.jpg)
អ្នកស្រី ទេព វន្នី សកម្មជនដីធ្លី នៅតំបន់បឹងកក់ ដែលទើបតែត្រូវបានដោះលែងពីពន្ធនាគារ ក្នុងពិធីមួយនៅថ្ងៃទី២១ ខែសីហា។ ផា លីណា
ភ្នំពេញៈ សកម្មជនដីធ្លីល្បីឈ្មោះ នៅតំបន់បឹងកក់ អ្នកស្រី ទេព វន្នី បានសម្តែងការសោកស្ដាយ ការដែលអ្នកស្រីត្រូវបានគេចាប់ដាក់ពន្ធនាគារទាំងខ្លួន «មិនមានកំហុស» អស់រយៈពេល ២ ឆ្នាំ ៥ ថ្ងៃ ជាអ្វីដែលអ្នកស្រីបានអធិប្បាយថា ជារឿងដែលមិននឹកស្មានដល់ ព្រោះតែការតវ៉ាទាមទារទីជម្រកខ្លួនឯង។
អ្នកស្រី វន្នីបានរំឭកថា អ្នកស្រី និងសកម្មជនដីធ្លីទាំងអស់ តាំងពីកើតមក មិនដែលគិតចង់ទៅហែរក្បួន ទៅមុខផ្ទះលោកនាយករដ្ឋមន្ត្រី ហ៊ុន សែន ឬទៅតស៊ូមតិនៅតាមក្រសួងពាក់ព័ន្ធនានាអ្វីនោះទេ។
អ្នកស្រីថា៖«ខ្ញុំមិននឹកស្មានថា ពួកខ្ញុំទៅជាបែបហ្នឹងទេ។ រឿងនេះជារឿងដែលពួកខ្ញុំ មិននឹកស្មានដល់ ព្រោះតែការអភិវឌ្ឍ បណ្ដាលឲ្យពួកខ្ញុំ ជាប់ពន្ធនាគារជាបន្ដបន្ទាប់ ដោយអយុត្ដិធម៌ បែកបាក់ក្រុមគ្រួសារ ម្ដាយឪពុក កូនជាដើម»។
អ្នកស្រីបានឲ្យដឹងថា៖«រស់នៅក្នុងពន្ធនាគារ គ្មានខុសអ្វីពីសត្វនៅក្នុងទ្រុងនោះទេ។ អ៊ីចឹង ខ្ញុំជាប់ទ្រុង ខ្ញុំសម្លឹងមើលតែដំបូលគុក ទ្រុងដែក និងសោដែលគេចាក់ បួនប្រាំជាន់ ពីបន្ទប់ឃុំឃាំងយើង រហូតដល់ក្រៅ»។
អ្នកស្រីបញ្ជាក់ថា៖«ខ្ញុំពិតជាមានការរន្ធត់ចិត្ដ និងសង្វេគខ្លាំងណាស់ ពិសេសឈឺចាប់ត្រង់ខ្លួនឯង មិនបានធ្វើខុស ហើយត្រូវជាប់ឃុំទៀត»។
អ្នកស្រីបានលើកឡើងថា ពេលត្រលប់មកផ្ទះវិញ អ្នកស្រីមិនទាន់ដឹងថា ត្រូវរស់បែបណា ដើម្បីឲ្យមានជីវភាពប្រសើរឡើងវិញនៅឡើយទេ ព្រោះខ្លួនអ្នកស្រីក៏មានជំងឺ ហើយមុខរបររកប្រាក់ចំណូលក៏បាត់បង់អស់រលីងគ្មានសល់។
លោក វន្នី បន្ថែមថា៖«អ្នកខ្លះ គាត់មិនដឹង គាត់គិតថា ខ្ញុំមានណាស់ហើយ គាត់គិតថា ខ្ញុំធ្វើនឹងមានអ្នកណាគេមកជួលខ្ញុំហើយ តាមពិតយើងធ្វើដោយចិត្ដស្មោះត្រង់ បើមិនមានឆន្ទះជួយគ្នាពិតប្រាកដទេ នឹងមិនបានជោគជ័យទេ។ ទោះបីផ្ទះខ្ញុំចាស់ ដំបូលមិនទាន់ចាក់ស៊ីម៉ងត៍ក៏ដោយ តែខ្ញុំសប្បាយចិត្ដ»។
ចំពោះការដោះលែងឲ្យមានសេរីភាពឡើងវិញនេះ អ្នកស្រី បានថ្លែងអំណរគុណដល់លោក នាយករដ្ឋមន្ដ្រីហ៊ុន សែន ពិសេស ព្រះមហាក្សត្រ ដែលព្រះអង្គបានឡាយព្រះហត្ថលេខាលើកលែងទោសដល់អ្នកស្រី។
អ្នកស្រី ទេព វន្នី ត្រូវបានដោះលែងពីពន្ធនាគារព្រៃស កាលពីយប់ថ្ងៃទី ២០ ខែសីហាឆ្នាំ ២០១៨ ដែលការដោះលែងនេះ ធ្វើឡើងភ្លាមៗ បន្ទាប់ពីព្រះមហាក្សត្រ បានលើកលែងទោស ទៅតាមការស្នើសុំពីលោកនាយករដ្ឋមន្ត្រី ហ៊ុន សែន។
បើយោងតាមដីកាបង្គាប់ឲ្យដោះលែង ដែលចេញដោយលោក គុជ គឹមឡុង ព្រះរាជអាជ្ញារង នៃអយ្យការ អមសាលាដំបូងរាជធានីភ្នំពេញ កាលពីយប់ថ្ងៃទី ២០ ខែសីហា ដែលធ្វើឡើងភ្លាមៗ បន្ទាប់ពីព្រះមហាក្សត្របានចេញព្រះរាជក្រឹត្យលើកលែងទោស បានសរសេរថា ឈ្មោះ ទេព វន្នី ភេទស្រី ត្រូវបានផ្តន្ទាទោសកំណត់ចំនួន ៦ ខែ ពីបទប្រមាថអ្នករាជការសាធារណៈ និងបទប្រឆាំងអ្នករាជការសាធារណៈ និងបទល្មើសមួយទៀត ត្រូវបានផ្តន្ទាទោសចំនួន ២ ឆ្នាំ ៦ ខែ ពីបទហិង្សាដោយចេតនា មានស្ថានទម្ងន់ទោស៕
