ភ្នំពេញៈ ក្រុមអ្នកវិភាគបានអះអាងថា ឯកអគ្គរដ្ឋទូតសហភាពអឺរ៉ុបថ្មីប្រចាំកម្ពុជានឹងមើលឃើញការពិតអំពីកម្ពុជា បន្ទាប់ពីលោកស្រីបានមកដល់ប្រទេសកម្ពុជា ខណៈការសន្និដ្ឋានអំពីការដកការអនុគ្រោះពន្ធសម្រាប់ការនាំចូលពីកម្ពុជានូវទំនិញគ្រប់ប្រភេទលើកលែងតែសព្វាវុធ (EBA) កំពុងខិតជិតមកដល់។
កាលពីថ្ងៃព្រហស្បតិ៍សប្តាហ៍មុន លោកស្រី Carmen Moreno ឯកអគ្គរដ្ឋទូតសហភាពអឺរ៉ុបប្រចាំកម្ពុជាដែលទើបតែងតាំងថ្មីបានមកដល់ប្រទេស កម្ពុជា និងបានថ្វាយសារតាំងដល់ព្រះមហាក្សត្រ នរោត្តម សីហមុនី នៅព្រះបរមរាជរាំង។ នេះបើយោងតាមគណៈប្រតិភូសហភាពអឺរ៉ុបប្រចាំកម្ពុជា។
គណៈប្រតិភូសហភាពអឺរ៉ុបបាននិយាយថាលោកស្រី Carmen Moreno មានកិតិ្តយសយ៉ាងខ្លាំងត្រូវបានទទួលដោយព្រះមហាក្សត្រ និងទទួលស្គាល់ជាផ្លូវការជាឯកអគ្គរដ្ឋទូតសហភាពអឺរ៉ុបប្រចាំកម្ពុជា។
លោកស្រី Carmen Moreno ត្រូវបានស្រង់សម្តីដោយគណៈប្រតិភូរបស់លោកស្រីក្នុងប្រទេសកម្ពុជា និងបង្ហោះនៅលើទំព័រហ្វេសប៊ុកកាលពីថ្ងៃចន្ទថា៖ «វាជាបុព្វសិទ្ធិសម្រាប់ខ្ញុំដែលតំណាងសហភាពអឺរ៉ុបប្រចាំកម្ពុជា ជាប្រទេសមួយដែលខ្ញុំធ្លាប់ស្គាល់ និងជាកន្លែងដែលខ្ញុំបានឃើញវឌ្ឍនភាពក្នុងរយៈកាលជាច្រើនឆ្នាំកន្លងមក។ នេះក៏ជាលទ្ធផលនៃភាពជាដៃគូរបស់យើងក្នុងការអភិវឌ្ឍ ហើយខ្ញុំសង្ឃឹមថា ខ្ញុំអាចរួមចំណែកដល់ការពង្រឹងភាពជាដៃគូនេះ និងទំនាក់ទំនងរបស់យើង» ។
លោកស្រី Carmen Moreno ដែលជាជនជាតិអេស្ប៉ាញត្រូវបានតែងតាំងជាឯកអគ្គរដ្ឋទូតប្រចាំកម្ពុជាកាលពីខែកក្កដាដោយជំនួសលោក George Edgar ជនជាតិអង់គ្លេសដែលទើបផុតអាណត្តិបេសកកម្មនៅកម្ពុជារបស់លោកកាលពីខែកញ្ញា។
លោកស្រី Moreno មិនបានឆ្លើយតបនឹងសំណួររបស់ភ្នំពេញប៉ុស្តិ៍ដែលផ្ញើតាមអ៊ីមែលនោះទេកាលពីថ្ងៃអង្គារ។
សហភាពអឺរ៉ុបបានចាប់ផ្តើមនីតិវិធីដកការអនុគ្រោះពន្ធសម្រាប់ការនាំចូលទំនិញគ្រប់យ៉ាងលើកលែងតែសព្វាវុធ (EBA) ពីកម្ពុជាកាលពីថ្ងៃទី ១២ ខែកុម្ភៈ ដោយលើកឡើងអំពីការរំលោភបំពានសិទ្ធិការងារ ការរំលោភយកដីធ្លី និងការបង្ក្រាបផ្នែកនយោបាយ។
កាលពីពាក់កណ្តាលខែសីហាសហភាពអឺរ៉ុបបានប្រកាសថា ខ្លួនបានបញ្ចប់ការស៊ើបអង្កេត ហើយលទ្ធផលរកឃើញរបស់ពួកគេត្រូវបានរំពឹងថានឹងផ្ញើរមកកម្ពុជាក្នុងរយៈពេល ៣ ខែគិតចាប់ពីកាលបរិច្ឆេទនៃការបិទការស៊ើបអង្កេតរបស់ពួកគេ។ ប្រសិនបើនីតិវិធីមិនផ្លាស់ប្តូរ ការសន្និដ្ឋាននឹងមកដល់កម្ពុជាមិនហួសពីសប្តាហ៍ក្រោយ ។
ប៉ុន្តែលោក កុយ គួង អ្នកនាំពាក្យក្រសួងការបរទេស និងកិច្ចសហប្រតិបត្តិការអន្តរជាតិបានថ្លែងថា មិនទាន់ទទួលបានរបាយការណ៍ពីសហភាពអឺរ៉ុបទេ។
ប៉ុន្តែតាមប្រភពមួយដែលដឹងរឿងនេះសុំមិនបញ្ចេញឈ្មោះបានថ្លែងថា ការបោះពុម្ពសេចក្តីសន្និដ្ឋានដែលធ្វើឡើងដោយលោកស្រី Cecilia Malmstrom ស្នងការអឺរ៉ុបផ្នែកពាណិជ្ជកម្ម និងលោក Jean-Claude Juncker ប្រធានគណៈកម្មការអឺរ៉ុបមិនទាន់បានផ្ញើមកកម្ពុជានៅឡើយទេ។ នៅពេលដែលកម្ពុជាទទួលបានការបោះពុម្ពនេះ ប្រទេសកម្ពុជាមានរយៈពេល ១ ខែ ដើម្បីផ្តល់មតិយោបល់ត្រឡប់ទៅវិញ។
លោកបានថ្លែងថា មតិយោបល់របស់កម្ពុជានឹងទទួលយកដោយប្រធានគណៈកម្មការសហភាពអឺរ៉ុបថ្មីគឺ Ursula von der Leyen ។
ប្រភពនេះបានបញ្ជាក់ថា៖ «តាមដែលខ្ញុំដឹងតាមលក្ខណៈផ្ទាល់ខ្លួនវាមិនច្បាស់ជាងអ្វីដែល គណៈកម្មការថ្មីនឹងស្នើទៅគណៈរដ្ឋមន្ត្រីរបស់សហភាពអឺរ៉ុបទេ។ មានការផ្លាស់ប្តូរផ្នែកនយោបាយនៅអឺរ៉ុប ហើយវាគ្រោះថ្នាក់ដែលធ្វើការព្យាករជាមុន»។
អ្នកវិភាគនយោបាយលោក ឡៅ ម៉ុងហៃ បានថ្លែងថាលោកមិនឃើញថា លោកស្រី Moreno អាចធ្វើអ្វីបានច្រើនជាងអគ្គរដ្ឋទូតមុន លោក George Edgar ក្នុងការដោះស្រាយបញ្ហា EBA នោះទេ លុះត្រាតែរដ្ឋាភិបាលយើងធ្វើតាមសហភាពអឺរ៉ុបក្នុងការលើកកម្ពស់គោលការណ៍សិទ្ធិមនុស្សដែលភ្ជាប់ទៅនឹងកិច្ចព្រមព្រៀង EBA ។
ទោះយ៉ាងណាលោក សុខ ទូច ប្រធានរាជបណ្ឌិត្យសភាកម្ពុជាបានថ្លែងកាលពីម្សិលមិញថា លោកស្រី Moreno នឹងឃើញការអភិវឌ្ឍពិតប្រាកដនៅកម្ពុជាដែលខុសពីអ្វីដែលបានផ្តល់ទៅសហភាពអឺរ៉ុបដោយ ក្រុមប្រឆាំង។
លោកបានបន្តថា អ្វីដែលលោកស្រី Moreno អាចយកចិត្តទុកដាក់ពិសេសនោះគឺតម្លាភាពចំពោះការចោទប្រកាន់អំពីបញ្ហាប្រជាធិបតេយ្យ និងសិទ្ធិមនុស្ស។
លោក សុខ ទូច បានថ្លែងថា កិច្ចសហប្រតិបត្តិការនាពេលអនាគតរវាងសហភាពអឺរ៉ុប និង កម្ពុជាមិនគួរជាកិច្ចសហប្រតិបត្តិការ «ដែលដាក់សម្ពាធផ្នែកនយោបាយ និងសេដ្ឋកិច្ចទៅលើគ្នាទៅវិញទៅមកនោះទេ»។
លោកថា៖ «ខ្ញុំគិតថាកាតព្វកិច្ចរបស់ឯកអគ្គរដ្ឋទូតសហភាពអឺរ៉ុបគឺត្រូវផ្សព្វផ្សាយអ្វីដែលល្អអំពីកម្ពុជាទៅសហភាពអឺរ៉ុប។ វាខុសពីអ្វីដែលក្រុមប្រឆាំងធ្វើ។ ប្រសិនបើលោកស្រីមិនលម្អៀង លោកស្រីនឹងអាចធ្វើឲ្យរដ្ឋសមាជិកសហភាពអឺរ៉ុបដឹងច្រើនជាងមុនអំពីកម្ពុជា និងជំរុញការវិនិយោគក្នុងប្រទេសកម្ពុជា»។
លោកបានបន្តថា៖ «យើងសង្ឃឹមថាសហភាពអឺរ៉ុបនឹងក្លាយជាដៃគូល្អរបស់យើងក្នុងវិស័យទេសចរណ៍ និងកសិកម្ម ហើយបង្កើតទីក្រុងស្អាតមួយដែលធ្វើឲ្យប្រទេសតូចនេះមានភាពទាក់ទាញចំពោះវិនិយោគិន»៕ PS