ភ្នំពេញៈ អ្នកវិភាគយល់ថាការប្រកាសផ្ដល់ថវិកាដល់កងទ័ពដែលផ្ដាច់ខ្លួនពីរាជរដ្ឋាភិបាល គឺជាអំពើរដ្ឋប្រហារ ខណៈដែលអ្នកនាំពាក្យរាជរដ្ឋាភិបាលថា ការប្រកាសបែបនេះគឺជាវិទ្ធង្សនា។
គណៈកម្មាធិការអចិន្រៃ្តយ៍អតីតគណបក្សសង្គ្រោះជាតិបានចេញសេចក្ដីប្រកាសព័ត៌មានកាលពីថ្ងៃអាទិត្យបន្ទាប់ពីបានប្រជុំរយៈពេល ២ ថ្ងៃនៅទីក្រុង Lowell សហរដ្ឋអាមេរិក ដោយសម្រេចនូវគោលការណ៍ ៥ ចំណុច។ ចំណុចសំខាន់ ២ នៃការសម្រេចរបស់ពួកគេនោះគឺការត្រៀមសម្រាប់ការត្រឡប់ចូលមកតំបន់អាស៊ីនៅថ្ងៃទី ៥ វិច្ឆិកា គឺ ៤ ថ្ងៃមុនពេលចូលមកកម្ពុជា និងការត្រៀមថវិកាសម្រាប់កងទ័ពដែលផ្ដាច់ខ្លួនចេញពីលោកនាយករដ្ឋមន្ត្រី ហ៊ុន សែន។
ចំណុចទី ៣ នៃសេចក្ដីសម្រេចបានសរសេរថា៖ «ត្រៀមថវិកាសម្រាប់ផ្គត់ផ្គង់កងកម្លាំងប្រដាប់អាវុធដែលផ្ដាច់ខ្លួនពីរបបលោក ហ៊ុន សែន មកការពារពលរដ្ឋនៅថ្ងៃទី ៩ ខែវិច្ឆិកា ឆ្នាំ ២០១៩»។
លោក អ៊ូ ច័ន្ទឫទ្ធិ អតីតតំណាងរាស្ត្រនៃអតីតគណបក្សសង្គ្រោះជាតិបានប្រាប់ឲ្យដឹងកាលពីថ្ងៃចន្ទថា ថវិកាសម្រាប់រៀបចំការវិលត្រឡប់របស់ថ្នាក់ដឹកនាំគណបក្សសង្គ្រោះជាតិគឺបានពីការចូលរួមរបស់ពលរដ្ឋខ្មែរ ជាពិសេសនៅក្រៅប្រទេសដែលគាំទ្រការវិលត្រឡប់នេះ។ ប៉ុន្តែលោកមិនធ្វើអធិប្បាយពាក់ព័ន្ធទៅនឹងថវិកាសម្រាប់កងទ័ពផ្ដាច់ខ្លួននោះទេ។
ឆ្លើយតបនឹងការប្រកាសផ្ដល់ថវិកាដល់កងកម្លាំងផ្ដាច់ខ្លួននេះ លោក ផៃ ស៊ីផាន អ្នកនាំពាក្យរាជរដ្ឋាភិបាលកម្ពុជាបានចាត់ទុកទង្វើបែបនេះ ថាគ្រាន់តែជាការធ្វើវិទ្ធង្សនាប៉ុណ្ណោះ។
លោកថ្លែងថា៖ «អាហ្នឹងជាវិទ្ធង្សនាទេ វាគ្មានស្អីទៅពិតប្រាកដនោះទេ។ រាជរដ្ឋាភិបាលប្រឹងប្រែងធ្វើកិច្ចការរបស់ខ្លួនដូចជាការរក្សាសណ្ដាប់ធ្នាប់សាធារណៈ សន្តិសុខជាតិ អ្វីៗទាំងអស់ដែលរក្សាបាននូវកំណើនសេដ្ឋកិច្ចបានត្រឹមត្រូវ។ ខ្ញុំមិនជឿទេ។ កងទ័ពលោកធ្លាប់ច្បាំងដើម្បីរំដោះប្រទេសជាតិ លោកមិនឆ្កួតមកបង្កើតបញ្ហាសម្រាប់ប្រទេសជាតិរបស់លោកទេ។ លោកមានប្រពន្ធមានកូនមានក្រុមគ្រួសារដែលត្រូវការសន្តិភាពមានតែត្រូវការពង្រឹងជីវភាពក្រុមគ្រួសាររបស់លោក»។
ចំណែកលោក សុខ ទូច ប្រធានរាជបណ្ឌិត្យសភាកម្ពុជាបានថ្លែងថា ការប្រកាសផ្ដល់ថវិកាដល់កងកម្លាំងផ្ដាច់ខ្លួនពីរាជរដ្ឋាភិបាលគឺជាទង្វើរដ្ឋប្រហារ។
លោកពន្យល់ថា៖ «ការប្រកូកប្រកាសបង្វែរកាណុងអីមានថវិកាស្អីៗហ្នឹងគឺមានន័យគ្រប់គ្រាន់ស្មើនឹងធ្វើរដ្ឋប្រហារ ធ្វើបដិវត្តន៍។ ធ្វើបែបនេះវានឹងក្លាយទៅជាការក្បត់ជាតិកាន់តែធ្ងន់បានន័យថាធ្វើធ្ងន់លើធ្ងន់។ អ៊ីចឹងគណបក្សសង្គ្រោះជាតិ ឬអ្នកនៅក្នុងអង្គប្រជុំពាក់ព័ន្ធនោះក្លាយទៅជាក្រុមបង្កើតក្រុមក្បត់ជាតិហើយ ពីព្រោះក្បត់រដ្ឋធម្មនុញ្ញក្បត់នឹងអ្វីដែលមានចែងក្នុងច្បាប់របស់ព្រះរាជាណាចក្រកម្ពុជាដែលរាជរដ្ឋាភិបាលកើតចេញពីការបោះឆ្នោត»។
លោកបន្តថាការធ្វើនយោបាយរបស់ថ្នាក់ដឹកនាំអតីតបក្សប្រឆាំងដូចសព្វថ្ងៃគឺកំពុងតែធ្វើឲ្យរងគ្រោះដល់អ្នកគាំទ្រនៅក្នុងស្រុកដែលវិភាគមិនដល់។
លោកថា៖ «គាត់ធ្វើបាបអ្នកគាំទ្រដែលខ្វះការពិចារណា ដើរចូលគុក គេញាត់គុក។ គេញាត់គុកដោយស្ថិតនៅលើទិដ្ឋភាព ៣ គឺទី ១ សណ្ដាប់ធ្នាប់ ទី ២ គេការពារច្បាប់ ទី ៣ គេមិនអាចឲ្យមានបដិវត្តន៍នៅក្នុងទឹកដីមួយទេ។ រដ្ឋាភិបាលស្របច្បាប់គេត្រូវការពារបែបនេះ»។
កាលពីសប្ដាហ៍មុនលោកនាយករដ្ឋមន្ត្រី ហ៊ុន សែន បានថ្លែងក្នុងសន្និសីទរួមគ្នាជាមួយនាយករដ្ឋមន្ត្រីឡាវដោយលោកថ្លែងថា ដីកាចាប់ខ្លួនលោក សម រង្ស៊ី ដែលនឹងគ្រោងវិលចូលស្រុកថ្ងៃទី ៩ វិច្ឆិកា ត្រូវបានបញ្ជូនដល់ឡាវ និងថៃរួចហើយ ខណៈដែលកម្ពុជានឹងបញ្ជូនដីកានេះទៅប្រទេសជាសមាជិកអាស៊ានផ្សេងទៀត។
លោក ផៃ ស៊ីផាន បានថ្លែងថា កិច្ចការបញ្ជូនដីកានេះស្ថិតនៅក្នុងភារកិច្ចរបស់ក្រសួងការបរទេស ប៉ុន្តែវាមិនចំណាយពេលយូរទេ គឺគ្រាន់តែយកទៅស្ថានទូតនានានៅកម្ពុជាជាការស្រេច។
ប៉ុន្តែលោក អ៊ូ ច័ន្ទឫទ្ធិ ដែលក៏ជាអ្នកនាំពាក្យគណៈកម្មាធិការអចិន្រៃ្តយ៍នៃអតីតបក្សសង្គ្រោះជាតិដែលត្រូវបានរំលាយដោយតុលាការកំពូលកាលពីឆ្នាំ ២០១៧ ហើយនោះថ្លែងថា គម្រោងវិលចូលមកកម្ពុជានៅថ្ងៃទី ៩ វិច្ឆិកា និងការមកដល់តំបន់អាស៊ីនៅថ្ងៃទី ៥ វិច្ឆិកា នឹងធ្វើឡើងដូចការគ្រោងទុក។ លោកមិនចាប់អារម្មណ៍ចំពោះដីកាចាប់ខ្លួនដែលកម្ពុជាបញ្ជូនទៅប្រទេសជាសមាជិកនៃសមាគមអាស៊ាននោះទេ។
ទោះយ៉ាងណាលោក សុខ ទូច ថ្លែងថាលោក សម រង្ស៊ី មិនអាចចូលមកអាស៊ានដោយគ្មានការចាប់ខ្លួនទេ បើសិនជាដីកាចាប់ខ្លួនពីកម្ពុជាត្រូវបានបញ្ជូនទៅប្រទេសទាំងនោះរួចហើយ ពីព្រោះអាស៊ានមួយមានជោគវាសនាតែមួយ។
លោក ឡៅ ម៉ុងហៃ អ្នកវិភាគនយោបាយថ្លែងថា គេមិនប្រាកដថា តើប្រទេសនៅតំបន់អាស៊ាននឹងចាប់អារម្មណ៍លើការស្នើសុំរបស់កម្ពុជាក្នុងការចាប់លោក សម រង្ស៊ី ឬយ៉ាងណាទេ។ ចំពោះប្រទេសផ្សេងទៀតនៅតំបន់អាស៊ី ការចាប់ខ្លួននៅតែចំហ (អាចធ្វើបាន)៕