The Phnom Penh Post Search

Search form

Logo of Phnom Penh Post newspaper Phnom Penh Post - អ្នក​ឃ្លាំ​មើល អ វ ត ក ចង់​ឲ្យ​ភាគី​ពាក់​ព័ន្ធ​សន្យា​ឲ្យ​ច្បាស់

អ្នក​ឃ្លាំ​មើល អ វ ត ក ចង់​ឲ្យ​ភាគី​ពាក់​ព័ន្ធ​សន្យា​ឲ្យ​ច្បាស់

អ្នក​ឃ្លាំ​មើល អ វ ត ក ចង់​ឲ្យ​ភាគី​ពាក់​ព័ន្ធ​សន្យា​ឲ្យ​ច្បាស់

131105_06a
អង្គសវនាការក្នុងសំណុំរឿង ០០២ របស់សាលាក្តីខ្មែរក្រហមកន្លងមក អ.វ.ត.ក

ភ្នំពេញៈ អ្នក​ឃ្លាំ​មើល​តុលាការ​អន្តរជាតិ ១ រូប​បាន​ព្រមាន​ថា សាលា​ក្តី​ខ្មែរ​ក្រហម​អាច «បញ្ឈប់​ប្រតិបត្តិការ​ខ្លួន​ទាំង​អាម៉ាស់» បើ​សិន​ភាគី​ពាក់​ព័ន្ធ មិន​ឆ្លើយ​តប​ដោយ​ស្មោះ​អំពី​ពេល​វេលា​ជាក់លាក់​ក្នុង​ការ​ផ្តល់​មូលនិធិ និង​សម្ពាធ​នយោបាយ​ដែល​ខ្លួន​ប្រឈម។

អត្ថបទ​ចេញ​ផ្សាយ​លើ​កាសែត​កាល​ពី​ថ្ងៃ​អាទិត្យ​ឲ្យ​ដឹង​ថា អង្គការ​គំនិត​ផ្តួច​ផ្តើម​យុត្តិធម៌​សង្គម​បើក​ទូលាយ​ដែល​មាន​មូ​ដ្ឋាន នៅ​បុរី ញូវយ៉ក បាន​អំពាវនាវ​បែប​នេះ​ទៅ​ថ្នាក់​ដឹក​នាំ​តុលាការ ប្រសិន​បើ​ខ្លួន​ចង់​បន្ត​កាត់​ក្តី​លើ​សំណុំ​រឿង ០០២ ត​ទៅ​ទៀត។

កាសែត ដដែល​បន្ត​ថា៖ «មាន​តែ​ថ្នាក់​ដឹក​នាំ​ដែល​មាន​ចិត្ត​ស្មោះ​ត្រង់ និង​ការ​រៀបចំ​ផែនការ​បន្ទាន់​ទេ ទើប​តុលាការ​និង​អង្គការ​សហ​ប្រជាជាតិ អាច​នឹង​ផ្តល់​អ្វី​ដែល​គេ​ត្រូវ​ផ្តល់​ឲ្យ​ទៅ​ភាគី​កម្ពុជា ចាប់​ពី​គោលដៅ​ដំបូង​នៃ​សាលា​ក្តី​ខ្មែរ​ក្រហម»។

កាសែត​នេះ​រៀបរាប់​បន្ត​ថា បើ​ពិនិត្យ​ពី​វ័យ​កាន់​តែ​ចាស់​ហើយ​សុខភាព​កាន់​តែ​ដុន​ដាប​របស់​សហ​ចុង​ចោទ ភាគី​ពាក់​ព័ន្ធ​គួរ​តែ​ពិចារណា​ថា​តើ​វា​មាន​ន័យ​ទេ ក្នុង​ការ​ចាប់​ផ្តើម​ការ​ជំនុំ​ជម្រះ​ដែល «ទំនង​ជា​មិន» អាច​បញ្ចប់។

កាសែត​នេះ​បន្ត​ថា បើ​ម្ចាស់​ជំនួយ មាន​ឆន្ទៈ​ផ្តល់​មូលនិធិ​ឲ្យ​ទៅ​តុលាការ​នេះ​តាម​រយៈ​ការ​ជំនុំ​ជម្រះ​លើក ទីពីរ ពួក​គេ​ត្រូវ​តែ​បញ្ឈប់ «ការ​ផ្តល់​ជំនួយ​បន្តិច​ម្តងៗ ដើម្បី​ដោះស្រាយ​ស្ថានការណ៍​វិបត្តិ» ហើយ​ត្រូវ​ធ្វើ​ការ​ប្តេជ្ញា​ឲ្យ​បាន​ពេញ​លេញ។ «ប្រសិន​បើ (ម្ចាស់​ជំនួយ) មិន​មាន​ឆន្ទៈ​ធ្វើ​អ៊ីចឹង​ទេ ពួក​គេ គួរ​តែ​និយាយ​ឲ្យ​ត្រង់ៗ​នៅ​ពេល​នេះ ហើយ​ចៀសវាង កុំ​ឲ្យ​មាន​ការ​ចំអក​ដាក់​តុលាការ​ដែល​ឈប់​ពាក់​កណ្តាល​ផ្លូវ ដោយ​សារ​តែ​គ្មាន​លុយ»។

កាសែត​នេះ​រាយការណ៍​បន្ត​ថា ភាព​ទាល់​ច្រក​បច្ចុប្បន្ន អាច​បំបែក​បាន ប្រសិន​បើ​ផែន​ការ​លម្អិត និង​ការ​សម្រេច​ចិត្ត​ចាប់​ផ្តើម​ជា​ថ្មី​នោះ។ ការ​កំណត់​ពេល​វេលា​ពិត​ប្រាកដ និង​ថវិកា​ត្រូវ​បាន​គេ​ត្រៀម ប្រសិន​បើ​ម្ចាស់​ជំនួយ​មាន​ការ​ប្តេជ្ញា​ចិត្ត។

របាយ​ការណ៍​កាសែត​នេះ​បញ្ជាក់​ថា៖ «ប្រសិន​បើ (ភាគី​ពាក់​ព័ន្ធ) មិន​បង្កើន​ការ​ផ្តល់​ជំនួយ​ទេ ជម្រើស​អាប់អួរ​ពីរ​អាច​នឹង​កើត​មាន ទីមួយ តុលាការ​នឹង​ដំណើរការ​ទាំង​លំបាក​រហូត​ដល់​មាន​ការ​ផ្ទុះ​ឡើង​នូវ​កំហឹង ទាំង​អាម៉ាស់​ដែល​នឹង​ឈាន​ទៅ​បញ្ចប់​ដល់​ការ​ប្រតិបត្តិការ។ ទី​ពីរ វា​អាច​ស្ថិត​ក្នុង​ស្ថានភាព​មិន​ប្រាកដ​ប្រជា ដោយ​មាន​ក្តី​អាម៉ាស់​ស្មើ​គ្នា​...ព្រោះ​ម្ចាស់​ជំនួយ ឈប់​ផ្តល់​ប្រាក់​ដោយ​មិន​បាន​ធ្វើ​ការ​សម្រេច​ចិត្ត​អំពី​រៀប​បម្រុង សម្រាប់​ភាគី​កម្ពុជា»។

លោក Lars Olsen មន្រ្តី​ទំនាក់​ទំនង​ផ្នែក​ច្បាប់​នៅ​តុលាការ​នេះ​បាន​ថ្លែង​ថា មិន​មាន​ហេតុ​ផល​ណា​មួយ​ដែល​រំពឹង​ថា ការ​ជំនុំ​ជម្រះ​លើ​សំណុំ​រឿង ០០២ នឹង​មិន​បន្ត​ដូច​ការ​ដែល​បាន​គ្រោង​ទុក​នោះ​ទេ។

លោក Lars Olsen បាន​ថ្លែង​បញ្ជាក់​ថា៖ «វា​ឥត​ប្រយោជន៍​ទេ​ដែល​និយាយ​ចចាម​អារ៉ាម​អំពី​អនាគត​របស់​តុលាការ​នេះ​។ មាន​បញ្ជា​មួយ​ឲ្យ​ចាប់​ផ្តើម​ការ​កាត់​ក្តី​លើក​ទី​ពីរ​ភ្លាមៗ​តាម​ដែល​អាច ធ្វើ​ទៅ​បាន ហើយ​ខ្ញុំ គិត​ថា នោះ​ជា​អ្វី​ដែល​នៅ​លើ​តុ​នៅ​ពេល​បច្ចុប្បន្ន»។

លោក​បាន​បន្ត​ទៀត​ថា ដំណើរការ​ថវិកា ដាច់​ដោយ​ឡែក​ចំពោះ​ការ​ចាប់​ផ្តើម​ការ​ជំនុំ​ជម្រះ​លើ​រឿង​នេះ។

លោក​បាន​មាន​ប្រសាសន៍​ថា៖ «ទោះ​បី​ជា​យើង​បាន​នឹង​កំពុង​ប្រឈម​នឹង​វិបត្តិ​ហិរញ្ញវត្ថុ​សម្រាប់​តុលាការ​មួយ​ផ្នែក​ធំ ក៏​យើង​ទទួល​បាន​រហូត​មក​ដល់ នឹង​ពេល​នេះ គឺ​ការ​គាំទ្រ​ចាំ​បាច់​ពី​ម្ចាស់​ជំនួយ ហើយ​យើង សង្ឃឹម​ថា ម្ចាស់​ជំនួយ នឹង​ផ្តល់​ជំនួយ​ដែល​ចាំ​បាច់​ដើម្បី​បញ្ចប់​អាណត្តិ​តុលាការ​ខ្មែរ​ក្រហម​នៅ​កម្ពុជា​នេះ​មិន​ខាន»៕ NR

អត្ថបទគួរចាប់អារម្មណ៍