.jpg)
លោក ឡៅ ម៉ុងហៃ ក្នុងពិធីមួយ នៅភ្នំពេញ កាលពីឆ្នាំ ២០១៨។ ហេង ជីវ័ន
ភ្នំពេញៈ អ្នកវិភាគនយោបាយ និងសង្គមលោក ឡៅ ម៉ុងហៃ បានទូលថ្វាយព្រះមហាក្សត្រ ព្រះករុណា ព្រះបាទសម្តេច ព្រះបរមនាថ នរោត្តម សីហមុនី ស្នើសុំប្រោសព្រះរាជទាន ការលើកលែងទោសទាំងអស់ដល់លោក សម រង្ស៊ី ប្រធានស្តីទីនៃអតីតគណបក្សសង្គ្រោះជាតិ ព្រមទាំងទូលថ្វាយស្នើសុំព្រះអង្គព្រះរាជទាននូវបរមងារ ជា «សម្តេច» ដល់លោក សម រង្ស៊ី ដែលលោកចាត់ទុកមេដឹកនាំនៃអតីតបក្សប្រឆាំងរូបនេះជារដ្ឋបុរសខ្មែរ ជាបណ្ឌិតព្រឹទ្ធាចារ្យ។
ការលើកឡើង និងស្នើសុំព្រះមហាក្សត្រ ព្រះរាជទានបែបនេះសម្រាប់លោក សម រង្ស៊ី ពីសំណាក់លោក ឡៅ ម៉ុងហៃ គឺធ្វើឡើង កាលពីថ្ងៃទី ១៩ មីនា មួយថ្ងៃ ក្រោយពីលោក សម រង្ស៊ី បានលើក ឡើងក្នុងបណ្តាញសង្គមហ្វេសប៊ុករបស់លោកថា អ្នកនយោបាយគ្រប់ជាន់ថ្នាក់ត្រូវចូលនិវត្តន៍យ៉ាងយូរ ចាប់ពីអាយុ ៧០ ឆ្នាំឡើងទៅ ដើម្បីទុកឱកាសឲ្យយុវជនជំនាន់ក្រោយមកដឹកនាំប្រទេសម្តង ជំនួសអ្នកដែលមានវ័យច្រើនណាស់ទៅហើយ។
លោក សម រង្ស៊ី សរសេរទៀតថា ការតម្រូវឲ្យថ្នាក់ដឹកនាំចាស់ៗសព្វថ្ងៃ ចូលនិវត្តន៍ គឺជាឱកាសផ្តល់ឲ្យយុវជនជំនាន់ក្រោយមកដឹកនាំប្រទេសតាមវេនរបស់ខ្លួន ដើម្បីឲ្យពួកគេអាចបង្ហាញ ស្នាដៃរបស់ខ្លួន ហើយទទួលបានបទពិសោធក្នុងការបំពេញតួនាទីរបស់ខ្លួនឲ្យកាន់តែប្រសើរថែមទៀត។
លោក រង្ស៊ី បញ្ជាក់ថា៖ «ចំណេះដឹងថ្មី ឈាមថ្មី គំនិតថ្មី ជាកត្តាចាំបាច់ដើម្បីឲ្យមានអភិបាលកិច្ចល្អដែលជំរុញប្រទេសយើងឆ្ពោះទៅរកការអភិវឌ្ឍពិតប្រាកដ ដែលផ្តល់ផលចំណេញដល់ប្រជារាស្ត្រទូទៅ»។
លោក ឡៅ ម៉ុងហៃ បានលើកឡើងតាមរយៈបណ្តាញសង្គមហ្វេសប៊ុក របស់លោក ថា៖ «ឯកឧត្តម សម រង្ស៊ី ជារដ្ឋបុរសខ្មែរ ជាបណ្ឌិតព្រឹទ្ធាចារ្យ a wise man, a sage ១ រូប។ សូមព្រះមហាក្សត្រជាទីគោរពសក្ការៈ របស់ប្រជាជាតិខ្មែរ ព្រះមេត្តាព្រះរាជទានការលើកលែងទោសទាំងអស់ដល់គាត់ និងព្រះរាជទានបរមងារ ជា សម្តេច ដល់គាត់។ ការលើកលែងទោស និងបរមងារ ដែលឯកឧត្តម សម រង្ស៊ី សមទទួលបាននេះ នឹងច្បាស់ជាប្រកបដោយធម៌ បានមកដោយធម៌ និងកើតឡើងដោយធម៌យ៉ាងពិតប្រាកដ។ សូមអ្នកនយោបាយ ដែលជាគូបដិបក្ខប្រឆាំងគ្នាជាមួយឯកឧត្តម សម រង្ស៊ី មេត្តាបោះបង់ចោលចេញទាំង អស់នូវអរិភាពនិងការប្រទូសរ៉ាយដែលអាចមានចំពោះគាត់»។
ប៉ុន្តែ លោក ផៃ ស៊ីផាន អ្នកនាំពាក្យរាជរដ្ឋាភិបាលកម្ពុជា បានថ្លែងថា លោកមិនមានការចាប់អារម្មណ៍ចំពោះការលើកឡើងរបស់លោក ឡៅ ម៉ុងហៃ នេះទេ ដោយបញ្ជាក់ថា ទោះជាយ៉ាងណា លោក សម រង្ស៊ី នៅតែជាទណ្ឌិតដដែល។
លោកថា៖ «ការសុំទៅណា អ្នកណាទៅណាហ្នឹង មានតែនាយករដ្ឋមន្រ្ដីទេ លោកមានបុព្វសិទ្ធិសម្រាប់រឿងនេះ។ គាត់ (សម រង្ស៊ី) នៅតែជាប់ឈ្មោះជាទណ្ឌិត។ ខ្ញុំមិនចាប់អារម្មណ៍ចំពោះរឿងនេះទេ»។
រីឯលោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណិ្ឌត្យសភាកម្ពុជា និងជាអ្នកវិភាគបញ្ហានយោបាយ បានប្រតិកម្មតបថា ការលើកឡើងនេះហួសហេតុ លើសពីការពិត ខណៈ លោក សម រង្ស៊ី គ្មានលក្ខណសម្បតិ្ដ អ្វីដែលត្រូវទទួលបានបរមងារ និងជាវីរបុរសនោះ។
លោកបន្ដថា៖ «លោក សម រង្ស៊ី គាត់មិនទាន់ទទួលបានសាលក្រមពីតុលាការផ្តន្ទាទោសគាត់ផង កុំនិយាយដល់គោរមងារ ឬក៏ងារជាសម្ដេច។ ជាបឋម លោក សម រង្ស៊ី គាត់ត្រូវមកទទួលទោស សិនដែលនេះជារឿងមួយសំខាន់ ដែលគាត់ត្រូវធ្វើ ហើយការលើកឡើងចំពោះការសុំព្រះរាជទាននៅព្រះមហាក្សត្រនេះខ្ញុំគិតថា វាជាការយល់សប្ដិមួយ ព្រោះ បរមងារជាសម្ដេចនេះ គេផ្ដល់ទៅដល់ឥស្សរជននយោបាយជាន់ខ្ពស់បំផុត ដែលមានគុណសម្បត្ដិ និងគុណូបការៈចំពោះជាតិមាតុភូមិ»។
លោកបន្ថែមថា៖ «ការលើកឡើងនេះ មានលក្ខណៈនយោបាយជ្រុលហួសហេតុ ដែលមិនស័ក្តិសមចេញពីបញ្ញវន្ដដែលស័ក្តិសមជាអ្នកវិភាគ ដែលចាត់ទុកថា មានការអប់រំខ្ពស់រហូតដល់ទៅបណ្ឌិតនយោបាយ ប៉ុន្ដែគាត់លើកឡើងបែបនេះ គឺក្នុងរូបភាពនយោបាយច្រើនជាង»។
នៅពេលទាក់ទងសុំការអធិប្បាយបន្ថែម ពីម្សិលមិញ លោក ឡៅ ម៉ុងហៃ ដាក់ជាសំណួរថា តើមាននរណាផ្សេងទៀតបានធ្វើកិច្ចការលើសលោក សម រង្ស៊ី ជាបុគ្គលម្នាក់គ្មានអំណាច និងគ្មានពុំនឹងពុំនាក់ជាសាធារណៈ?
តើមាននរណាផ្សេងទៀតបានរងការវាយប្រហារលើរាងកាយដោយគ្រាប់បែកដៃ? តើមាននរណាផ្សេងធ្លាប់មានហ្វូងមហាជនច្រើនបានមកអបអរស្វាគមន៍គាត់ដូចកាលពីថ្ងៃទី ១៣ ខែ កក្កដា ឆ្នាំ ២០១៣ ក្នុងគ្រាដែលគាត់បានវិលត្រឡប់ពីការនិរទេសខ្លួន។
លោកថាប្រទេស អង់គ្លេស រដ្ឋាភិបាលអភិរក្ស បានទូលស្នើសុំម្ចាស់ក្សត្រីឲ្យប្រទានងារជាអង្គម្ចាស់ដល់ប្រធានសហជីពដែលបានមានះប្រឆាំងនឹងរដ្ឋាភិបាលអភិរក្សជុំវិញការចូលនិវត្តន៍របស់គាត់។ ប៉ុន្តែប្រធានសហជីពរូបនោះកំពុងធ្វើកិច្ចការ ហើយប្រឆាំងនឹងគោលនយោបាយអភិរក្ស អំឡុងពេលដែលជីវិតដ៏សកម្មរបស់គាត់ដើម្បីសុខុមាលភាពរបស់កម្មករប៉ុណ្ណោះ។
លោកបានបន្ថែមថា៖ «តើនរណាបានចុះតវ៉ាតាមដងផ្លូវ ហើយនាំកម្មករទាមទារប្រាក់បៀវត្សរ៍និងលក្ខខណ្ឌការងារ បានប្រសើរ? តើនរណាមានកំហុស នៅពេលកម្មករ និងម្ចាស់ហាងនានាមានបញ្ហាជាមួយ អាជ្ញាធរពុករលួយ ដើម្បីការពារសិទ្ធិ និងផលប្រយោជន៍របស់ពួកគេ?
តើមាននរណាផ្សេងទៀតធ្លាប់ផ្តួចផ្តើមគំនិតឲ្យមានវប្បធម៌នយោបាយ ដូចជាគាត់បានធ្វើស្របពេលស្នើសុំឲ្យមានវប្បធម៌សន្ទនាក្នុងឆ្នាំ ២០១៤ គឺជាគំនិតផ្តួចផ្តើមដែលសម្តេច ហ៊ុន សែន កំពុងដណ្តើមដើម្បីយកជាកម្មសិទ្ធិ? តើមាននរណាផ្សេងទៀតបាននាំលោក ហ៊ុន សែន ទៅជួបកម្មករនៅក្រុងគូឡាឡាំពួ ប្រទេស ម៉ាឡេស៊ី?»៕
