កំពង់ឆ្នាំងៈ យ៉ាងហោចណាស់មានអ្នកភូមិចំនួន ៦ នាក់ក្នុងចំណោមអ្នកភូមិរហូតដល់ជាង ១០០ នាក់បានស្លាប់ដែលអាជ្ញាធរសង្ស័យថា បណ្តាលមកពីពុលទឹក និងពុលស្រាសក្នុងរយៈពេល ២ ថ្ងៃកន្លងមកនៅក្នុងភូមិជីប្រ៉ង ឃុំជៀប ស្រុកទឹកផុស។
លោក ប្រាក់ វ៉ុន ប្រធានមន្ទីរសុខាភិបាលខេត្តកំពង់ឆ្នាំង បានប្រាប់ភ្នំពេញប៉ុស្តិ៍ពីម្សិលមិញថា ករណីពុលស្រាសនេះកើតមានឡើងនៅវេលាម៉ោងប្រមាណជា ៤ រសៀលថ្ងៃទី ២៨ ខែវិច្ឆិកា បន្ទាប់ពីមានពលរដ្ឋម្នាក់មានអាការមិនស្រួលខ្លួនដូចជា ឈឺក្បាល វិលមុខ តឹងទ្រូង ថប់ដង្ហើម និងក្អួតចង្អោរ បន្ទាប់មកមានប្រជាពលរដ្ឋជាបន្តបន្ទាប់មានអាការដូចគ្នានេះកើតឡើង។
លោកថ្លែងថា៖ «រហូតមកដល់ថ្ងៃនេះ ( ២៩ វិច្ឆិកា) ប្រជាពលរដ្ឋដែលពុលស្រាសក្នុងពិធីបុណ្យសពដែលមានពលរដ្ឋចំនួន ២ នាក់បានស្លាប់ដោយសារពុលទឹក មានរហូតទៅដល់ ១០១ នាក់ដែលក្នុងនោះបានស្លាប់ចំនួន ៤ នាក់នៅមន្ទីរពេទ្យខេត្ត និងមន្ទីរពេទ្យនៅរាជធានីភ្នំពេញដោយសារពួកគេមានអាការធ្ងន់ធ្ងរជាងគេ»។
អ្នកដែលពុលស្រាសនេះមានអាយុចន្លោះពីជាង ២០ ឆ្នាំទៅដល់ ៦០ ឆ្នាំ ហើយអ្នកពុលខ្លះមានអាការធូរស្រាលនឹងអាចអនុញ្ញាតឱ្យត្រឡប់ទៅផ្ទះវិញ។ លោកមានប្រសាសន៍ថា អាជ្ញាធរបានប្រមូលនូវសំណាកដែលមានស្រាស និងស្រាថ្នាំដែលប្រជាពលរដ្ឋបានពិសាក្នុងពិធីបុណ្យផ្ញើមកមន្ទីរពិសោធន៍នៃវិទ្យាស្ថានប៉ាស្ទ័រកម្ពុជានៅរាជធានីភ្នំពេញ ដើម្បីពិនិត្យមើលឱ្យបានច្បាស់ថា តើមូលហេតុនៃការពុលស្រាសនេះបណ្តាលមកពីអ្វីពិតប្រាកដ។
លោកបានបន្តថា៖ «មកដល់ពេលនេះ យើងមិនទាន់ទទួលបានលទ្ធផលជាផ្លូវការយ៉ាងណានោះទេ ប៉ុន្តែខ្ញុំបានធ្វើការសន្និដ្ឋានជាបឋមថា ករណីពុលនេះគឺបណ្តាលមកពីស្រាសដែលមានសារជាតិមេតាណុលច្រើនហួសកម្រិត»។ លោកបន្ថែមថា មន្ទីរសុខាភិបាលខេត្តតែងតែធ្វើការផ្សព្វផ្សាយ និងអំពាវនាវទៅដល់ប្រជាពលរដ្ឋកុំឱ្យពិសាស្រាសណាដែលមានការផលិតមិនត្រឹមត្រូវតាមស្តង់ដាបច្ចេកទេស។
អ្នកនាំពាក្យក្រសួងសុខាភិបាល លោកស្រី ឱ វណ្ណឌីន បានប្រាប់ឱ្យដឹងកាលពីថ្ងៃទី ២៨ ខែវិច្ឆិកាថា ករណីសង្ស័យពុលស្រាសនេះបានកើតឡើងក្នុងចំណោមអ្នកដែលបានធូរស្រាលពីពុលទឹកដោយសារថ្នាំបាញ់នៅចម្ការឪឡឹកនៅក្នុងទីតាំងជាមួយគ្នាដែលអ្នកទាំងនេះបានទៅចូលរួមពិធីបុណ្យសពអ្នកភូមិដែលបានស្លាប់ពីការពុលទឹក។
លោកស្រីថ្លែងថា បន្ទាប់ពីមានហេតុការណ៍ភ្លាមៗនោះដែរ រដ្ឋមន្រ្តីក្រសួងសុខាភិបាល លោក ម៉ម ប៊ុនហេង បានចាត់ក្រុមការងារចុះទៅពិនិត្យ និងអន្តរាគមន៍ជួយជាបន្ទាន់ និងបានពិភាក្សាជាមួយអភិបាលខេត្តកំពង់ឆ្នាំង ដើម្បីបញ្ឈប់ការលក់ និងចែកចាយស្រាសនោះជាបន្ទាន់ផងដែរ។
លោកស្រីថា៖ «សូមបងប្អូនកុំពិសាស្រាសដែលរៀបចំគ្មានបច្ចេកទេសត្រឹមត្រូវ ដើម្បីចៀសផុតពីការពុលដែលធ្វើឲ្យបាត់បង់ជីវិត»។
ករណីពុលស្រាស និងស្រាថ្នាំនេះគឺកើតមានក្នុងពិធីបុណ្យសពដែលអ្នកស្លាប់នោះគឺស្លាប់ដោយសារពុលទឹកដែលពួកគាត់ហូបនោះមានសារធាតុគីមីពុល ដែលធ្វើឱ្យមានជនរងគ្រោះសរុបពីការពុលទឹកនេះរហូតដល់ចំនួន ១៣ នាក់ (ស្រី ៨ នាក់ និងប្រុស ៥ នាក់) មានអាយុពី ៤ ឆ្នាំ ដល់ ៥៣ ឆ្នាំ។
បើតាមលោកស្រី ឱ វណ្ណឌីន ករណីពុលទឹកនេះបណ្តាលឱ្យស្រ្តីចំនួន ២ នាក់ស្លាប់ និង ១១ នាក់ទៀតត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យខេត្តកំពង់ឆ្នាំង។
បើតាមរបាយការណ៍ពីមន្ទីរសុខាភិបាលខេត្តកំពង់ឆ្នាំងនៅថ្ងៃទី ២៤ ខែវិច្ឆិកា ប្រហែលម៉ោង ១១ ថ្ងៃត្រង់ ជនរងគ្រោះទាំងនេះបានអស់ទឹកសម្រាប់បរិភោគ ហើយក៏បានទៅដងទឹកអណ្តូងដែលគេជីកនៅតាមវាលស្រែយកទឹកសម្រាប់ប្រើប្រាស់ និងយកមកចែកគ្នាបរិភោគពេលបាយថ្ងៃត្រង់ ខណៈដែលនៅព្រឹកនោះគេឃើញកសិករដាំឪឡឹកក្បែរនោះ បានយកធុងថ្នាំបាញ់ឪឡឹកទៅលាងនៅទីនោះ។
របាយការណ៍បន្តទៀតថា ក្រោយពីពិសាទឹកនោះបន្តិចមកមានស្ត្រីម្នាក់ចេញសញ្ញាក្អួតចង្អោរ តែមិនមានអ្នកណាចាប់អារម្មណ៍ថា ពុលថ្នាំទេ ដោយស្មានថា ខ្យល់ចាប់ និងជាបន្តបន្ទាប់មានអ្នកអស់កម្លាំងឈឺក្បាល ទន់ដៃជើង ពិបាកដកដង្ហើមរហូតដល់ទៅ ១១ នាក់ និងបានស្លាប់ ២ នាក់ក្នុងថ្ងៃដដែលនោះ។
បច្ចុប្បន្នស្ថានភាពអ្នកពុលស្រា និងពុលទឹកទាំងនោះមានសភាពធូរស្រាល និងបានវិលត្រឡប់ទៅផ្ទះសំបែងរៀងៗខ្លួនវិញហើយ នៅសល់តែស្ត្រីអាយុ ៥៣ ឆ្នាំម្នាក់ប៉ុណ្ណោះត្រូវនៅបន្តព្យាបាលដោយសារតែគាត់មានជំងឺសួត៕
វីដេអូ៖