.jpg)
ទិដ្ឋភាពបោះបង្គោលព្រំដីនៅតំបន់ភ្នំត្នោត-ភ្នំពកថ្មីៗនេះ។ រូបថត សហការី
ព្រះវិហារ/សៀមរាបៈ អ្នកអភិរក្សធនធានព្រៃឈើ និងសត្វព្រៃបានអះអាងថា សម្ទុះនៃការចូលទន្ទ្រានកាន់កាប់ដីក្នុងដែនជម្រកសត្វព្រៃភ្នំត្នោត-ភ្នំពក ក្នុងស្រុកចំនួន ២ ក្នុងខេត្តព្រះវិហារ និងស្រុកមួយក្នុងខេត្តសៀមរាបពីសំណាក់ពលរដ្ឋមកពីខេត្តផ្សេងៗមានការកើនឡើងគួរឱ្យកត់សម្គាល់នាពេលថ្មីៗនេះ ដែលជាការបង្ហាញសញ្ញាមិនល្អសម្រាប់ជម្រកសត្វព្រៃ។
លោក Ben Devis អ្នកអភិរក្សធនធានព្រៃឈើ និងសត្វព្រៃជនជាតិអាមេរិកនៅដែនជម្រកសត្វព្រៃភ្នំត្នោត-ភ្នំពកបានប្រាប់ ភ្នំពេញ ប៉ុស្តិ៍ ពីថ្ងៃទី ២៨ ធ្នូថា ពលរដ្ឋចូលកាប់ឈើសម្រាប់ធ្វើអាជីវកម្មហាក់នៅមានធម្មតា។ ប៉ុន្តែអ្នកព្យាយាមចូលកាន់កាប់ដីមានច្រើនជាងមុន ហើយភាគច្រើនជាអ្នកចំណាកស្រុកមកពីខេត្តផ្សេងៗតែអ្នកនៅទីនេះមិនសូវមានទេ។
លោកបានបន្តថា តាមការសង្កេតឃើញថា ពលរដ្ឋដែលបានចូលទៅទន្ទ្រានកាន់កាប់ដីនេះបានបោះព្រំដី តាមរយៈកាប់ដើមឈើធ្វើបង្គោល និងបាញ់ថ្នាំចំណាំព្រំដីរបស់ពួកគេ។ នៅពេលលោកសួរ ខណៈចុះល្បាតឃើញពួកគេឆ្លើយថាមកពីខេត្តបាត់ដំបង។ ជាមួយគ្នានេះលោកក៏បានឃើញបង្គោលព្រំដីច្រើនទីតាំងផងដែរដែលជាសញ្ញាមិនល្អសម្រាប់ជម្រកសត្វព្រៃភ្នំត្នោត-ភ្នំពក។
លោក Ben បានបញ្ជាក់ថា៖ «អ្នកដែលចូលទៅទន្ទ្រានយកដីគឺអ្នកខ្លះដើម្បីបានដីសម្រាប់រស់នៅ ប៉ុន្តែភាគតិចណាស់ និងអ្នកខ្លះទៀតដើម្បីយកធ្វើអាជីវកម្មដែលភាគច្រើនគឺជាអ្នកធំ និងអ្នកមានលុយ ដោយបានជួលអ្នកផ្សេងឱ្យមកទន្ទ្រានយកដីនេះ»។ ក៏ប៉ុន្តែលោកថាដីដែលទន្ទ្រាននេះគឺមិនអាចយកទៅធ្វើកសិកម្មបាននោះទេ ព្រោះជាដីប្រភេទថ្ម។
លោកបន្ថែមថា៖ «គេប្រាប់ពលរដ្ឋថា បើចាប់ដីបានគេចែកគ្នា។ ឧទាហរណ៍ បើចូលទន្ទ្រានកាន់កាប់ដីបាន ១០ ហិកតា គេចែកពាក់កណ្តាលម្នាក់ ហើយករណីនេះ យើងចាប់បានពលរដ្ឋចំនួន ២ នាក់ដាក់ពន្ធនាគារកាលពី ២ សប្តាហ៍មុន ដោយពួកគាត់បានអះអាងថា ដីហ្នឹងគឺជាដីរបស់ថៅកែរបស់គាត់ទាំងអស់»។
បើតាមលោក Ben ភាគច្រើននៃអ្នកចូលទន្ទ្រានកាន់កាប់ដីតំបន់នេះ គឺពួកគេរកម៉ូយទិញបានភ្លាម ដោយពួកគាត់មិនចង់រស់នៅទីនោះទេ ហើយដីដែលពួកគេចាប់បាននេះ ធ្វើដំណាំក៏មិនកើតដែរ សូម្បីតែដាំដើមស្វាយចន្ទីក៏មិនអាចរស់ដែរ ព្រោះជាដីមានថ្មច្រើន។
លោក Ben បានបង្ហាញការងឿងឆ្ងល់ថា លោកហាក់មិនយល់ពីទឹកចិត្តរបស់ពលរដ្ឋដែលនៅតែបន្តចូលទន្ទ្រានកាន់កាប់ដីក្នុងដែនជម្រកសត្វព្រៃភ្នំត្នោត-ភ្នំពកនេះទេ ព្រោះជាប្រភេទដីធ្វើកសិកម្មមិនកើត។ ប៉ុន្តែការទន្ទ្រានចូលកាន់កាប់ដីនេះប្រហែលយកលក់ទៅឱ្យក្រុមហ៊ុនរ៉ែ ឬក្រុមហ៊ុនផ្សេងទៀត។ តាមការសង្កេតរបស់លោកនៅក្នុងខែធ្នូនេះមានពលរដ្ឋដែលចូលទៅទន្ទ្រានយកដីច្រើនទីតាំងក្នុងតំបន់នេះដោយមានជាង ៥០ ហិកតាដែលបង្កឱ្យប៉ះពាល់ដល់ព្រៃឈើ និងសត្វព្រៃផងដែរ។
លោក សុង ច័ន្ធសុជាតិ ប្រធានមន្ទីរបរិស្ថានខេត្តព្រះវិហារបានឱ្យដឹងថា លោកមិនទាន់ទទួលរបាយការណ៍ថ្មីៗជុំវិញការចូលទន្ទ្រានកាន់កាប់ដីក្នុងដែនជម្រកសត្វព្រៃភ្នំត្នោត-ភ្នំពកនេះទេ ប៉ុន្តែលោកថាកន្លងមកធ្លាប់ទទួលបានរបាយការណ៍ពីការបញ្ជូនបុរស ២ នាក់ទៅតុលាការ និងឃុំខ្លួនបណ្តោះអាសន្នជុំវិញការទន្ទ្រានកាន់កាប់ដីធ្លីនេះ។
លោកថា៖ «តាមច្បាប់អ្នកដែលចូលទន្ទ្រានកាន់កាប់ដីក្នុងដែនជម្រកសត្វព្រៃ និងតំបន់អភិរក្សនឹងត្រូវផ្តន្ទាទោស»។
លោក ឡោ ចាន់ អ្នកសម្របសម្រួលសមាគមការពារសិទ្ធិមនុស្សអាដហុកខេត្តព្រះវិហារបានឱ្យដឹងដែរថា លោកទទួលបានព័ត៌មានក្រៅផ្លូវការដោយមិនទាន់ជាលាយលក្ខណ៍អក្សរ ឬរបាយការណ៍ពីខាងណាមួយទេ។ ប៉ុន្តែលោកថា ក្នុងដែនជម្រកសត្វព្រៃភ្នំត្នោត-ភ្នំពកដែលគ្រប់គ្រងដោយក្រសួងបរិស្ថាន និងលោក Ben នេះ មានពលរដ្ឋមួយចំនួនបានចូលទៅទន្ទ្រាន និងកាន់កាប់ដោយខុសច្បាប់។
លោកថ្លែងថា៖ «ខ្ញុំមិនមែនកាន់ជើងខាងភាគីណាមួយទេគឺមានបងប្អូនប្រជាពលរដ្ឋចំណូលស្រុកក៏ដូចជាបងប្អូនយើងដែលរស់នៅក្នុងតំបន់ហ្នឹងបានទៅរំលោភយកដីសហគមន៍ក៏ដូចជាដីតំបន់ការពារ និងដីស្ថិតនៅក្រោមការមើលថែពីលោក Ben ក៏មានដែរ»។
បើតាមលោក ឡោ ចាន់ បើពលរដ្ឋគ្មានដីសម្រាប់រស់នៅគឺពួកគាត់អាចដាក់ពាក្យស្នើសុំទៅអាជ្ញាធរដើម្បីបានដីសម្បទានសង្គមកិច្ចទៅតាមលទ្ធភាពដីដែលរដ្ឋផ្តល់ឱ្យដោយមិនគួរណាទៅទន្ទ្រានកាន់កាប់យកដីដែលមានការការពារ ឬជាដីអភិរក្សនោះទេ។
យោងតាមអនុក្រឹត្យលេខ ១៤៣ អនក្រ.បក ចុះថ្ងៃទី ៣១ ខែសីហា ឆ្នាំ ២០១៧ ដែនជម្រកសត្វព្រៃភ្នំត្នោត-ភ្នំពកត្រូវបានបង្កើតឡើងដោយមានផ្ទៃដីចំនួន ៤២ ០៩៧ ហិកតា ស្ថិតក្នុងភូមិសាស្ត្រស្រុកសង្គមថ្មី និងស្រុកគូលែន ខេត្តព្រះវិហារ និងស្រុកជីក្រែង ខេត្តសៀមរាប៕
