ព្រះវិហារៈ ពលរដ្ឋ ៣ នាក់ដែលមានទំនាស់ដីធ្លីជាមួយក្រុមហ៊ុនឯកជនមួយនៅខេត្តព្រះវិហារត្រូវបានទាហាន ការពារក្រុមហ៊ុននេះចាប់ខ្លួនកាលពីចុងសប្តាហ៍មុន ប៉ុន្តែក្រោយមកក្រុមគ្រួសារនិងពលរដ្ឋជាច្រើននាក់បានផ្តុំគ្នាតវ៉ានិងបានចាប់ខ្លួនទាហាន ២ នាក់វិញជាថ្នូរនឹងការផ្ដល់ដំណឹងពីទីកន្លែងឃុំខ្លួនពលរដ្ឋ ៣ នាក់នោះ។
តំណាងពលរដ្ឋ លោក ឡាយ លីហ៊ួរ បានប្រាប់ភ្នំពេញប៉ុស្តិ៍ម្សិលមិញថា ពលរដ្ឋ ៣ នាក់នោះរួមមាន លោក សុំ ម៉ឺន អាយុ ៥៤ ឆ្នាំ លោក ម៉ឺន មៀន អាយុ ២៦ ឆ្នាំនិងលោក ឈិន រ៉ន ត្រូវបានទាហានកងពលតូចវារៈ ២៦១ ការពារដីក្រុមហ៊ុនមេត្រីភាពចាប់ខ្លួនក្នុងពេលវេលានិងទីកន្លែងខុសគ្នា ខណៈពួកគេកំពុងដឹកអីវ៉ាន់ និងចិញ្ច្រាំដំឡូងកាលពីថ្ងៃទី ១៩ និង២០ ខែមករា ចុងសប្តាហ៍មុន។
លោក លីហ៊ួរ បន្តថា ក្រោយការចាប់ខ្លួនពួកគេទាំង ៣ នាក់នោះពុំមានដំណឹងថា ត្រូវបានបញ្ជូនទៅទីណាឲ្យប្រាកដទេ ធ្វើឲ្យក្រុមគ្រួសារ និងពលរដ្ឋបារម្ភនិងបានស្វែងរកនៅស្នងការដ្ឋានទាំងខេត្តព្រះវិហារ និង
ខេត្តឧត្តរមានជ័យ តែពុំបានដំណឹងទេដោយសារមានការរុញដាក់គ្នាទៅវិញទៅមក។
លោកបន្ថែមថា បន្ទាប់ពីដំណឹងបែបនេះ សាច់ញាតិ និងពលរដ្ឋក៏បានប្រមូលផ្តុំគ្នាតវ៉ា ហើយក៏ឈានដល់ចាប់ខ្លួនទាហានការពារដីក្រុមហ៊ុននោះ ២ រូបវិញជាថ្នូរនឹងការប្រាប់ដំណឹងរបស់ពលរដ្ឋទាំង ៣ នាក់ដែលត្រូវបានចាប់ខ្លួននោះ។
លោកបញ្ជាក់ថា៖ «គ្នាគាត់១០នាក់ បានចាប់ពលរដ្ឋដាក់ឡាន ដោយអត់មានជូនដំណឹងថាយកទៅខាងណាទេ គេរុញឲ្យទៅសួរខាងណេះខាងណោះ។ ទាល់តែមានការឆោឡោពីពលរដ្ឋនិងសាច់ញាតិទើបគេឲ្យឃើញ យើងចង់ឲ្យដោះស្រាយតាមនីតិវិធីច្បាប់កុំឲ្យចាប់អត់ដឹងរឿងអី អ៊ឹចឹងមានខុសអីចាប់ពី បទអី?»។
យ៉ាងណាក្ដីលោក ឡាយ លីហ៊ួរ បានបញ្ជាក់ថា រហូតមកទល់ពេលនេះ ពលរដ្ឋម្នាក់ ក្នុងចំណោម ៣ នាក់នោះកំពុងបាត់ខ្លួន ខណៈ ២ នាក់កំពុងស្ថិតក្នុងពន្ធនាគារខេត្តព្រះវិហារស្របពេលក្រុមគ្រួសារពួកគេកំពុងស្វែងរកកិច្ចអន្តរាគមន៍ឲ្យដោះលែងពួកគេវិញ។
លោក លីហ៊ួរ ថា៖ «ឥឡូវបងប្អូនគាត់បានប្តឹងវិញ ដោយសារចាប់ខ្លួនអត់មានមូលហេតុដែលកំពុងពិភាក្សាជាមួយអ្នកច្បាប់ដើម្បីឲ្យជួយ។ ចំណែកអ្នកបាត់ខ្លួនយើងកំពុងបារម្ភ ព្រោះប្រពន្ធគាត់កំពុងបារម្ភ អត់ឃើញមកវិញ»។
បើតាមពលរដ្ឋ ដីមានជម្លោះរបស់ក្រុមហ៊ុនមេត្រីភាពជាមួយពលរដ្ឋជាង ៣០០ គ្រួសារនោះគឺស្ថិតជាប់ព្រំប្រទល់ខេត្តឧត្តរមានជ័យ និងខេត្តព្រះវិហារ ហើយដីនេះត្រូវបានការពារដោយទាហានម្នាក់ដែលពលរដ្ឋថា ឈ្មោះ រីម ខេន ហៅ លុយ សម្បត្តិ។ ជម្លោះដីធ្លីនេះ ស្ថិតក្នុងនីតិវិធីតុលាការក្រោយប្តឹងគ្នាកាលពីចុងឆ្នាំមុន។
ភ្នំពេញប៉ុស្តិ៍មិនអាចទាក់ទងលោក រីម ខេន ដែលពលរដ្ឋចោទថា ជាអ្នកការពារដីក្រុមហ៊ុន និងបានចាប់ពលរដ្ឋ ៣ នាក់នោះបានទេ ពីម្សិលមិញ។
អភិបាលខេត្តព្រះវិហារ លោក អ៊ុន ចាន់ដា មិនអាចសុំអត្ថាធិប្បាយបានទេកាលពីម្សិលមិញដោយលោកមិនលើកទូរស័ព្ទ។ ចំណែកស្នងការនគរបាលខេត្តព្រះវិហារលោក យិន ចំណាន បានប្រាប់ថា លោកទទួលបានព័ត៌មាននេះ និងកំពុងឲ្យមន្ត្រីស្រាវជ្រាវ។
លោកបញ្ជាក់ថា៖ «មានព័ត៌មានអ៊ីចឹងដូចដែលលោកស្រីបានលើកឡើងមែន ខ្ញុំឲ្យនគរបាលយើងស្រាវជ្រាវជាមួយក្រុមហ៊ុនតាំងពីម្សិលមិញ ប៉ុន្តែព័ត៌មាននេះ ប្រហែលជាមិន ១០០% ទេហើយជាព័ត៌មានពលរដ្ឋខេត្តឧត្តរមានជ័យគឺស្រុកត្រពាំងប្រាសាទ»។
ស្នងការនគរបាលខេត្តឧត្តរមានជ័យលោក ម៉ែន លី មិនអាចទាក់ទងបានទេ ដោយលោកចុចទទួលហើយ បិទវិញ ខណៈស្នងការរងនគរបាលខេត្តនេះ លោក ស៊ុង ពិសិដ្ឋ អះអាងថា លោកកំពុងចុះបេសកកម្ម។
មេប៉ុស្តិ៍ឃុំត្រពាំងប្រាសាទ ក្នុងស្រុកត្រពាំងប្រាសាទ ខេត្តឧត្តរមានជ័យ លោក សន អធិរ័ត្ន បានប្រាប់ថា លោកបានដឹងរឿងនេះតែពុំលម្អិតទេ ព្រោះមិនបានចុះដល់កន្លែងកើតហេតុ។
បើតាមមេប៉ុស្តិ៍រូបនេះ ដើមឡើយពលរដ្ឋបានទៅរុករានដីព្រៃ ក្រោយមកមានទំនាស់ជាមួយទាហានរហូតប្តឹងផ្ដល់នៅតុលាការខេត្តព្រះវិហារ។
លោកថា៖ «ដល់មានរឿងម្សិលម្ងៃ ម្សិលអីនេះខ្ញុំអត់បានចុះទៅទេ ដោយខាងលោកអធិការ និងមេឃុំចុះផ្ទាល់»។
មេឃុំត្រពាំងប្រាសាទ លោក ខាន់ ខេម បានបញ្ជាក់ដែរថា ក្រោយមានការចាប់ខ្លួនពលរដ្ឋទាំង ៣ នាក់នោះ ពលរដ្ឋក៏បានចាប់ទាហាន ២ នាក់វិញដែរកាលពីយប់ថ្ងៃចន្ទ តែបានដោះលែងវិញភ្លាមៗក្រោយសម្របសម្រួលប៉ុន្តែលោកថាពុំដឹងរឿងនេះលម្អិតទេ។
លោកថា៖ «រឿងចាប់ពលរដ្ឋអីពីមុន ខ្ញុំមិនដឹងច្បាស់ទេ មិនដឹងខាងណាគេចាប់អីទេ។ ប៉ុន្តែតាមរបាយការណ៍លោកអភិបាលស្រុកបានប្រាប់ថា គេចាប់ទាហាន ២ នាក់ទើបខ្ញុំអន្តរាគមន៍ចុះទៅមើលហ្នឹង ហើយទៅមើលហ្នឹងគឺដីខាងព្រះវិហារទាំងអស់»។
ព្រះរាជអាជ្ញាសាលាដំបូងខេត្តព្រះវិហារ លោក ទី សុវិនថាល់ បានថ្លែងថា សំណុំរឿងនេះកំពុងស្ថិតក្នុងចំណាត់ការរបស់តុលាការខេត្តព្រះវិហារដែលកំពុងស៊ើបសួរក្រុមជនសង្ស័យពាក់ព័ន្ធនឹងបទល្មើសបរិស្ថាន។
លោកបញ្ជាក់ថា៖ «យើងមិនចោទប្រកាន់គាត់អ្វីក្រៅពីបទល្មើសបរិស្ថានទេ ព្រោះតំបន់ហ្នឹងជាកន្លែងអភិរក្សសត្វព្រៃ និងអភិរក្សធនធានធម្មជាតិ។តែបើចង់ស្នើសុំគាត់ឲ្យនៅក្រៅឃុំគឺទាល់តែធ្វើឡើងតាមរយៈមេធាវី មិនមែនស្នើតាមតែមាត់អ៊ីចឹងទេ ដូច្នេះបើគ្មានការស្នើសុំនៅក្រៅឃុំទេ តុលាការ នឹងធ្វើការរបស់ខ្លួនបន្តទៀត»។
លោក ឡោ ច័ន្ទ មន្ត្រីសម្របសម្រួលសមាគមការពារសិទ្ធិអាដហុកប្រចាំខេត្តព្រះវិហារ បានថ្លែងថា ការចាប់ខ្លួនពលរដ្ឋដោយគ្មានដីកា និងធ្វើឡើងដោយទាហានដែលមិនមែនជាបទល្មើសជាក់ស្តែង ហើយខុសសមត្ថកិច្ច ដូច្នេះ គឺជារឿងមិនត្រឹមត្រូវទេ។
លោកថា៖ «ឃើញថា ២ នាក់ត្រូវបានចូលពន្ធនាគារ ចំណែកម្នាក់ទៀតកំពុងបាត់ខ្លួន។ ដូច្នេះការចាប់ខ្លួនហ្នឹងមានភាពអាថ៌កំបាំងយ៉ាងខ្លាំង ហើយមិនមានភាពប្រក្រតីទៀត...ការចាប់ខ្លួនហ្នឹងខុសនឹងផ្លូវច្បាប់។ យើងស្នើឲ្យដោះលែងគាត់ឲ្យមានសេរីភាពវិញ»៕
(កែសម្រួល ព្រុំ ភ័ក្ត្រ)