ភ្នំពេញៈ ក្រុមអ្នកវិភាគលើកឡើងស្រដៀងគ្នាថា ឱកាសល្អសម្រាប់មេដឹកនាំបក្សកាន់អំណាចលោកនាយករដ្ឋមន្ត្រី ហ៊ុន សែន និងអតីតមេបក្សប្រឆាំង លោក សម រង្ស៊ី ជួបគ្នារកដំណោះស្រាយនយោបាយដែលធ្វើឲ្យប្រជាពលរដ្ឋរីករាយសាទរគឺការជួបគ្នារវាងមេដឹកនាំទាំង ២ ដោយមានការសម្របសម្រួលពីអន្តរជាតិនៅលើទឹកដីអាមេរិក ឬអឺរ៉ុបស្របពេលពួកគេមានវត្តមាននៅទីនោះអំឡុងខែនេះ ឬខែក្រោយ។
អ្នកវិភាគនយោបាយលោក មាស នី ថ្លែងពីម្សិលមិញថា ទោះបីជាថ្នាក់ដឹកនាំនយោបាយនៃគណបក្សទាំង ២ មានជម្លោះនឹងគ្នាក្នុងរឿងនយោបាយក្តី ក៏ប៉ុន្តែតាមរយៈមនុស្សទី ៣ ថ្នាក់ដឹកនាំនៃបក្សនយោបាយទាំង ២ ក៏នៅតែមានមនោសញ្ចេតនាចង់ជួបគ្នារកដំណោះស្រាយផងដែរហើយ តាមរយៈមនុស្សទី ៣ ថ្នាក់ដឹកនាំទាំង ២ បក្សក៏បានប្រាស្រ័យទាក់ទងគ្នារួចមកហើយដែរក្នុងអំឡុងពេលមានជម្លោះនយោបាយកើតឡើងមកនេះ ប៉ុន្តែក៏អាក់ខានទៅវិញដោយសារតែប៉ះសម្តីគ្នារវាងថ្នាក់ដឹកនាំទាំង ២ ប៉ុន្តែលោក មាស នី មិនបានបញ្ជាក់លម្អិតអំពីការទាក់ទងគ្នានេះទេគ្រាន់តែថា ទាក់ទងតាមរយៈបុគ្គលទី ៣ តែប៉ុណ្ណោះ។
ឯប្រធានសមាគម ជយលាភី បញ្ញាជនកម្ពុជា លោក រស់ សារ៉ុម ក៏បញ្ជាក់ដែរថាលោក ហ៊ុន ម៉ាណែត ដែលជាកូនប្រុសលោក ហ៊ុន សែន និងលោក សម សារ៉ុម កូនប្រុសលោក សម រង្ស៊ី ក៏បានស្កាត់ទៅជួបគ្នានៅប្រទេសមួយក្នុងតំបន់អាស៊ីអំឡុងខែមិថុនាមុនថ្ងៃបោះឆ្នោតខែកក្កដា។
លោក មាស នី ថ្លែងថា៖ «បើយើងមើលចរិតអ្នកដឹកនាំទាំងសងខាងហ្នឹងរាល់ថ្ងៃគាត់មានមនោសញ្ចេតនារៀងខ្លួន ហើយមនោសញ្ចេតនានេះ វាមានល្អមានអាក្រក់ពេលណាល្អទៅក៏ល្អូកល្អិន ពេលណាដែលមានប៉ះគ្នាបន្តិចបន្តួចទៅក៏អ្វីៗសក្លាយទៅជាខ្មៅភ្លាមមួយរំពេច»។
លោកថា៖ «ខ្ញុំនៅតែមានជំនឿថាក្នុងនាមថ្នាក់ដឹកនាំខ្មែរទាំងសម្តេចនាយក [រដ្ឋមន្ត្រី ហ៊ុន សែន] ទាំងលោក សម រង្ស៊ី គាត់នៅតែមានចេតនាក្នុងការយកប្រយោជន៍ជាតិយកមកដាក់ជាធំ ហើយរកឱកាសក្នុងការធ្វើការជាមួយគ្នា»។
លោករំពឹងថា ទោះបីមិនទាន់ដល់ពេលដែលលោក ហ៊ុន សែន និងលោក សម រង្ស៊ី ធ្វើការជាមួយគ្នាក្នុងពេលឥឡូវក៏ដោយ ក៏អាចពេលអនាគតមេដឹកនាំទាំង ២ នឹងបញ្ចប់នូវការវិវាទផ្ទៃក្នុង ដើម្បីចៀសវាងកុំឲ្យគេយកកម្ពុជាទៅដាក់លើតុអន្តរជាតិធ្វើការរិះគន់។
ជាងនេះទៀតលោកថា៖ «បើសិនជាគ្រាន់តែឮព័ត៌មានថា អ្នកទាំង ២ បានជួបគ្នាពលរដ្ឋខ្មែរនៅទូទាំងប្រទេសទះដៃអបអរសាទរ ហើយប្រហែលជានឹងផ្ញើនូវការជូនពរសន្ធឹកសន្ធាប់ទៀតទៅលើមេដឹកនាំទាំង ២។ នេះជាទឹកចិត្តរបស់ពលរដ្ឋខ្មែរដែលរួមទាំងខ្ញុំផង»។
លោក រស់ សារ៉ុម ហាក់ដូចជាមិនចាត់ទុកជម្លោះនយោបាយរវាងលោក ហ៊ុន សែន និងលោក សម រង្ស៊ី ថាជាជម្លោះមែនទែននោះទេ ដោយលោកថា នយោបាយរបស់មេដឹកនាំទាំង ២ គឺងាយនឹងក្តៅហើយក៏ងាយនឹងត្រជាក់ ហើយថារយៈពេលកន្លងទៅនេះកូនប្រុសលោក ហ៊ុន សែន គឺលោក ហ៊ុន ម៉ាណែត និងកូនប្រុសលោក សម រង្ស៊ី គឺលោក សម សារ៉ុម ក៏បានជួបគ្នាជាមិត្តភាពរួចមកហើយដែរ ដែលជំនួបនេះមិនមែនជារឿងចៃដន្យនោះទេ។ ប៉ុន្តែលោកមិនបញ្ជាក់លម្អិតពីទីកន្លែងច្បាស់លាស់ និងគោលបំណងនៃជំនួបនោះទេ លោកគ្រាន់តែថាប្រភពដែលលោកទទួលបាននោះគឺជាប្រភពដែលអាចទុកចិត្តបាន។
លោក សារ៉ុម ថា៖ «អ៊ីចឹងការទស្សនកិច្ចរបស់សម្តេច ហ៊ុន សែន ទៅប៉ែកអឺរ៉ុបនោះ ខ្ញុំយល់ថាបើជួបគ្នាវាជារឿងល្អហើយ ព្រោះវាអត់មានអីខាតទេសម្រាប់ប្រទេសកម្ពុជាយើង។ ជួបគ្នាហើយនិយាយគ្នាទៅធ្វើម៉េចដើម្បីខ្មែរយើងបានសុខទាំងអស់គ្នា ហើយកុំយករឿងបុគ្គលមកលាយឡំជាមួយកិច្ចការប្រទេសជាតិ»។
លោកបញ្ជាក់ថា៖ «សម រង្ស៊ី គាត់មានទោសតែស្រុកខ្មែរទេ អ៊ីចឹងបើ សម រង្ស៊ី ជាឧក្រិដ្ឋជន ប៉ុណ្ណេះប៉ូលិសអាំងទែរប៉ូលចាប់ សម រង្ស៊ី បាត់ទៅហើយ មិនមែន សម រង្ស៊ី ដើរហើរពេញម៉ាពិភពលោកអ៊ីចឹងទេ»។
តាមគម្រោងលោកនាយករដ្ឋមន្ត្រី ហ៊ុន សែន នឹងចាកចេញទៅចូលរួមប្រជុំជាមួយអង្គការសហប្រជាជាតិនៅសហរដ្ឋអាមេរិកចុងខែកញ្ញានេះក្រោយរដ្ឋាភិបាលថ្មីរបស់លោកត្រូវបង្កើតរួច ហើយនឹងចេញទៅប្រជុំនៅសហភាពអឺរ៉ុបនាទីក្រុងប្រ៊ុចសែលប្រទេសបែលហ្ស៊ិកនាខែតុលាដែលទីតាំងខាងលើនេះក៏ជាទីដែលលោក សម រង្ស៊ី នឹងមានបេសកកម្មនៅទីនោះដែរ។
ប៉ុន្តែអ្នកនាំពាក្យគណបក្សប្រជាជនលោក សុខ ឥសាន បែរជាសម្តែងនូវការមិនពេញចិត្តចំពោះការលើកឡើងខាងលើដោយចាត់ទុកលោក សម រង្ស៊ី ជាទណ្ឌិតដែលលោក ហ៊ុន សែន មិនមានរឿងអ្វីត្រូវជួបនោះ។
លោកថ្លែងថា៖ «[ការលើកឡើង] គ្រាន់តែមានចរិតនយោបាយ។ ខ្ញុំយល់ថា បេសកកម្មរបស់សម្តេចប្រមុខរាជរដ្ឋាភិបាលទៅក្នុងនាមប្រជាជាតិកម្ពុជាទៅដើម្បីចូលរួមមហាសន្និបាតពេញអង្គរបស់អង្គការសហប្រជាជាតិមិនមែនទៅរកជួបពួកទណ្ឌិតក្រៅច្បាប់នោះទេ»។
លោកបញ្ជាក់ថា៖ «តាមការប្រមើលមើល គ្មានផ្លូវដើម្បីទៅឲ្យទណ្ឌិតហ្នឹងមកជួបថ្នាក់ដឹកនាំពេញលក្ខណៈច្បាប់របស់ប្រជាជាតិកម្ពុជានោះទេ ទោះបីអន្តរជាតិមាននិន្នាការចង់ឲ្យមានការជួបគ្នា ខ្ញុំយល់ថាមិនមានឥទ្ធិពលអីមកលើអធិបតេយ្យភាព និងឯករាជភាពរបស់កម្ពុជាទេ»។
អតីតតំណាងរាស្ត្រនៃអតីតគណបក្សសង្គ្រោះជាតិលោក ហូ វ៉ាន់ ដែលកំពុងនិរទេសខ្លួននៅសហរដ្ឋអាមេរិកថ្លែងថា៖ «បើយើងនៅតែមានះដូចអ្នកនាំពាក្យហ្នឹងនិយាយគឺនាំសេចក្តីទុក្ខដល់ប្រជាពលរដ្ឋកម្ពុជាហើយ។ នាំភាពក្រីក្រដល់ប្រជាពលរដ្ឋខ្មែរហើយ ហើយក៏នាំកុម្មុយនីស្តផ្តាច់ការទៅដល់ប្រទេសកម្ពុជាយើងហើយ»៕