.jpg)
អ្នកស្រី ទេព វន្នី ពេលមកដល់សហគមន៍បឹងកក់វិញ បន្ទាប់ពីត្រូវបានដោះលែងពីពន្ធនាគារព្រៃសកាលពីយប់មិញ។ រូបថត Fresh News
ភ្នំពេញៈ សកម្មជនដីធ្លីល្បីឈ្មោះនៅសហគមន៍បឹងកក់គឺ អ្នកស្រី ទេព វន្នី ត្រូវបានដោះលែងចេញពីពន្ធនាគារព្រៃសវិញហើយកាលពីយប់មិញដែលការដោះលែងនេះត្រូវបានធ្វើឡើងភ្លាមៗ បន្ទាប់ពីព្រះមហាក្សត្របានចេញព្រះរាជក្រឹត្យលើកលែងទោសដល់អ្នកស្រី វន្នី និងសកម្មជនដីធ្លីនៅតំបន់បឹងកក់ចំនួន ៣ រូបផ្សេងទៀត។
ព្រះរាជក្រឹត្យលើកលែងទោសរបស់ព្រះមហាក្សត្រ នរោត្តម សីហមុនី ដែលចេញកាលពីថ្ងៃម្សិលមិញគឺធ្វើឡើងទៅតាមការស្នើសុំរបស់លោកនាយករដ្ឋមន្ត្រី ហ៊ុន សែន។
បើយោងតាមដីកាបង្គាប់ឲ្យដោះលែងដែលចេញដោយលោក គុជ គឹមឡុង ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញកាលពីយប់មិញ ដែលធ្វើឡើងភ្លាមៗបន្ទាប់ពីព្រះមហាក្សត្របានចេញព្រះរាជក្រឹត្យលើកលែងទោសបានសរសេរថាអ្នកស្រី ទេព វន្នី ត្រូវបានផ្តន្ទាទោសកំណត់ចំនួន ៦ ខែពីបទប្រមាថអ្នករាជការសាធារណៈ និងបទប្រឆាំងអ្នករាជការសាធារណៈ និងបទល្មើសមួយទៀតត្រូវបានផ្តន្ទាទោសចំនួន ២ ឆ្នាំ ៦ ខែពីបទហិង្សាដោយចេតនាមានស្ថានទម្ងន់ទោស។
ដីកាបង្គាប់ឲ្យដោះលែងនេះបានសរសេរទៀតថាអ្នកស្រី ទេព វន្នី នៅពេលនេះកំពុងតែត្រូវបានឃុំខ្លួននៅមណ្ឌលអប់រំកែប្រែទី ២ (ម ២)។ «តាមអំណាចព្រះរាជក្រឹត្យខាងលើឈ្មោះ ទេព វន្នី ត្រូវបានលើកលែងទោស។ គប្បីធ្វើការដោះលែងឲ្យមានសេរីភាពវិញ»។
ព្រះរាជក្រឹត្យរបស់ព្រះមហាក្សត្រក៏បានលើកលែងទោសដល់សកម្មជនដីធ្លីនៅតំបន់បឹងកក់ចំនួន ៣ រូបផ្សេងទៀតដែលកំពុងនៅក្រៅឃុំផងដែររួមមាន អ្នកស្រី ហេង មុំ, អ្នកស្រី បូ ឆវី និងអ្នកស្រី គង់ ចន្ថា។
អ្នកស្រី ទេព វន្នី ត្រូវបានតុលាការឃុំខ្លួនកាលពីថ្ងៃទី ១៥ ខែសីហា ឆ្នាំ ២០១៦ ដែលគិតរហូតមកដល់ពេលនេះអ្នកស្រីបានជាប់ពន្ធនាគារអស់រយៈពេល ២ ឆ្នាំហើយ។
អ្នកស្រី ទេព វន្នី ត្រូវបានដោះលែងពីពន្ធនាគារព្រៃសកាលពីយប់មិញ។ រូបថត Fresh News
លោក ពុទ្ធិ ស័ក្ដ សកម្មជនដីធ្លីនៅតំបន់បឹងកក់បានថ្លែងប្រាប់ភ្នំពេញប៉ុស្ដិ៍កាលពីយប់មិញដោយបានសម្តែងនូវភាពសប្បាយរីករាយ និងសង្ឃឹមថា រាជរដ្ឋាភិបាលនឹងបន្ដសកម្មភាពបែបនេះបន្ថែមទៀត។
លោកបញ្ជាក់ថា៖ «ខ្ញុំគិតថាការងាកទៅរកការបន្ថយស្ថានភាពនយោបាយដែលតានតឹងនេះ យើងខ្ញុំជាប្រជាពលរដ្ឋរងគ្រោះ និងមិត្ដភក្ដិដែលជាប់ពន្ធនាគារត្រូវបានដោះលែងនេះ ខ្ញុំពិតជារំភើបណាស់ ហើយសង្ឃឹមថាយន្ដការដោះលែងនេះនឹងបន្ដទៅសកម្មជនសិទិ្ធមនុស្សបន្ថែមទៀតដើម្បីសន្ដិភាពផ្លូវចិត្ដ ផ្លូវអារម្មណ៍ដល់ប្រជាជនខ្មែរគ្រប់រូប»។
អ្នកស្រី ផាន់ ឈុនរេត សកម្មជនដីធ្លីនៅតំបន់បឹងកក់ម្នាក់ទៀតនៅពេលទាក់ទងកាលពីយប់មិញក៏បានសម្ដែងការត្រេកអរផងដែរថា៖ «ខ្ញុំសប្បាយចិត្ដយ៉ាងខ្លាំង ចំពោះការដោះលែងនេះឥឡូវកំពុងតែរាំពេញភូមិ គ្មានអ្វីសប្បាយជាងនេះទេ»។
លោក អំ សំអាត ប្រធានផ្នែកស៊ើបអង្កេតនៃអង្គការសិទ្ធិមនុស្សលីកាដូក៏បានសាទរចំពោះការដោះលែងនេះផងដែរដោយថ្លែងថា៖ «ខ្ញុំស្វាគមន៍ចំពោះការដោះលែងដោយមានការលើកលែងទោសដោយព្រះរាជក្រឹត្យ ព្រះមហាក្សត្រ ប៉ុន្តែទោះជាយ៉ាងណាអ្នកស្រី ទេព វន្នី ត្រូវបានជាប់ពន្ធនាគារអស់រយ:ពេលជាង ២ ឆ្នាំដោយអយុត្តិធម៌ ដោយគ្រាន់តែអ្នកស្រី និងសហគមន៍បឹងកក់តវ៉ាទាមទារកដំណោះស្រាយបញ្ហាដីធ្លី»។
លោកបញ្ជាក់ថា៖ «ខ្ញុំគិតថាការដោះលែងនេះដោយសារមានការថ្កោលទោស និងទាមទារពីសហគមន៍ជាតិ និងអន្តរជាតិជាបន្តបន្ទាប់ផងដែរ ហើយដោយសាររាជរដ្ឋាភិបាលថ្មីនឹងកើតឡើងក្នុងពេលឆាប់ៗចង់បានការគាំទ្រពីសហគមន៍អន្តរជាតិ»៕
