ភ្នំពេញៈ ស្របពេលរដូវប្រាំងឆ្នាំនេះក្ដៅហួតហែងខ្លាំង ប្រព័ន្ធផ្គត់ផ្គង់ទឹកស្អាតក្នុងតំបន់មួយចំនួននៅរាជធានីភ្នំពេញមានភាពរអាក់រអួល ដោយពេលខ្លះគ្មានលំហូរទឹកសូម្បី ១ តំណក់ នៅពេលព្រឹក និងពេលខ្លះទៀតនៅពេលល្ងាច បង្កឲ្យមានការរអ៊ូរទាំពីអ្នកប្រើប្រាស់ ខណៈមន្ត្រីអះអាងថា ការផលិតទឹកមានការខ្វះខាតប្រមាណ ១០ ម៉ឺនម៉ែត្រគុបក្នុង ១ ថ្ងៃ។
កញ្ញា តាន់ រតនៈ អាយុ ២២ ឆ្នាំមានលំនៅក្នុងភូមិស្ពានខ្ពស់ សង្កាត់គីឡូម៉ែត្រលេខ ៦ ខណ្ឌឫស្សីកែវបានថ្លែងថាកាលពី ១ សប្ដាហ៍មុន ប្រព័ន្ធខ្សែបណ្ដាញផ្គត់ផ្គង់ទឹកស្អាតនៅក្នុងភូមិរបស់នាងមានភាពរអាក់រអួលដែលពេលខ្លះគ្មានទឹកចេញទេ។
កញ្ញា បានថ្លែងថា៖ «កាល ១ សប្ដាហ៍មុន នៅចន្លោះម៉ោង ៧ ព្រឹកដល់ម៉ោង ៨ និង ៣០ នាទីព្រឹក ពេលបើកក្បាលរ៉ូប៊ីណេគ្មានលំហូរទឹកស្អាតសូម្បីតែ ១ តំណក់។ ករណីនេះមិនមែនកើតមានតែនៅផ្ទះរបស់ខ្ញុំទេ ផ្ទះអ្នកជិតខាងខ្ញុំក៏ដូច្នោះដែរ។ នៅល្ងាចថ្ងៃខ្លះទៀត គឺគ្មានទឹកចេញទេរហូតដល់ម៉ោង ១០ យប់ ទើបមានទឹកស្អាតប្រើប្រាស់»។
កញ្ញា រតនៈ បានបន្តថាបញ្ហានេះទំនងជាបណ្ដាលមកពីការជួសជុលបណ្ដាញលូរំដោះទឹកជំនន់ និងការជួសជុលផ្លូវ ១ ចំនួននៅក្នុងរាជធានី-ភ្នំពេញដែលអាចប៉ះពាល់លើបណ្ដាញទុយោមេផ្គត់ផ្គង់ទឹកស្អាតទើបបានជាការផ្គត់ផ្គង់ទឹករបស់រដ្ឋាករទឹកស្វយ័តរាជធានីភ្នំពេញ រអាក់រអួល។
ជុំវិញករណីនេះលោក ស៊ឹម ស៊ីថា អគ្គនាយករដ្ឋាករទឹកស្វយ័តរាជធានី-ភ្នំពេញបានថ្លែងកាលពីថ្ងៃទី ១៣ ខែមីនាថា ភាពរអាក់រអួលនៃការផ្គត់ផ្គង់ទឹកស្អាតនេះមិនមែនមកពីខូច ឬបែកធ្លាយខ្សែបណ្ដាញទុយោមេនោះទេ។ ប៉ុន្តែគឺមកពីការប្រើប្រាស់ទឹកស្អាតកើនឡើងខ្ពស់ជាងការរំពឹងទុក។
លោក ស៊ីថា បានថ្លែងថា៖ «តាមសមត្ថភាពផលិតជាក់ស្ដែងដែលយើងខ្ញុំមានប្រមាណជាង ៦០ ម៉ឺនម៉ែត្រគុបក្នុង ១ ថ្ងៃ ហើយសេចក្ដីត្រូវការទឹកស្អាតប្រើប្រាស់មានរហូតទៅដល់ជាង ៧០ ម៉ឺនម៉ែត្រគុប ក្នុង ១ ថ្ងៃ បានសេចក្ដីថាយើងខ្វះទឹកសម្រាប់ផ្គត់ផ្គង់ប្រមាណជាង ១០ ម៉ឺនម៉ែត្រគុប ក្នុង ១ ថ្ងៃ»។
លោកបានថ្លែងថា ទោះយ៉ាងណាការផលិតទឹករបស់រដ្ឋាករទឹកស្វយ័តរាជធានីភ្នំពេញមិនបានថយចុះនោះទេ ពោលគឺសមត្ថភាពនៃការផលិតទឹកស្អាតនេះមានការកើនឡើងជារៀងរាល់ឆ្នាំ តែនេះដោយសារតម្រូវការប្រើប្រាស់មានការកើនឡើងខ្ពស់លើសការរំពឹងទុក។ ក្នុងឆ្នាំ ២០១៦ រដ្ឋាករទឹកស្វយ័តរាជធានីភ្នំពេញ ផលិតទឹកស្អាតបានត្រឹមជាង ៤០ ម៉ឺនម៉ែត្រគុបប៉ុណ្ណោះ ខណៈបច្ចុប្បន្នផលិតទឹកស្អាតបានជាង ៦០ ម៉ឺនម៉ែត្រគុប ក្នុង ១ ថ្ងៃ។
លោក ស៊ីថា បានបន្តថា ឆ្លើយតបនឹងតម្រូវការប្រើប្រាស់ទឹកស្អាតរបស់ពលរដ្ឋកាន់តែច្រើនឡើងពី ១ ឆ្នាំទៅ ១ ឆ្នាំ រាជរដ្ឋាភិបាលកម្ពុជានៅដើមឆ្នាំ ២០២០ នេះបានសាងសង់រោងចក្រផលិតទឹកស្អាតថ្មី ១ កន្លែងទៀតនៅសង្កាត់បាក់ខែង ខណ្ឌជ្រោយចង្វាររាជធានីភ្នំពេញដោយប្រើប្រាស់ថវិកាជាង ៣០០ លានដុល្លារអាមេរិក ដែលមានសមត្ថភាពអាចផ្គត់ផ្គង់ទឹកបានជិត ៤០ ម៉ឺនម៉ែត្រគុបក្នុង ១ ថ្ងៃ។
លោកបានអះអាងថា តាមគម្រោងរោងចក្រផលិតទឹកស្អាតថ្មីនេះនឹងត្រូវសាងសង់រួចរាល់ជាស្ថាពរនៅក្នុងឆ្នាំ ២០២៣ ហើយវានឹងជួយបង្កើនសមត្ថភាពផលិតទឹកស្អាតកើនឡើងបន្ថែមទៀតដែលរំពឹងថា ការផ្គត់ផ្គង់ទឹកស្អាតជូនពលរដ្ឋនៅទូទាំងរាជធានីភ្នំពេញ ហើយនឹងគ្មានការខ្វះខាតទឹកស្អាតទៀតឡើយ។
ជុំវិញការខ្វះទឹកស្អាតសម្រាប់ផ្គត់ផ្គង់ជូនពលរដ្ឋនេះដែរលោក ឃួង ស្រេង អភិបាលរាជធានីភ្នំពេញបានជំរុញឲ្យរដ្ឋបាលខណ្ឌទាំង ១៤ ក្នុងរាជធានីភ្នំពេញត្រូវយកចិត្តទុកដាក់ខ្ពស់ក្នុងការចូលរួមដោះស្រាយ និងត្រូវមានរថយន្តដឹកទឹកជូនបងប្អូនពលរដ្ឋក្នុងមូលដ្ឋាន ជាពិសេសនៅតំបន់ជាយក្រុង។
ការជំរុញរបស់លោក ឃួង ស្រេង លើបញ្ហានេះបានធ្វើឡើងក្នុងកិច្ចប្រជុំកាលពីថ្ងៃទី ១៣ ខែមីនា ឆ្នាំ ២០២០ ជាមួយមន្ដ្រីជំនាញពាក់ព័ន្ធស្ដីពីបញ្ហាកង្វះទឹកប្រើប្រាស់ប្រចាំថ្ងៃក្នុងរាជធានីភ្នំពេញ។
លោកបានបញ្ជាក់ថា៖ «រាជធានី-ភ្នំពេញសព្វថ្ងៃមិនត្រឹមតែរីកទំហំផ្ទៃដីប៉ុណ្ណោះទេគឺលូតកម្ពស់ថែមទៀតដោយលំនៅឋានសង់ខ្ពស់ៗជាច្រើនដូចនេះតម្រូវការទឹកក៏មានការកើនឡើងច្រើនផងដែរ»៕