The Phnom Penh Post Search

Search form

Logo of Phnom Penh Post newspaper Phnom Penh Post - អ្នក​របួស​ដោយ​ហិង្សា ​ត្រូវ​តុលាការ​ឲ្យ​ចូល​បំភ្លឺ​ ក្នុង​នាម​ជនសង្ស័យ




អ្នក​របួស​ដោយ​ហិង្សា ​ត្រូវ​តុលាការ​ឲ្យ​ចូល​បំភ្លឺ​ ក្នុង​នាម​ជនសង្ស័យ

Content image - Phnom Penh Post
លោក អំ សំអាត ដែល​រងរបួស​ក្នុង​ថ្ងៃ​ទិវា​សិទ្ធិ​លំនៅឋាន​អន្តរជាតិ​កាលពី​ឆ្នាំ​មុន។ ហេង ជីវ័ន

អ្នក​របួស​ដោយ​ហិង្សា ​ត្រូវ​តុលាការ​ឲ្យ​ចូល​បំភ្លឺ​ ក្នុង​នាម​ជនសង្ស័យ

ភ្នំពេញៈ មន្ត្រី​អង្គការ​សិទ្ធិ​មនុស្ស​ល្បី​ម្នាក់​ និង​សកម្មជន​ដីធ្លី​បឹងកក់​ដែល​រងរបួស​ពី​ការ​វាយ​ដោយ​ក្រុម​សន្តិសុខ​កាលពី​ខែ​តុលា​ឆ្នាំ​មុន​ត្រូវ​បាន​សាលា​ដំបូង​រាជធានី​ភ្នំពេញ​ឲ្យ​ចូល​ខ្លួន​ទៅ​បំភ្លឺ​នៅ​មុខ​អយ្យការ​នៅ​ថ្ងៃ​នេះ​ក្នុង​នាម​ជា​ «ជនសង្ស័យ»​ ពាក់ព័ន្ធ​នឹង​បណ្តឹង​របស់​សន្តិសុខ​ខណ្ឌ​ដូនពេញ​ បើ​ទោះ​ជា​ពួកគេ​ត្រូវ​បាន​មជ្ឈដ្ឋាន​​ជាតិ​ និង​អន្តរជាតិ​ចាត់ទុក​ថា​ជា​ជនរងគ្រោះ ​​និង​ស្នើ​ឲ្យ​រក​ជន​ដៃ​ដល់​មក​ទទួល​ខុស​ត្រូវ​ចំពោះ​មុខ​ច្បាប់​ក្ដី​។

លោក អំ សំអាត ប្រធាន​ក្រុម​បច្ចេកទេស​ស៊ើបអង្កេត​អង្គការ​សិទ្ធិ​មនុស្ស​លីកាដូ និង​លោក ច័ន្ទ ពុទ្ធិស័ក្ត តំណាង​សហគមន៍​បឹងកក់​ត្រូវ​បាន​លោក ងិន ពេជ្រ ព្រះរាជអាជ្ញារង​នៃ​អយ្យការ​​អម​សាលា​ដំបូង​រាជធានី​ភ្នំពេញ​ចេញ​ដីកា​កោះ​កាលពី​ថ្ងៃ​ទី​ ២០ ​ខែ​មករា​ដើម្បី​ឲ្យ​​ចូល​ខ្លួន​បំភ្លឺ​ក្នុង​នាម​ជា «ជនសង្ស័យ» ពី​បទ​បង្ក​ហិង្សា​ដោយ​ចេតនា​ប្រព្រឹត្ត​កាលពី​ថ្ងៃ​​ទី​ ១០ ខែ​តុលា​ឆ្នាំ​មុន​នៅ​រាជធានី​ភ្នំពេញ​។

ប៉ុន្តែ​ដីកា​កោះ​នេះ​ត្រូវ​បាន​អង្គការ​លីកាដូ​ចាត់​ទុក​ថា​ជា​រឿង​ហួស​ចិត្ត​ដោយសារ​តែ​អ្នក​ទាំង​ពីរ​នេះ​គឺជា​អ្នក​រងរបួស​នៅក្នុង​ហេតុការណ៍​ប៉ះទង្គិច​រវាង​ក្រុម​សន្តិសុខ​ខណ្ឌ​ដូនពេញ​ជាមួយ​​ក្រុម​សហគមន៍​ដែល​ដង្ហែ​ក្បួន​អហិង្សា​ក្នុង​ទិវា​សិទ្ធិ​លំនៅឋាន​កាលពី​ថ្ងៃ​ទី​ ១០ ខែ​តុលា ឆ្នាំ​ ២០១៦។

អ្នកស្រី ណាលី​ ពីឡូក​ នាយករង​ផ្នែក​តស៊ូ​មតិ​នៃ​អង្គការ​លីកាដូ​បាន​ថ្លែង​ថា៖ «លោក អំ សំអាត​ និង​លោក ច័ន្ទ ពុទ្ធិស័ក្ដ ​គឺជា​ជនរងគ្រោះ​នៃ​ការ​វាយដំ​ដោយ​គ្មាន​ហេតុផល​នោះ»។ អ្នកស្រី​បន្ត​ថា៖ «ករណី​​នេះ​គួរ​ឲ្យ​ហួស​ចិត្ត​ដោយ​ហេតុ​ថា​បណ្ដឹង​លើ​អ្នក​ទាំង​ពីរ​មិន​គួរ​ត្រូវ​បាន​យក​មក​ពិចារណា​ដើម្បី​ស៊ើបអង្កេត​នោះ​ទេ»។

អង្គការ​ លីកាដូ​ កាលពី​ម្សិលមិញ ​បាន​សរសេរ​រំឭក​​ថា ​នៅ​ព្រឹត្តិការណ៍​ខែ​តុលា ​អំឡុង​​ពេល​ក្បួន​ដង្ហែ​អហិង្សា​ធ្វើ​ដំណើរ​ឆ្លង​កាត់​ផ្លូវ​នានា​ក្នុង​រាជធានី​ភ្នំពេញ​ឆ្ពោះ​ទៅ​ទីលាន​ប្រជាធិបតេយ្យ ក្រុម​សន្តិសុខ (ដឹកនាំ​ដោយ​ លោក គឹម វុត្ថា ប្រធាន​សន្ដិសុខ​ខណ្ឌ​ដូនពេញ) បាន​បិទ​ផ្លូវ​រារាំង​ក្បួន​ដង្ហែ​ និង​បាន​ឆក់​យក​ស្គរ​ឆៃយ៉ាំ ​និង​បដា​ពី​ក្រុម​អ្នក​ដើរ​ហែ​ក្បួន។ នៅ​ពេល​នោះ​ក្រុម​សន្ដិសុខ​បាន​ចាប់ផ្ដើម​ប្រើ​អំពើ​ហិង្សា​​ទៅ​លើ​លោក ច័ន្ទ ពុទ្ធិស័ក្ដ ខណៈ​ដែល​លោក​កំពុង​ថត​សកម្មភាព​ហែ​ក្បួន​​នោះ។​

រីឯ លោក អំ សំអាត បាន​ព្យាយាម​បញ្ឈប់​ស្ថានការណ៍​តានតឹង​ និង​អំពើ​ហិង្សា​ដោយ​សន្ដិវិធី​ក្នុង​នាម​លោក​ជា​អ្នក​ឃ្លាំ​មើល​សិទ្ធិ​មនុស្ស​។ ប៉ុន្តែ​ភ្លាមៗ​នោះ​ក្រុម​សន្ដិសុខ​ក៏​បាន​ចាប់ផ្ដើម​វាយដំ​ទៅ​លើ​រូប​លោក​ដោយ​បាន​ហ៊ុមព័ទ្ធ​ ដាល់​មុខ និង​កញ្ចឹង​ក​របស់​លោក​ជាច្រើន​ដៃ​ដោយ​គ្មាន​ហេតុផល​ទាល់​តែ​សោះ។ ​អ្នក​ទាំង​ពីរ​ត្រូវ​បាន​រងរបួស​ និង​ត្រូវ​ចូល​សម្រាក​ព្យាបាល។

នៅ​ព្រឹក​ថ្ងៃ​ដដែល​នៃ​ហេតុការណ៍​នោះ​លោក អំ សំអាត​ និង​លោក​ ច័ន្ទ ពុទ្ធិស័ក្ដ​ បាន​ដាក់​ពាក្យ​បណ្ដឹង​​នៅ​ប៉ុស្ដិ៍​រដ្ឋបាល​នគរបាល​ជ័យជម្នះ​ បន្ទាប់ពី​អ្នក​ទាំង​ពីរ​​ទទួល​រង​អំពើ​ហិង្សា។ អង្គការ​លីកាដូ និង​សារព័ត៌មាន​ជាតិ​ជាច្រើន​ទៀត​​មាន​ទាំង​រូបថត វីដេអូ​ និង​សាក្សី​ដែល​បញ្ជាក់​ពី​ការ​វាយដំ​យ៉ាង​អាក្រក់​នោះ «ប៉ុន្តែ​បណ្ដឹង​របស់​អ្នក​ទាំង​ពីរ​មិន​ត្រូវ​បាន​យក​មក​ចាត់​ការ​នោះ​ទេ»។

នៅ​ពេល​ទាក់ទង​កាលពី​មិ្សលមិញ​លោក​ សំអាត សម្ដែង​ការ​ហួស​ចិត្ត​ចំពោះ​បណ្តឹង​មនុស្ស​ពីរ​នាក់​ក្នុង​លិខិត​តុលាការ​ថា​បាន​ប្តឹង​រូប​លោក​។

លោក​ថ្លែង​ថា៖ «បងប្អូន​ឃើញ​ច្បាស់​ហើយ​បណ្តាញ​សង្គម​ក៏​បាន​ដាក់​រូបភាព​ថា​មាន​សន្តិសុខ​ខណ្ឌ​ប្រាំ​ទៅ​ប្រាំ​មួយ​នាក់​បាន​រោម​ខ្ញុំ​ និង​វាយ​ខ្ញុំ។ បើ​ពលរដ្ឋ​មិន​បាន​ជួយ​ខ្ញុំ​ទេ​ ខ្ញុំ​ប្រាកដជា​ត្រូវ​របួស​ធ្ងន់ ឬ​អាច​បាត់បង់​ជីវិត​ក៏​មាន»។

លោក​បន្ត​ថា​សន្តិសុខ​បាន​វាយ​ហើយ​បាន​ប្តឹង​រូប​លោក​ទៀត​ហើយ​លោក​បាន​ហៅ​ទង្វើ​នេះ​ជា​ទង្វើ «អាក្រក់» ​ដែល​ពួកគេ​បាន​ «បំផ្លាញ​កិត្តិយស​រាជរដ្ឋាភិបាល»។

លោក ច័ន្ទ ពុទ្ធិស័ក្ត បាន​ហៅ​ការ​កោះ​ហៅ​លោក​ក្នុង​នាម​ជា​ជនសង្ស័យ​ថា​ជា​រឿង «អយុត្តិធម៌» ដែល​លោក​ និង​លោក​ សំអាត ​បាន​ដាក់​ពាក្យ​ប្តឹង​តាំងពី​ថ្ងៃ​កើត​ហេតុ​ម្ល៉េះ តែ​បែរ​ជា​គ្មាន​ចំណាត់ការ​ទៅ​វិញ​។

លោក ឆក់ កៅនី មេប៉ុស្តិ៍​នគរបាល​សង្កាត់​​ជ័យជំនះ​បាន​ប្រាប់​ភ្នំពេញ​ប៉ុស្តិ៍​ថា​ប៉ុស្តិ៍​នគរបាល​របស់​លោក​បាន​ទទួល​ពាក្យ​បណ្តឹង​ពី​ភាគី​ទាំង​ពីរ​នៅ​ក្នុង​ថ្ងៃ​តែ​មួយ​ហើយ​បាន​អះអាង​ថា​ពួកគេ​សុទ្ធ​តែ​មាន​រងរបួស​ដូច​គ្នា។

លោក​ថ្លែង​ថា៖ «យើង​បញ្ជូន​ទៅ​អធិការ រួច​អធិការ​​ក៏​បញ្ជូន​ទៅ​តុលាការ​...ពីរ​បី​ថ្ងៃ​ក្រោយ​កើត​ហេតុ​យើង​បញ្ជូន​ទៅ​តុលាការ។ ផុត​ពី​ដៃ​ខ្ញុំ ខ្ញុំ​អត់​ដឹង​អធិការ​បញ្ជូន​ទៅ​តុលាការ​ថ្ងៃ​ណា»។

លោក​បាន​បញ្ជាក់​ថា៖ «បណ្តឹង​របស់​សន្តិសុខ (ដែល​អះអាង​ថា​រងរបួស) គឺ​ឲ្យ​ចាត់​ការ​តាម​ផ្លូវ​ច្បាប់​»។

ជាមួយ​គ្នា​នេះ​អង្គការ​សិទ្ធិ​មនុស្ស​អន្តរជាតិ​ក្រៅ​ប្រទេស​ចំនួន​បួន​ក៏​បាន​អំពាវនាវ​ជា​សាធារណៈ​កាលពី​ម្សិលមិញ​​ឲ្យ​មាន​ការ​បញ្ចប់​ការ​ស៊ើបអង្កេត​ទៅ​លើ​បណ្តឹង​សន្តិសុខ​ប្រឆាំង​លោក​ សំអាត ​និង​លោក​ ពុទ្ធិស័ក្ត ​ផង​ដែរ​។

អង្គការ​ទាំង​នោះ​ក៏​រួម​មាន​ទាំង​អង្គការ​លើក​លែង​ទោស​អន្តរជាតិ​ (Amnesty International) អង្គការ​ឃ្លាំ​មើល​សិទ្ធិ​មនុស្ស​ (Human Rights Watch) ផង​ដែរ​។

លោក ChampaPatel នាយក​អង្គការ​លើកលែង​ទោស​អន្តរជាតិ​ប្រចាំ​អាស៊ី​អាគ្នេយ៍​ និង​ប៉ាស៊ីហ្វិក​បាន​ហៅ​ការ​ស៊ើបអង្កេត​ទៅ​លើ​ករណី​លោក​ អំ សំអាត ​និង​ច័ន្ទ ពុទ្ធិស័ក្ត ដោយ​អាជ្ញាធរ​របស់​កម្ពុជា​គឺ​ជា​ការ​ធ្វើ​ទាំង​បំពាន​ច្បាប់​ហើយ​ក្រុម​សន្តិសុខ​មិន​ត្រូវ​​បាន​គេ «ដាក់​ទណ្ឌកម្ម» សោះ​ឡើយ​ ប៉ុន្តែ «អ្នក​ដែល​ធ្វើការ​លើក​តម្កើង​ និង​ការពារ​សិទ្ធិ​មនុស្ស​តែ​រង​ទទួល​រង​​នូវ​បណ្តឹង​ព្រហ្មទណ្ឌ»។

សេចក្តី​ថ្លែងការណ៍​នោះ​ក៏​បាន​ស្នើ​ឲ្យ​បញ្ឈប់​ការ​ស៊ើបអង្កេត​លើ​បណ្តឹង​សន្តិសុខ​ខណ្ឌ ឬ​ហៅ​ថា​ប៉ូលិស​ប៉ារ៉ា​ប្រឆាំង​នឹង​មន្ត្រី​សិទ្ធិ​មនុស្ស​ និង​សកម្មជន​ដីធ្លី​ដោយ​ហៅ​អំពើ​នោះ​ថា​ជា​ការ «​បំភិត​បំភ័យ​ផ្នែក​ផ្លូវ​ច្បាប់» ទៅ​លើ​ពួកគេ។

ទោះ​យ៉ាង​ណា​លោក លី សុផាណា អ្នក​នាំ​ពាក្យ​សាលា​ដំបូង​រាជធានី​ភ្នំពេញ​បាន​ថ្លែង​ថា​អយ្យការ​នឹង​ធ្វើការ​ពិនិត្យ​លើ​រឿង​ក្តី​នេះ​ដោយ​ «ផ្អែក​លើ​ឯកសារ​នានា​​ភ័ស្តុតាង​ និង​ស្តាប់​ចម្លើយ​បុគ្គល​ដែល​មាន​ការ​ពាក់ព័ន្ធ»​។

លោក គឹម សន្តិភាព​ អ្នក​នាំពាក្យ​ក្រសួង​យុត្តិធម៌​បាន​ថ្លែង​តប​​ក្រុម​អង្គការ​សិទ្ធិ​មនុស្ស​ទាំងនោះ​ថា៖ «តុលាការ​មាន​​ឯករាជភាព​របស់​ខ្លួន​ ដូច្នេះ​អង្គការ​អន្តរជាតិ​គួរ​ពិនិត្យ​មើល​ច្បាប់​របស់​យើង​។ ពួកគេ​ត្រូវ​តែ​យល់​ពី​ប្រព័ន្ធ​ច្បាប់​របស់​ប្រទេស​យើង»៕

(រាយការណ៍​បន្ថែម​ដោយ Erin Handley)

អត្ថបទគួរចាប់អារម្មណ៍