ភ្នំពេញៈ អ្នកវិភាគនយោបាយលើកឡើងស្រដៀងគ្នាថា មន្ត្រីការទូតជាន់ខ្ពស់អាមេរិកដែលត្រូវបានគេស្គាល់ថា ជាអ្នកការទូតមានបទពិសោធនៅអាស៊ី ហើយដែលនឹងត្រូវបញ្ជូនមកកម្ពុជាក្នុងអាណតិ្តរដ្ឋាភិបាលថ្មីរបស់លោកនាយករដ្ឋមន្ត្រី ហ៊ុន សែន ត្រូវគេរំពឹងថាបញ្ហានយោបាយដ៏ចម្រូងចម្រាសក្រោយការបោះឆ្នោតនឹងអាចមានដំណោះស្រាយឈានទៅរកភាពប្រក្រតីវិញ។
លោក សុខ ទូច អ្នកវិភាគនយោបាយ និងជាប្រធានរាជបណ្ឌិត្យសភាកម្ពុជាដែលថ្លែងថា សហរដ្ឋអាមេរិកមិនសូវមានវិនិយោគច្រើននៅកម្ពុជា ឬមិនមានប្រយោជន៍ច្រើនពីកម្ពុជានោះនឹងមិនមានអ្វីដែលអាមេរិកត្រូវប៉ះដៃយកដៃប៉ះជើងយកជើងជាមួយកម្ពុជានោះទេ ហើយថាការបញ្ជូនឯកអគ្គរដ្ឋទូតថ្មីលោក Patrick Murphy ដែលយល់ដឹងច្រើនពីកិច្ចការ និងនយោបាយនៅអាស៊ី សម្រាប់អាណត្តិថ្មីនៃស្ថានទូតសហរដ្ឋអាមេរិកប្រចាំកម្ពុជា គឺជាក្តីរំពឹងទៅដល់នយោបាយនៅកម្ពុជាដែលនឹងអាចដោះស្រាយបាន។
លោក សុខ ទូច ប្រាប់ភ្នំពេញ-ប៉ុស្តិ៍កាលពីថ្ងៃចន្ទថា៖ «ខ្ញុំគិតថាអគ្គរដ្ឋទូតថ្មីមកនេះ គេនឹងសម្របសម្រួលដើម្បីបន្ធូរបន្ថយនយោបាយ។ ខ្ញុំជឿថា មិនមានអីបន្ថែម [លើទណ្ឌកម្មចំពោះកម្ពុជានោះទេ] ពីព្រោះរដ្ឋាភិបាលកម្ពុជាកើតចេញពីការបោះឆ្នោត។ បើបន្ថែមមានន័យថាអាមេរិកអត់យល់ពីប្រជាធិបតេយ្យ»។
ដោយសំដៅទៅលើបំណងសហរដ្ឋអាមេរិកដែលប្រកាសដាក់ទណ្ឌកម្មមកលើកម្ពុជានោះលោក សុខ ទូច បញ្ជាក់ថា៖ «ខ្ញុំយល់ថាអ្វីដែលអាមេរិក ចង់បាន [ឲ្យមានដំណោះស្រាយ] គឺការរំលាយគណបក្សសង្គ្រោះជាតិ។ អានេះជាច្បាប់របស់ព្រះរាជាណាចក្រកម្ពុជា»។
លោក Paul Chambers អ្នកវិភាគនយោបាយ និងជាទីប្រឹក្សាពិសេសកិច្ចការអន្តរជាតិនៃសាកលវិទ្យាល័យ Naresuan នៅឯប្រទេសថៃប្រាប់ភ្នំពេញប៉ុស្តិ៍តាមសារអេឡិចត្រូនិកកាលពីថ្ងៃចន្ទថា អាមេរិកបានព្យាយាមបង្ហាញការមិនពេញចិត្តចំពោះការធ្លាក់ចុះនៃលទ្ធិប្រជាធិបតេយ្យ និងការកើនឡើងនៃការរំលោភបំពានសិទ្ធិមនុស្សនៅក្នុងប្រទេសកម្ពុជា។
អាមេរិកបានសម្រេចដាក់ទណ្ឌកម្មលើប្រទេសកម្ពុជាច្រើនជាងគេបើប្រៀបធៀបនឹងបណ្ដាប្រទេសនៅអាស៊ីអាគ្នេយ៍ដោយសារតែហេតុផលនៃការប្រកួតប្រជែងខាងភូមិសាស្ត្រនយោបាយ ខណៈដែលលោក ហ៊ុន សែន នាំកម្ពុជាឲ្យខិតចូលទៅក្នុងគន្លងរបស់ចិន ដូច្នេះសហរដ្ឋអាមេរិកនឹងកាន់តែព្យាយាមកៀរគរប្រមែប្រមូលសម្ពាធដើម្បីដាក់មកលើកម្ពុជាដែរ។
លោកបញ្ជាក់ថា៖ «ការតែងតាំងឯកអគ្គរដ្ឋទូតថ្មីរបស់សហរដ្ឋអាមេរិក បង្ហាញថាសហរដ្ឋអាមេរិកទទួលស្គាល់រដ្ឋាភិបាលកម្ពុជាថ្វីបើក្រុងវ៉ាស៊ីនតោនសម្តែងការព្រួយបារម្ភអំពីលទ្ធិប្រជាធិបតេយ្យនៅកម្ពុជាក៏ដោយ»។
លោក Paul សរសេរថា៖ «ខ្ញុំព្យាករថា សំឡេងគាត់នឹងកាន់តែខ្លាំងនៅកម្ពុជា ប៉ុន្តែគាត់ក៏នឹងស្វែងរកការធ្វើពាណិជ្ជកម្មដ៏ធំរវាងប្រទេសទាំង ២ ផងដែរ»។
លោកថាឯកអគ្គរដ្ឋទូតថ្មីរបស់សហរដ្ឋអាមេរិកលោក Patrick Murphy មានបទពិសោធធ្វើការនៅក្នុងស្ថានទូតអាមេរិកក្នុងប្រទេសមីយ៉ាន់ម៉ា និងប្រទេសថៃ ហើយក្នុងឱកាសទាំង ២ នេះលោកបានធ្វើការប្រឈមមុខនឹងរបបដែលប្រហាក់ប្រហែលនឹងរបបផ្តាច់ការ ឬរបបផ្តាច់ការទាំងស្រុងតែម្តង។
ដោយឡែកលោក រស់ សារ៉ុម ប្រធានសមាគមជយលាភីបញ្ញាជនកម្ពុជាថ្លែងថា បើទោះបីជាការបញ្ជូនឯកអគ្គរដ្ឋទូតថ្មីសម្រាប់ការងារអាណត្តិថ្មីរបស់អាមេរិកក៏ដោយ ប៉ុន្តែមិនមានន័យថាអាមេរិកគាំទ្ររដ្ឋាភិបាលថ្មីរបស់លោក ហ៊ុន សែន ទាំងស្រុងនោះដែរ ប៉ុន្តែសហរដ្ឋអាមេរិកមានគោលនយោបាយពាក់ព័ន្ធនឹងកម្ពុជាដែលលោករំពឹងថានឹងមានការផ្លាស់ប្តូរនយោបាយនៅកម្ពុជា។
លោកបញ្ជាក់ថា៖ «ខ្ញុំជឿថា [ការសម្របសម្រួល ]អាចទៅរួច ពីព្រោះដំណោះស្រាយនយោបាយចាំបាច់ត្រូវតែមាន មិនអាចតទៅដល់ចប់អាណតិ្តទេ។ [ឯកអគ្គរដ្ឋទូតថ្មី] ស្គាល់ច្បាស់ពីអ្វីដែលខែ្មរកំពុងជួបប្រទះ»។
លោកថា៖ «កម្ពុជាគឺជាចំណុចស្នូលនៃយុទ្ធសាស្ត្រឥណ្ឌូប៉ាស៊ីហ្វិករបស់សហរដ្ឋអាមេរិក។ អ៊ីចឹងកម្ពុជា អាមេរិកមិនអាចបោះបង់ចោលបានទេ បើថាឲ្យចិនស៊ីដាច់ផ្តាច់មុខ គឺមិនអាចទេ។ អ៊ីចឹងការមករបស់លោកអគ្គរដ្ឋទូតថ្មី ដែលនឹងមកកាន់តំណែងនេះគឺនយោបាយអាមេរិកចំពោះកម្ពុជាសង្កត់ធ្ងន់កាន់តែខ្លាំង ព្រោះកម្ពុជាមិនអាចដើរទៅរករបបផ្តាច់ការបានទេ»។
ប៉ុន្តែអ្នកនាំពាក្យគណបក្សប្រជាជនកម្ពុជាដែលជាបក្សកាន់អំណាចលោក សុខ ឥសាន នៅតែមានជំនឿថាសហរដ្ឋអាមេរិកនៅតែគាំទ្រ និងមិនដាក់ទណ្ឌកម្មលើកម្ពុជានោះទេដោយលោកបញ្ជាក់ថា បើទំនាក់ទំនងរវាងកម្ពុជា និងសហរដ្ឋអាមេរិកមិនល្អ អាមេរិកដកទូតចេញហើយ។
លោក ឥសាន ថ្លែងថា៖ «ខ្ញុំយល់ថាការទូតជាការទូតហើយវាអត់មានគ្របដណ្តប់មកលើឯករាជ្យ និងអធិបតេយ្យភាពកម្ពុជាទេ។ អ៊ីចឹងទេ ខ្ញុំយល់ថាអ្នកការទូតគេយល់អំពីអ្វីទៅដែលជានយោបាយការទូត មិនមែនមកត្រួតត្រាកម្ពុជាទេ»។
កាលពីសប្តាហ៍មុន ស្ថានទូតសហរដ្ឋអាមេរិកប្រចាំកម្ពុជាបានចេញសេចក្តីប្រកាសមួយដោយបញ្ជាក់ថា នៅថ្ងៃទី ១០ ខែសីហាលោកប្រធានាធិបតី ដូណាល់ ត្រាំ បានប្រកាសពីបំណងរបស់លោកក្នុងការតែងតាំងលោក Patrick Murphy ជាឯកអគ្គរដ្ឋទូតថ្មីប្រចាំប្រទេសកម្ពុជា។
នៅពេលនេះលោក Murphy ជាឧបការីរងរដ្ឋមន្ត្រីក្រសួងការបរទេសទទួលបន្ទុកតំបន់អាស៊ីអាគ្នេយ៍។ កន្លងមកលោកគឺជាអនុប្រធានទូត និងជាភារធារីប្រចាំប្រទេសថៃពី ២០១៣-២០១៦។ នៅប្រទេស Lesotho ពី ២០០៦-២០០៨ ហើយបានធ្វើជាតំណាងស្តីទីពិសេស និងជាអ្នកសម្របសម្រួលគោលនយោបាយសម្រាប់ប្រទេសភូមា ឬមីយ៉ាន់ម៉ាពីឆ្នាំ ២០១២-២០១៣។
ជាមួយគ្នានេះលោកឯកអគ្គរដ្ឋទូត William Heidt មានប្រសាសន៍ថាលោក Patrick គឺជាបេក្ខជនតែងតាំងដ៏ល្អបំផុត។ លោកមានប្រវត្តិលេចធ្លោក្នុងការងារ ស្គាល់តំបន់អាស៊ីអាគ្នេយ៍ច្បាស់ ហើយដឹងពីគោលនយោបាយ ការបរទេសរបស់សហរដ្ឋអាមេរិកនៅក្នុងតំបន់នេះយ៉ាងច្បាស់៕