សៀមរាប: អតីតប្រធានគណៈកម្មាធិការប្រតិបត្តិអតីតគណបក្សសង្គ្រោះជាតិស្រុកជីក្រែងខេត្តសៀមរាប លោក បាន សម្ភីរ ត្រូវបានសាលាឧទ្ធរណ៍ដោះលែងឲ្យមានសេរីភាពឡើងវិញកាលពីយប់ថ្ងៃ ២២ មីនា បន្ទាប់ពីអនុវត្តទោសក្នុងពន្ធនាគារខេត្តគ្រប់ចំនួន ប៉ុន្ដែក្រុមគ្រួសារ និងមេធាវីនៅតែថា ជារឿងអយុត្តិធម៌។
លោក បាន សម្ភីរ វ័យ ៧០ ឆ្នាំ ត្រូវបានសមត្ថកិច្ចចាប់ខ្លួនកាលពីថ្ងៃទី ២០ ខែ ឧសភា ឆ្នាំមុនពាក់ព័ន្ធនឹងការប្រមាថព្រះមហាក្សត្រ។
កាលពីថ្ងៃទី ៤ ខែ តុលា ឆ្នាំ ២០១៨ សាលាដំបូងខេត្តសៀមរាបបានផ្ដន្ទាទោសលោកឲ្យជាប់ពន្ធនាគារ ១ ឆ្នាំ ប៉ុន្តែឲ្យអនុវត្តទោស ១០ ខែ រីឯទោសសល់ត្រូវព្យួរពាក់ព័ន្ធសំណុំរឿងបង្ហោះសារបន្ដពីអ្នកដទៃប្រមាថព្រះមហាក្សត្រខ្មែរ ប្រព្រឹត្តនៅភូមិពន្លឺព្រះផុស ឃុំកំពង់ក្ដី ស្រុកជីក្រែងកាលពីថ្ងៃ ១៣ ខែឧសភា ឆ្នាំ ២០១៨។
អ្នកស្រី អាំង វងភ័ក្ត្រ ត្រូវជាកូនបង្កើតលោក បាន សម្ភីរ បានប្រាប់ភ្នំពេញប៉ុស្ដិ៍ កាលពីម្សិលមិញថា ឪពុកអ្នកស្រីបានទទួលទោសគ្រប់ចំនួន ១០ ខែ ទៅតាមសាលដីការបស់តុលាការរួចហើយ ដោយត្រូវបានសាលាឧទ្ធរណ៍បានសម្រេចដោះលែងវិញកាលពីម៉ោង ៧ យប់ថ្ងៃទី ២២ ខែមីនា ឆ្នាំនេះ។
អ្នកស្រីបន្តថាអ្នកស្រីសប្បាយចិត្តខ្លាំងណាស់ដែលឪពុកត្រូវបានដោះលែង ព្រោះស្ថានទម្ងន់ទោសហាក់មិនសូវធ្ងន់ដូចការចោទ ដោយសារអ្នកចែករំលែក (Share) ប្រមាណជាង ៤០០ នាក់ផ្សេងទៀតមិនជាប់ទោស ប៉ុន្ដែសម្រាប់រូបគាត់ម្នាក់បែរជាមានទោសដល់ ១ ឆ្នាំ។
អ្នកស្រីបញ្ជាក់ថា៖ «ខ្ញុំមានការសោកស្ដាយខ្លាំងដែរ ពេលគេចាប់ខ្លូនឪពុកខ្ញុំហ្នឹង ខ្ញុំមិនដឹងថាត្រូវធ្វើយ៉ាងណាទេ តែដូចជាអយុត្តិធម៌ចំពោះគាត់ ព្រោះយើងឃើញអ្វីប្លែកអ៊ីចឹងយើង Share គ្រប់ៗគ្នាទៅ អត់ដែលឃើញមានបញ្ហាអី្វទេ ប៉ុន្ដែដល់ពេលឪពុកខ្ញុំ Share ទៅគេថា ខុសច្បាប់អីណាណោះ ខ្ញុំអត់ដឹងច្បាស់ដែរ។ រឿងដែលគាត់ចង់ចូលធ្វើនយោបាយវិញនោះ ខ្ញុំអត់ដឹងទេ ទាល់តែសួរគាត់ផ្ទាល់»។
លោក សំ ទិត្យសីហា មេធាវីការពារក្ដីលោក បាន សម្ភីរ បានថ្លែងថា លោក បាន សម្ភីរ បានអនុវត្តទោសក្នុងពន្ធនាគារគ្រប់ចំនួន ក្រោយពីតុលាការបានសម្រេចដាក់ទោសគាត់ ១២ ខែ ប៉ុន្ដែអនុវត្តទោសក្នុងពន្ធនាគារ ១០ ខែ ហើយសល់ ២ ខែទុកព្យួរទោស។ ក្នុងនោះតុលាការក៏មិនបានបង្គាប់ឲ្យបង់ប្រាក់ពិន័យចូលរដ្ឋដែរ។
លោកថា៖ «ខ្ញុំយល់ថា ការដាក់ទោសគាត់នេះ ហាក់ដូចជាធ្ងន់ធ្ងរពេក ព្រោះតាមស្ថានទម្ងន់ទោសមិនមានឥទ្ធិពលធ្វើឲ្យប៉ះពាល់ដល់សង្គមឬធ្វើចលាចលក្នុងសង្គមអ្វី និងខូចសណ្ដាប់ធ្នាប់សាធារណៈទេ។ ទោសនេះគឺគ្រាន់តែហៅមកអប់រំ ណែនាំឬធ្វើកិច្ចសន្យាទៅបានហើយ»។
លោក រៀម ច័ន្ទម្នី ព្រះរាជអាជ្ញារងនៃសាលាដំបូងខេត្តសៀមរាប បានថ្លែងថា សាលាឧទ្ធរណ៍បានដោះលែងគាត់ហើយ គឺគាត់បានអនុវត្តទោសគ្រប់ចំនួន ប៉ុន្ដែព្យួរ ២ ខែទៀត «គេកាត់ទោសគាត់រួចហើយ ហើយគាត់មិនសុខចិត្ត គាត់ប្ដឹងទៅឧទ្ធរណ៍ ហើយឧទ្ធរណ៍គេដាក់ទោសគាត់តាមផ្លូវច្បាប់ទៅហើយឥឡូវនេះ គេដោះលែងគាត់វិញអ៊ីចឹងទៅ»។
គួររំឭកថា មូលហេតុដែលនាំឱ្យមានការផ្តន្ទាទោសនេះដោយសារកាលពីថ្ងៃទី ១៣ ខែឧសភា ឆ្នាំមុន នគរបាលខេត្តសៀមរាបបានរកឃើញហ្វេសប៊ុកឈ្មោះ Ban Samphy បានបង្ហោះសារបង្ហាញពីអត្ថន័យប្រមាថដល់អង្គព្រះមហាក្សត្រ ព្រះបាទ សម្ដេចព្រះបរមនាថ នរោត្តម សីហមុនី។
តាមចម្លើយនៅដំណាក់កាលនគរបាលយុត្តិធម៌ លោក បាន សម្ភីរ បានថ្លែងថា ការដែលលោកចែកចាយបន្តខ្លឹមសារក្នុងហ្វេសប៊ុកនេះមកពីមិនពេញចិត្តអង្គព្រះមហាក្សត្រហើយពេលឃើញការបង្ហោះក្នុងគណនីឈ្មោះ (Khmer Thatcher) គាត់ក៏បានចូល Share បន្តតែម្ដងទៅ៕