The Phnom Penh Post Search

Search form




Logo of Phnom Penh Post newspaper Phnom Penh Post - អ្នកស្រាវជ្រាវ​រក​ឃើញ​លិង្គ​ចម្លែក​ នៅ​ដែនដី​អតីត​ក្រុង​សម្ភុបុរៈ

អ្នកស្រាវជ្រាវ​រក​ឃើញ​លិង្គ​ចម្លែក​ នៅ​ដែនដី​អតីត​ក្រុង​សម្ភុបុរៈ

Content image - Phnom Penh Post
លិង្គព្រះឥសូរឥតក្បាលដែលរកឃើញកាលពីសប្តាហ៍មុន នៅខេត្តក្រចេះ។ សហការី

អ្នកស្រាវជ្រាវ​រក​ឃើញ​លិង្គ​ចម្លែក​ នៅ​ដែនដី​អតីត​ក្រុង​សម្ភុបុរៈ

ក្រចេះ: ក្រុមអ្នកស្រាវជ្រាវ​ប្រវត្តិសាស្ដ្រ​ បាន​រកឃើញ​លិង្គ​ព្រះឥសូរ​អត់​ក្បាល​ និង​ចាត់ទុកថា​ គឺជា​លិង្គ​ចម្លែក​ស្ថិត​​នៅលើ​គ្រឹះ​ប្រាសាទ​បុរាណ​​បាក់បែក​មួយ ​ក្នុងភូមិ​អូរ​ក្រសាំង​ ឃុំ​បឹង​ចារ ​ស្រុក​សំបូរ ​ខេត្ត​ក្រចេះ ​ដែលជា​អតីត​ដែនដី​របស់​ទីក្រុង​សម្ភុបុរៈ នា​សម័យ​ចេនឡា។

លោក ធុ​យ ចាន់​ធួន​ អនុប្រធាន​សមាគម​អ្នកប្រវត្តិសាស្ដ្រ​កម្ពុជា​ និង​ជា​អនុប្រធាន​វិទ្យា​ស្ថាន​សិល្បៈ​ និង​វប្បធម៌​ នៃ​រាជបណ្ឌិត្យ​សភា​កម្ពុជា​បាន​សរសេរ​បង្ហោះ​តាម​ហ្វេ​ស​ប៊ុ​កនៅ​ថ្ងៃទី ១៧​ ខែ ឧសភា​ ថា​ កាលពី​ថ្ងៃទី ១០​ ខែ ឧសភា​ ​លោក​បាន​ដឹកនាំ​សិក្ខាកាម​របស់​រាជបណ្ឌិត្យ​សភា​កម្ពុជា​ ចុះទៅ​សិក្សា​នៅ​ទីក្រុង​បុរាណ​សម្ភុបុរៈ ​និង​បាន​រក​វត្ថុ​បុរាណ​ថ្មី​បន្ថែមទៀត​ ដែល​ពុំទាន់​មាន​អ្នក​រកឃើញ​នៅ​ឡើយ​ ក្នុងនោះ​ដូចជា​ រណ្ដៅ​ផ្ទាំង​ដាប់ថ្មបង្ហូរ​ទឹកមន្ត​ចេញពី​ប្រាសាទ​ចំនួន ២ ​បំណែក​មេ​ទ្វារ ​ទម្រ​ព្រះ​បែកបាក់​ជាច្រើន​ដុំ​ និង​លិង្គ​ព្រះឥសូរ​ចម្លែក​មួយ​ដែល​មាន​ប្រវែង​ ១ ម៉ែត្រ។

លោក ចាន់​ធួន បាន​ប្រាប់​ភ្នំពេញ ​ប៉ុស្ដិ៍​ កាលពី​ថ្ងៃទី ១៩ ​ឧសភា​ ថា ​មូលហេតុ​ដែល​លោក​​សន្ម​តថា​ ជា​លិង្គ​ចម្លែក​ ដោយសារ​ជា​លិង្គ​គ្មាន​ក្បាល​និង​មិន​ធ្លាប់​បានឃើញ​កន្លង​មក​ឡើយ ​ព្រោះលិង្គ​នេះ​អាច​ត្រូវបាន​គេ​ធ្វើឡើង​ស្រោប​អំពី​មាស​ជាវ​ត្ថុ​ដ៏​មាន​តម្លៃ​នៅ​ក្បាល​លិង្គ ​និង​ត្រូវបាន​គេ​លួច​កាត់​យក​ ទើប​ធ្វើឱ្យ​លិង្គ​នោះ​ខុសពី​លិង្គ​ដទៃ​ដែលមាន​នៅ​ក្នុង​សារមន្ទីរ​ជាតិ​ភ្នំពេញ នៅ​មណ្ឌល​អភិរក្ស​អង្គរ និង​តាម​សារមន្ទីរ​បុរាណ​នានា​នៅ​ក្នុង​ប្រទេស​កម្ពុជា។

លោក​ថា​៖ «លិង្គ​ដែល​អត់​ក្បាល​ហ្នឹង​ណា៎ ​អ្នកជំនាញ​នៅ​តំបន់​អង្គរ​មួយចំនួន​ដែលជា​មិត្តភក្ដិ​បានផ្ដល់​ជា​យោបល់​មក​ខ្ញុំ​ថា ​អាហ្នឹង​ប្រាកដជា​ចម្លែក​ព្រោះ​ស្អី ​លិង្គ​ហ្នឹង​វា​អត់​មាន​ក្បាល ​ក្បាល​វា​អាច​គេ​ដាក់​លោហៈ ធាតុ​គ្រប​ពីលើ ​យើង​ឃើញ​លិង្គ​ពី​ដើម​គ្រប​មាស ប្រាក់ ​ឬក៏​សំរឹទ្ធ​ អ៊ីចឹង​ក្បាល​លិង្គ​ហ្នឹង​ប្រហែល​គ្រប​វត្ថុ​មានតម្លៃ​ទាំងអស់​ហ្នឹង ​ហើយ​ត្រូវ​ឈ្មួ​ញ​ជីក​យក​ទៅ។ គ្រប់​កន្លែង ​១០០%​ នៃ​ប្រា​សាទ​​ទាំងអស់ ​អ្វីដែល​ខ្ញុំ​រក​ឃើញ​ គឺ​សុទ្ធតែជា​ការ​បំផ្លាញ​របស់​មនុស្ស​ជីក​យក​គ្រឹះ​ទាំង​អស់ ​គឺ​ជីក​គ្រឹះ​ក្រោម​រក​មើល​កំណប់»។

លោក ចាន់​ធួន ​បន្ថែមថា ​កាលពី​ខែមីនា​កន្លង​ទៅ ​លោក​ក៏បាន​រកឃើញ​ប្រភេទ​លិង្គ​ចម្លែក​ចំនួន ​៣ ដុំ​ដែរ ​ដែល​ត្រូវ​បាន​គេ​ធ្វើឡើង​រាង​ប៉ុនៗ​គ្នា​នៅ​ក្បែរ​គ្នា​ដូច​ទៅ​នឹង​ជើង​ចង្ក្រាន។

អ្នកស្រាវជ្រាវ​វត្ថុ​បុរាណ​ប្រវត្តិសាស្ដ្រ​ ​ចាត់ទុក​លិង្គ​ចម្លែក​ទាំងនេះ ​ថា​ជាវ​ត្ថុ​មានតម្លៃ​សម្រាប់​ធ្វើជា​តឹកតាង​សម្រាប់​ប្រវត្តិសាស្ដ្រ​ជាតិ​ និង​បាន​អំពាវនាវ​ឱ្យ​អាជ្ញាធរ​ពាក់ព័ន្ធ​ជាពិសេស ​មន្ត្រី​វប្បធម៌ ​គួរ​ទៅយក​វត្ថុ​ទាំងនេះ​ ទៅ​តម្កល់​ទុក​នៅ​ក្នុង​សារមន្ទីរ។

លោក​បន្ថែម​ថា​៖ «ព្រោះ​ខ្ញុំ​អត់​មាន​លុយ​ទៅ​ដឹក​ទេ​ បើ​ខ្ញុំ​មាន​លុយ ខ្ញុំ​នឹង​ដឹក​មក​ជូន​ដល់​សារមន្ទីរ​ទៀត​ប្រសិនបើ​មាន។ ខ្ញុំ​សូម​អំពាវនាវ​អាជ្ញាធរ​ ជា​ពិសេស​មន្ទីរ​វប្បធម៌​ខេត្ត​ក្រចេះ ​ឃើញ​របាយការណ៍​រប​ស់​ខ្ញុំ​ហើយ ​ដឹង​ព័ត៌មាន​ពី​ខ្ញុំ​ហើយ ​សួរ​ខ្ញុំ​ឱ្យ​ច្បាស់​ថែមទៀត​ទៅ ហើយ​ទៅយក​របស់​ទាំង​ហ្នឹង​មក​តម្កល់​ទុក​ក្នុង​សារមន្ទីរ​ទៅ ដើម្បី​កុំឱ្យ​គេ​លួច ​ព្រោះ​បុរាណ​វត្ថុ​នេះ​គឺ​ថ្លៃ​ណាស់»។

លោក​ស្រី​ ហុក ផល្លីនី ​អនុ​​ប្រធាន​មន្ទីរ​វប្បធម៌​និង​វិចិត្រ​សិល្បៈ​ខេត្ត​ក្រចេះ​ ប្រាប់​ភ្នំពេញប៉ុស្ដិ៍​ ម្សិលមិញថា​ នៅពេលចូល​ធ្វើ​ការងារ​វិញ​នៅ​ថ្ងៃនេះ​ លោក​ស្រី​នឹង​ប្រាប់​ដំណឹង​អំពី​ការរក​ឃើញ​លិង្គ​បុរាណ​ទាំងនេះ​ទៅ​ប្រធាន​មន្ទីរ​និង​មន្រ្តី​ជំនាញ​ ចុះទៅ​ដល់​ទីតាំង​ដើម្បី​នាំយក​វត្ថុ​បុរាណ​ទាំង​នោះ​មក​រក្សា​ទុក។

លោក​ស្រីបាន​ថ្លែង​ថា​៖ «ឱ្យតែ​ដឹង​ប្រ​ធាន​មន្ទីរ​គាត់​នឹងឱ្យ​មន្រ្តី​ជំនាញ​គាត់​ខាង​បេតិកភណ្ឌ​គេ​ចុះ​ទៅ»។

លោក​ ធុយ ចាន់​ធួន ​បាន​ដឹកនាំ​អ្នកប្រវត្តិសាស្ដ្រ​ចុះ​សិក្សា​ស្រាវជ្រាវ​តាំងពី​ឆ្នាំ ២០១៥ ​នៅទីក្រុង​បុរាណ​ ប្រាសាទ​បុរាណ​ រមណីយ​ដ្ឋាន​ប្រវត្តិ​សាស្ដ្រ​ និង​ទីតាំង​បុរាណ​ស្ថាន​ដែលមាន​ទំនាក់ទំនង​ជាមួយ​អរិយធម៌​ចេនឡា។ កាលពី​ថ្ងៃ​ទី​ ៧ ​ខែ ឧសភា ​កន្លង​ទៅនេះ​ លោក​​អះអាង​ថា ​មាន​គ្រឹះ​ប្រាសាទ​បុរាណ​ជាង ១០០ ត្រូវបាន​គេ​សាង​សង់ឡើង​ក្នុង​ដែនដី​ទីក្រុង​សម្ភុ​បុរៈ​នា​សតវត្សរ៍​ទី ៦-៧ ​ហើយ​ពុំ​ធ្លាប់មាន​អ្នករកឃើញ​ពីមុន​មកឡើយ ​និង​ទើប​ត្រូវបាន​រកឃើញ​ជា​បន្តប​ន្ទាប់​ស្ថិត​នៅ​ក្នុង​ខេត្ត​ក្រចេះ។

លោក​ ចាន់​ធួន ​បញ្ជាក់ថា​ ការ​ចុះ​សិក្សា​រយៈពេល​កន្លងមក​នេះ ​គឺ​លោក​បាន​ប្រើប្រាស់​ថវិកា​ជា​ប្រាក់ខែ​ផ្ទាល់​ខ្លួន ​ដើម្បី​ចំណាយ​លើ​មធ្យោបាយ​ធ្វើ​ដំណើរការ​ស្នាក់នៅ ​និង​ការហូបចុក​ជាដើម ​ស្របពេល​បច្ចុប្បន្ននេះ ​លោក​បាន​អំពាវនាវ ដល់​​រដ្ឋាភិបាល​គួរ​មាន​មូលនិធិ​សម្រាប់​ជួយ​ដ​ល់​​ការងារ​ស្រាវជ្រាវ​ប្រវត្តិសាស្ដ្រ​នាពេល​ខាងមុខ៕

អត្ថបទគួរចាប់អារម្មណ៍

  • កោះកុងៈ កូនអណ្តើក​ហ្លួង​ចំនួន ៣០ ​ក្បាល​បាន​ញាស់​ចេញពី​សម្បុក​នៅលើ​ឆ្នេរ​ខ្សាច់​សិប្បនិម្មិត​ក្នុង​មជ្ឈមណ្ឌល​អភិរក្ស​សត្វ​ល្មូន​ខេត្តកោះកុង កាលពី​សប្តាហ៍​កន្លងទៅ ហើយ​នេះ​គឺជា​លើក​ទី​ ២ ​ហើយ ដែល​អណ្តើក​ហ្លួង​ចិញ្ចឹម​ក្នុង​មជ្ឈមណ្ឌល​នេះ​បាន​ពង​កូន​។ នេះ​បើតាម​អង្គការ​សមាគម​អភិរក្ស​សត្វព្រៃ​នៅ​កម្ពុជា (WCS)​។

  • ភ្នំពេញៈ ការបញ្ចូល​មីក្រូ​សារជាតិ​ក្នុង​អង្ករ គឺជា​ជំហាន​ចម្បង​មួយ​ក្នុងការ​ដោះស្រាយ​បញ្ហា​អាហារូបត្ថម្ភ​ក្នុង​ប្រទេស​កម្ពុជា ដែល​ប្រជាជន​ភាគច្រើន​ទទួលទាន​បាយ ក្នុង​បរិមាណ​ច្រើន​ជា​រៀងរាល់ថ្ងៃ​។ នេះ​បើតាម​មន្ត្រី​ក្រុមប្រឹក្សា​ស្តារ​អភិវឌ្ឍន៍​វិស័យ​កសិកម្ម និង​ជនបទ​។

  • ភ្នំពេញ: ក្នុង​ចំណោម​ភោជនីយដ្ឋាន​ពោរពេញ​ដោយ​សិល្បៈ​ចម្អិន​ម្ហូបអាហារ ការ​គិតគូរ​ពី​និរន្តរភាព​បរិស្ថាន​ភព​ផែន​ដី និង​បង្កប់​រឿង​រ៉ាវ​ប្រពៃណី​វប្បធម៌​ដ៏​អស្ចារ្យ​នៅ​អេស្ប៉ាញ ប៉េរូ​សហរដ្ឋអាមេរិក​ ថៃ ដាណឺម៉ាក​ នូវែលសេឡង់ ចិន ជប៉ុន អ៊ីតាលី និង​ម៉ិកស៊ិក អាហារ​នៅ​​ផ្ទះ​ប្រពៃណី​បុរាណ​មួយ​​​តាម​ដង​ទន្លេ​មេគង្គ

  • ភ្នំពេញៈ ទាំង​អ្នកនយោបាយ អ្នកវិភាគ និង​ស្ថាប័ន​គណៈកម្មាធិការ​ជាតិ​រៀបចំ​ការបោះឆ្នោត​បានចាត់ទុក​ដំណើរការ​ឃោសនា​រក​សំឡេងឆ្នោត ក្នុង​រយៈពេល ៣ ​ថ្ងៃ​របស់​គណបក្ស​នយោបាយ ដែល​បាន​ចុះបញ្ជី​បេក្ខជន​ចូលរួម​បោះឆ្នោត​ជ្រើសរើស​ក្រុមប្រឹក្សាឃុំ សង្កាត់​អាណត្តិ​ទី​ ៥ ដែល​នឹង​ប្រព្រឹត្តទៅ​នៅ​ថ្ងៃទី​ ៥ ខែមិថុនា ថា មាន​ភាពចាស់ទុំ​ផ្នែក​នយោបាយ និង​មិនមាន​អំពើហិង្សា​ណាមួយ​កើតឡើង​នោះ

  • ភ្នំពេញៈ សាលាឧទ្ធរណ៍​ភ្នំពេញ​នៅ​ថ្ងៃទី​ ២៣ ​ឧសភា បានប្រកាស​សាលដីកា​កំបាំង​មុខមន្ត្រី​សមាគម​ការពារ​សិទ្ធិមនុស្ស​អាដហុក​ ៤ ​រូប និង​អតីត​មន្ត្រី​ ១ ​រូប​ទៀត​សម្រេច​តម្កល់​សាលក្រម​របស់​សាលាដំបូង​រាជធានី​ភ្នំពេញ​ដដែល បន្ទាប់ពី​បាន​កាត់ក្តី​ឱ្យ​ពួកគេ​ជាប់ពន្ធនាគារ​ក្នុង​ម្នាក់​ ៥ ​ឆ្នាំ តែ​ឱ្យ​អនុវត្ត​ទោស ​១៤ ​ខែ​ពាក់ព័ន្ធ​បទចោទ​សូកប៉ាន់​សាក្សី និង​សមគំនិត​សូកប៉ាន់​សាក្សី​ដល់​ នាង ខុម ចាន់តារាទី ហៅ​ ស្រីមុំ​។

  • បន្ទាយមានជ័យៈ ក្នុង​មួយ​ថ្ងៃៗ​មាន​ប្រជាពលរដ្ឋ​នៅតាម​ព្រំដែន ជាពិសេស​ពលករ​ខ្មែរ​ពី ​៤០០ ទៅ​ ៥០០​ នាក់​បាន​ទៅ​ស្នើសុំ​ធ្វើ​បណ្ណ​ឆ្លងដែន ដើម្បី​បាន​ចូលទៅ​ធ្វើការ ឬ​លក់ដូរ​ស្របច្បាប់ នៅក្នុង​ប្រទេស​ថៃ បន្ទាប់ពី​ភាគី​ទាំង​ ២​ បាន​ឯកភាព​គ្នា​បើក​ច្រកព្រំដែន​ឡើងវិញ កាលពី​ថ្ងៃទី​ ១ ខែឧសភា ក្នុង​កម្រិត​ថ្នាក់​តំបន់​។