.jpg)
លោក សម រង្ស៊ី កាលនៅមិនទាន់និរទេសខ្លួនទៅក្រៅប្រទេស។ ហេង ជីវ័ន
ភ្នំពេញៈ លោក សម រង្ស៊ី ប្រធានស្ដីទីគណបក្សសង្គ្រោះជាតិដែលត្រូវបានតុលាការរំលាយ បានអំពាវនាវឲ្យពលរដ្ឋក្នុងស្រុកងើបឡើងទាមទារឲ្យមានការផ្លាស់ប្ដូរ ជាអ្វីដែលអ្នកវិភាគថ្កោលទោស ខណៈមន្ត្រីរាជរដ្ឋាភិបាលចំអកចំពោះការអំពាវនាវនេះ ស្របពេលដែលក្រុមអ្នកគាំទ្រអតីតបក្សប្រឆាំងនៅអឺរ៉ុបត្រៀមបាតុកម្មនៅថ្ងៃទី ១ មីនា ដើម្បីទាមទារសិទ្ធិមនុស្សនៅកម្ពុជា។
ក្នុងវីដេអូឃ្លីបដែលលោកបង្ហោះកាលពីថ្ងៃអង្គារ លោក សម រង្ស៊ី ថ្លែងថា៖ «ក្នុងឆ្នាំ ២០១៩ នេះ យើងត្រូវដណ្ដើមប្រទេសកម្ពុជាយកមកសងប្រជារាស្ត្រខ្មែរវិញ។ នេះជាសាច់រឿងផង ជាគោលដៅយើងផង ជាបេសកកម្មប្រវត្តិសាស្ត្រដែលយើងត្រូវចូលរួមបំពេញបេសកកម្មនេះប្រកបដោយជោគជ័យដណ្ដើមប្រទេសកម្ពុជាយកមកសងប្រជារាស្ត្រខ្មែរវិញ»។
ការថ្លែងរបស់លោក សម រង្ស៊ី បានធ្វើឡើងក្នុងពេលជួបជាមួយអ្នកគាំទ្រអតីតគណបក្សសង្គ្រោះជាតិនៅសហរដ្ឋអាមេរិក។ ក្នុងជំនួបនោះ លោកថា ការយកប្រទេសកម្ពុជាមកវិញនេះ មិនឲ្យផុតពីឆ្នាំ ២០១៩ នេះទេ។ លោកអំពាវនាវឲ្យខ្មែរនៅក្រៅប្រទេសរួមមាន ពលករ កម្មករ នៅបណ្ដាប្រទេសក្នុងតំបន់អាស៊ីចូលរួមដំណើរវិលត្រឡប់ទៅកម្ពុជាជាមួយគ្នាដើម្បីចាប់ដៃជាមួយពលរដ្ឋក្នុងស្រុកដែលកំពុងភ័យខ្លាច។
លោកថ្លែងថា៖ «ដូច្នេះយើងត្រូវប្រមូលកម្លាំងយើងចូលស្រុកហើយបំផុសពលរដ្ឋខ្មែរនៅក្នុងស្រុកឲ្យងើបឈរឡើងដើម្បីទាមទារការផ្លាស់ប្តូរដែលយើងចង់បានទាំងអស់គ្នា»។
ទោះយ៉ាងណាលោកថា មិនចង់ឲ្យមានការបង្ហូរឈាមទេ បើទោះបីជាអះអាងថា លោកជាមួយពលរដ្ឋនឹងចូលទៅចាប់លោកនាយករដ្ឋមន្ត្រី ហ៊ុន សែន ក៏ដោយ។
លោកបានបង្ហើបថា មានបណ្ដាញធ្វើការក្នុងស្រុកដោយស្ងាត់ៗ និងដោយចេញមុខ រួមទាំងការធ្វើសង្គ្រាមចិត្តសាស្ត្រជាមួយកងទ័ពដោយបំផុសបំផុលទឹកចិត្តទាហានកុំឲ្យការពារអំណាចរបស់លោក ហ៊ុន សែន។
លោក ប៉ុល ហំម អតីតអនុប្រធានអតីតគណបក្សសង្គ្រោះជាតិបានថ្លែងថា លោកមិនអាចទស្សន៍ទាយថា តើលោក សម រង្ស៊ី ពិតជានឹងត្រឡប់មកវិញមែនឬមិនមែនទេ ដោយសារលោកនៅកម្ពុជាមិនធ្លាប់បានទាក់ទងគ្នា។
ដោយសារជាប់បម្រាមហាមធ្វើនយោបាយ លោក ប៉ុល ហំម បានថ្លែងថា លោកមិនអាចអត្ថាធិប្បាយបានទេ។ ប៉ុន្តែលោកបានបញ្ជាក់ជំហរថា៖ «ដូចដឹងស្រាប់ហើយ រឿងធ្វើនយោបាយអី ខ្ញុំនៅក្នុងបម្រាមនៅឡើយ។ តែបើទុកជាមានសិទ្ធិធ្វើនយោបាយក៏ដោយ ក៏ខ្ញុំមិនមានគម្រោងផែនការអីឲ្យប្រជាពលរដ្ឋប្រមូលផ្ដុំធ្វើអ្វីដែលខុសច្បាប់ទេ។បើគាត់ធ្វើបានអីខ្ញុំមិនដឹងទេណា មិនមែនតាមរយៈខ្ញុំទេ»។
យ៉ាងណាក្ដីលោក សុខ ឥសាន អ្នកនាំពាក្យគណបក្សប្រជាជនកម្ពុជាបានចំអកឲ្យលោក សម រង្ស៊ី ដោយលោកបានថ្លែងថា បើចង់ប្ដូររបបត្រូវចូលមកប្ដូរជាក់ស្ដែង មិនមែនគ្រាន់តែស្រែកពីចម្ងាយទេ។
លោកថ្លែងថា៖ «បើចង់ប្តូររបបសព្វថ្ងៃដូចបានស្រែកមែននោះ សូមអញ្ជើញទណ្ឌិតនិងបក្ខពួកជាពិសេសអ្នកវិភាគរត់ចោលស្រុកវ័យក្មេងចូលមកក្នុងស្រុកខ្មែរទៅដើម្បីធ្វើការផ្លាស់ប្តូរជាក់ស្តែងនៅនឹងកន្លែងតែម្តង។ ប្រជាជនកម្ពុជានៅរង់ចាំទណ្ឌិតនិងអស់លោកចូលមកដឹកនាំផ្ទាល់ តែប្រជាជនកម្ពុជាមិនត្រូវការការញុះញង់ពីចម្ងាយជាដាច់ខាត។ បើមកដឹកនាំផ្ទាល់ទើបហៅថាក្លាហាន តែបើគ្រាន់តែស្រែកពីចម្ងាយអត់បានការទេ»។
លោក សុខ ឥសាន បានបន្ដថា លោក សម រង្ស៊ី តែងនិយាយផ្ទុយពីការពិតដោយលោកថា កម្ពុជាកំពុងរីកចម្រើន ប៉ុន្តែលោក សម រង្ស៊ី ថា កំពុងលិចលង់ក្រីក្រយ៉ាប់យ៉ឺន។ កម្ពុជាមានស្ថិរភាព ប៉ុន្តែលោក សម រង្ស៊ី ថា កម្ពុជាកំពុងច្របូកច្របល់ អស្ថិរភាព។
លោកបញ្ជាក់ថា៖ «ទណ្ឌិតកំពុងរត់ចោលស្រុកមិនហ៊ានចូលស្រុក បែរជាថាចង់មកចាប់សម្តេច ហ៊ុន សែន ទៅវិញ។ ខ្លួនឯងកំពុងអស់អ្នកគាំទ្រ បែរជានិយាយថាមានអ្នកគាំទ្ររាប់លាននាក់នៅក្រៅប្រទេស»។
លោក ផៃ ស៊ីផាន អ្នកនាំពាក្យរាជរដ្ឋាភិបាល បានថ្លែងថា រដ្ឋាភិបាលមិនប្រឆាំងនឹងការវិលត្រឡប់របស់លោក សម រង្ស៊ីទេ។ ប៉ុន្តែការវិលត្រឡប់ក្នុងរូបភាពជាឧទ្ទាមមកប្រឆាំងនឹងរដ្ឋាភិបាលស្របច្បាប់នោះ កម្ពុជានឹងចាត់វិធានការគ្រប់បែបយ៉ាង។
លោកថ្លែងថា៖ «វាជាការអំពាវនាវរបៀបឧទ្ទាមបង្កចលាចល ការអំពាវនាវនេះជាអំពើខុសច្បាប់កម្ពុជា។រដ្ឋាភិបាលនឹងចាត់វិធានការគ្រប់បែបយ៉ាងហើយជំហររបស់កងប្រដាប់អាវុធបានបង្ហាញពីការប្ដេជ្ញាក្នុងកិច្ចការពារច្បាប់ ការពាររដ្ឋាភិបាល ប្រឆាំងដាច់ខាតក្រុមបះបោរ ក្រុមធ្វើសកម្មភាពទាំងឡាយណាដែលប្រឆាំងរដ្ឋាភិបាល»។
លោក ឡៅ ម៉ុងហៃ អ្នកវិភាគនយោបាយក៏មិនយល់ស្របចំពោះការប្រមូលកម្លាំងប្រជាជនមកប្រឆាំងនឹងរដ្ឋាភិបាលដែរ ដោយលោកថ្លែងយ៉ាងខ្លីថា៖ «ខ្ញុំមិនយល់ស្រប ហើយថ្កោលទោសការអំពាវនាវបែបនេះ»។
ប៉ុន្តែនៅពេលសួរថា តើនឹងមានអ្វីកើតឡើងប្រសិនបើមានចលនាប្រជាជនមែននោះ លោក ម៉ុងហៃ បានថ្លែងថា៖ «ប្រហែលជាមានការប្រយុទ្ធគ្នារវាងគណបក្សទាំង ២ ដែលទំហំនិងលទ្ធផលដូចដែលការប្រយុទ្ធគ្នាពីមុនធ្លាប់បានបង្ហាញហើយ គឺថា លទ្ធផលមិនអាចគិតទុកមុនបាន»។
ស្របពេលជាមួយគ្នានេះ សកម្មជនអតីតគណបក្សសង្គ្រោះជាតិនៅទ្វីបអឺរ៉ុបកំពុងត្រៀមធ្វើបាតុកម្មនៅថ្ងៃទី ១ ខែមីនាខាងមុខនៅទីក្រុងប្រ៊ុចសែល ប្រទេសបែលហ្ស៊ិក ដើម្បីអ្វីដែលពួកគេថា «ទាមទារសិទ្ធិមនុស្សនៅកម្ពុជា»។
លោក ណណ ហ៊ី អាយុ ៧៣ ឆ្នាំ ដែលជាសកម្មជនអតីតគណបក្សសង្គ្រោះជាតិម្នាក់នៅប្រទេសបែលហ្ស៊ិកបានប្រាប់កាលពីម្សិលមិញថា ការធ្វើបាតុកម្មនេះគឺធ្វើឡើងមុនថ្ងៃគម្រប់ខួប ១៨ ខែនៃការចាប់ខ្លួនលោក កឹម សុខា និងមុនពេល សហភាពអឺរ៉ុបគ្រោងនឹងសម្រេចដំណើរការដកប្រព័ន្ធអនុគ្រោះពន្ធពីកម្ពុជាដែលលោកថានឹងធ្វើនៅខែមីនា។
លោកបានបញ្ជាក់ថា៖ «គេប្រហែលសម្រេចដក (EBA) នៅក្នុងខែ ៣ នេះប្រសិនបើរបបអាណត្តិទី ៦ នេះ មិនព្រមគោរព ៥ ចំណុច ដែលគេសុំឲ្យវិលថយក្រោយវិញដើម្បីរកលទ្ធិប្រជាធិបតេយ្យសេរីភាពជូនស្រុកខ្មែរវិញ។ យើងដឹងថា វាប៉ះពារធ្ងន់ធ្ងរណាស់ បើយើងមិនព្រមធ្វើតាមគេ»៕
