.jpg)
ជនសង្ស័យ នឹង សេចក្តីប្រកាសពីការឃាត់ខ្លួនជនសង្ស័យដែលជាអ្នកសារព័ត៌មាន ២ នាក់ទៅតុលាការ។
កោះកុងៈ មន្ត្រីបរិស្ថានខេត្តកោះកុងបានបញ្ជូនអ្នកសារព័ត៌មាន ២ នាក់ទៅតុលាការនៅថ្ងៃទី ២៩ ខែមេសា ពាក់ព័ន្ធការរារាំងការងារសមត្ថកិច្ច ពេលកំពុងចុះប្រតិបត្តិការ បង្ក្រាបបទល្មើស ធនធានធម្មជាតិនៅក្នុងភូមិជីត្រេះ ឃុំអណ្តូងទឹក ស្រុកបុទុមសាគរ។
លោក ហ៊ុន ម៉ារ៉ាឌី ប្រធានមន្ទីរបរិស្ថានខេត្តកោះកុងប្រាប់ភ្នំពេញប៉ុស្តិ៍នៅព្រឹកថ្ងៃទី ៣០ ខែមេសានេះថា នៅថ្ងៃទី ២៨ ខែមេសា ឆ្នាំ ២០២១ វេលាម៉ោង ៨ ព្រឹក ក្រុមការងារមន្ទីរបរិស្ថានខេត្តកោះកុងបានសហការជាមួយកម្លាំងកងរាជអាវុធហត្ថលើផ្ទៃប្រទេស និងបុគ្គលិកអង្គការអភិវឌ្ឍន៍ដៃគូបានចុះល្បាតទប់ស្កាត់បទល្មើសធនធានធម្មជាតិ ត្រង់ចំណុចកំពង់ភ្លូរ ស្ថិតក្នុងភូមិជីត្រេះ ឃុំអណ្តូងទឹក ហើយបានប្រទះឃើញខ្ទម ដែលពលរដ្ឋសង់ខុសច្បាប់ស្ថិតក្នុងតំបន់អភិរក្សនៃឧទ្យានជាតិបុទុមសាគរ។
លោកថ្លែងថា៖ «នៅពេលក្រុមការងារកំពុងប្រតិបត្តិការរុះរើខ្ទមក៏មានអ្នកសារព័ត៌មានចំនួន ៥ នាក់បានធ្វើសកម្មភាពថតរូបភាព និង រារាំងធ្វើឲ្យរាំងស្ទះដល់សមត្ថកិច្ចកំពុងចុះប្រតិបត្តិការបង្ក្រាបបទល្មើសធនធានធម្មជាតិ»។
នៅពេលនោះក្រុមសមត្ថកិច្ចបានធ្វើការហាមឃាត់ជាច្រើនដង ប៉ុន្តែពួកគាត់ មិនព្រមស្តាប់ ហើយបានប្រើពាក្យសម្តីមិនសមរម្យទៀតផង។ ដូចច្នេះក្រុមសមត្ថកិច្ចបានសម្រេចចាប់ខ្លួនចំនួន ២ នាក់ និងបានកសាងសំណុំរឿងបញ្ជូនទៅតុលាការ។
បើតាមលោក ហ៊ុន ម៉ារ៉ាឌី ជនសង្ស័យទាំង ២ នាក់ម្នាក់ឈ្មោះ នួន ប៊ុនថា ភេទប្រុស អាយុ ៤៦ ឆ្នាំ បច្ចុប្បន្នរស់នៅភូមិអណ្តូងទឹក ឃុំអណ្តូងទឹក ស្រុកបុទុមសាគរ ខេត្តកោះកុង ជាជំនួយការគេហទំព័រ រស្មីក្រុងច្បារមន ដែលបានប្រើប្រាស់កាតកាសែតផុតកំណត់ថ្ងៃទី ២១ ខែមករា ឆ្នាំ២០២១។
ម្នាក់ទៀតឈ្មោះ ផល សៀប ភេទប្រុស អាយុ ៤១ ឆ្នាំបច្ចុប្បន្នរស់នៅភូមិតានី ឃុំភ្ញីមាស ស្រុកគិរីសារគរ ខេត្តកោះកុង។ គាត់ជាអ្នកយកព័ត៌មាននៃអង្គភាពព័ត៌មាន ឥទ្ធិពលព្រះអាទិត្យ ដែលពុំមានការចុះបញ្ជីនៅមន្ទីរព័ត៌មានខេត្តកោះកុងទេ។
ចំណែកអ្នកព័ត៌មាន ៣ រូបផ្សេងទៀតបានរត់គេចខ្លួនបាត់។
លោក ហ៊ុន ម៉ារ៉ាឌី បញ្ជាក់ថា ករណីបង្កឡើងដោយជនសង្ស័យខាងលើនេះផ្ទុយពីច្បាប់ស្តីពី តំបន់ការពារធម្មជាតិតាមមាត្រា ៦១ ចំណុច ៧ គឺរារាំងដល់មន្ត្រីរដ្ឋបាលការពារ និងអភិរក្សធម្មជាតិក្នុងការចុះអនុវត្តមុខនាទី និងភារកិច្ចរបស់ខ្លួន។
យោងតាមមាត្រា ៦១ នៃច្បាប់ស្តីតំបន់ការពារធម្មជាតិចែងថា ត្រូវផ្តន្ទាទោសជាបទល្មើសធនធានធម្មជាតិថ្នាក់ទី ៣ ដែលបទល្មើសធនធានធម្មជាតិថ្នាក់ទី ៣ ចែងថា ត្រូវផ្តន្ទាទោសដាក់ពន្ធនាគារពី ១ ឆ្នាំ ទៅ ៥ ឆ្នាំ ឬពិន័យជាប្រាក់ពី ១៥ លានរៀល ដល់ ១៥០ លានរៀល៕
