អ្នករាយការណ៍ពិសេស អ.ស.ប ស្តីពីស្ថានភាពសិទ្ធិមនុស្សនៅកម្ពុជា នៅថ្ងៃសុក្រនេះ បានបង្ហាញក្តីបារម្ភយ៉ាងខ្លាំងអំពីការបង្ក្រាបខាងនយោបាយដែលមានលក្ខណៈកាន់តែខ្លាំងឡើងៗនៅទូទាំងប្រទេស ហើយធ្វើការអំពាវនាវឲ្យរដ្ឋាភិបាលគោរពនូវសិទ្ធិសេរីភាពក្នុងការបញ្ចេញមតិយោបល់ និង ការជួបប្រជុំ។
យ៉ាងណា អ្នកនាំពាក្យរដ្ឋាភិបាល បានអះអាងថា ស្ថាប័ននេះ គ្មានសិទ្ធិជៀលជ្រែកដែនអធិបតេយ្យរបស់កម្ពុជានោះទេ ហើយថា ទង្វើរបស់រដ្ឋាភិបាល ក្នុងពេលនេះ គឺដើម្បីការពារសន្តិភាព និងបញ្ចៀសសកម្មភាពនៃការផ្តួលរលំរដ្ឋាភិបាលតែប៉ុណ្ណោះ។
សេចក្តីប្រកាសព័ត៌មានរបស់ អ្នករាយការណ៍ពិសេស អ.ស.ប ស្តីពីស្ថានភាពសិទ្ធិមនុស្សនៅកម្ពុជា ចេញផ្សាយពីទីក្រុង ហ្សឺណែវ ឲ្យដឹងថា ចាប់តាំងពីខែសីហា មានមនុស្សយ៉ាងតិចចំនួន ៨៩ នាក់ ត្រូវបានចោទប្រកាន់ពីបទ «រួមគំនិតក្បត់ ប្រឆាំងនឹងរដ្ឋ» ហើយយ៉ាងហោចណាស់ក៏មានមនុស្សចំនួន ៥២ នាក់ ត្រូវបានចាប់ខ្លួន នៅតាមបណ្តាខេត្តចំនួន ២០ ដែលព្រឹត្តិការណ៍នេះនាំឲ្យមានការកើនឡើងនូវករណីនៃការយាយី ធ្វើទុក្ខបុកម្នេញ និង ចំណាត់ការតាមផ្លូវ តុលាការប្រឆាំងនឹងសមាជិក ឬ អ្នកគាំទ្រគណបក្សសង្គ្រោះជាតិ ចំនួនជាង ២០០ ករណី រាប់ចាប់តាំងពីថ្ងៃទី ១ ខែ មករា ឆ្នាំ ២០១៩ ។
អ្នកស្រី ស្មីត អ្នកជំនាញឯករាជ្យដែលត្រូវបានតែងតាំងដោយក្រុមប្រឹក្សាសិទ្ធិមនុស្ស បានថ្លែងក្នុងសេចក្តីប្រកាសនោះថា ស្របពេល លោក សម រង្ស៊ី អតីតមេដឹកនាំគណបក្សប្រឆាំង ពោលគឺគណបក្សសង្គ្រោះជាតិកម្ពុជា ដែលត្រូវបានដាក់ឲ្យនៅក្រៅច្បាប់ ប្រកាសវិលត្រឡប់ពីការនិរទេសខ្លួន នៅថ្ងៃទី ៩ ខែវិច្ឆិកា ការកើនឡើងយ៉ាងឆាប់រហ័សនូវចំនួននៃការចាប់ខ្លួន និង ការចោទប្រកាន់យ៉ាងធ្ងន់ធ្ងរទៅលើសមាជិកគណបក្ស សង្គ្រោះជាតិ កំពុងស្ថិតនៅក្នុងស្ថានភាពអាសន្ន។
អ្នកស្រី បានបន្តថា៖ «គេមិនត្រូវអនុញ្ញាតឲ្យមានការចាប់ខ្លួនទាំងឡាយ ដោយគ្រាន់តែផ្អែកលើមូលហេតុនៃការអនុវត្តសិទ្ធិសេរីភាពក្នុងការបញ្ចេញមតិយោបល់ តាមរយៈការថ្លែងសារនយោបាយ និងការធ្វើអត្ថាធិប្បាយទៅលើកិច្ចការសាធារណៈឡើយ។ ប្រទេសកម្ពុជាត្រូវតែគោរពកាតព្វកិច្ចអន្តរជាតិរបស់ខ្លួន»។
អ្នកស្រី មានប្រសាសន៍ថា៖ «ខ្ញុំសូមអំពាវនាវដល់រដ្ឋាភិបាល និងគ្រប់ភាគីទាំងអស់ ធ្វើការកាត់បន្ថយនូវស្ថានភាពដែលវិវឌ្ឍន៍ទៅរកភាពតានតឹង ហើយស្វែងរកការសន្ទនាគ្នានៅក្នុងបរិយាកាសប្រកបដោយសន្តិវិធី និងដែលអនុញ្ញាតឲ្យមានការបញ្ចេញនូវមតិនយោបាយជួយគ្នាដោយចៀសវាងការរឹតត្បិតណាមួយបន្ថែមទៀតទៅលើសេរីភាពជាមូលដ្ឋាន ដែលជាគ្រឹះនៃការទទួលបានការអនុវត្តសិទ្ធិមនុស្សសម្រាប់ទាំងអស់គ្នា»។
លោក ផៃ ស៊ីផាន អ្នកនាំពាក្យរាជរដ្ឋាភិបាល បានថ្លែងប្រាប់ ភ្នំពេញ ប៉ុស្តិ៍ ពីម្សិលមិញដោយបដិសេធការលើកឡើងទាំងនេះ និង ចាត់ទុកថា គឺជា ការយល់ឃើញខុសគ្នា និង ផ្ទុយការយល់ឃើញរបស់រដ្ឋាភិបាលកម្ពុជា ដែលទង្វើទាំងនេះ គឺជាកាតព្វកិច្ចការពារអធិបតេយ្យរបស់ខ្លួន។ បន្ថែមពីនេះ សម្រាប់កម្ពុជា គឺមានចេតនាតែមួយគិត ធ្វើគ្រប់យ៉ាងដើម្បីការពារស្ថេរភាព សន្តិភាព ចំពោះក្រុមទាំងឡាយណា ដែលមានចេតនាប៉ុនប៉ង់ ធ្វើរដ្ឋប្រហារ ហើយបុគ្គលដែលមានជាប់ពាក់ព័ន្ធ ត្រូវតែមានការឃាត់ខ្លួន តាមច្បាប់របស់កម្ពុជា។
លោកបញ្ជាក់ថា៖ «ការដាក់ពង្រាយកម្លាំងប្រដាប់អាវុធ ការចល័តទ័ព គឹជាកាតព្វកិច្ចរបស់រដ្ឋាភិបាល ក្នុងកិច្ចការពារសន្តិភាព ស្ថេរភាព នីត្យានុកូលភាព ដែលគ្មានអ្នកណាមួយមកជ្រៀលជ្រែកបាននោះទេ។ ទាំងនេះ មិនមែនជាការគាប់សង្កត់ទៅលើសន្និសេរីភាពប្រជាពលរដ្ឋនោះទេ។ សុំអំពាវនាវឲ្យប្រជាពលរដ្ឋកុំឲ្យទៅចូលរួមនៅក្នុងសកម្មភាពធ្វើរដ្ឋប្រហារ ដឹកនាំដោយ សម រង្ស៊ី និង ក្រុមហ្នឹងឯង»។
បន្ថែមពីនេះ លោកផៃ ស៊ីផាន ក៏ប្រកាសឲ្យប្រជាពលរដ្ឋចូលខ្លួនមកសារភាព ពីការមិនចូលរួមជាមួយអតីតគណបក្សសង្គ្រោះជាតិក្នុងការផ្តួលរលំរដ្ឋាភិបាល ខណៈលោក អះអាងថា រដ្ឋាភិបាល ក៏គ្មានហេតុផលអ្វីត្រូវ ស្វែងរកការសន្ទនាគ្នាជាមួយក្រុមទាំងនោះដែរ៕