ភ្នំពេញៈ មានមនុស្ស ២៦ នាក់បានស្លាប់ និងរងរបួសដោយសារគ្រាប់មីន និងគ្រាប់យុទ្ធភណ្ឌមិនទាន់ផ្ទុះក្នុងរយៈពេលជាង ៤ ខែដើមឆ្នាំនេះ ជាតួលេខមួយដែលមានការថយចុះប្រមាណ ៤៨ ភាគរយបើធៀបនឹងរយៈពេលដូចគ្នាកាលពីឆ្នាំមុន ដែលមានអ្នកស្លាប់ និងរបួសរហូតដល់ ៥០ នាក់។ នេះបើតាមរបាយការណ៍របស់អាជ្ញាធរមីនដែលភ្នំពេញប៉ុស្តិ៍ទទួលបានកាលពីថ្ងៃចន្ទ។
របាយការណ៍បានបញ្ជាក់ថា៖ «ក្នុងចំណោមជនរងគ្រោះទាំង ២៦ នាក់នោះ មាន ៥ នាក់បានស្លាប់ និង ២១ នាក់ទៀតបានរងរបួសធ្ងន់ និងស្រាល ក្នុងនោះមាន ៧ នាក់ បានដាច់អវយវៈដែលនឹងក្លាយជាជនពិការអស់ ១ ជីវិត និងកំពុងស្ថិតក្រោមការជួយសង្គ្រោះព្យាបាលពីក្រុមគ្រូពេទ្យជំនាញនៅឡើយ»។
បើតាមរបាយការណ៍នេះក្នុងរយៈពេលជាង ៤ ខែដើមឆ្នាំ ២០២០ នេះប្រតិបត្តិករចំនួន ៧ រួមមាន កងយោធពលខេមរភូមិន្ទ មជ្ឈមណ្ឌលសកម្មភាពកំចាត់មីនកម្ពុជា (CMAC),អង្គការដោះមីនកម្ពុជា (CSHD), អង្គការ Hallo Trust, អង្គការ MAC, អង្គការ NPA និងអង្គការ APOPO បានបោសសម្អាតមីនលើផ្ទៃដី ៣៦ ១៨០ ៧០៤ ម៉ែត្រក្រឡា ដោយរកឃើញមីនប្រឆាំងមនុស្សចំនួន ៤ ៨៩៣ គ្រាប់ មីនប្រឆាំងរថក្រោះ ១២០ គ្រាប់ និងសំណល់ជាតិផ្ទុះពីសង្គ្រាម ១៤ ១៩៥ គ្រាប់។
ជាមួយគ្នានេះលោកទេសរដ្ឋមន្ត្រី លី ធុជ អនុប្រធានទី ១ នៃអាជ្ញាធរមីន បានបញ្ជាក់ប្រាប់ភ្នំពេញប៉ុស្តិ៍កាលពីថ្ងៃចន្ទថា មីន និងសំណល់ជាតិផ្ទុះពីសង្គ្រាមនៅតែបន្តផលប៉ះពាល់ដល់ជីវភាពរស់នៅរបស់ពលរដ្ឋកម្ពុជាទាំងអ្នករស់នៅជនបទដាច់ស្រយាល និងក្នុងទីប្រជុំជនមួយចំនួនផងដែរ។ ដូច្នេះគ្រប់គ្នាត្រូវប្រុងប្រយ័ត្នពេលដែលប្រទះឃើញវាចូរកុំព្យាយាមប៉ះពាល់ ឬកាន់លេង ឬរើសវាយកទៅកែច្នៃធ្វើអ្វីផ្សេងទៀតឲ្យសោះ ព្រោះវាងាយនឹងផ្ទុះបង្កគ្រោះថ្នាក់ដល់អាយុជីវិត។
លោកបានបញ្ជាក់ថា៖ «គ្រាប់មីន គ្រាប់បែកចង្កោម និងសំណល់ជាតិផ្ទុះសល់ពីសង្គ្រាមនៅតែជាហានិភ័យសម្រាប់យើងគ្រប់គ្នា ព្រោះវាមិនត្រឹមតែបង្កឲ្យពលរដ្ឋយើងស្លាប់ និងធ្លាក់ខ្លួនពិការប៉ុណ្ណោះទេ ថែមទាំងជាឧបសគ្គសម្រាប់ការស្ដារ និងអភិវឌ្ឍជីវភាពគ្រួសារ សេដ្ឋកិច្ចជាតិទៀតផង»។
បើតាមលោក ធុជ គ្រាប់មីន និងសំណល់ជាតិផ្ទុះសល់ពីសង្គ្រាមរាប់លានគ្រាប់ត្រូវបានគេរាយការណ៍ថាមានបង្កប់នៅក្នុងដីស្ទើរគ្រប់ទីកន្លែងនៅកម្ពុជាពិសេសនៅតំបន់លេណដ្ឋានកងទ័ព និងតាមតំបន់ជួរព្រំដែន។
កាលពីថ្ងៃអាទិត្យមានគ្រាប់កាំភ្លើងធំចំនួន ១៦ គ្រាប់ត្រូវបានពលរដ្ឋប្រទះឃើញនៅក្នុងស្រុករវៀង និងស្រុកគូលែន ខេត្តព្រះវិហារ ហើយត្រូវបានមន្ត្រីជំនាញផ្នែកកម្ចាត់មីននៃអង្គការ CSHD ជួយអន្តរាគមន៍បោសសម្អាត និងកម្ទេចចោលនៅនឹងកន្លែង។
លោក ឈួន បូរ៉ា មន្ត្រីបច្ចេកទេសផ្នែកបោសសម្អាតមីននៃអង្គការ CSHD បានប្រាប់ភ្នំពេញប៉ុស្តិ៍កាលពីថ្ងៃចន្ទថា៖ «គ្រាប់មិនទាន់ផ្ទុះ ដែលត្រូវបានរំដោះចេញពីដីស្រែរបស់ប្រជាកសិករ និងដុតកម្ទេចចោលនៅនឹងកន្លែងនេះជាប្រភេទគ្រាប់ផ្លោងចាប់ពីកម្រិត ៦០ ម.ម ដល់ ៨៥ ម.ម ដែលជាផលិតផលនៃប្រទេសអាមេរិក ចិន រុស្ស៊ី និងវៀតណាម»។
ទន្ទឹមនឹងនេះគ្រាប់បែកទម្លាក់ពីលើយន្តហោះប្រភេទ MK82 ចំនួន ១ គ្រាប់ត្រូវបានក្រុមអង្គការ NPA ជីកកាយចេញពីក្នុងដីព្រៃសហគមន៍ភូមិផាក់ណាម ឃុំកោះពាក់ ស្រុកវើនសៃខេត្តរតនគិរីកាលពីថ្ងៃសៅរ៍ បន្ទាប់ពីអ្នកភូមិបានប្រទះឃើញ និងរាយការណ៍ប្រាប់ឲ្យសមត្ថកិច្ចជួយអន្តរាគមន៍ប្រាប់ទៅមន្ត្រីជំនាញឲ្យជួយដល់ពួកគេ។ បច្ចុប្បន្នគ្រាប់បែកដ៏ធំនោះត្រូវបានក្រុមមន្ត្រីជំនាញអង្គការ NPA នាំយកទៅរក្សាទុកបណ្ដោះអាសន្ននៅទីតាំងមានសុវត្ថិភាពនៃអង្គការនេះ។
គួរបញ្ជាក់ផងដែរថា ដើម្បីបង្កើនកិច្ចប្រតិបត្តិការបោសសម្អាតមីនឲ្យសម្រេចបានតាមផែនការយុទ្ធសាស្ត្រ «កម្ពុជាគ្មានមីនឆ្នាំ ២០២៥» រាជរដ្ឋាភិបាលកម្ពុជាបានសម្រេចចូលរួមជាថវិកាបដិភាគ ១០ ភាគរយ ទៅគ្រប់គម្រោងថ្មីៗសម្រាប់ការបោសសម្អាតមីនដើម្បីមនុស្សធម៌ជាលក្ខណៈទ្វេភាគី ឬពហុភាគី និងបានដាក់ចេញផែនការជាក់លាក់ក្នុងការបញ្ចប់ការស្រាវជ្រាវទិន្នន័យជាមូលដ្ឋានចំនួន ៧៣ ស្រុកក្នុងខេត្តមួយចំនួននៅភាគខាងកើតប្រទេសក្នុងឆ្នាំ ២០២០ នេះ។
ចាប់ពីឆ្នាំ ២០២០ ដល់ឆ្នាំ ២០២៥ កម្ពុជានៅត្រូវការថវិកាប្រមាណ ៣៧៧ លានដុល្លារបន្ថែមទៀត ដើម្បីរំដោះផ្ទៃដីដែលមានមីន គ្រាប់បែកចង្កោម និងសំណល់ជាតិផ្ទុះពីសង្គ្រាមប្រមាណ ៨០៦ គីឡូម៉ែត្រក្រឡា៕