បាត់ដំបង: សមត្ថកិច្ចខេត្តបាត់ដំបងបានកំណត់អត្តសញ្ញាណជនខិលខូចរួចហើយករណីលួចកាប់រុករានដីក្នុងដែនជម្រកសត្វព្រៃ «តំបន់ប្រើប្រាស់ច្រើនយ៉ាងសំឡូត» នៅភូមិអូរតាតឹង ឃុំសំឡូត ស្រុកសំឡូត ខេត្តបាត់ដំបងបន្ទាប់ពីសមកិច្ចបានដកបំផ្លាញដើមទុរេន និងដើមដូងសរុបប្រមាណ ៣០០ ដើម ដែលជនឱកាសនិយមលួចដាំនៅទីនោះ។
លោក កត បូរ៉ាន់ ប្រធានមន្ទីរបរិស្ថានខេត្តបាត់ដំបងបានប្រាប់ភ្នំពេញប៉ុស្ដិ៍ពីម្សិលមិញថា កម្លាំងរបស់លោកបានដកបំផ្លាញទុរេន ដូង និងដំណាំផ្សេងទៀតសរុបជាង ៣០០ ដើម ដែលបានដាំលើផ្ទៃប្រហែលជាង ៤ ហិកតា ក្នុងតំបន់ប្រើប្រាស់ច្រើនយ៉ាងសំឡូត។ លើសពីនេះសមត្ថកិច្ចបានបំផ្លាញខ្ទមមួយ និងដកហូតទុយោទឹកសម្រាប់ស្រោចស្រព និងម៉ាស៊ីនបូមទឹក ១ គ្រឿង យកមករក្សាទុកផងដែរ។
លោកបន្តថា ពេលនេះសមត្ថកិច្ចបានកំណត់អត្តសញ្ញាណជនសង្ស័យបានហើយដែលជាអ្នកនៅខេត្តបាត់ដំបង ប៉ុន្ដែលោកមិនទាន់អាចបង្ហាញមុខនៅពេលនេះទេដោយរង់ចាំប្រមូលភ័ស្តុតាងបន្ថែមទៀត ដើម្បីរៀបចំបណ្ដឹងប្ដឹងទៅតុលាការ។
លោក បូរ៉ាន់ បញ្ជាក់ថា៖ «យើងនឹងមិនលើកលែងឲ្យជនណាម្នាក់ដែលរំលោភយកដីព្រៃរដ្ឋ និងដីដែនជម្រកសត្វព្រៃអភិរក្សទេ ព្រោះអាជ្ញាធរបានផ្សព្វផ្សាយជាច្រើនលើកមកហើយ ដោយមិនអនុញ្ញាតឲ្យមានការរំលោភបំពានលើដីអភិរក្ស ឬកន្លែងហាមឃាត់ទេ...»។
លោក សើ សាម៉េត អភិបាលស្រុកសំឡូតបានថ្លែងពីម្សិលមិញថា លោកបានទទួលដំណឹងពីការបង្ក្រាបនេះ ដោយលោកថាដំណាំទាំងនេះទើបដាំប្រហែលជិត ២ សប្ដាហ៍ប៉ុណ្ណោះ ដោយរាយទុយោទឹក តែមិនទាន់រួចរាល់ក៏ត្រូវសមត្ថកិច្ចប្រមូលយកមករក្សាទុកនៅស្នាក់ការសង្កាត់រដ្ឋបាលព្រៃឈើស្រុកសំឡូត។
លោកថា៖ «អាជ្ញាធរយើងបានប្រាប់ និងផ្សព្វផ្សាយច្រើនហើយថាកុំឲ្យទៅប៉ះពាល់ដីនៅតំបន់ហ្នឹង ប៉ុន្ដែយើងកំពុងគិតបង្កើតគណៈកម្មការមួយចុះទៅពិនិត្យតំបន់ហ្នឹងឡើងវិញថា តើនៅមានសល់ដីទំនេរៗដែលអាចកាត់ឆ្វៀលចែកឲ្យពលរដ្ឋក្រីក្របានដែរឬអត់? បើអាចនោះយើងនឹងកាត់ជូនពួកគាត់»។
លោក ប៊ូ ស៊ីណា ប្រធានផ្នែកប្រតិបត្តិច្បាប់នៃអង្គការមូលនិធិ ម៉ាដក្ស ជោលី ភីត (Maddox Jolie Pitt Fundation) បានថ្លែងថា តំបន់នេះគឺជាការគ្រប់គ្រង និងអភិរក្សរួមគ្នាដោយតារាហូលីវូដ អ្នកស្រី អេនជេលីណា ជោលី និងមន្ទីរបរិស្ថានខេត្តបាត់ដំបង។
លោកបន្តថា បច្ចុប្បន្នតំបន់នោះបានប្រែក្លាយឈ្មោះទៅជាតំបន់ប្រើប្រាស់ច្រើនយ៉ាងសំឡូត ហើយនៅក្នុងរយៈពេលប៉ុន្មានខែចុងក្រោយនេះ ក៏មានជនឱកាសនិយមបានលួចចូលទៅទន្ទ្រានយកដី ១ កន្លែង ដើម្បីធ្វើជាកម្មសិទ្ធិផ្ទាល់ខ្លួនថែមទាំងបានដាក់ដាំដើមទុរេនរាប់រយដើមទៀតផង។
លោក ស៊ីណា បានបញ្ជាក់ថា៖ «នៅពេលទៅដល់គឺខ្ញុំសង្កេតឃើញថា ជនខិលខូចបានទន្ទ្រានយកដីប្រមាណជា ៤ ហិកតា ដោយគេបានកាប់បំផ្លាញដើមឈើធំៗអស់ជាច្រើនដូចជា ដើមត្រសេក គឺគេអារជាកង់ៗ គរជាគំនរត្រៀមបម្រុងដុតបំផ្លាញចោល និងដើមស្ពង់ ដែលមានមុខកាត់រហូតដល់ជិត ១ ម៉ែត្រ ក៏ត្រូវបានគេកាត់ផ្តួលចោលដែរ ដើម្បីយកដីដាំដំណាំ ហើយដីដែលគេកាប់ហ្នឹងគឺគេបានដាំដើមទុរេន និងដូង ប៉ុន្ដែពេលពួកខ្ញុំទៅដល់ អ្នកដាំដំណាំហ្នឹងរត់គេចខ្លួនបាត់អស់ហើយ តែយ៉ាងណា អាជ្ញាធរបានរកឃើញអត្តសញ្ញាណហើយដោយកំពុងរៀបចំសំណុំរឿងប្ដឹងទៅតុលាការ»៕