ព្រះសីហនុៈ ដោយសារតែស្ថានភាពរបួសធ្ងន់ធ្ងរពេក អ្នកម្នាង អ៊ុក ផល្លា បានទទួលមរណភាពហើយ នៅមន្ទីរពេទ្យខេត្តព្រះសីហនុ នៅវេលាម៉ោងជាង ១២ ថ្ងៃទី ១៧ ខែមិថុនា ឆ្នាំ ២០១៨ នេះ គឺប្រមាណជា ៣ ម៉ោង បន្ទាប់ពីជួបគ្រោះថ្នាក់ចរាចរណ៍ ជាមួយព្រះអង្គម្ចាស់នរោត្តម រណឫទ្ធិ ប្រធានគណបក្សហ៊្វុនស៊ិនប៉ិច នៅស្រុកព្រៃនប់ ខេត្តព្រះសីហនុ។
លោក កេត សុភ័ក្រ អនុប្រធានការិយាល័យនគរបាល ចរាចរណ៍ខេត្តព្រះសីហនុ បានឲ្យដឹងថា តាមព័ត៌មានដែលលោកបានទទួល អ្នកម្នាង អ៊ុក ផល្លា បានទទួលមរណភាពហើយ បន្ទាប់ពីត្រូវបានដឹកតាមឧទ្ធម្ភាគចក្រ ជាមួយព្រះអង្គម្ចាស់នរោត្តម រណឫទ្ធិ ចេញទៅព្យាបាលនៅមន្ទីរពេទ្យ។
លោក ជួន ណារិន្ទ ស្នងការខេត្តព្រះសីហនុ មិនអាចទាក់ទងសុំអធិប្បាយបានទេ ដោយទូរស័ព្ទរបស់លោកពុំមានអ្នកទទួល។
ប៉ុន្តែ លោក យន់ មីន អភិបាលខេត្តព្រះសីហនុ បានថ្លែងថា អ្នកម្នាង ផល្លា បានស្លាប់ហើយ ខណៈដែលព្រះអង្គម្ចាស់ នរោត្តម រណឫទ្ធិ ត្រូវបានដឹកតាមឧទ្ធម្ភាគចក្រ មកកាន់រាជធានីភ្នំពេញហើយ នៅវេលាម៉ោង ១ និង១៥ នាទី។ «សម្តេចក្រុមព្រះ ក៏ប្រើអុកស៊ីសែនដែរ…។ បើតាមក្រុមការងារ សម្តេចក្រុមព្រះប្រហែលជាត្រូវបញ្ជូនទៅព្យាបាល នៅមន្ទីរពេទ្យ រ៉ូយាល់ភ្នំពេញ»។
ជាមួយគ្នានេះ លោក ផែង វណ្ណៈ មន្ត្រីជាន់ខ្ពស់ក្រសួងការពារជាតិ និងជាអ្នកល្បីឈ្មោះ នៅតាមបណ្តាញសង្គមហ្វេសប៊ុកបានឲ្យដឹងថា អ្នកម្នាង ផល្លា បានស្លាប់ហើយ នៅវេលាម៉ោង ១២ និង ២៣ នាទី ថ្ងៃទី ១៧ ខែមិថុនានេះ នៅមន្ទីរពេទ្យបង្អែកខេត្តព្រះសីហនុ។ លោកបញ្ជាក់ថា៖«លោក ជួន ណារិន្ទ បានប្រាប់ខ្ញុំថា អ្នកម្នាង អ៊ុក ផល្លា បានស្លាប់នៅក្នុងមន្ទីរពេទ្យខេត្តព្រះសីហនុ ហើយសម្តេចក្រុមព្រះ បានរងរបួសបាក់ជើងខាងឆ្វេង មានអាការធូរស្រាលបន្តិចហើយ និងបានឡើងឧទ្ធម្ភាគចក្រ មកកាន់មន្ទីរពេទ្យក្នុងរាជធានីភ្នំពេញ»។
នៅព្រឹកថ្ងៃទី ១៧ ខែមិថុនានេះ ព្រះអង្គម្ចាស់ នរោត្តម រណឫទ្ធិ និងអ្នកម្នាង អ៊ុក ផល្លា បានជួបគ្រោះថ្នាក់ចរាចរណ៍ នៅអំឡុងម៉ោងជាង ៩ នៅភូមិអូរតាសេក ឃុំអូរចំណារ ស្រុកព្រៃនប់ ខេត្ដព្រះសីហនុខណៈដែលព្រះអង្គកំពុងយាងទៅជួបសំណេះសំណាលជាមួយប្រជាពលរដ្ឋនៅក្នុងខេត្តព្រះសីហនុ។
ក្រោយគ្រោះថ្នាក់នេះ សម្ដេចក្រុមព្រះ និងអ្នកម្នាង រួមទាំងអ្នកផ្សេងទៀត ត្រូវបានបញ្ជូនទៅសង្គ្រោះនៅមន្ទីរពេទ្យបង្អែកខេត្តព្រះសីហនុ (ចម្ការចេក)។ នេះបើយោងតាម លោក អ៊ី សុខា ស្នងការរងនគរបាលខេត្តព្រះសីហនុ។
លោក សុខា បានប្រាប់ថា ព្រះអង្គនិងអ្នកម្នាងរបួសធ្ងន់រួមនឹងអ្នកផ្សេងទៀតក៏របួសដែរ ប៉ុន្តែលោកមិនបានបញ្ជាក់ពីមូលហេតុលម្អិតទេខណៈកំពុងរវល់។
យ៉ាងណាក្ដី អធិការរងស្រុកព្រៃនប់ម្នាក់ សុំមិនបញ្ចេញឈ្មោះ បានឲ្យដឹងថា គ្រោះថ្នាក់នេះបណ្ដាលមកពីរថយន្ត Highlander បើកបុកព្រះទីនាំងរបស់ព្រះអង្គ ក្នុងពេលលោកយាងទៅជួបសួរសុខទុក្ខប្រជាពលរដ្ឋនៅខេត្តព្រះសីហនុ នាវេលាម៉ោង ៨ និង ៥០ នាទីព្រឹក។
លោកបានបញ្ជាក់ថា៖«ឡាន Highlander ដែលធ្វើដំណើរចេញមកពីខេត្តព្រះសីហនុ បានរ៉េចង្កូតមកឆ្វេងហើយ បុកឡាន របស់សម្តេច ក្រុមព្រះ BMW ហើយឡាន Highlander បុកពេញទំហឹង បង្កឲ្យរបួសចំនួន ៧ នាក់ ស្រី ២ នាក់។ សម្តេចក្រុមព្រះ និងអ្នកម្នាង ក៏ត្រូវរបួសដែរ ហើយត្រូវបានយកទៅពេទ្យខេត្តព្រះសីហនុហើយ…»។
សូមបញ្ជាក់ថា នេះមិនមែនជាលើកទី ១ ទេ ដែលសម្ដេចក្រុមព្រះ នរោត្តម រណឫទ្ធិ និង អ្នកម្នាង អ៊ុក ផល្លា បានជួបគ្រោះថ្នាក់ចរាចរណ៍ ប៉ុន្តែកាលថ្ងៃទី ២៥ ខែមេសាឆ្នាំ ២០១៥ ព្រះអង្គ និងអ្នកម្នាង ក៏ធ្លាប់ជួបគ្រោះថ្នាក់ចរាចរណ៍ដែរ នៅភូមិអម្ពិលធំ ឃុំខ្វិតធំ ស្រុកព្រៃឈរខេត្តកំពង់ចាម ដែលបណ្ដាលឲ្យអ្នកម្នាង អ៊ុក ល្លា រងរបួសភ្នែកធ្ងន់ និងបានបញ្ជូនទៅព្យាបាលនៅក្រៅប្រទេស៕