កោះកុងៈ តំណាងសហគមន៍ និងសកម្មជនតំបន់អារ៉ែងស្នើរដ្ឋាភិបាលត្រូវមានវិធានការឱ្យម៉ឺងម៉ាត់បន្ទាប់ពីមានគម្រោងសាងសង់ផ្លូវ ស្ពានចូលតំបន់នោះដោយបារម្ភថាគម្រោងនេះនឹងបង្កលក្ខណៈងាយស្រួលដល់ជនឆ្លៀតឱកាសចូលកាប់ព្រៃឈើយ៉ាងអនាធិបតេយ្យដែលនឹងប៉ះពាល់ដល់ជីវភាពរស់នៅរបស់ពួកគេ និងជម្រកសត្វព្រៃ។
ការជំរុញនេះធ្វើឡើងនៅក្នុងសន្និសីទព័ត៌មានស្តីពីហានិភ័យថ្មីសម្រាប់តំបន់អារ៉ែងកាលពីម្សិលមិញនៅរាជធានីភ្នំពេញដើម្បីសម្តែងការស្វាគមន៍ចំពោះរដ្ឋាភិបាលដែលមានគម្រោងសាងសង់ផ្លូវតែក៏បង្ហាញពីក្តីបារម្ភរបស់ពួកគេផងដែរ។
នៅក្នុងវេទិកាស្ដីពីការការពារ និងអភិរក្សធនធានធម្មជាតិនៅព្រឹកថ្ងៃទី ២២ ខែ សីហាលោកនាយករដ្ឋមន្ត្រី ហ៊ុន សែន បានយល់ព្រមតាមសំណើរបស់កញ្ញា ធី សុវណ្ណថា ថានឹងសាងសង់ផ្លូវចូលទៅតំបន់អារ៉ែង និងអភិវឌ្ឍតំបន់នេះឲ្យទៅជាតំបន់ទេសចរណ៍។
សកម្មជនបរិស្ថាននៅតំបន់អារ៉ែងលោក សាន់ ម៉ាឡា ស្វាគមន៍ចំពោះការអភិវឌ្ឍរបស់រដ្ឋាភិបាលជាពិសេសការសាងសង់ផ្លូវហើយ និងស្ពានដើម្បីសម្រួលដល់ការធ្វើដំណើររបស់ប្រជាជនមូលដ្ឋាន និងសម្រួលដល់ភ្ញៀវទេសចរជាតិ និងអន្តរជាតិ។
តែលោកថាទន្ទឹមនឹងនេះក៏មានជនឆ្លៀតឱកាសនឹងបង្កើនការកាប់ឈើ ឬនាំចូលគ្រឿងញៀនទៅតំបន់នោះផងដែរបើមិនមានការទប់ស្កាត់ ឬវិធានការហ្មត់ចត់ពីសំណាក់រដ្ឋាភិបាលទេនោះ។
លោកថា៖ «ឈ្មួញខិលខូចមួយចំនួនដែលកំពុងប្រកបរបរកាប់ឈើលក់ជាលក្ខណៈរកស៊ីខុសច្បាប់ដូច្នេះខ្ញុំគិតថាផ្លូវពិបាកក៏គេនៅតែអាចដឹកជញ្ជូនឈើចេញពីតំបន់អារ៉ែងមកលក់ទីផ្សារខាងក្រៅបានដូច្នេះបើមានផ្លូវ និងស្ពានស្រួលវាគឺជាមធ្យោបាយមួយដែលនឹងសម្រួលឱ្យសកម្មភាពប្រព្រឹត្តបទល្មើសរបស់ឈ្មួញខិលខូចទាំងអស់នេះ»។
លោកសង្កេតឃើញថាទោះបីជាបច្ចុប្បន្នមានប៉ុស្តិ៍នគរបាលដាក់យាមឃ្លាំមើលការដឹកជញ្ជូនឈើខុសច្បាប់ក្តី ក៏នៅតែមិនមានប្រសិទ្ធភាពដែរដោយមានមន្រ្តីមួយចំនួនឃុបឃិតគ្នាប្រព្រឹត្តអំពើពុករលួយ។
លោក ម៉ាឡា ក៏បានប្រតិកម្មទៅនឹងកញ្ញា ធី សុវណ្ណថា ផងដែរ ដែលចោទថាពលរដ្ឋនៅតំបន់អារ៉ែងជាអ្នកកាប់ឈើលក់។ «ការលើកឡើងរបស់កញ្ញា សុវណ្ណថា នៅក្នុងវេទិកាជាមួយសម្តេចនាយករដ្ឋមន្ត្រីដែលគាត់និយាយថាប្រជាជនមូលដ្ឋានជាអ្នកកាប់បំផ្លាញព្រៃឈើតាមពិតនេះជារឿងមួយដែលមិនមែនជាការពិតតែគាត់និយាយត្រូវខ្លះពោលពលរដ្ឋកាប់មែនតែដើម្បីផ្គត់ផ្គង់ជីវភាពប្រចាំថ្ងៃជាលក្ខណៈគ្រួសារ»។
តំណាងសហគមន៍តំបន់អារ៉ែងលោក វ៉ែន វ៉ន ថ្លែងថានៅពេលមានផ្លូវស្រួលនឹងមានហានិភ័យចូលតំបន់នោះតាមរយៈជនខិលខូចអាចកើតមានទៅជាចោរ លួច ឆក់ និងប្លន់ជាដើម។ «អ៊ីចឹងខ្ញុំសង្ឃឹមថារាជរដ្ឋាភិបាលក៏ដូចជាអាជ្ញាធរថ្នាក់ក្រោមត្រូវមានវិធានការយ៉ាងម៉ឺងម៉ាត់ដើម្បីចាត់វិធានការទប់ស្កាត់លើរឿងនេះ»។
ទាក់ទងនឹងវិស័យទេសចរណ៍វិញ លោកថា៖ «ពួកខ្ញុំខ្លាចស្ថាប័នរដ្ឋាភិបាលផ្តល់អាជ្ញាប័ណ្ណដល់ក្រុមហ៊ុនឯកជនធ្វើលើវិស័យទេសចរណ៍នោះពលរដ្ឋអត់មានចំណូលហើយខ្ញុំចង់បានជាងគេគឺវិស័យទេសចរណ៍នេះនឹងត្រូវបានគ្រប់គ្រងដោយប្រជាពលរដ្ឋតែម្តង»។
ចំណែកប្រជាពលរដ្ឋនៅតំបន់អារ៉ែងអ្នកស្រី ហាស់ ឡៃ អាយុ ៥០ ឆ្នាំថ្លែងថា៖ «ព្រោះកន្លងមកទោះបីជាខ្ញុំអត់មានថ្នល់អត់មានស្ពានពិតមែនតែសំខាន់ខ្ញុំរស់នៅបានសុខស្រួលក៏មិនមែនមិនឱ្យអភិវឌ្ឍទេអភិវឌ្ឍចុះតែធ្វើម៉េចឱ្យពួកខ្ញុំរស់នៅបានសុខ កុំឱ្យមានជនខិលខូចកាប់បំផ្លាញព្រៃឈើ និងកុំឱ្យមានចោរកម្មចេញចូល»។
អ្នកនាំពាក្យក្រសួងបរិស្ថានលោក សៅ សុភាព បានប្រាប់ភ្នំពេញប៉ុស្តិ៍ថារាជរដ្ឋាភិបាលបានកំណត់គោលការណ៍ច្បាស់លាស់ដោយដាក់បញ្ជាទៅក្រសួង ស្ថាប័នពាក់ព័ន្ធ និងរដ្ឋបាលថ្នាក់ក្រោមជាតិឱ្យទប់ស្កាត់បទល្មើសធម្មជាតិនានា។
លោកគូសបញ្ជាក់ថា៖ «យើងបាននិងកំពុងធ្វើពាក់ព័ន្ធនឹងការការពារ និងបង្ក្រាបបទល្មើស និងបង្កើនការយកចិត្តទុកដាក់បន្ថែមទៀតអ៊ីចឹងទេយើងមិនបណ្តោយឱ្យជនខិលខូច ជនល្មើសបង្កបញ្ហាបានទេ»។
ទោះបីយ៉ាងណាលោក សុភាព បញ្ជាក់ថារហូតមកទល់ពេលនេះខាងក្រសួងមិនទាន់ទទួលព័ត៌មានច្បាស់លាស់ពីគម្រោងសាងសង់ផ្លូវចូលតំបន់អារ៉ែងនៅឡើយទេតែលោកថាអាចនឹងចាប់ផ្តើមពេលឆាប់ៗខាងមុខនៅពេលដែលស្ថានភាពអំណោយផលខណៈបច្ចុប្បន្នមានភ្លៀងធ្លាក់នៅតំបន់នោះ។
តំបន់អារ៉ែងស្ថិតនៅក្នុងស្រុកថ្មបាំង ខេត្តកោះកុង ជាផ្នែកមួយនៃជួរភ្នំក្រវាញគ្របដណ្ដប់ទៅដោយព្រៃស្រោង ព្រៃរបោះ ដីចម្ការ ដីស្រែ និងដងស្ទឹងជាច្រើនដែលសម្បូរទៅដោយធនធានធម្មជាតិសត្វព្រៃ និងជាកន្លែងទេសចរណ៍គួរឲ្យទាក់ទាញដែលមានទិដ្ឋភាពដ៏ស្រស់ស្អាត៕
