយាយថា៖ «តាមជំនឿពីដូនតារបស់ពួកយើង បើក្នុង ១ ខែមានអ្នកភូមិចាប់ពី ៣ នាក់ឡើងទៅស្លាប់បន្តបន្ទាប់គ្នានោះ អ្នកភូមិទាំងអស់ត្រូវនាំគ្នារៀបចំពិធីបន់ស្រន់ដល់ព្រលឹងដូនតា និងអារុកអារក្ខអ្នកតាម្ចាស់ស្រុក ដើម្បីសុំសេចក្ដីសុខ ហើយបើមានជំងឺរាតត្បាតគឺត្រូវនាំគ្នាហាមឃាត់មនុស្សពីក្រៅសហគមន៍ចេញ-ចូលនៅក្នុងភូមិ»។
បើតាមលោក ស៊ីឡា ផន នៅក្នុងខែមីនានេះមានអ្នកភូមិ ៣ នាក់បានឈឺស្លាប់ដោយជំងឺផ្សេងៗ ប៉ុន្តែមិនពាក់ព័ន្ធជំងឺកូវីដ ១៩ នោះទេ។ អ្នកភូមិម្នាក់បានស្លាប់កាលពីដើមខែមីនាដោយជំងឺគ្រុនពោះវៀន ចំណែកម្នាក់ទៀតបានស្លាប់កាលពី ១ សប្តាហ៍មុនដោយសារខ្យល់គរ ឬគាំងបេះដូង។ ចំណែកអ្នកភូមិម្នាក់ទៀតឈ្មោះ ប៉ម អាយុ ៥៨ ឆ្នាំជាជនជាតិព្នងបានស្លាប់កាលពីថ្ងៃទី ២៣ ខែមីនានេះ ដោយសារជំងឺរលាកក្រពះ។
លោកបញ្ជាក់ថា៖ «មុនដំបូងអ្នកភូមិយើងឯកភាពគ្នាបិទតែក្នុងរយៈពេល ២-៣ ថ្ងៃ ឬត្រឹម ១ សប្ដាហ៍ប៉ុណ្ណោះ ប៉ុន្តែពេលនេះការបិទនោះអាចនឹងអូសបន្លាយរយៈពេលយូរ ព្រោះយើងបារម្ភអ្នកមកពីក្រៅសហគមន៍នាំជំងឺកូវីដ ១៩ មកចម្លងដល់អ្នកភូមិរបស់យើង»។
យ៉ាងណាក៏ដោយលោក ចាន់ ផល្លី សមាជិកក្រុមប្រឹក្សាឃុំក្បាលរមាស និយាយថាការប្រតិបត្តិតាមជំនឿតពីដូនតារបស់អ្នកភូមិក្របីជ្រុំ ដោយធ្វើការហាមឃាត់មនុស្សពីខាងក្រៅចេញចូលនៅក្នុងសហគមន៍របស់ពួកគេនាពេលនេះគឺជារឿងល្អប្រសើរបំផុត ខណៈពលរដ្ឋ និងអាជ្ញាធរនៅទូទាំងប្រទេសកំពុងមមាញឹកក្នុងការប្រយុទ្ធប្រឆាំង ការឆ្លងរីករាលដាលនៃជំងឺកូវីដ១៩។
លោកថ្លែងថា៖ «ពេលខ្លះការប្រតិបត្តិត្រណមតាមជំនឿពីដូនតាអាចជួយឲ្យយើងទាំងអស់គ្នានៅសហគមន៍ ឬក្នុងផ្ទៃប្រទេសទាំងមូលអាចគេចផុតពីការឆ្លងជំងឺរាតត្បាតផ្សេងៗ។ ពិសេសក្នុងអំឡុងពេលនេះមិនចំពោះតែប្រទេសកម្ពុជាយើងទេពិភពលោកទាំងមូលកំពុងប្រឈមចំពោះការឆ្លងរីករាលដាលនៃជំងឺកូវីដ ១៩ ដែលកើតចេញមុនដំបូងគេក្នុងប្រទេសចិន»។
បើតាមលោក ផល្លី ក្នុងរយៈពេលប៉ុន្មានថ្ងៃជាប់គ្នានេះ អាជ្ញាធរមូលដ្ឋានបានសហការជាមួយមន្ត្រីនៃមន្ទីរសុខាភិបាលខេត្តស្ទឹងត្រែង ចុះផ្សព្វផ្សាយអំពីវិធានបង្ការទប់ស្កាត់ការឆ្លងជំងឺកូវីដ ១៩ ដល់ប្រជាពលរដ្ឋនៅក្នុងសហគមន៍មូលដ្ឋាន។ អាជ្ញាធរបានអំពាវនាវឲ្យពលរដ្ឋ អនុវត្តវិធានអនាម័យស្អាតជាប្រចាំដោយត្រូវលាងសម្អាតដៃនឹងសាប៊ូ ឬអាល់កុល មុននិងក្រោយពេលប៉ះពាល់វត្ថុអ្វីមួយដែលមិនស្អាត។
ត្រូវរក្សាគម្លាតសុវត្ថិភាពពីមនុស្សដែលមកពីក្រៅសហគមន៍ក្នុងរយៈចម្ងាយយ៉ាងតិច ១,៥ ម៉ែត្រ។ ត្រូវរាយការណ៍ជាបន្ទាន់ដល់សមត្ថកិច្ច ប្រសិនបើឃើញញាតិមិត្ត បងប្អូន ដែលធ្វើចំណាកស្រុកទៅរកការងារធ្វើនៅប្រទេសជិតខាង ឬបណ្ដាខេត្តនានាដែលមានផ្ទុះករណីឆ្លងជំងឺកូវីដ ១៩ ហើយពេលពួកគេត្រឡប់មកភូមិស្រុកវិញ៕
