The Phnom Penh Post Search

Search form




Logo of Phnom Penh Post newspaper Phnom Penh Post - អ្នក​គាំទ្រ​សាទរ​ការ​ដោះ​លែង​តំណាង​រាស្ត្រ​និង​សកម្មជន

អ្នក​គាំទ្រ​សាទរ​ការ​ដោះ​លែង​តំណាង​រាស្ត្រ​និង​សកម្មជន

លោក​ស្រី មូរ សុខហួរ ពេល​ត្រូវ​បាន​ដោះ​លែង​ពី​ពន្ធនាគារ ព្រៃ​ស កាល​ពី​ម្សិល​មិញ​ជាមួយ​តំណាង​រាស្ត្រ ៦​រូប និង​សកម្មជន​ម្នាក់​ផ្សេង​ទៀត។
លោក​ស្រី មូរ សុខហួរ ពេល​ត្រូវ​បាន​ដោះ​លែង​ពី​ពន្ធនាគារ ព្រៃ​ស កាល​ពី​ម្សិល​មិញ​ជាមួយ​តំណាង​រាស្ត្រ ៦​រូប និង​សកម្មជន​ម្នាក់​ផ្សេង​ទៀត។ ម៉ៃ វីរៈ

អ្នក​គាំទ្រ​សាទរ​ការ​ដោះ​លែង​តំណាង​រាស្ត្រ​និង​សកម្មជន

ភ្នំពេញៈ ក្រុម​អ្នក​គាំទ្រ​គណបក្ស​ប្រឆាំង​បាន​ស្រែ​កហ៊ោ​កញ្រ្ជៀវ​សប្បាយ​រីក​រាយ កាល​ពី​រសៀល​ថ្ងៃ​អង្គារ ខណៈ​អ្នក​តំណាង​រាស្រ្ត​គណបក្ស​សង្គ្រោះ​ជាតិ ៧​នាក់ និង​សកម្ម​ជន​ម្នាក់ ត្រូវ​បាន​ធានា​ឲ្យ​នៅ​ក្រៅ​ឃុំ តែ​ប៉ុន្មាន​ម៉ោង​បន្ទាប់​ពី​មាន​ការ​ព្រម​ព្រៀង​គ្នា​ក្នុង​ជំនួប​ចរចា​កំពូល​រវាង​មេ​ដឹក​នាំ​គណបក្ស​ជាប់​ឆ្នោត​ទាំង​ពីរ។

អ្នក​តំណាង​រាស្រ្ត​មាន​សេរីភាព​ចេញ​ពី​ពន្ធនាគារ ព្រៃ​ស នៅ​ជាយ​រាជធានី​ភ្នំពេញ មាន លោក ហូរ វ៉ាន់ លោក រៀល ខេមរិន្ទ លោក ម៉ែន សុថាវរិន្រ្ទ លោក កែវ ភារម្យ លោក ឡុង រី និង លោក នុត រំដួល ហើយ​និង​សកម្ម​ជន លោក អឿង ណារិទ្ធ បាន​បង្ហាញ​ខ្លួន​និង​បំពាក់​កម្រង​ផ្កា។

លោក ឡុង រី តំណាង​រាស្រ្ត​ជាប់​ឆ្នោត​នៅ​មណ្ឌល ខេត្ត​បន្ទាយ​មាន​ជ័យ ថ្លែង​ពេល​ជួប​ក្រុម​អ្នក​គាំទ្រ​ថា៖ «យើង​មិន​បាន​ធ្វើ​អ្វី​ខុស​ទេ»។

មួយ​សន្ទុះ​ក្រោយ​មក លោក​ស្រី មូរ សុខហួរ តំណាង​រាស្រ្ត​គណបក្ស​ប្រឆាំង​ត្រូវ​បាន​ដោះ​លែង​ពី​ទ្វារ​ផ្សេង។ លោក​ស្រី​ថ្លែង​ទៅ​កាន់​អ្នក​គាំទ្រ ខណៈ​ក្រុម​អ្នក​យក​ព័ត៌មាន និង​អ្នក​ស្មោះ​ស្ម័គ្រ​នឹង​គណបក្ស​នៅ​ព័ទ្ធ​ជុំវិញ​ថា៖ «វា​ជា​ពេល​ដែល​យើង​ត្រូវ​បង្រួប​បង្រួម​គ្នា​ជា​ខ្មែរ​តែ​មួយ»។

លោក​ស្រី បាន​ឡើង​ជិះ​រថយន្ត​ជាមួយ​ស្វាមី​ហើយ​ថ្លែង​សារ​ខ្លី​ថា៖ «ខ្ញុំ​មាន​មោទនភាព។ ខ្ញុំ​ពិត​ជា​មាន​មោទនភាព​ចំពោះ​ប្រជាជន​ខ្ញុំ។ ខ្ញុំ​មាន​មោទនភាព​ជា​ស្រ្តី​ខ្មែរ ហើយ​អ្នក​អាច​យល់​ថា ការ​គាំទ្រ និង​សេចក្តី​ប្រាថ្នា​របស់​ប្រជាជន​ខ្មែរ គឺ​ដើម្បី​ការ​ផ្សះ​ផ្សា និង​យុតិ្តធម៌»។

លោក​ស្រី​បន្ត​ថា លទិ្ធ​ប្រជាធិបតេយ្យ លទិ្ធ​ប្រជាធិបតេយ្យ​ពិតៗ!! បន្ទាប់​មក​រថយន្ត​ដឹក​គាត់​បាន​បើក​ចេញ​ផុត​ពី​ក្រុម​អ្នក​គាំទ្រ។

សមាជិក​គណបក្ស​សង្គ្រោះ​ជាតិ​ត្រូវ​បាន​ចាប់​ខ្លួន កាល​ពី​សប្តាហ៍​មុន​ហើយ​បាន​ទទួល​រង​ការ​ចោទ​ប្រកាន់​ជា​ច្រើន​រាប់​ទាំង​ការ​ចោទ​ពី​បទ​បះបោរ​ពី​ព្រឹត្តិ​ការណ៍​ថ្ងៃ ទី១៥ ខែ​កក្កដា រវាង​បាតុករ​របស់​គណបក្ស​ប្រឆាំង និង​សន្តិសុខ​ដែល​ស្មោះ​នឹង​គណបក្ស​កាន់​អំណាច នៅ​ទីលាន​ប្រជាធិបតេយ្យ ក្នុង​រាជធានី​ភ្នំពេញ ដែល​ធ្វើ​ឲ្យ​សន្តិសុខ និង​សកម្ម​ជន​រង​របួស​ជាច្រើន​នាក់។

លោក កែ មុនី ចៅក្រម​នៃ​សាលា​ដំបូង​រាជធានី​ភ្នំពេញ បាន​ប្រាប់ ភ្នំពេញ ប៉ុស្តិ៍ ពី​ម្សិល​មិញ​ថា ខណៈ​មាន​ការ​ដោះ​លែង​ឲ្យ​សេរីភាព​នៅ​ក្រៅ​ឃុំ អ្នក​ទាំង ៨​នាក់ នៅ​ប្រឈម​នឹង​សវនាការ​តុលាការ​នៅ​ឡើយ។

លោក​បន្ត​ថា៖ «ខ្ញុំ​ចុះ​ហត្ថលេខា​លើ​ដីកា​អនុញ្ញាត​ឲ្យ​នៅ​ក្រៅ​ឃុំ​នៅ​រសៀល​នេះ។ ដីកា​ក៏​បាន​បញ្ជូន​ទៅ​ប្រធាន​ពន្ធនាគារ​និង​មេធាវី​ការ​ពារ​ក្តី។ ខ្ញុំ​អនុញ្ញាត​ឲ្យ​ពួកគេ​នៅ​ក្រៅ​ឃុំ​បណ្តោះ​អាសន្ន»។

ប៉ុន្មាន​ថ្ងៃ​បន្ទាប់​ពី​តុលាការ​បាន​ចោទ​ប្រកាន់​មន្រ្តី​គណបក្ស​ប្រឆាំង​ពី​សប្តាហ៍​មុន លោក សម រង្ស៊ី បាន​កាត់​បន្ថយ​ដំណើរ​ទៅ​កាន់​អឺរ៉ុប​ដោយ​វិល​ត្រឡប់​មក​កម្ពុជា​វិញ កាល​ពី​ថ្ងៃ ទី១៩ ខែ​កក្កដា ហើយ​បាន​អំពាវ​នាវ​ឲ្យ​មាន​ដំណោះ​ស្រាយ​ភាព​ជាប់​គាំង​នយោបាយ​ដែល​អូស​បន្លាយ​ជិត ១ ឆ្នាំ​បន្ទាប់​ពី​ការ​បោះ​ឆ្នោត​ឆ្នាំ​មុន។ ដំណោះ​ស្រាយ​នយោបាយ​សម្រេច​បាន​កិច្ច​ព្រម​ព្រៀង​គ្នា​កាល​ពី​ម្សិល​មិញ​បន្ទាប់​ពី​ជំនួប​ថ្នាក់​កំពូល​ប្រមាណ ៥​ម៉ោង នៅ​វិមាន​ព្រឹទ្ធសភា នៅ​ភ្នំពេញ។

នៅ​ក្រៅ​ពន្ធនា​គារ លោក យឹម សុវណ្ណ អ្នក​នាំ​ពាក្យ​គណបក្ស​សង្គ្រោះ​ជាតិ បាន​ថ្លែង​ថា លោក​មិន​បាន​ដឹង​ថា​តើ​ពួកគេ​នឹង​ឆ្ពោះ​ទៅ​ទី​ណា​នោះ​ទេ បើ​ទោះ​បី​ជា​លោក ឡុង បុត្តា អ្នក​តំណាង​រាស្រ្ត​ជាប់​ឆ្នោត​របស់​គណបក្ស​សង្គ្រោះ​ជាតិ បាន​និយាយ​មុន​នេះ​ថា ពួក​គេ​នឹង​ទៅ​កាន់​ទីស្នាក់​ការ​កណ្តាល​គណបក្ស​នៅ សង្កាត់​ចាក់​អង្រែ​លើ ខណ្ឌ​មាន​ជ័យ រាជធានី​ភ្នំពេញ៕

រាយការណ៍​បន្ថែម​ដោយៈ ប៊ុត រស្មីគង្គា និង តាត ឧត្តម

អត្ថបទគួរចាប់អារម្មណ៍