បន្ទាយមានជ័យៈ តុលាការខេត្តបន្ទាយមានជ័យបានចេញដីកាកោះហៅអ្នកសារព័ត៌មានដែលជាម្ចាស់គេហទំព័រសារព័ត៌មានអនឡាញចំនួន ២ នាក់ឱ្យចូលបំភ្លឺនៅថ្ងៃទី ១១ ខែមីនា ពាក់ព័ន្ធនឹងករណីបរិហារកេរ្តិ៍ ដែលការចេញដីកានេះកើតមានឡើង បន្ទាប់ពីអ្នកសារព័ត៌មានម្នាក់បានចុះផ្សាយព័ត៌មានមួយទាក់ទងរឿងទំនាស់ដីធ្លីរវាងពលរដ្ឋជាមួយឧកញ៉ាម្នាក់នៅក្រុងប៉ោយប៉ែត។
លោក ទាវ សំអុល ចាងហ្វាងគេហទំព័រសារព័ត៌មាន «ថ្ងៃថ្មី» បានប្រាប់ភ្នំពេញប៉ុស្ដិ៍ពីថ្ងៃម្សិលមិញថា កាលពីថ្ងៃទី ៥ ខែមីនា លោកទទួលបានដីកាកោះហៅពីតុលាការដើម្បីចូលទៅបំភ្លឺនៅថ្ងៃទី ១១ ខែមីនា ប៉ុន្តែដីកានោះមិនបានដាក់ឈ្មោះដើមបណ្ដឹងនោះទេ។
លោកបញ្ជាក់ថា នៅក្នុងដីកាគ្រាន់តែបញ្ជាក់ថា ការកោះហៅនេះដើម្បីឆ្លើយបំភ្លឺពីករណីបរិហារកេរ្តិ៍ជាសាធារណៈតាមសារព័ត៌មានដែលប្រព្រឹត្តឡើងកាលពីថ្ងៃទី ២១ ខែធ្នូ ឆ្នាំ ២០១៩។
លោកបញ្ជាក់ថាកាលពីថ្ងៃទី ២១ ខែធ្នូ ឆ្នាំ ២០១៩ គឺលោកបានផ្សព្វផ្សាយរឿងទំនាស់ដីធ្លីប្រវែង ២ ម៉ែត្រនៅក្នុងសង្កាត់ប៉ោយប៉ែត ក្រុងប៉ោយប៉ែតដែលមានជម្លោះរវាងប្រជាពលរដ្ឋ និងឧកញ៉ាម្នាក់ឈ្មោះ ឡាច ប៊ុនលីម។
លោកថា៖ «ខ្ញុំផ្សាយព័ត៌មានហ្នឹង គឺមិនបានបញ្ចេញបញ្ចូលអីទេ ហើយក៏បានសាកសួរភាគីទាំងសងខាង។ ខ្ញុំសំណូមពរទៅដល់ថ្នាក់លើសូមឲ្យជួយអ្នកសារព័ត៌មានវិជ្ជាជីវៈគឺសូមយកច្បាប់អ្នកសារព័ត៌មានមកអនុវត្ត»។
ចំណែកលោក លី ម៉េងហ៊ុយ អ្នកសារព័ត៌មានម្នាក់ទៀតដែលជាម្ចាស់គេហទំព័រសារព័ត៌មានអនឡាញ «ម្ចាស់ការ» ដែលត្រូវបានតុលាការកោះហៅដែរនោះបានថ្លែងថា លោកមិនបានចុះផ្សាយអំពីករណីទំនាស់ដីធ្លីប្រវែង ២ ម៉ែត្ររវាងពលរដ្ឋ និងឧកញ៉ា ឡាច ប៊ុនលីម នោះទេ។
ប៉ុន្តែលោកបញ្ជាក់ថា លោកបានចុះផ្សាយព័ត៌មានមួយគឺបន្ទាប់ពីលោក ទាវ សំអុល ត្រូវបានអធិការក្រុងប៉ោយប៉ែតកោះហៅឱ្យចូលបំភ្លឺនៅថ្ងៃទី ២៦ ខែធ្នូ ជុំវិញលោក ទាវ សំអុល ដែលបានចុះទៅកន្លែងកើតហេតុហើយបានធ្វើការផ្សាយបន្តផ្ទាល់ រឿងទំនាស់ដីធ្លីរបស់ពលរដ្ឋ និងឧកញ៉ារូបនេះកាលពីថ្ងៃទី ២១ ខែធ្នូ។
លោកថ្លែងថា៖ «ខ្ញុំអត់បានសរសេររឿងឧកញ៉ារំលោភដីអី គឺខ្ញុំអត់ដឹងទេ ហើយខ្ញុំអត់បានចោទគាត់ (ឧកញ៉ា)ទេ បើខ្ញុំមិនបានសរសេរផង ហេតុអ្វីដែលខ្ញុំចោទគាត់កើត»។
លោក លី ម៉េងហ៊ុយ បន្ថែមថា៖ «ខ្ញុំមានការខកចិត្តជាខ្លាំងចំពោះអ្នកដែលប្ដឹង មិនដឹងថាលោកណាទេ ប៉ុន្តែបណ្ដឹងនេះគឺគោលបំណងបំបាក់ស្មារតីអ្នកសារព័ត៌មាន ហើយរំលោភលើច្បាប់របបសារព័ត៌មាន។ ការចុះផ្សាយខុស គឺអត់មានឱ្យអ្នកសារព័ត៌មានទៅបំភ្លឺទេ ទី ១ ហើយទី ២ កាលពីពេលថ្មីៗនេះ សម្ដេចតេជោប្រកាសហើយ គឺរាល់ការចុះផ្សាយរបស់អ្នកសារព័ត៌មានអត់មានទោសទណ្ឌអីទេ»។
កាលពីថ្ងៃម្សិលមិញលោក រឿន លីណា អ្នកនាំពាក្យសាលាដំបូងខេត្តបន្ទាយមានជ័យបានថ្លែងថា លោកមិនទាន់បានដឹងច្បាស់អំពីដីកាកោះហៅនេះទេ ដោយសារលោកជាប់រវល់មកប្រជុំនៅរាជធានីភ្នំពេញ។
លោក មឿន ឈានរិទ្ធ សាស្ដ្រាចារ្យផ្នែកព័ត៌មានបានលើកឡើងថា នៅក្នុងសង្គមប្រជាធិបតេយ្យ ដើម្បីលើកកម្ពស់សេរីភាពសារព័ត៌មាន និងសេរីភាពបញ្ចេញមតិ ប្រជាពលរដ្ឋ ឬមន្ត្រីសាធារណៈគួរតែឱ្យអ្នកសារព័ត៌មានផ្សាយកែតម្រូវឡើងវិញ ឬសរសេរជាលិខិតបំភ្លឺដោយខ្លួនឯង ប្រសិនបើយល់ថា មានអ្នកសារព័ត៌មានណាម្នាក់បានចុះផ្សាយខុសធ្វើឱ្យប៉ះពាល់ដល់កិត្តិយសរបស់ខ្លួន។
លោកថា៖ «ខ្ញុំគិតថា តុលាការក៏ដូចជាចៅក្រមមុននឹងអញ្ជើញអ្នកសារព័ត៌មានទៅបំភ្លឺ គាត់គួរតែធ្វើការស៊ើបអង្កេតដោយខ្លួនឯងសិន តើការសរសេររបស់អ្នកសារព័ត៌មានហ្នឹងពិត ឬមិនពិត ហើយខ្ញុំគិតថា ប្រសិនបើអ្នកសារព័ត៌មានបានសរសេរចុះផ្សាយប្រកបដោយសច្ចភាពគួរតែមានសេចក្ដីក្លាហានដើម្បីចូលទៅបំភ្លឺ»៕