.jpg)
អ្នកសារព័ត៌មាន និងអ្នកពាក់ព័ន្ធប្រព័ន្ធផ្សព្វផ្សាយអបអរទិវាអន្តរជាតិ សិទ្ធិទទួលព័ត៌មាន។ ហ៊ាន រង្សី
ភ្នំពេញៈ អ្នកសារព័ត៌មាន មន្ត្រីជំនាញផ្នែកព័ត៌មានរបស់រាជរដ្ឋាភិបាល និងអង្គការសង្គមស៊ីវិល ព្រមទាំងស្ថានទូតប្រមាណជា ៥០ នាក់ បានជួបប្រជុំគ្នានៅក្នុងសណ្ឋាគារមួយក្នុងរាជធានីភ្នំពេញកាលពីថ្ងៃម្សិលមិញ ដើម្បីសម្ដែងការអបអរសាទរទិវាអន្តរជាតិសម្រាប់សិទ្ធិទទួលព័ត៌មានសកលដែលប្រកាសដោយមហាសន្និបាតអង្គការសហប្រជាជាតិលើកទី ៧៤ នៅថ្ងៃទី ២៨ ខែកញ្ញា ចំពេលដែលពិភពលោកប្រឈមជាមួយការរីករាលដាលនៃជំងឺរាតត្បាតកូវីដ ១៩។ កម្មវិធីនេះបានបង្ហាញតួនាទីសំខាន់នៃការទទួលបានព័ត៌មានក្នុងការជួយសង្គ្រោះជីវិត និងកាត់បន្ថយផលប៉ះពាល់នៃវិបត្តិដូចជាការរាតត្បាតនៃជំងឺកូវីដ១៩នាពេលបច្ចុប្បន្ន និងក្នុងការរៀបចំគោលនយោបាយប្រកបដោយចីរភាព។
កាលពីថ្ងៃទី ១៧ ខែ វិច្ឆិកា ឆ្នាំ ២០១៥ អង្គការអប់រំ វិទ្យាសាស្ត្រ និងវប្បធម៌របស់អង្គការសហប្រជាជាតិ (យូណេស្កូ) បានប្រកាសយកថ្ងៃទី ២៨ ខែកញ្ញា ជាទិវាអន្តរជាតិសម្រាប់សិទ្ធិទទួលព័ត៌មានជាសកល ដោយមើលឃើញថា អង្គការសង្គមស៊ីវិល និងស្ថាប័នរដ្ឋាភិបាលជាច្រើននៅលើពិភពលោក បានអនុម័ត និងប្រារព្ធពិធីនេះ។
ក្រសួងព័ត៌មាន និង UNESCO បានចេញសេចក្ដីប្រកាសព័ត៌មានរួម ដោយបានអះអាងថា ការប្រារព្ធឡើងនូវទិវាអន្តរជាតិសម្រាប់សិទ្ធិទទួលព័ត៌មានជាសកលពិតជាមានសារៈសំខាន់ណាស់ក្នុងប្រទេសកម្ពុជា ដោយសារតែក្រសួងព័ត៌មានក្រោមការពិគ្រោះយោបល់ជាមួយទីភ្នាក់ងារអង្គការសហប្រជាជាតិ អង្គការសង្គមស៊ីវិល និងអ្នកពាក់ព័ន្ធប្រព័ន្ធផ្សព្វផ្សាយកំពុងធ្វើការលើការអនុម័តច្បាប់ស្ដីពីសិទ្ធិទទួលព័ត៌មាននៅចុងឆ្នាំនេះ។
សេចក្ដីប្រកាសព័ត៌មាននេះបានឲ្យដឹងថា៖ «មនុស្សបានដឹងថាការទទួលព័ត៌មានត្រឹមត្រូវ និងទាន់ពេលវេលាអាចជាបញ្ហានៃជីវិត និងការស្លាប់។ ការទទួលបានព័ត៌មានក៏អាចធ្វើឲ្យប្រជាជនអាចធ្វើតាមការឆ្លើយតបចំពោះវិបត្តិដូចជាច្បាប់បង្ខាំង បទប្បញ្ញត្តិនៃការធ្វើដំណើរ និងសាលារៀន ការធ្វើតេស្តរកមេរោគ ការផ្គត់ផ្គង់ឧបករណ៍វេជ្ជសាស្ត្រ និងជំនួយសេដ្ឋកិច្ច ឬកញ្ចប់ជំនួយ»។
លោក មាស សុភ័ណ្ឌ អ្នកនាំពាក្យក្រសួងព័ត៌មានបានថ្លែងឲ្យដឹងក្នុងពិធីនោះថា ស្របទៅនឹងបរិបទនៃសិទ្ធិទទួលបានព័ត៌មាន រាជរដ្ឋាភិបាលក៏បានប្រឹងប្រែងជំរុញឲ្យមានសេរីភាពនៃប្រព័ន្ធផ្សព្វផ្សាយ ដោយកំពុងបង្កើតឲ្យមានច្បាប់ស្ដីពីសិទ្ធិទទួលបានព័ត៌មាន។
លោកថ្លែងថា៖ «សិទ្ធិសេរីភាពក្នុងការទទួលបានព័ត៌មាននៅប្រទេសកម្ពុជាយើង ឃើញថាកាន់តែទូលំទូលាយ និងទទួលបានព័ត៌មានពីគ្រប់ប្រភពទាំងអស់ដូចបានឃើញប្រជាពលរដ្ឋកម្ពុជា លោកបានទទួលព័ត៌មានបានលឿន និងច្រើនប្រភពតាមរយៈការរីកចម្រើនប្រព័ន្ធព័ត៌មាន»។
ទន្ទឹមគ្នានេះដែរ សហភាពសហព័ន្ធអ្នកសារព័ត៌មានកម្ពុជា (ស.ស.ស.ក) បានចេញសេចក្ដីថ្លែងការណ៍ អបអរសាទរទិវាអន្តរជាតិស្ដីពីសិទ្ធិទទួលព័ត៌មាននេះដែរ ដោយបានលើកទឹកចិត្តដល់អ្នកសារព័ត៌មាន និងអ្នកនិយមប្រើប្រាស់បណ្តាញសង្គមនៅកម្ពុជាឲ្យបន្តប្រើប្រាស់សិទ្ធិទទួលបានព័ត៌មានក្នុងឧត្តមគតិដើម្បីពង្រឹងសមត្ថភាពជាតិ ដើម្បីបណ្តុះស្មារតីកម្ពុជានិយម និងបន្តប្រើប្រាស់លំហសិទ្ធិសេរីភាពព័ត៌មាន ដើម្បីផ្សព្វផ្សាយអំពីផលប្រយោជន៍ជាតិជាមុន។
ស.ស.ស.ក បានថ្លែងឲ្យដឹងថា៖ «យើងអាចប្រើប្រាស់សិទ្ធិនេះ ដើម្បីស្វែងយល់ព័ត៌មានគ្រប់ទិដ្ឋភាពមិនត្រឹមតែអំពីវឌ្ឍនភាពនៃប្រទេសជាតិរបស់យើងតែប៉ុណ្ណោះទេ គឺយើងត្រូវតាមដានជាប្រចាំអំពីសភាពការណ៍វិវឌ្ឍន៍ប្រែប្រួលឥតឈប់ឈរនៃបញ្ហាតំបន់ និងពិភពលោកផងដែរ»។ «យើងសង្ឃឹមថាច្បាប់នេះនឹងក្លាយជាមធ្យោបាយបន្ថែមរួមចំណែកពង្រឹងពង្រីកនូវឥរិយាបថ ផ្នត់គំនិត និងវប្បធម៌ ប្រជាធិបតេយ្យចូលរួមពីសំណាក់ប្រជាពលរដ្ឋជាមួយនឹងរាជរដ្ឋាភិបាលក្នុងសកម្មភាពអភិវឌ្ឍន៍ប្រទេសជាតិលើគ្រប់វិស័យ»។
ស.ស.ស.ក បានថ្លែងទៅកាន់ទិវាអន្តរជាតិនោះថា៖ «ថ្ងៃនេះសហភាពសហព័ន្ធអ្នកសារព័ត៌មានកម្ពុជា សូមចូលរួមជាមួយអ្នកសារព័ត៌មាននៅក្នុងប្រទេសកម្ពុជា និងនៅជុំវិញពិភពលោក អបអរសាទរទិវាអន្តរជាតិស្ដីពីសិទ្ធិទទួលព័ត៌មានដែលត្រូវមហាសន្និបាតអង្គការសហប្រជាជាតិលើកទី ៧៤ ប្រកាសនៅថ្ងៃទី ២៨ ខែ កញ្ញា ឆ្នាំ ២០១៩ ក្នុងគោលបំណងបង្កើតឱកាសចូលរួម ដើម្បីពិភពលោកសម្រេចឲ្យបាននូវគោលដៅអភិវឌ្ឍន៍សហស្សវត្សរ៍»។
លោក Sardar Umar Alam តំណាងអង្គការយូណេស្កូប្រចាំនៅព្រះរាជាណាចក្រកម្ពុជាបានថ្លែងក្នុងពិធីនោះដែរថា នៅប្រទេសកម្ពុជា ទាក់ទងនឹងសិទ្ធិទទួលបានព័ត៌មានគឺបានផ្តល់សេរីភាពច្រើនជាងមុន ដូចជាការផ្តួចផ្តើមធ្វើសេចក្តីព្រាងច្បាប់ សិទ្ធិទទួលព័ត៌មាន ដែលរដ្ឋាភិបាលកម្ពុជា មានគោលបំណងក្នុងការអនុម័តច្បាប់នេះឲ្យបាននៅឆ្នាំ ២០២០។
លោក Sardar បានថ្លែងថា៖ «ច្បាប់ស្តីពីសិទ្ធិទទួលព័ត៌មាននៅកម្ពុជានឹងត្រូវបានអនុម័តក្នុងពេលឆាប់ៗ ហើយវានឹងមានលក្ខណៈស្តង់ដាអន្តរជាតិក្នុងការផ្តល់នូវសេរីភាពបញ្ចេញមតិពេញលេញ។ គោលការណ៍សំខាន់នៃច្បាប់នេះ គឺត្រូវឲ្យមានការបញ្ជាក់ឲ្យបានច្បាស់ពីសិទ្ធិទទួលបានព័ត៌មានខ្ពស់បំផុត និងដោយរលូន»៕
