The Phnom Penh Post Search

Search form




Logo of Phnom Penh Post newspaper Phnom Penh Post - អ្នកភូមិ​រាប់​រយ​នាក់​រស់​​នៅ​លើ​ភ្នំ​គូលែន នឹង​ត្រូវ​​ផ្លាស់​ចេញ

អ្នកភូមិ​រាប់​រយ​នាក់​រស់​​នៅ​លើ​ភ្នំ​គូលែន នឹង​ត្រូវ​​ផ្លាស់​ចេញ

Content image - Phnom Penh Post
ផ្ទះនិងរោងសង់នៅក្បែរព្រះអង្គធំ លើ​ភ្នំ​គូលែន ជា​កន្លែង​ដែល​អាជ្ញាធរ​ត្រូវបណ្តេញចេញ។ រូបថត សហការី

អ្នកភូមិ​រាប់​រយ​នាក់​រស់​​នៅ​លើ​ភ្នំ​គូលែន នឹង​ត្រូវ​​ផ្លាស់​ចេញ

សៀមរាប៖ អ្នក​ភូមិ​រាប់​រយ​នាក់​ដែល​នៅ​តំបន់​ប្រវត្តិសាស្រ្ត​ភ្នំ​គូលែន ​ក្នុង​ខេត្ត​សៀមរាប​មាន​ការ​ភ្ញាក់​ផ្អើល​ បន្ទាប់​ពី​រដ្ឋា​ភិបាល​​ប្រកាស​ថា ​នឹង​ផ្លាស់ប្តូរ​ពួក​គេ​ទៅ​នៅ​កន្លែង​ផ្សេង​ជា​ផ្នែក​នៃ​គម្រោង​មួយ​ដើម្បី​​ទទួល​បាន​ការ​ចុះ​បញ្ជី​បេតិកភ័ណ្ឌ​ពិភព​លោក​​របស់​អង្គការ​យូណេស្កូ​​សម្រាប់​កន្លែង​នេះ។

លោក ភួង លីណា ​ប្រធាន​មន្ទីរ​បរិស្ថាន​ខេត្ត​សៀមរាប​ ​កាល​ពី​ម្សិលមិញ​បាន​បញ្ជាក់​ចំពោះ​ព័ត៌​មាន​​ដែល​អ្នក​ភូមិ​បាន​ទទួល​កាល​ពី​ចុង​សប្តាហ៍។

លោក លីណា ថ្លែង​ថា៖ «គ្រួសារ​ប្រហែល ​៣០០ ​គ្រួសារ​ ​​ដែល​ភាគ​ច្រើន​បំផុត​ជា​ទាហាន​​និង​​គ្រួសារ​អ្នក​ចំណូល​ថ្មី​​ដែល​រស់​នៅ​ជិត​​តំបន់​​ព្រះ​អង្គធំ​នៅ​លើ​ភ្នំ​គូលែន​​នឹង​ត្រូវ​​ផ្លាស់ប្តូរ​ ​ឲ្យ​ទៅ​នៅ​កន្លែង​ថ្មី​​នា​ពេល​ខាង​មុខ​ឆាប់​ៗ​នេះ​​​ ដោយ​សារ​​ការ​រស់​នៅ​របស់​ពួក​គេ​​កំពុង​ប៉ះ​ពាល់​បរិស្ថាន​​​ឧទ្យាន​ជាតិ​»។

ទោះ​យ៉ាង​ណា​ក្តី ​លោក​បន្ថែម​ថា ​អ្នក​ដែល​បាន​រស់​នៅ​​​ទី​នោះ​អស់​រយៈ​ពេល​​យូរ​ រហូត​ដល់ ​២០​ ឆ្នាំ​ ​នឹង​មិន​ត្រូវ​បាន​ផ្លាស់ប្តូរ​ទេ។

ប៉ុន្តែ​មិន​ទាន់​មាន​ភាព​ច្បាស់លាស់​អំពី​ផែន​ការ​​របស់​​ក្រសួង​នៅ​ឡើយ​ទេ ខណៈ​​លោក លីណា ​ទទួល​ស្គាល់​​ថា លោក​មិន​ដឹង​ថា ​​​នៅ​ពេល​ណា​​​អ្នក​ភូមិ​​នឹង​ត្រូវ​ផ្លាស់ប្តូរ​​ ឬ​ ទៅ​កន្លែង​ណា​​នោះ​ទេ​ ​ប៉ុន្តែ​លោក​បាន​​អះ​អាង​ថា នឹង​ទៅ​អតីត​ផ្ទះ​របស់​ពួក​គេ​​នៅ​ជិត​ៗ​នោះ​។ លោក​មិន​បាន​លើក​ឡើង​អំពី​​សំណង​​ជា​ប្រាក់​​ទេ​។

លោក​ថ្លែង​ថា​៖ «​ពួក​គេ​​ប្រហែល​ជា​​នឹង​ត្រូវ​ឲ្យ​ទៅ​នៅ​​ជើង​ភ្នំ​ ហើយ​យើង​ប្រហែល​ជា​​ឲ្យ​ពួក​គេ​​នៅ​ដី​មួយ​ដុំ​​ធំ​ជាង​​កន្លែង​បច្ចុប្បន្ន​»។ 

លោក លីណា បាន​បន្ថែម​ថា​៖ «​យើង​នឹង​រើ​ផ្ទ​របស់​ពួក​គេ​ ប៉ុន្តែ​​យើង​នឹង​​រក្សា​អាជីវកម្ម​របស់​ពួក​គេ​​នៅលើ​ភ្នំ​ពេញ​ ដោយ​មិន​ប៉ះពាល់»។

គម្រោង​នេះ​គឺ​ធ្វើ​ឡើង​បន្ទាប់​ពី​មាន​សំណើ​ពី​ក្រសួង​បរិស្ថាន​ទៅ​គណៈ​កម្មាធិការ​សម្របសម្រួល​អន្តរជាតិ​​សម្រាប់​ការ​ការ​ពារ​​និង​អភិវឌ្ឍន៍​តំបន់​ប្រវត្តិ​សាស្រ្ត​អង្គរ​ (ICC-Angkor) ​ដើម្បី​អភិវឌ្ឍន​ផែន​ការ​មេ​​សម្រាប់​ការ​គ្រប់​គ្រង​តំបន់​ឧទ្យាន​ជាតិ​​នៅ​ក្នុង​កិច្ច​ខិត​ខំ​ប្រឹង​ប្រែង​ដាក់​តំបន់​នេះ​ទៅ​ក្នុង​បញ្ជី​បេតិកភ័ណ្ឌ​ពិភព​លោក​ ​ដែល​នេះ​ជា​ការងារ​មួយ​ដែល​តម្រូវ​ឲ្យ​មាន​ការ​កំណត់​ចំនួន​ប្រជាជន។

លោក ឈិន វន្នី អាយុ​ ៤៣ ​ឆ្នាំ​​ជា​ប្រជាពលរដ្ឋ​ម្នាក់​ដែល​នៅ​ក្នុង​តំបន់​នេះ​តាំង​ពី​ឆ្នាំ​ ២០០០​ បាន​ថ្លែង​ថា ចម្ងាយ​ពី​ផ្ទះ​បច្ចុប្បន្ន​របស់​លោក​ទៅ​​ជើង​ភ្នំ​​គឺ​​មាន​​ចម្ងាយ​រហូត​ដល់​ ២០ ​គីឡូ​។

លោក វន្នី បាន​ថ្លែងថា៖ «ខ្ញុំ​នឹង​មិន​ទៅ​ណា​ទេ។ ​ខ្ញុំ​គ្រាន់​តែ​ចង់​រស់​នៅ​ទី​នេះ​។»​ «យើង​ពិបាក​ចិត្ត​ណាស់​ព្រោះ​យើង​មិន​បាន​កាប់​ឈើ​ទេ ​យើង​មិន​បាន​ធ្វើ​ឲ្យ​មាន​បញ្ហា​ណា​មួយ​ដល់​ឧទ្យាន​ទេ​ យើង​គ្រាន់​តែ​រស់​នៅ​ទី​នោះ​​ជា​មួយ​ធម្មជាតិ​​ដើម្បី​លក់​វត្ថុ​អនុស្សាវរីយ៍​​ទៅ​ភ្ញៀវ​ទេសចរ»។

មន្រ្តី​អាជ្ញាធរ​អប្សរា​ ឈាន រដ្ឋា បាន​ថ្លែង​ថា​ ​អាជ្ញាធរ​​បាន​គ្រប់​គ្រង​​ឧទ្យាន​នេះ​ចាប់​តាំង​ពី​មាន​ព្រះ​រាជ​ក្រឹត្យ​​ឆ្នាំ ​១៩៩៦​ ហើយ​លោក​បាន​សង្កត់​ធ្ងន់​ថា​៖ «​​ការ​ងារ​របស់​​យើង​​គឺ​ផ្តោត​ទៅ​លើ​ការ​អភិរក្ស​​និង​ធ្វើ​ការ​ស្រាវ​ជ្រាវ​​បុរាណ​វិទ្យា​នៅ​ឧទ្យាន​​»៕PS

អត្ថបទគួរចាប់អារម្មណ៍