.jpg)
សមត្ថកិច្ចកំពុងត្រួតពិនិត្យសម្ភារ នៅក្នុងផ្ទះអ្នកបិទស្រា ក្នុងស្រុកល្វាឯម បន្ទាប់ពីមានមនុស្សបានស្លាប់ជាបន្តបន្ទាប់ដោយសារផឹកស្រា។ រូបថត ក.ប.ប
កណ្តាលៈ ពលរដ្ឋដែលស្លាប់ដោយសារផឹកស្រាសនិងស្រាត្រាំថ្នាំ ដែលមានលាយសារធាតុមេតាណុលលើសកម្រិត បានកើនដល់ ១១ នាក់ហើយ គិតត្រឹមថ្ងៃទី ១៩ ខែឧសភា ក្នុងស្រុកល្វាឯម និងម្នាក់ទៀត កំពុងស្ថិតក្នុងស្ថានភាពសង្គ្រោះបន្ទាន់នៅក្នុងមន្ទីរពេទ្យ។
លោក ឌឹម ថេង អគ្គនាយករងនៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប) ប្រាប់ ភ្នំពេញ ប៉ុស្តិ៍ នៅថ្ងៃទី ១៩ ខែ ឧសភា ឆ្នាំ ២០២១ នេះថា ចំពោះករណីស្លាប់ និងជួយសង្គ្រោះ ប្រជាពលរដ្ឋទាំង ១២ នាក់ នេះត្រូវបានរកឃើញថា ពួកគាត់បានផឹកស្រាស និងស្រាត្រាំថ្នាំ ដែលមានលាយសារធាតុមេតាណុលលើសកម្រិត។
លោក ឌឹម ថេង ពន្យល់ថា ចំពោះស្រាជាទូទៅត្រូវបានអនុញ្ញាតឱ្យមានសារធាតុមេតាណុលចំនួន ០,៥ ភាគរយប៉ុណ្ណោះ។ ប៉ុន្តែនៅក្នុងករណីនេះ គឺពួកគាត់ផឹកស្រាដែលមានសារធាតុមេតាណុល លើសកម្រិត ដោយក្នុងម្នាក់ៗ បានពិសារស្រាដែលមានលាយសារធាតុមេតាណុលក្នុងរវង្វង់ពី ១ លីត្រ ឬ ៧០ មីលីលីត្រ។
លោក ឌឹម ថេង ថ្លែងថា៖ «ខ្ញុំសូមបញ្ជាក់ថា ការធ្វើតេស្តលើស្រា ដែលពលរដ្ឋបានពុលស្លាប់ នៅស្រុកល្វាឯមនេះ ដោយលទ្ធផលមកពីមន្ទីរពិសោធន៍ គឺរកឃើញស្រាត្រាំថ្នាំ មានសារធាតុមេតាណុល ១១,៣ % ស្រាស រកឃើញសារធាតុមេតាណុល ៧,៣ %។ នេះ គឺជាលទ្ធផលចុងក្រោយ»។
បើតាមលោក ឌឹម ថេង ចំពោះករណីនេះ មន្ត្រីជំនាញរបស់លោក កំពុងតែស្រាវជ្រាវបន្ត ថា គាត់លាយខ្លួនឯង ឬអ្នកលក់ ជាអ្នកលាយ ដើម្បីមានវិធានការតាមផ្លូវច្បាប់។
ទោះជាយ៉ាងណាលោកបញ្ជាក់ថា ការពុលស្រាភាគច្រើនមិនមែនមកពីការផលិត ឬបិតស្រានោះទេ គឺដោយសារតែអ្នកពិសារស្រា ឬអ្នកដែលលក់ស្រា ជាអ្នកលាយសារធាតុមេតាណុលហួសកម្រិត។
លោក ឌឹម ថេង ថ្លែងថា៖ «ប្រជាពលរដ្ឋខ្មែរយើងភាគច្រើន គឺមិនទាន់យល់ហើយចាត់ទុកថា មេតាណុល មិនមែនជាសារធាតុពុលនោះទេ ។ គាត់យល់ច្រឡំថា មេតាណុលហ្នឹងជាមេស្រា ដាក់លាយទៅ វាខ្លាំង និងវិល និងមួយទៀត គាត់អត់ដឹងថា ដាក់អាហ្នឹងទៅពុលដល់ស្លាប់នោះទេ អីចឹងហើយបានគាត់លាយទៅ»។
បើតាមលោក ឌឹម ថេង ការដាក់លាយសារធាតុមេតាណុលនេះជាមួយនឹងស្រាស ឬស្រាត្រាំថ្នាំ មិនត្រឹមតែបណ្តាលឱ្យគ្រោះថ្នាក់ដល់ស្លាប់នោះទេ ប៉ុន្តែបើពុលមិនទាន់ស្លាប់ក៏ធ្វើឱ្យងងិតភ្នែក និងប៉ះពាល់ដល់ប្រព័ន្ធខួរក្បាលថែមទៀតផងដែរ។
លោក ហេង សុផល អធិការស្រុកល្វាឯមថ្លែងថា មន្ត្រីជំនាញបានចុះមកសួរនាំ និងបានប្រមូលទិញទាំងស្រាស និងស្រាត្រាំថ្នាំទាំងអស់ ដើម្បីយកទៅពិនិត្យនៅឡាបូពិសោធន៍ ប៉ុន្តែលោកមិនទាន់ទទួលបានលទ្ធផលថា ពលរដ្ឋដែលស្លាប់នេះ ដោយសារពុលស្រា ឬយ៉ាងណាទេ ប៉ុន្តែអ្នកទាំងអស់គ្នាជាអ្នកញៀនស្រា។
ទោះជាយ៉ាងណា លោក ហេង សុផលថា មន្ត្រីជំនាញ និងអាជ្ញាធរពាក់ព័ន្ធ នៅពេលដែលចុះមកពិនិត្យដោយផ្ទាល់បានបិទដេប៉ូចែកចាយ និងកន្លែងបិតស្រាមួយចំនួន ដោយហាមមិនឱ្យមានចរាចរណ៍ ឬផលិតនូវស្រាស និងស្រាត្រាំថ្នាំជាបណ្តោះអាសន្ន ដោយរង់ចាំអនុវត្តនីតិវិធីបន្ត។
បើតាមលោក ហេង សុផល ករណីពលរដ្ឋពុលស្រាបណ្តាលឱ្យស្លាប់នេះ បានកើតឡើងជាបន្តបន្ទាប់ចាប់តាំងពីថ្ងៃទី ១០ ខែ ឧសភា ឆ្នាំ ២០២១ ស្ថិតនៅក្នងភូមិស្គរ ឃុំសារិកា ស្រុកល្វាឯម ខេត្តកណ្តាល ដោយពួកគាត់បានទៅចូលរួមកំដរ បុណ្យសពឈ្មោះ ម៉ន ងន អាយុ ៥១ ឆ្នាំ៕
