The Phnom Penh Post Search

Search form




Logo of Phnom Penh Post newspaper Phnom Penh Post - អ្នក​នេសាទ​វៀតណាម ១ ក្រុម​វ៉ៃ​អ្នក​នេសាទ​ខ្មែរ​ម្នាក់​ស្លាប់

អ្នក​នេសាទ​វៀតណាម ១ ក្រុម​វ៉ៃ​អ្នក​នេសាទ​ខ្មែរ​ម្នាក់​ស្លាប់

Content image - Phnom Penh Post
ពលរដ្ឋ​មក​គោរព​សព​អ្នក​នេសាទ​ខ្មែរ នៅ​វិហារ​ឥស្លាម​មួយ​នៅ​ខេត្ត​កំពត ដែល​បុរស​នេសាទ​ម្នាក់​នោះត្រូវ​អ្នក​នេសាទ​វៀតណាម​វាយ​សម្លាប់។ រូបថត សហការី

អ្នក​នេសាទ​វៀតណាម ១ ក្រុម​វ៉ៃ​អ្នក​នេសាទ​ខ្មែរ​ម្នាក់​ស្លាប់

កំពតៈ អ្នក​នេសាទ​ខ្មែរ​អ៊ិស្លាម​ម្នាក់​ត្រូវ​បាន​ចាប់​ខ្លួន និង​វាយ​ដល់​ស្លាប់​ដោយ​ក្រុម​អ្នក​នេសាទ​វៀតណាម​មួយ​ក្រុម​នៅ​ផ្ទៃ​សមុទ្រ​ក្នុង​​ក្រុង​កំពត ខេត្ត​កំពត​កាលពី​យប់​ថ្ងៃ​អាទិត្យ​ហើយ​អាជ្ញាធរ​កំពុង​ស្វែងរក​ទូក​វៀតណាម​ដើម្បី​រក​យុតិ្តធម៌​ជូន​ជនរងគ្រោះ។

លោក នូស យូក អាយុ​ ៤៣ ឆ្នាំ​ជា​ម្ចាស់​ទូក​ដែល​ជំនួយការ​របស់​លោក​ត្រូវ​គេ​វាយ​ដល់​ស្លាប់​នោះ​បាន​ថ្លែង​កាលពី​ម្សិលមិញ​ថា​លោក និង​អ្នក​នេសាទ​ដទៃ​ទៀត​បាន​ចាកចេញ​ពី​ផ្ទះ​ទៅ​សមុទ្រ​តាំងពី​ម៉ោង ៤ រសៀល​ហើយ​ម៉ោង​ជិត ៨ យប់​មាន​ទូក​នេសាទ​ធំៗ​ជាច្រើន​របស់​វៀតណាម​មក​បុក​ទូក​លោក​បណ្ដាល​ឲ្យ​ជំនួយ​ការ​របស់​លោក​ធ្លាក់​ចូល​ក្នុង​ទឹក​សមុទ្រ។

លោក នូស យូក បាន​បន្ត​ថា៖ «​ទូក​វៀតណាម​បុក​ទូក​ខ្ញុំ​នៅ​ម៉ោង ៧ និង ៥០ នាទី​យប់​ហើយ​បន្ទាប់​មក​ជំនួយការ​ខ្ញុំ​បាន​ធ្លាក់​ចូល​ទឹក​សមុទ្រ​។ ខ្ញុំ​មិន​អាច​ជួយ​គាត់​បាន​ទេ​ព្រោះ​ទូក​វៀតណាម​ធំ ២ ទៀត​បាន​តាម​ទូក​ខ្ញុំ​ដើម្បី​បុក​ទៀត ប៉ុន្តែ​ខ្ញុំ​បាន​ព្យាយាម​រត់​គេ​ពី​ពួកគេ​ហើយ​ស្រែក​ហៅ​រក​ជំនួយ​ពី​ក្រុម​អ្នក​នេសាទ​ខ្មែរ​យើង​»​។

លោក​បាន​បន្ត​ថា​អ្នក​នេសាទ​វៀតណាម​បាន​ចាប់​ជនរងគ្រោះ​ដែល​ធ្លាក់​ក្នុង​សមុទ្រ​នោះ​យក​ទៅ​ទូក​ពួកគេ​ហើយ​វាយ​រហូត​ដល់​ស្លាប់​បន្ទាប់មក​គេ​បោះ​សាកសព​ចូល​ក្នុង​ទឹកសមុទ្រ។

លោក​ថា​អ្នក​នេសាទ​វៀតណាម​នោះ​បាន​ឆ្លងដែន​មក​នេសាទ​ក្នុង​សមុទ្រ​កម្ពុជា​រាល់​យប់​ហើយ​នាំគ្នា​នេសាទ​ខុស​ច្បាប់​ដែល​ក្នុង​ទូក​ពួកគេ​ប្រើ​ឧបករណ៍​ខុស​ច្បាប់។

លោក នូស យូក ប្រាប់​ថា​ពួក​អ្នក​នេសាទ​នឹង​ផ្អាក​ទៅ​នេសាទ​នៅ​ប៉ុន្មាន​ថ្ងៃ​សិន​រហូត​ទាល់តែ​គេ​គិត​ថា​មាន​សុវត្ថិភាព។

លោក សែ មឿក មេភូមិ​ដូនត្នោត​បាន​ថ្លែង​កាលពី​ម្សិលមិញ​ថា​អាជ្ញាធរ​នឹង​ស្វែងរក​ទូក​វៀតណាម​ដែល​បុក​ហើយ​វាយ​ជនរងគ្រោះ​ស្លាប់​នោះ។

លោក​បន្ត​ថា៖ «​យើង​បាន​ស្នើ​ឲ្យ​អ្នក​នេសាទ​ផ្អាក​ទៅ​នេសាទ​មួយ​រយៈ​រហូត​ទាល់​តែ​គ្រប់​យ៉ាង​មាន​សុវត្ថិភាព​ព្រោះ​យើង​ខ្លាច​វៀតណាម​ធ្វើ​អាក្រក់​មក​លើ​ប្រជាជន​យើង​ម្តង​ទៀត​»។

លោក ស សារិន ប្រធាន​មន្ទីរ​ជលផល​ខេត្ត​កំពត​មិន​អាច​ទាក់ទង​សុំ​ការ​អត្ថាធិប្បាយ​បាន​ទេ​កាលពី​ម្សិលមិញ​។

លោក ខូយ ឃុនហួរ អភិបាល​ខេត្ត​កំពត​បាន​ថ្លែង​ពី​ម្សិលមិញ​ថា វា​មិន​គួរ​និយាយ​ថា​វៀតណាម​ចាប់​ខ្លួន និង​វាយ​អ្នក​នេសាទ​ខ្មែរ​ស្លាប់​ទេ​ព្រោះ​វា​គឺជា​ឧប្បត្តិហេតុ​។

លោក​បាន​បញ្ជាក់​ថា៖ «​ខ្ញុំ​សោកស្តាយ​ក្នុង​ការ​ឃើញ​ឧប្បតិ្តហេតុ​កើតឡើង​ហើយ​វា​មិន​ត្រឹមត្រូវ​ទេ​ក្នុង​ការ​និយាយ​ថា​ជនរងគ្រោះ​ត្រូវ​បាន​សម្លាប់ ព្រោះ​វា​ជា​ឧប្បតិ្តហេតុ​កើតឡើង​ដោយសារ​ទូក​បុក​គ្នា​។ យើង​ត្រូវ​ស៊ើបអង្កេត​លើ​ហេតុការណ៍​នេះ​ឲ្យ​ច្បាស់លាស់»។

បើ​តាម​ម្ចាស់​ទូក​ជនរងគ្រោះ​នោះ​ឈ្មោះ ឌុល ណៃយប់ អាយុ​ ៤២ ឆ្នាំ​ហើយ​ក្រោយ​ស្រង់​ពី​ទឹក​សព​ត្រូវ​បាន​កប់​នៅ​ភូមិ​ក្បែរ​នោះ​កាលពី​ម្សិលមិញ៕

អត្ថបទគួរចាប់អារម្មណ៍