ភ្នំពេញ៖ ក្រសួងសុខាភិបាលបានប្រកាសនៅថ្ងៃព្រហស្បតិ៍ ទី ១១ ខែ មីនា ឆ្នាំ ២០២១ ពីករណីបុរសជនជាតិខ្មែរអាយុ ៥០ ឆ្នាំម្នាក់ បានទទួលមរណៈភាពនៅមន្ទីរពេទ្យមិត្តភាពខ្មែរ-សូវៀត ពេលដែលគាត់កំពុងសម្រាកព្យាបាលជំងឺកូវីដ ១៩។
យោងតាមសេចក្តីប្រកាសព័ត៌មានរបស់ក្រសួងសុខាភិបាលបានឱ្យដឹងថា បុរសជនជាតិខ្មែរម្នាក់បានស្លាប់នេះ គឺជាករណីលើកទី១ដោយសារជំងឺកូវីដ ១៩ នៅក្នុងប្រទេសកម្ពុជា។
ក្រសួងបានបន្តថា «នាថ្ងៃទី ១១ ខែមីនា វេលាម៉ោង ១០:៤០ នាទី មានបុរសជនជាតិខ្មែរម្នាក់ អាយុ ៥០ ឆ្នាំបានទទួលមរណភាពដោយសារជំងឺកូវីដ ១៩ នៅមន្ទីរមិត្តភាពខ្មែរ-សូវៀត ដែលជាករណីស្លាប់លើកដំបូងនៅកម្ពុជា»។
ជនរងគ្រោះរូបនេះមានលំនៅក្នុងសង្កាត់ចាក់អង្រែ ខណ្ឌមានជ័យ រាជធានីភ្នំពេញ ជាអ្នកបើកបរឱ្យថៅកែជនជាតិចិននៅខេត្តព្រះសីហនុ ដែលមានផ្ទុកជំងឺកូវីដ ១៩ ក្នុងព្រឹត្តិការណ៍សហគមន៍ ២០ កុម្ភៈ។
ក្រសួងបានបញ្ជាក់ថា សពបុរសរូបនេះត្រូវបានរកឃើញមានឆ្លងវីរុសកូវីដ ១៩ នៅថ្ងៃទី ២៧ ខែកុម្ភៈ ឆ្នាំ ២០២១ ដែលមានលទ្ធផលបញ្ជាក់ដោយមន្ទីរពិសោធន៍នៃវិទ្យាស្ថានប៉ាស្ទ័រកម្ពុជា។
លោកស្រី ឱ វណ្ណឌីន អ្នកនាំពាក្យក្រសួងសុខាភិបាលមិនអាចទាក់ទងដើម្បីសុំអធិប្បាបាយករណីខាងលើនេះបានទេ។
គួរបញ្ជាក់ផងដែថា លោកនាយករដ្ឋមន្រ្តី ហ៊ុន សែន កាលពីយប់ថ្ងៃទី ១០ ខែមីនា បានផ្ញើសារជាសំឡេងដោយបញ្ជាឱ្យថ្នាក់ដឹកនាំនៃរាជធានី-ខេត្ត ទាំងអស់ត្រូវត្រៀមរៀបចំជាមុននូវទីកន្លែងសម្រាប់បូជាសព និងបញ្ចុះសពទៅតាមប្រពៃណីទំនៀមទម្លាប់របស់ពលរដ្ឋក្នុងប្រទេសកម្ពុជា៕
វីដេអូ៖